Lesona 209: Aoaoga a Taitai o le Ekalesia

Suesueina o Savali a Auauna a le Alii

E Mafai Ona Tatou Faalogo i le Siufofoga o le Faaola e ala i Upu a Ona Taitai

O se lesona tomua lenei mo se faasologa o lesona o le a aoaoina i le aluga o le tausaga e faaaoga ai se savali a se taitai o le Ekalesia. O nei lesona o le a faaaoga ai le mamanu o le “Aoaoga a Taitai o le Ekalesia”. O lenei lesona e mafai ona fesoasoani i tagata aoga ia lagonaina le taua o le suesue ma le faaaogaina o savali a le Alii na tuuina mai e Ana auauna.

Sauniuniga a le tagata aoga: Valaaulia tagata aoga e o mai saunia e faasoa mai se faamatalaga mai se taitai o le Ekalesia e taua ia i latou ma faamatala mai pe aisea. O lenei saunoaga e mafai ona sau mai se lauga o le konafesi aoao, savali o le faasalalauga, faasalalauga faaagafesootai, po o se mea e talitutusa.

Gaoioiga E Ono Mafai Ona Aoao Ai

Ua faasoa mai e auauna a le Faaola savali mai ia te Ia

Faaali se ata o iai nei o le Aufono a le Au Peresitene Sili ma le Korama a Aposetolo e Toasefululua. Valaaulia tagata aoga e talanoaina se mea na aoaoina talu ai nei e nei taitai. Valaaulia tagata aoga e lisi mai nisi o faatulagaga e faaaoga e taitai o le Ekalesia e faasoa mai ai savali a le Alii ia i tatou. Ona valaaulia lea o tagata aoga e tali fesili nei ma le vasega po o ia latou api faamaumau mo suesuega:

• Afai e matauina e se tasi lou olaga, o le a se mea o le a latou vaaia e atagia ai le taua o loo e tuuina i luga o upu a auauna a le Alii?

Faitau le Mataupu Faavae ma Feagaiga 1:37–38, ma vaavaai mo le mea na faatonuina e le Faaola i tatou e faia i upu a Ana auauna.

• O le a sou manatu i le mea e taua ona manatua mai lenei fuaitau?

• O a upumoni e mafai ona e faailoaina?

  Atonu e faailoa mai e tagata aoga se upumoni e pei o lea: Ua poloaiina i tatou e le Alii e suesue i upu e fetalai mai ai o Ia ia i tatou e ala mai i Ana auauna (Mataupu Faavae ma Feagaiga 1:37–38).

• Na faapefea ona e taumafai e suesue i upu a auauna a le Alii o se vaega o lau suesuega masani o le talalelei?

I le faaiuga o le konafesi aoao ia Aperila 2018, sa tuuina atu ai e Peresitene Russell M. Nelson le valaaulia lenei. Vaavaai mo upu po o fasifuaitau e mafai ona fesoasoani i se tasi ia malamalama i le taua o le suesueina o savali a taitai o le Ekalesia.

Ou te apoapoai atu ia te outou ia suesue e le aunoa i savali o lenei konafesi—pe faisoo foi—i le isi ono masina o sosoo ai nei. Ia tagai ma le toto’a i ni auala e faaaofia ai nei savali i a outou afiafi faaleaiga, o au aoaoga o le talalelei, o a outou talanoaga ma aiga ma uo, e oo lava i a outou talanoaga ma i latou e le o nisi o la tatou faatuatuaga. E toatele tagata lelei o le a tali mai i upumoni ua aoaoina i lenei konafesi pe a ofoina atu i le alofa. Ma o le a faaleleia lou naunautaiga e usiusitai pe a e manatuaina ma manatunatu i mea ua e lagonaina i nei aso e lua ua alu. (Russell M. Nelson, “Faamalosi ia i le Galuega Nei,” Liahona, Me 2018, 118)

• O le a se mea na e mauaina?

  Valaaulia tagata aoga e iloilo e i latou lava a latou taumafaiga i le taimi nei e suesue i savali mai taitai o le Ekalesia. E mafai ona latou mafaufau pe faafia ona latou suesue pe faalogo i savali mai taitai o le Ekalesia ma le auala e mafai ai e o latou aiga ona suesue i na savali. E mafai e tagata aoga ona mafaufau loloto pe latou te mananao e tuuina atu nisi faamamafa i savali o le konafesi aoao o se vaega o a latou suesuega o le talalelei.

• O a nisi o auala e te tuufaatasia ai aoaoga a taitai o le Ekalesia i lau suesuega o le talalelei?

• O faapefea ona faamanuiaina oe e le Alii mo le faia o lenei mea?

Faaloloto au suesuega

O le isi vaega o le lesona ua faamoemoe e tuu atu ai i tagata aoga se avanoa e faataitai ai le suesueina o savali a se taitai o le Ekalesia e faaaoga ai manatu mai le mamanu o le “Aoaoga a Taitai o le Ekalesia”. O lenei mea e mafai ona saunia ai tagata aoga e suesue i savali a taitai o le Ekalesia i lesona i le lumanai.

