Leksiyon 208: Mga Pagtulun-an sa mga Lider sa Simbahan

Pagpangandam alang sa Kinatibuk-ang Komperensiya

Pagpaminaw sa mga Pulong sa Manluluwas pinaagi sa Kinatibuk-ang Komperensiya

Ang tinuyo nga pagpangandam ug pag-apil sa kinatibuk-ang komperensiya makapahimo kanato nga makadawat og personal nga pagpadayag. Ang mga mensahe sa inspirasyon ug giya nga gihatag sa kinatibuk-ang komperensiya nagagikan sa Ginoo pinaagi sa Iyang pinili nga mga lider. Kini nga leksiyon makatabang sa mga estudyante nga maandam sa pagpaminaw og personal nga mga mensahe gikan sa Manluluwas sa kinatibuk-ang komperensiya.

Posibleng mga Kalihokan sa Pagkat-on

Pagpangandam alang sa mga kalihokan

Dapita ang mga estudyante nga hunahunaon ang mga kalihokan nga ganahan nilang apilan, sama sa espesyal nga holiday, dula sa esport, bakasyon, o laing kalihokan. Hangyoa sila sa pagpakigbahin kon giunsa nila pag-apil o pagpangandam sa pag-apil niini nga mga kalihokan. Hisgoti kon sa unsang paagi ang atong pagpangandam alang sa mga kalihokan makatabang kanato nga makabaton og mas makahuloganon nga kasinatian atol sa kalihokan. Human sa paghisgot, ikonsiderar ang pagpakita og hulagway sa usa ka pamilya nga nagtan-aw sa kinatibuk-ang komperensiya.

• Unsa ang imong gibuhat o ang gibuhat sa imong pamilya sa pagpangandam ug sa pag-apil sa kinatibuk-ang komperensiya?

Ang katuyoan sa kinatibuk-ang komperensiya

Niadtong Pebrero 1831, ang Ginoo mihatag og pagpadayag ngadto ni Joseph Smith ug Sidney Rigdon nga nagsugo kanila sa pagpundok sa mga elder alang sa usa ka komperensiya, nga gihimo niadtong Hunyo nianang tuiga.

Basaha ang Doktrina ug mga Pakigsaad 44:2 nga mangita sa unsay gisaad sa Ginoo nga buhaton niini nga komperensiya.

• Sa unsang paagi nga ang saad sa Ginoo niini nga bersikulo makatabang kanimo nga makasabot kon nganong aduna kitay kinatibuk-ang komperensiya?

Basaha ang mosunod nga pamahayag gikan ni Presidente Russell M. Nelson, nga mangita sa katuyoan sa kinatibuk-ang komperensiya.

Ang katuyoan niini ug sa matag kinatibuk-ang komperensiya mao ang pagtabang kanato nga maminaw Kaniya. (Russell M. Nelson, “Pangbukas nga Mensahe,” Liahona, Mayo 2020, 7)

Mahimong isulat o i-link sa mga estudyante ang pamahayag ni Presidente Nelson sa ilang mga kasulatan tapad sa Doktrina ug mga Pakigsaad 44:2.

Ipasabot og maayo ang kamatuoran nga ang katuyoan sa kinatibuk-ang komperensiya mao ang pagtabang kanato nga maminaw ni Jesukristo.

• Nganong importante ang pagkahibalo sa unsay isulti ni Jesukristo nganha kanimo?

• Unsa ang pipila ka mga paagi nga makadungog ka sa Manluluwas sa kinatibuk-ang komperensiya?

Aron matabangan ang mga estudyante sa pagpamalandong sa ilang pagpangandam alang sa kinatibuk-ang komperensiya, ikonsiderar ang pagpakita sa mosunod nga mga pangutana sa pagsukod sa kaugalingon diha sa pisara. Mahimong pamalandongan sa mga estudyante ang mga pangutana ug isulat ang ilang mga tubag diha sa journal sa pagtuon.

• Unsa ka maayo ang imong pagpangandam sa pagpaminaw sa Manluluwas nga mamulong kanimo pinaagi sa mga mensahe sa kinatibuk-ang komperensiya?

• Unsa ang imong gikinahanglan o gilaoman nga madawat gikan sa kinatibuk-ang komperensiya?

Pagpangandam alang sa kinatibuk-ang komperensiya

Ang katuyoan sa handout mao ang pagtabang sa mga estudyante nga makadiskobre sa nagkalainlaing mga paagi nga sila makapangandam alang sa kinatibuk-ang komperensiya. Mahimong magtinabangay ang mga estudyante diha sa gagmay nga mga grupo, kauban ang usa ka pares, o mag-tinagsa.

