Leksiyon 211—Mga Pagtulun-an sa mga Lider sa Simbahan

“Mga Pagpili alang sa Kahangtoran”

Pagtuon sa mga Pagtulun-an sa mga Lider sa Simbahan

Sa tibuok tuig, daghan og kahigayonan ang mga estudyante sa seminary nga makakat-on gikan sa mga pagtulun-an sa dinasig nga mga lider sa Simbahan ni Jesukristo. Kini nga leksiyon naghatag og pananglitan kon unsaon paggamit sa mga magtutudlo ang “Template: Mga Pagtulun-an sa mga Lider sa Simbahan” nga dokumento aron giyahan ang klase samtang ilang tun-an kini nga mga mensahe. Ang pananglitan nga gigamit niini nga leksiyon mao ang “Mga Pagpili alang sa Kahangtoran” ni Presidente Russell M. Nelson ([tibuok kalibotan nga debosyonal alang sa mag young adult, Mayo 15, 2022], broadcasts.ChurchofJesusChrist.org). Kini nga leksiyon makapalawom sa pagsabot sa mga estudyante sa mga baroganan nga makatabang nila sa pagpangandam alang sa kinabuhing dayon.

Posibleng mga Kalihokan sa Pagkat-on

Timan-i: Kini nga leksiyon naghatag og pananglitan kon unsaon paggamit sa mga magtutudlo ang “Template: Mga Pagtulun-an sa mga Lider sa Simbahan” nga dokumento aron matabangan ang mga estudyante nga tun-an ang mga mensahe nga gikan sa mga lider sa Simbahan. Pwede nimong ipahiuyon ang mga ideya niini nga leksiyon, paggamit og lain-laing kombinasyon sa mga ideya gikan sa template, o paggamit og kaugalingon nimong mga ideya nga mas mahatag ang mga panginahanglan sa imong mga estudyante.

Sugdi ang leksiyon

Sugdi ang leksiyon sa paagi nga makapainteres sa mga estudyante ug makatabang nga maandam ang ilang mga hunahuna ug mga kasingkasing alang sa kasinatian nga pagkat-on. Ikonsiderar ang paggamit og usa ka pahayag o konsepto gikan sa pakigpulong ni Presidente Nelson nga “Mga Pagpili alang sa Kahangtoran.” Ang mosunod maoy usa ka pananglitan kon unsaon pagsugod ang leksiyon.

Isulat ang mosunod nga pahayag diha sa pisara ug dapita ang mga estudyante nga maghunahuna sa ilang kaugmaon niini nga kinabuhi ug sa kahangtoran:

Sa pakigpulong ngadto sa mga young adult, si Presidente Russell M. Nelson mipahayag:

Gusto kong maghisgot kaninyo mahitungod sa inyong kaugmaon. (Russell M. Nelson, “Mga Pagpili alang sa Kahangtoran,” [tibuok kalibotan nga debosyonal alang sa mga young adult, Mayo 15, 2022], broadcasts.ChurchofJesusChrist.org)

Tubaga ang mosunod nga mga pangutana diha sa imong journal sa pagtuon:

• Unsay imong gihunahuna o gibati samtang imong gipamalandongan ang imong kaugmaon niini nga kinabuhi ug sa kahangtoran?

• Kon makaistorya ka sa propeta sa Dios bahin sa imong kaugmaon, unsay imong ipangutana niya?

Ikonsiderar ang pagdapit og pipila ka estudyante nga ipakigbahin ang unsay ilang gisulat diha sa ilang mga journal sa pagtuon. Pwede usab nimong dapiton ang mga estudyante nga isulat diha sa pisara ang pipila sa ilang mga pangutana bahin sa ilang kaugmaon. Makatabang tingali kini nga mga pangutana nga makapangandan ang mga estudyante sa pagtuon sa mensahe.

Tun-i ang mensahe

Samtang magtuon ang mga estudyante, awhaga sila nga magpunting sa pagpauswag sa ilang kahibalo ug pagpalig-on sa ilang pagpamatuod sa Langitnong Amahan ug kang Jesukristo. Dapita ang mga estudyante nga irekord ang ilang mga gihunahuna ug gibati nga tingali nagagikan sa Espiritu Santo samtang nagtuon sila.

Kini nga bahin sa leksiyon maggamit sa “Pangitaa” nga ideya gikan sa “Tun-i ang Mensahe” nga seksiyon sa dokumento nga “Template: Mga Pagtulun-an sa mga Lider sa Simbahan.” Kini nga seksiyon gituyo aron tabangan ang mga estudyante nga mopunting sa ilang pagtuon sa pakigpulong.