O manatu nei e fetuunai mai vaega o le mamanu “Suesue i le savali” ma le “Faalolotoina o le malamalama”. E mafai ona e filifilia isi manatu mai le mamanu pe saunia ni filifiliga talitutusa e te fatuina.

Filifili se tasi o mea nei e fesoasoani ia te oe e faataitai ai le suesueina o se savali mai se tasi o auauna a le Alii:

• Tusi upu a Iesu Keriso i le ogatotonu o se itulau o lau api faamaumauga mo suesuega. A o e suesue i le lauga, vaavaai mo upu po o fasifuaitau o loo aoao mai ai e faatatau i uiga, uiga auaumama, ma matafaioi a Iesu Keriso. Tusi mea ua e aoaoina ma lagonaina e uiga ia Iesu Keriso i lau api talaaga ma pe mafai faapefea ona fesoasoani lenei mea ia te oe e mulimuli ai ia te Ia.

• Faailoa mai mau o loo ta’ua i le lauga (po o i le faamatalaga faai’u). Faitau fuaiupu ma matau mea latou te aoao atu pe fesoasoani ia te oe e malamalama ai e uiga i le autu. E mafai ona e fatuina se sootaga i le va o le fuaiupu ma le lauga i lau Potutusi o le Talalelei pe tusi se faamatalaga i au mau.

• I le faaaogaina o mea na e aoaoina i le lauga, fai se ata, ata tusi, pepa lautele o i ai se savali, meme, faasalalauga faaagafesootai, po o se mea talitutusa e mafai ona avea o se faamanatu pe musuia ai se tasi. Saunia e faasoa atu mea na e fatuina, faamalamalama atu le savali ma pe mafai faapefea ona faamanuiaina pe musuia ai isi.

Ina ia fesoasoani i tagata aoga e faataitai le suesueina o se savali mai taitai o le Ekalesia, tuuina atu se vaega po o se lauga atoa mai le konafesi aoao, se tusiga i mekasini o le Liahona po o le Mo le Malosi o le Autalavou po o faigalotu ma faasalalauga a le Ekalesia. Tuu atu i tagataiti aoga se taimi ia lava e suesue ai e faaaoga ai le manatu na latou filifilia i luga.

E mafai ona e savalivali solo i le potuaoga ma fesoasoani ma faamalosiau i tagata aoga a o latou faataitaia. A maea le gaoioiga, e mafai ona e faatulagaina tagata aoga i ni vaega toalaiti e faasoa mai le manatu na latou filifilia, o le tomai sa latou faataitaia, ma mafaufauga ma lagona na oo mai ia i latou a o latou suesue.

A lava le taimi, e mafai ona e valaaulia tagata aoga e faataitai se isi tomai mai le mamanu e faaaoga ai le savali po o le lauga lava e tasi.

O le taua o le suesueina o upu a auauna a le Alii

Valaaulia tagata aoga e filifili se tasi o fesili nei e talanoaina pe tali i a latou api faamaumau mo suesuega:

• O le a se mea ua e aoaoina pe lagonaina i le asō ua fesoasoani ia te oe e lagona ai le taua o afioga a le Faaola na tuuina mai e Ana auauna?

• O le a se mea e te manao e manatua a o faaauau pea ona e suesue i savali a auauna a le Alii?

• E mafai faapefea ona faamanuiaina oe mai le suesueina o savali mai taitai o le Ekalesia o se vaega o lau suesuega masani o le talalelei?

Mafaufau e valaaulia tagata aoga e fuafua pe faapefea ona latou suesue i savali a auauna a le Alii o se vaega o a latou suesuega masani o le talalelei. E mafai ona e faasoa atu se aafiaga na e maua i le faalogo i le siufofoga o le Alii a o e suesueina savali a AOa taitai.

Punaoa Faaopoopo

O a nisi o faamanuiaga o le suesueina o savali a auauna a le Alii?

Sa saunoa mai Elder Jeffrey R. Holland o le Korama a Aposetolo e Toasefululua:

Afai matou te aoao atu i le Agaga ma outou faalogo e ala i le Agaga, o nisi o i matou o le a pai atu i lou tulaga, ma auina atu se savali faaperofeta patino e faapitoa lava mo oe.

Uso e ma tuafafine, i konafesi aoao, matou te tuuina atu a matou molimau e tuufaatasia ma isi molimau o le a oo mai, aua pe o le a lava le ala o le a faalogoina lava le siufofoga o le Atua. (Jeffrey R. Holland, “O Se Tagavai i Atunuu,” Liahona, Me 2011, 113)

E mafai faapefea ona ou aoao atili mai le suesueina o savali a taitai o le Ekalesia?

