“Leksiyon 209—Pagtuon sa mga Mensahe sa mga Sulugoon sa Ginoo: Atong Madungog ang Tingog sa Manluluwas pinaagi sa mga Pulong sa Iyang mga Lider,” Manwal sa Magtutudlo sa Seminary sa Doktrina ug mga Pakigsaad (2025)
“Pagtuon sa mga Mensahe sa mga Sulugoon sa Ginoo,” Manwal sa Magtutudlo sa Seminary sa Doktrina ug mga Pakigsaad
Leksiyon 209: Mga Pagtulun-an sa mga Lider sa Simbahan
Pagtuon sa mga Mensahe sa mga Sulugoon sa Ginoo
Atong Madungog ang Tingog sa Manluluwas pinaagi sa mga Pulong sa Iyang mga Lider
Kini usa ka pasiuna nga leksiyon para sa mga serye sa mga leksiyon nga itudlo sa tibuok tuig gamit ang usa ka mensahe sa usa ka lider sa Simbahan. Kini nga mga leksiyon maggamit sa template nga “Mga Pagtulun-an sa mga Lider sa Simbahan.” Kini nga leksiyon makatabang sa mga estudyante nga mabati ang kaimportante sa pagtuon ug paggamit sa mga mensahe sa Ginoo nga gihatag sa Iyang mga sulugoon.
Pagpangandam sa estudyante: Dapita ang mga estudyante sa pagtambong nga andam nga mopakigbahin og usa ka pamahayag gikan sa usa ka lider sa Simbahan nga makahuloganon para nila ug ipasabot kon ngano. Kini nga pamahayag pwedeng gikan sa usa ka pakigpulong sa kinatibuk-ang komperensiya, mensahe sa sibya, post sa social media, o sama niini.
Posibleng mga Kalihokan sa Pagkat-on
Ang mga sulugoon sa Manluluwas mopakigbahin og mga mensahe nga gikan Kaniya
Ipakita ang kasamtangang litrato sa Unang Kapangulohan ug Kurom sa Napulog Duha ka Apostoles. Dapita ang mga estudyante nga maghisgot og usa ka butang nga bag-ohay lang gitudlo niini nga mga lider. Dapita ang mga estudyante nga ilista ang pipila sa mga kahimtang nga gigamit sa mga lider sa Simbahan sa pagpakigbahin sa mensahe sa Ginoo nganhi kanato. Dayon dapita ang mga estudyante nga tubagon ang mosunod nga mga pangutana diha sa klase o sa ilang mga journal sa pagtuon:
-
Kon naay usa ka tawo nga maniid sa inyong kinabuhi, unsay ilang makita nga nagpaila kon unsa ka importante para nimo ang mga pulong sa mga sulugoon sa Ginoo?
Basaha ang Doktrina ug mga Pakigsaad 1:37–38, nga pangitaon kon unsay gisugo sa Manluluwas nga atong himoon sa mga pulong sa Iyang mga sulugoon.
-
Unsa sa imong hunahuna ang importanteng hinumdoman gikan niini nga tudling?
-
Unsa nga mga kamatuoran ang imong mailhan?
Ang mga estudyante mahimong makaila og usa ka kamatuoran nga sama sa mosunod: Ang Ginoo misugo kanato sa pagsiksik sa mga pulong nga Iyang gisulti kanato pinaagi sa Iyang mga sulugoon (Doktrina ug mga Pakigsaad 1:37–38).
-
Sa unsang paagi nimo gisulayan pagpangita ang mga pulong sa mga sulugoon sa Ginoo isip kabahin sa imong regular nga pagtuon sa ebanghelyo?
Sa kataposan sa Abril 2018 nga kinatibuk-ang komperensiya, gisulti ni Presidente Russell M. Nelson ang mosunod nga pagdapit. Pangitaa ang mga pulong o hugpong sa mga pulong nga makatabang sa usa ka tawo nga masabtan ang kaimportante sa pagtuon sa mga mensahe sa mga lider sa Simbahan.
Awhagon ko kamo sa pagtuon kanunay sa mga mensahe niining komperensiya—gani balik-balikon—sulod sa mosunod nga unom ka bulan. Magmakugihon sa pagpangita og mga paagi sa paglakip niining mga mensahe sa inyong mga family home evening, sa inyong pagtudlo sa ebanghelyo, sa inyong mga panag-istorya sa pamilya ug sa mga higala, ug gani sa inyong mga diskusyon niadtong lahi nato og tinuohan. Daghan ang maayong tawo nga mouyon sa mga kamatuoran nga gitudlo niining komperensiya kon gidalit diha sa gugma. Ug ang inyong tinguha sa pagsunod mapalambo samtang kamo maghinumdom ug mamalandong kon unsa ang inyong gibati sa milabayng duha ka adlaw. (Russell M. Nelson, “Magpadayon Tang Tanan,” Liahona, Mayo 2018, 118)
-
Unsay imong nadiskobrehan?
Dapita ang mga estudyante nga susihon ang kaugalingon nilang mga paningkamot karon sa pagtuon sa mga mensahe gikan sa mga lider sa Simbahan. Pwede nilang hunahunaon kon unsa ka sagad nilang tun-an o paminawon ang mga mensahe gikan sa mga lider sa Simbahan ug kon unsaon tingali pagtuon sa ilang pamilya ang maong mga mensahe. Pwedeng pamalandongan sa mga estudyante kon gusto nilang mas hatagan og gibug-aton ang mga mensahe sa kinatibuk-ang komperensiya isip kabahin sa ilang pagtuon sa ebanghelyo.