Pagpangandam alang sa Kinatibuk-ang Komperensiya

Sa dihang si Jesukristo mibisita sa mga Nephita, Siya midapit kanila sa pag-andam sa ilang mga hunahuna sa pagpaminaw ug pagsabot sa Iyang mensahe (tan-awa sa 3 Nephi 17:3). Handurawa kon unsa kaha ang imong kasinatian sa kinatibuk-ang komperensiya kon imo usab kining buhaton.

1. Tun-i ang mosunod nga mga kapanguhaan, mangita og mga paagi nga maandam nimo ang imong kaugalingon sa pagdawat sa mga mensahe sa Ginoo diha sa kinatibuk-ang komperensiya. Mahimo nimong markahan ang makahuloganon nga mga pulong ug mga hugpong sa mga pulong nga mipatigbabaw diha kanimo.

   Mosiah 2:9; Doktrina ug mga Pakigsaad 88:63

   Si Presidente Russell M. Nelson mitudlo:

   

   Gikan sa pulpito karon ug ugma, kamo padayon nga makadungog og kamatuoran. Palihog timan-i ang mga ideya nga makakuha sa inyong pagtagad ug kadtong mosantop sa inyong hunahuna ug magpabilin sa inyong kasingkasing. Mainampoon nga mohangyo sa Ginoo sa pagkompirmar nga unsay inyong nadungog mao ang tinuod. (Russell M. Nelson, “Unsa Ang Tinuod?,” Liahona, Nob. 2022, 30)

   Si Presidente Henry B. Eyring sa Unang Kapangulohan mitudlo:

   

   Nakaila ko sa mga sulugoon sa Dios kinsa mamulong kaninyo niining komperensiya. Gitawag sila sa Dios sa paghatag sa mga mensahe ngadto sa Iyang mga anak. Ang Ginoo naghisgot kabahin nila: “Unsa nga Ako ang Ginoo namulong, Ako namulong, ug Ako dili mangayo og pasaylo alang sa akong kaugalingon; ug bisan pa ang mga langit ug ang yuta mahanaw, ang akong mga pulong dili mahanaw, apan ang tanan matuman, bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” [Doktrina ug mga Pakigsaad 1:38].

   Kamo nagpakita sa inyong pagsalig Kaniya kon kamo maminaw uban sa tinguha sa pagkat-on ug paghinulsol ug dayon moadto ug mobuhat sa bisan unsay Iyang gihangyo. Kon kamo igo nga mosalig sa Dios sa pagpaminaw sa Iyang mensahe sa matag pagpamulong, awit, ug pag-ampo dinhi niini nga komperensiya, makaplagan ninyo kini. Ug kon kamo dayon moadto ug mobuhat sa unsay gusto Niyang ipabuhat kaninyo, ang inyong gahom sa pagsalig Kaniya motubo, ug moabot ang panahon nga kamo mapuno sa pagpasalamat nga masayod nga Siya misalig kaninyo. (Henry B. Eyring, “Salig sa Dios, Dayon Lakaw ug Buhata,” Liahona, Nob. 2010, 73)

   Si Presidente Dieter F. Uchtdorf, kanhi sa Unang Kapangulohan, mitudlo:

   

   Samtang nangandam kamo alang sa kinatibuk-ang komperensiya, dapiton ko kamo sa pagpamalandong sa mga pangutana nga gusto ninyong matubag. Pananglitan, tingali nangandoy kamo alang sa direksiyon ug giya sa Ginoo kalabot sa mga hagit nga inyong giatubang.

   Ang mga tubag sa inyong piho nga mga pag-ampo mahimong direktang moabut gikan sa usa ka partikular nga pakigpulong o gikan sa piho nga hugpong sa mga pulong. Sa laing mga higayon ang mga tubag mahimong moabut gikan sa mora og walay kalabutan nga pulong, hugpong sa mga pulong, o awit. Ang kasingkasing nga napuno sa pasalamat alang sa mga panalangin sa kinabuhi ug ang dakong tinguha sa pagpaminaw ug pagsunod sa mga pulong sa tambag moandam og agianan alang sa personal nga pagpadayag. (Dieter F. Uchtdorf, “Kinatibuk-ang Komperensiya—Dili Ordinaryo nga Panalangin,” Liahona, Sept. 2011, 4)

2. Gikan sa imong gitun-an, paghimo og lista sa mga paagi nga makaandam ka sa pagpaminaw sa tingog sa Ginoo diha sa kinatibuk-ang komperensiya.

3. Paglista og uban pang mga paagi nga makapangandam ka sa pagpaminaw sa tingog sa Ginoo diha sa kinatibuk-ang komperensiya.

Ang akong pagpangandam alang sa kinatibuk-ang komperensiya

Ang mosunod nga mga pangutana makatabang sa mga estudyante nga magamit ang tambag gikan sa pamahayag ni Elder Uchtdorf diha sa handout. Mahimong motubag ang mga estudyante sa mga pangutana diha sa ilang journal sa pagtuon o sa usa ka gamay nga piraso sa papel o note card nga ilang madala sa balay isip pahinumdom.