Kon ang mga estudyante walay akses sa pakigpulong ni Presidente Nelson nga “Mga Pagpili alang sa Kahangtoran,” pwede kang maghatag og tulo ka handout, nga naay mga bahin sa iyang mga komento. Pwede nimong bahinon ang imong klase sa tulo ka grupo ug patun-a ang kada grupo og lainlaing handout. O pwede kang magprinta og kopya sa tibuok pakigpulong, ug pwedeng tun-an sa mga estudyante ang pakigpulong sa ginagmay nga grupo. Dapita ang mga estudyante sa pagsunod sa mga instruksiyon sa ubos samtang ilang kompletohon ang kalihokan.

Samtang imong tun-an ang pakigpulong ni Presidente Nelson nga “Mga Pagpili alang sa Kahangtoran,” pangitaa ang mga kamatuoran nga makatabang nimo sa pagpangandam para sa imong kaugmaon sa yuta ug sa kinabuhing dayon uban sa Langitnong Amahan ug ni Jesukristo. Pwede usab nimong pangitaon ang mga pagtulun-an nga makatubag sa imong mga pangutana bahin sa imong kaugmaon nga imong gisulat diha sa imong journal sa pagtuon o sa pisara.

Mga Pagpili alang sa Kahangtoran, Bahin 1

Ang akong katuyoan karong gabhiona mao ang pagseguro nga ang inyong mga mata bukas gayod sa kamatuoran nga kini nga kinabuhi mao gayod ang panahon nga makahimo kamo og desisyon kon unsa nga matang sa kinabuhi ang inyong gusto nga puy-an sa kahangtoran. Karon mao ang inyong panahon “sa pagpangandam sa pagsugat sa Dios” [tan-awa sa Alma 12:24; 34:32]. …

Ang matag matarong nga pagpili nga inyong himoon dinhi maghatag gayod og dakong kaayohan karon. Apan ang matarong nga mga pagpili sa mortalidad mohatag og mas dakong kaayohan gayod sa kahangtoran. Kon kamo mopili nga mohimo og mga pakigsaad uban sa Dios ug magmatinud-anon niadto nga mga pakigsaad, kamo adunay saad sa “himaya nga idugang diha sa [inyong ulo] hangtod sa kahangtoran” [Abraham 3:26]. …

Ang kaaway, siyempre, dili gusto gani nga kamo maghunahuna sa ugma, unsa pa kaha ang kinabuhing dayon. Apan palihog ayaw pagkawalay kahibalo o inosente mahitungod sa mga oportunidad ug mga hagit sa mortalidad. Niana nga diwa, kinahanglan kamo makasabot sa tulo ka sukaranan nga mga kamatuoran nga motabang kaninyo sa pagpangandam sa inyong umaabot nga padulngan: …

Una: Hibaloa ang kamatuoran mahitungod kon kinsa kamo. Nagtuo ako nga kon ang Ginoo direktang namulong kaninyo karong gabhiona, ang unang butang nga Iyang segurohon nga inyong masabtan mao ang inyong tinuod nga pagkatawo. Hinigugma kong mga higala, kamo literal nga espiritu nga mga anak sa Dios. Gikanta ninyo kini nga kamatuoran sukad inyong nakat-onan ang mga pulong sa “Ako Anak sa Dios” [Mga Himno, num. 2]. Apan kana ba nga mahangtoron nga kamatuoran napatik sa inyong kasingkasing? Kini ba nga kamatuoran nakaluwas kaninyo sa dihang nag-atubang og tintasyon?

Ako nahadlok nga tingali kanunay ninyong nadungog kini nga kamatuoran nga kini daw mas sama sa usa ka bansilag [slogan] kay sa balaanon nga kamatuoran. Ug gani, ang paagi nga kamo maghunahuna mahitungod kon kinsa gayod kamo makaapekto sa hapit matag desisyon nga inyong himoon. …

…Kinsa man kamo?

Una ug labing importante, kamo anak sa Dios.

Ikaduha, isip miyembro sa Simbahan, kamo anak sa pakigsaad. Ug ikatulo, kamo disipulo ni Jesukristo.