-
Unsa ang pipila ka paagi nga imong malakip ang mga pagtulun-an sa mga lider sa Simbahan diha sa imong pagtuon sa ebanghelyo?
-
Giunsa ka pagpanalangin sa Ginoo tungod sa imong paghimo ini?
Palawmi ang imong pagsabot
Ang sunod nga bahin sa leksiyon gituyo aron hatagan og higayon ang mga estudyante nga magpraktis sa pagtuon sa mga mensahe sa usa ka lider sa Simbahan gamit ang mga ideya gikan sa template nga “Mga Pagtulun-an sa mga Lider sa Simbahan.” Kini mahimong moandam sa mga estudyante sa pagtuon sa mga mensahe sa mga lider sa Simbahan sa umaabot nga mga leksiyon.
Ang mosunod nga mga ideya gipahaom gikan sa “Tun-i ang mensahe” ug “Palawmi ang pagsabot” nga mga seksiyon sa template. Pwede kang mopili og laing mga ideya gikan sa template o maghatag og susamang mga opsyon nga imong gihimo.
Pagpili og usa sa mosunod aron matabangan kang magpraktis sa pagtuon sa usa ka mensahe gikan sa usa sa mga sulugoon sa Ginoo:
-
Isulat ang pulong nga Jesukristo sa tunga-tunga sa pahina sa imong journal sa pagtuon. Samtang imong tun-an ang pakigpulong, pangitaa ang mga pulong o hugpong sa mga pulong nga nagtudlo bahin sa kinaiya, mga hiyas, ug mga papel ni Jesukristo. Isulat ang imong nakat-onan ug gibati bahin kang Jesukristo diha sa imong journal ug kon sa unsang paagi kini makatabang nimo sa pagsunod Kaniya.
-
Ilha ang mga kasulatan nga gikutlo diha sa pakigpulong (o sa mga endnote). Basaha ang mga bersikulo ug timan-i kon unsay ilang gitudlo o nakatabang nimo aron masabtan ang mahitungod sa hilisgotan. Pwede kang maghimo og link tali sa bersikulo ug sa pakigpulong diha sa imong Librarya sa Ebanghelyo o maghimo og mubo nga sulat diha sa imong mga kasulatan.
-
Gamit ang imong nakat-onan sa pakigpulong, paghimo og litrato, drowing, poster, meme, post sa social media, o susama niini nga magsilbing usa ka pahinumdom o inspirasyon sa usa ka tawo. Pangandam sa pagpakigbahin sa unsay imong gihimo, nga ipasabot ang mensahe ug kon sa unsang paagi kini makapanalangin o makapadasig sa uban.
Aron tabangan ang mga estudyante nga magpraktis sa pagtuon sa usa ka mensahe gikan sa mga lider sa Simbahan, paghatag og tipik o kompletong pakigpulong gikan sa kinatibuk-ang komperensiya, usa ka artikulo sa Liahona o Alang sa Kalig-on sa mga Kabatan-onan nga mga magasin, o mga debosyonal ug mga sibya sa Simbahan. Hatagig igong panahon ang mga estudyante sa pagtuon gamit ang ideya nga ilang gipili sa ibabaw.
Pwede kang maglakaw-lakaw sa klasrom ug tabangan ug dasigon ang mga estudyante samtang nagpraktis sila. Human sa kalihokan, pwede nimong bahin-bahinon sa gagmayng grupo ang mga estudyante aron ipakigbahin ang ideya nga ilang gipili, ang kahanas nga ilang gipraktisan, ug ang ilang mga nahunahuna ug mga gibati samtang nagtuon sila.
Kon naa pay panahon, pwede nimong dapiton ang mga estudyante nga magpraktis og laing kahanas gikan sa template gamit ang parehas ra nga mensahe o pakigpulong.
Ang kaimportante sa pagtuon sa mga pulong sa mga sulugoon sa Ginoo
Dapita ang mga estudyante sa pagpili og usa sa mosunod nga mga pangutana nga hisgotan o tubagon diha sa ilang mga journal sa pagtuon:
-
Unsay imong nakat-onan o gibati karon nga nakatabang nimo nga mabati ang kaimportante sa mga pulong sa Manluluwas nga gihatag sa Iyang mga sulugoon?
-
Unsay gusto nimong mahinumdoman samtang nagpadayon sa pagtuon sa mga mensahe sa mga sulugon sa Ginoo?
-
Sa unsang paagi ka makabenepisyo gikan sa pagtuon sa mga mensahe gikan sa mga lider sa Simbahan isip kabahin sa imong regular nga pagtuon sa ebanghelyo?
Ikonsiderar ang pagdapit sa mga estudyante nga planohon kon unsaon nila pagtuon ang mga mensahe sa mga sulugon sa Ginoo isip kabahin sa ilang regular nga pagtuon sa ebanghelyo. Pwede nimong ipakigbahin ang imong kasinatian sa pagkadungog sa tingog sa Ginoo samtang nagtuon ka sa mga mensahe sa Iyang mga lider.