Sa faamatala e Elder David A. Bednar lana mamanu patino mo le suesueina o upu, aoaoga, ma faatonuga a perofeta ma aposetolo:

O le fuafuaga autu o le faailoa lea o le aoaoga faavae po o le mataupu faavae autu o loo aoaoina, saili soo se valaaulia e fesootai ma talafeagai ma lena aoaoga faavae po o le mataupu faavae, ona iloa lea o faamanuiaga folafolaina, pe afai tatou te galulue e tusa ai ma lena valaaulia. …

O lea a o amata ona ou faia lena mea, sa ou iloa ai sa i ai se mea taua sa faamamafaina. Ma e toetoe lava o taimi uma, e le o tulaga uma, ae toetoe lava o taimi uma, sa i ai se valaaulia e faatino, ma faia se mea i mea sa aoaoina. Ona sosoo ai lea ma se faamanuiaga folafolaina o le a mulimuli mai. O le mea la na iu ina ou faia o le a ou aveina se pepa, ma e tolu koluma ou te faia. Ma ou te faaaoga lauga, ma ou taumafai e aotele ma faailoa na mea. Ma o lena mea, o le mea moni, na avea ma a’u savaliga ma talanoaga mo le isi ono masina na sosoo ai. (David A. Bednar, i le “Episode 24: Elder Bednar Shares His Pattern for Studying General Conference Messages” [Church News faasalalauga, 30 Mat., 2021])

Gaoioiga Faaopoopo e Aoao Ai

Fesoasoani i tagata aoga ia iloa le siufofoga o le Alii

Atonu e faigata i nisi tagata aoga ona malamalama pe faape’i le “faalogoina” o le siufofoga o le Faaola. E mafai ona e valaaulia ni nai tagata aoga e faasoa mai pe na faapefea ona latou faalogoina pe lagonaina le siufofoga o le Alii o fetalai atu ia i latou. E mafai foi ona e tuuina atu le uunaiga lenei ma valaaulia tagata aoga e faauma le faamatalaga i a latou api talaaga. Ona faasoa atu lea o o latou manatu i isi.

• Ou te logona le Alii e ala i le …

E mafai ona e faaalia le vitio “#HearHim: Faalogo i le Siufofoga o Iesu Keriso” (1:47) e fesoasoani ai i tagata aoga ia iloa le manaomia ona faalemu ma ia filemu e logona ai le siufofoga o le Faaola.

Faataitaiga faaletusitusiga paia o le sailia o le taitaiga mai perofeta a le Alii

Mafaufau e valaaulia tagata aoga e faasoa mai se tala i tusitusiga paia e uiga i le tuuina mai e le Alii o le taitaiga i Ana fanau e ala mai i Ana perofeta. E mafai ona e mafaufau e valaaulia i latou e suesue le 2 Tupu 5:1–14; Mosaea 2:1–4, 9, 41; Alema 16:5–8, po o isi faataitaiga i tusitusiga paia.

O le mana o savali o le konafesi aoao

Ina ia fesoasoani i tagata aoga ia iloa faamanuiaga e mafai ona latou olioli ai e ala i le suesue ma le faamaoni ma faaaoga upu a auauna a le Alii na tuuina mai i le konafesi aoao, mafaufau e faaali le vitio “Ideas for Learning and Teaching from General Conference” (2:01).

Isi savail mai taitai o le Ekalesia

O manatu nei e mafai ona fesoasoani i tagata aoga e iloa ai po o fea e maua ai savali a taitai o le Ekalesia e faaopoopo atu i le konafesi aoao:

• O itulau o faasalalauga o upega o fesoota’iga o sui a le Au Peresitene Sili ma le Korama a Aposetolo e Toasefululua.

• Itulau o “Faasalalauga ma Faasalalauga Tuusao o Mea na Tutupu” i le ChurchofJesusChrist.org. E mafai ona e valaaulia se tagata aoga e faasolosolo i le itulau uepisaite, faaali atu i le vasega ia faatulagaga eseese e mafai ona latou faalogo ai i le siufofoga o le Alii e ala i Ana auauna. E mafai ona e fai atu i tamaiti aoga e manatunatu i taimi na latou auai ai i soo se tasi o nei faasalalauga.

• Itulau uepisaite o le “Faasalalauga Tuusao” i le ChurchofJesusChrist.org.

E mafai ona manuia tagata aoga mai le iloaina o le mea e mafai ona latou maua ai faigalotu e tuuina atu e taitai o le Ekalesia i aoga a le Ekalesia. E mafai e tagata aoga ona maua nei faigalotu i nofoaga nei ma matamata i nisi o ulutala o nisi o savali talu ai nei:

• Lauga a le BYU: https://speeches.byu.edu/

• Faigalotu ma lauga a le BYU–Idaho: https://web.byui.edu/devotionalsandspeeches/

• Lauga a le BYU-Hawaii: https://speeches.byuh.edu/

• Ensign Faigalotu a le kolisi: https://www.ensign.edu/devotionals