Karong gabhiona, mangamuyo ako kaninyo nga dili hulipan kining tulo ka importante kaayo ug dili mausab nga mga timailhan og laing uban pa, tungod kay ang pagbuhat sa ingon makapugong sa inyong pag-uswag o dili makiangayong mobutang kaninyo sa usa ka naandan [stereotype] nga mahimong mopakgang sa inyong mahangtorong pag-uswag. …

Adunay nagkadaiyang timaan nga mahimong importante kaayo kaninyo, siyempre. Palihog ayaw ko saypa sa pagsabot. Wala ako nagsulti nga ang ubang mga titulo ug mga timailhan dili mahinungdanon. Ako nag-ingon lamang nga kinahanglan walay timailhan ang motangtang, mohulip, o mag-una sa prayoridad niining tulo ka malahutayon nga mga titulo: “anak sa Dios,” “anak sa pakigsaad,” ug “disipulo ni Jesukristo.”

Ang bisan unsang timailhan nga dili mobagay niining tulo ka sukaranan nga mga titulo makapasagmuyo kaninyo sa kataposan. Ang ubang mga timaan makapasagmuyo kaninyo sa paglabay sa panahon tungod kay kini walay gahom sa paggiya kaninyo paingon sa kinabuhing dayon diha sa celestial nga gingharian sa Dios. …

Ayaw og kasayop niini: Balaanon ang inyong potensiyal. Uban sa inyong makugihon nga pagtinguha, ang Dios mohatag kaninyo og mga pasiplat kon kinsa kamo mamahimo. (Russell M. Nelson, “Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 15, 2022], broadcasts.ChurchofJesusChrist.org)

Mga Pagpili alang sa Kahangtoran, Bahin 2

Ikaduha: Hibaloa ang kamatuoran mahitungod sa unsay gitanyag kaninyo sa Dios nga Amahan ug sa Iyang Anak, si Jesukristo.

Sa laktod pa, Sila mitanyag kaninyo sa tanan!

Ang plano sa Langitnong Amahan alang sa Iyang mga anak magtugot kanato nga magpuyo kon asa ug sa unsang paagi Siya nagpuyo ug sa kataposan anam-anam nga mamahimong mas sama Kaniya. Ang Iyang Plano literal nga mohimo sa labing buhong nga mga panalangin sa tanang kahangtoran nga maanaa alang kanato, lakip sa potensiyal alang kanato nga mamahimong “isigkamanununod uban kang Kristo.” [Mga Taga-Roma 8:17].

Ang Dios nasayod sa tanan ug nakakita sa tanan. Sa tanang kahangtoran, wala nay laing mas nakaila kaninyo o nagpakabana mahitungod kaninyo kaysa Kaniya. Wala nay laing mas duol kaninyo kaysa Kaniya. Kamo makapahayag gayod sa inyong mga gibati ngadto Kaniya ug makasalig Kaniya nga mopadala sa Espiritu Santo ug sa mga anghel sa pag-atiman kaninyo. Iyang gipakita ang Iyang kinadak-an nga gugma sa dihang Iyang gipadala ang Iyang Bugtong Anak aron mamatay alang kaninyo—aron mahimong inyong Manluluwas ug inyong Manunubos!

Pinaagi sa Iyang Pag-ula, si Ginoong Jesukristo nakabuntog sa kalibotan [tan-awa sa Juan 16:33; Doktrina ug mga Pakigsaad 50:41]. Busa, Siya “gamhanan sa … paglimpyo [kaninyo] gikan sa tanan nga dili matarong” [Alma 7:14]. Siya moluwas kaninyo gikan sa inyong kinalisoran nga mga kahimtang sa Iyang kaugalingon nga paagi ug panahon. Samtang kamo moduol ngadto Kaniya sa hugot nga pagtuo, Siya mogiya, mopreserbar, ug mopanalipod kaninyo. Siya moayo sa inyong masulub-on nga kasingkasing ug mohupay kaninyo sa inyong kaugtas [tan-awa sa Lucas 4:18; Alma 7:10–12]. Siya mohatag kaninyo og pagtugot nga makagamit sa Iyang gahom. Ug Siya mohimo sa imposible sa inyong kinabuhi nga mahimong posible. …

Ang Dios adunay espesyal nga gugma alang sa matag tawo nga mohimo og pakigsaad Kaniya diha sa mga tubig sa bunyag. Ug kana nga balaanon nga gugma mapalawman samtang ang dugang pa nga mga pakigsaad gihimo ug matinud-anong gituman. Dayon sa kataposan sa mortal nga kinabuhi, bililhon ang paghiusa sa matag anak sa pakigsaad sa atong Langitnong Amahan [tan-awa sa Salmo 116:15].