• Unsa ang akong mga pangutana? Unsa nga giya o direksiyon ang akong gikinahanglan alang sa mga hagit nga akong giatubang?

• Unsa ang piho nga butang nga akong buhaton aron makaandam sa pagpaminaw sa direksiyon sa Ginoo alang kanako sa kinatibuk-ang komperensiya? (Pagpili og usa o duha ka paagi nga imong gilista sa imong handout.)

Tabangi ang mga estudyante sa pagreport sa ilang kasinatian sa kinatibuk-ang komperensiya

Human sa kinatibuk-ang komperensiya, ikonsiderar ang paghangyo sa mga estudyante sa pagpakigbahin kon sa unsang paagi ang ilang pagpangandam alang sa kinatibuk-ang komperensiya nakaapekto sa ilang kasinatian. Ang ubang mga estudyante tingali wala makaapil sa komperensiya. Mahimo kang mohatag og panahon alang niini nga mga estudyante sa pagrebyo sa mga pagpamubo sa mga pakigpulong.

• Unsay imong gibuhat sa pagpangandam? Sa unsang mga paagi kini makatabang?

• Sa unsang paagi ang imong pagpangandam nakatabang kanimo nga mapaminaw ang tingog sa Manluluwas ug makadawat og direksiyon gikan Kaniya?

Mahimo usab nga ipakigbahin sa mga estudyante ang ilang mga pagbati o pagpamatuod mahitungod sa unsay ilang gibati o nadungog atol sa kinatibuk-ang komperensiya.

Dugang nga mga Kapanguhaan

Unsa ang gitutokan sa mga mensahe sa kinatibuk-ang komperensiya?

Si Presidente Russell M. Nelson mitudlo:

Ang Kinatibuk-ang mga Awtoridad ug Kinatibuk-ang Opesyales sa Simbahan nga mamulong magtutok sa ilang mga mensahe sa atong Manluluwas, si Jesukristo, sa Iyang kaluoy, ug sa Iyang walay kinutoban nga matubsanong gahom. Wala pa gayoy panahon sa kasaysayan sa kalibotan nga ang kahibalo bahin sa atong Manluluwas adunay mas personal nga kaimportante ug may kalabotan ngadto sa matag kalag sa tawo. Hunahunaa unsa kadali sa makapahugno nga mga kaguliyang sa tibuok kalibotan—ug niadtong anaa sa atong kaugalingon nga mga kinabuhi—masulbad kon kitang tanan mopili sa pagsunod ni Jesukristo ug magtuman sa Iyang mga panudlo. (Russell M. Nelson, “Putli nga Kamatuoran, Putli nga Doktrina, ug Putli nga Pagpadayag,” Liahona, Nob. 2021, 6)

Unsa ang usa ka paagi sa pagsulat og mubo nga mga sulat atol sa kinatibuk-ang komperensiya?

Si Elder Robert D. Hales (1932–2017) sa Korum sa Napulog Duha ka Apostoles mitudlo:

Kon magsulat ko atol sa komperensiya, dili nako masulat ang eksakto gayod nga gisulti sa namulong; akong masulat ang gipersonal nga direksiyon nga gihatag kanako sa Espiritu.

Ang gisulti dili ingon ka importante sa unsay atong nadungog ug gibati. (Robert D. Hales, “Kinatibuk-ang Komperensiya: Paglig-on sa Pagtuo ug Pagpamatuod,” Liahona, Nob. 2013, 6)

Ngano nga kinahanglan ko nga moapil sa kinatibuk-ang komperensiya?

Si Elder Neil L. Andersen sa Korum sa Napulog Duha ka Apostoles mitudlo:

Mosaksi ako ninyo nga si Jesus mao ang Kristo, nga naggiya Siya sa kalihokan niining sagrado nga buhat, ug nga ang kinatibuk-ang komperensiya mao ang usa sa pinakaimportante nga panahon nga Siya mohatag og direksiyon sa Iyang Simbahan ug ngari nato sa personal nga paagi. …

Ang mga mensahe sa kinatibuk-ang komperensiya mao ang gusto sa Ginoo nga atong pamalandungon karon ug sa umaabot nga mga bulan. (Neil L. Andersen, “Ang Tingog sa Ginoo,” Liahona, Nob. 2017, 122, 124)

Dugang nga mga Kalihokan sa Pagkat-on

Alternatibo nga pagsugod

Isip alternatibong paagi sa pagsugod sa leksiyon, ikonsiderar ang pagpangutana kon nganong importante nga kanunay nga i-update ang operating system sa mobile phone. Sa unsang paagi kana may kalabotan sa pagpili sa pag-apil sa mga kinatibuk-ang komperensiya?