Siya nagpakabana gayod og maayo nga ang tanan sa Iyang mga anak adunay kahigayonan nga makadungog sa malipayon nga mga balita sa gipahiuli nga ebanghelyo. Ang Langitnong Amahan nagpadala sa Iyang mga anak ngadto sa yuta sa sobra unom ka libo ka tuig. Kadaghanan niini nga mga tawo wala pa makadawat sa mga ordinansa nga mopasarang nila sa kinabuhing dayon. Mao kana ngano nga ang mga templo mahinungdanon kaayo. Mao kana ngano nga ang pagpundok sa Israel sa duha ka habig sa tabil mao ang labing importante nga kawsa sa yuta karon. Kamo, akong minahal nga mga kauban niini nga balaan nga buhat, adunay mahinungdanon nga tahas niini nga pagpundok, ug ako nagpasalamat kaninyo alang niini. (Russell M. Nelson, “Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 15, 2022], broadcasts.ChurchofJesusChrist.org)

Mga Pagpili alang sa Kahangtoran, Bahin 3

Hibaloa ang kamatuoran nga may kalabotan sa inyong pagkakabig. Ang kamatuoran mao nga kinahanglan inyong angkonon ang inyong kaugalingon nga pagkakabig. Walay laing makahimo niini alang kaninyo.

Karon, mahimo bang dapiton ko kamo sa pagkonsiderar og pipila ka pangutana? Gusto ba kamong mobati og kalinaw mahitungod sa mga kabalaka nga kasamtangang naghasol kaninyo? Gusto ba kamong mas makaila ni Jesukristo? Gusto ba kamong makat-on kon sa unsang paagi ang Iyang balaanon nga gahom makaayo sa inyong mga samad ug mga kahuyang? Gusto ba kamong makasinati sa tam-is, makahupay nga gahom sa Pag-ula ni Jesukristo nga naglihok sa inyong kinabuhi?

Ang pagtinguha sa pagtubag niini nga mga pangutana magkinahanglan og paningkamot—dakong paningkamot. Ako mangamuyo kaninyo sa pag-ako sa responsibilidad sa inyong pagpamatuod. Trabahoa kini. Angkona kini. Atimana kini. Amumaha kini aron motubo kini. Palamboa kini gamit ang kamatuoran. Ayaw kini hugawi sa sayop nga mga pilosopiya sa dili matuohon nga mga lalaki ug mga babaye ug dayon matingala nganong nagkahuyang ang inyong pagpamatuod.

Buhata ang inadlaw, sinsero, mapainubsanon nga pag-ampo. Amumaha ang inyong kaugalingon gamit ang mga pulong sa karaan ug sa modernong panahon nga mga propeta. Hangyoa ang Ginoo sa pagtudlo kaninyo kon unsaon nga mas maayong makapaminaw Kaniya. Paggahin og dugang nga panahon diha sa templo ug sa buhat sa family history.

Samtang inyong himoon ang inyong pagpamatuod nga inyong kinatas-an nga prayoridad, bantayi ang mga milagro nga mahitabo sa inyong kinabuhi.

Kon kamo adunay mga pangutana—ug ako naglaom nga kamo aduna—pangita og mga tubag nga inubanan og mainiton nga tinguha nga motuo. Pagkat-on sa tanan nga inyong mahimo mahitungod sa ebanghelyo ug seguroha nga modangop ngadto sa mga tinubdan nga puno sa kamatuoran alang sa giya. Nagpuyo kita sa kapaigoan nga “walay [ma]tago” [Doktrina ug mga Pakigsaad 121:28]. Mao nga, sa paglabay sa panahon, ang Ginoo motubag sa atong tanang pangutana.

Sa pagkakaron, ihumol ang inyong kaugalingon diha sa buhong nga kapanguhaan sa pagpadayag nga dali ra kaayo natong ma-access. Ako mosaad nga ang pagbuhat sa ingon mopalig-on sa inyong pagpamatuod, bisan kon pipila sa inyong mga pangutana wala pa matubag. Ang inyong sinsero nga mga pangutana, nga gipangutana sa hugot nga pagtuo, mosangpot kanunay sa mas dako nga hugot nga pagtuo ug dugang nga kahibalo. …

Samtang akohon ninyo ang responsibilidad sa inyong pagpamatuod ug mopahinabo niini nga motubo, mahimo kamong mas epektibo nga instrumento diha sa mga kamot sa Ginoo. Kamo “[m]adasig pinaagi sa usa ka maayo nga katuyoan” [Alma 43:45]—ang kawsa ni Jesukristo!