Mga social media account sa mga lider sa Simbahan

Sa mga adlaw ug mga semana sa wala pa ang kinatibuk-ang komperensiya, ang mga lider sa Simbahan kasagarang mag-post bahin sa kinatibuk-ang komperensiya diha sa ilang mga social media account. Dapita ang mga estudyante sa pagtan-aw sa pipila ka mga post sa social media sa mga lider sa Simbahan nga gi-post sulod sa pipila ka semana sa miaging kinatibuk-ang komperensiya. Ikonsiderar ang pagpakita sa ka ehemplo. Dapita ang mga estudyante sa pagpangita og bisan unsang tambag nga makatabang kanila sa pagpangandam sa pag-apil sa kinatibuk-ang komperensiya. Mahimo nimong hisgotan ang bisan unsang mga panalangin nga gisaad sa mga lider sa Simbahan.

Ang pagdapit ni Elder Neil L. Andersen sa pagpangandam alang sa kinatibuk-ang komperensiya

Sa wala pa ang Oktubre 2020 nga kinatibuk-ang komperensiya, si Elder Neil L. Andersen nag-post og bidyo sa Facebook. Sa bidyo, mihatag siya og tulo ka mga sugyot kon unsaon pagpangandam alang sa kinatibuk-ang komperensiya. Ikonsiderar ang pagtan-aw sa tibuok bidyo, “Pagdapit sa Pagpangandam alang sa Kinatibuk-ang Komperensiya” (Facebook, Sept. 30, 2020, facebook.com/neill.andersen; bidyo, 3:01), o ang iyaha lamang tulo ka sugyot (gikan sa time code nga 1:27 hangtod sa 2:51). Dapita ang mga estudyante sa pagkonsiderar kon sa unsang paagi nga ang iyang mga sugyot makatabang kanila sa pagpangandam sa pagpaminaw sa tingog sa Ginoo.

Tun-i ang Alang sa Kalig-on sa mga Kabatan-onan nga Magasin

Ang Marso ug Septiyembre nga mga edisyon sa Alang sa Kalig-on sa mga Kabatan-onan nga mga magasin kasagaran adunay sulod nga “ Notebook sa Kinatibuk-ang Komperensiya” nga mahimong i-download, iprinta, ug gamiton samtang miapil sa kinatibuk-ang komperensiya. Pagdala og pipila ka mga kopya sa bag-ohay lang nga mga edisyon sa “Notebook sa Kinatibuk-ang Komperensiya” aron tan-awon sa mga estudyante, o dasiga ang mga estudyante sa pagtan-aw niini diha sa Librarya sa Ebanghelyo nga app. Ikonsiderar ang paghangyo sa mga estudyante sa pagpakigbahin sa pipila ka mga ideya nga ilang nadiskobrehan gikan sa “Notebook sa Kinatibuk-ang Komperensiya” nga makatabang kanila sa pagpangandam alang sa kinatibuk-ang komperensiya.

Giunsa pagpangandam sa mga mamumulong alang sa kinatibuk-ang komperensiya

Ikonsiderar ang pagpasalida sa bidyo nga “Ang Tingog sa Ginoo” gikan sa time code nga 3:07 hangtod 5:17. Si Elder Neil L. Andersen naghisgot sa paningkamot nga gihimo sa mga mamumulong sa pag-andam og pakigpulong alang sa kinatibuk-ang komperensiya. Dapita ang mga estudyante nga hisgotan kon unsay atong makat-onan pinaagi sa pagkahibalo kon unsaon pagpangandam sa mga mamumulong. Ang mosunod nga mga pangutana makatabang tingali sa panaghisgot.

• Sa unsang paagi nga ang pagkahibalo bahin sa paningkamot nga gihimo sa mga mamumulong sa pagpangandam makapadasig kanimo nga mahimong mas andam?

Kalihokan sa pagrebyo sa kinatibuk-ang komperensiya

Ikonsiderar ang paghatag sa mga estudyante og kahigayonan sa pagrebyo sa unsay ilang nakat-onan sa kinatibuk-ang komperensiya. Mahimo kang magsulat og pipila ka mga pangutana diha sa pisara sama sa mosunod: Unsay nakapakatawa nimo? Unsa nga pakigpulong ang ganahan nimong tun-an pag-usab? Unsa ang imong nakat-onan nga makatabang kanimo diha sa imong kinabuhi? Unsa ang imong nakat-onan mahitungod sa Manluluwas?

Pwede nimong dapiton ang mga estudyante nga isulat sa pisara ang mga tubag sa bisan hain sa mga pangutana. Ikonsiderar ang pagpakigbahin og tubag gikan sa imong kasinatian sa kinatibuk-ang komperensiya. Pwedeng mopili ang mga estudyante og pipila ka tubag sa pisara ug dapiton ang ilang mga klasmeyt nga mas idetalye pa ang ilang mga kasinatian.