Walay laing nahitabo niini nga yuta nga mas importante kaysa pagpundok sa Israel alang Kaniya. Pahibaloa ang inyong Langitnong Amahan nga gusto kamong motabang. Hangyoa Siya nga ibutang kamo sa pagbuhat niining mahimayaon nga kawsa. Ug dayon barog ug katingala sa unsay mahitabo kon tugotan ninyo ang Dios nga mopatigbabaw labaw sa tanan sa inyong kinabuhi.

Akong minahal nga mga higala, gimahal ko kamo. Ako magpasalamat kaninyo. Ako nagtuo kaninyo. Isip ang propeta sa Ginoo, gipanalanginan ko kamo nga masayod sa kamatuoran mahitungod kon kinsa kamo ug sa paghatag og bili mahitungod kon unsa gayod ang inyong mahimayaon nga potensiyal. Panalanginan ko kamo nga akohon ang responsibilidad sa inyong kaugalingon nga pagpamatuod. Ug panalanginan ko kamo nga makabaton sa tinguha ug kalig-on sa pagtuman sa inyong mga pakigsaad.

Kon inyong buhaton, ako mosaad nga kamo makasinati sa espirituhanon nga paglambo, kagawasan gikan sa kahadlok, ug usa ka pagsalig nga dili kaayo ninyo mahunahuna karon. Kamo makabaton sa kalig-on nga magkaanaa og positibo nga impluwensiya nga labaw gayod sa inyong natural nga kapasidad. Ug ako mosaad nga ang inyong kaugmaon mahimong mas makadasig kaysa bisan unsang butang nga inyong kasamtangan nga gituohan. (Russell M. Nelson, “Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 15, 2022], broadcasts.ChurchofJesusChrist.org)

Dapita ang mga estudyante sa pagpamalandong sa ilang nakat-onan nga makatabang nila sa pagpangandam para sa ilang umaabot nga kinabuhi dinhi sa yuta ug sa kinabuhing dayon. Pwede sab nilang pamalandongan kon asa sa ilang mga pangutana bahin sa umaabot ang natubag ug kon sa unsang paagi. Ikonsiderar ang pagpangutana sa pipila ka estudyante nga ipakigbahin kon sa unsang paagi natubag ang ilang mga pangutana.

Palawmi ang pagsabot

Kini nga bahin sa leksiyon mogamit sa “Paghimo og usa ka Butang” nga ideya gikan sa “Palawmi ang Pagsabot” nga seksiyon sa dokumento nga “Template: Pagtulun-an sa mga Lider sa Simbahan.”

Ang katuyoan niini nga seksiyon mao nga tabangan ang mga estudyante sa pagpamalandong ug paghisgot sa pakigpulong ni Presidente Nelson nga “Mga Pagpili alang sa Kahangtoran.”

Pamalandonga ang mga panglantaw nga imong naangkon samtang gitun-an nimo ang mensahe ni Presidente Nelson. Paghimo og usa ka butang nga makatabang nimo nga hinumdoman ang unsay imong nakat-onan o nga makadasig sa uban nga mangandam alang sa makahuloganong kaugmaon ug kinabuhing dayon. Ang mosunod maoy pipila ka pananglitan sa unsay imong mahimo:

• Usa ka litrato

• Usa ka balak

• Usa ka meme

• Usa ka post sa social media

  Kon posible, pwedeng ikaw ang maghatag sa papel ug uban pang gikinahanglang suplay. Kon mahuman na ang mga estudyante, ikonsiderar ang pagdapit sa pipila kanila nga ipakigbahin ang ilang gihimo. Samtang ila kining ipakigbahin, pwede kang mangutana og dugang sama sa mosunod:

• Unsa nga bahin sa mensahe ni Presidente Nelson ang nakapadasig nimo nga himoon kana? Nganong nakapadasig kini kanimo?

• Sa unsa nga paagi ang paghinumdom niana nga mensahe makagiya nimo karon ug sa umaabot?

• Sa unsang paagi nga ang imong gihimo makadasig sa usa ka tawo sa pagdangop ngadto sa Langitnong Amahan ug kang Jesukristo?

Ikonsiderar ang pagpakigbahin sa imong pagpamatuod sa mga kamatuoran nga nakapadasig kanimo gikan sa mensahe ni Presidente Nelson. Dapita ang mga estudyante nga buhaton ang bisan unsang pag-aghat nga tingali ilang mabati.