Lesona 208: Aoaoga a Taitai o le Ekalesia

Sauniuni mo le Konafesi Aoao

Faalogo i Afioga a le Faaola e ala i le Konafesi Aoao

O le saunia ma le loto i ai ma le auai i le konafesi aoao e mafai ai ona tatou maua faaaliga faaletagata lava ia. O savali o musumusuga ma taitaiga e tuuina mai i le konafesi aoao e mai le Alii e ala mai i Ana taitai filifilia. O lenei lesona e mafai ona fesoasoani i tagata aoga e saunia ai e faalogo i savali patino mai le Faaola i le konafesi aoao.

Gaoioiga E Ono Mafai Ona Aoao Ai

Sauniuniga mo mea e tutupu

Valaaulia tagata aoga e mafaufau i mea e tutupu latou te fiafia e auai ai, e pei o se aso malolo faapitoa, taaloga taalo, tafaoga, po o se isi gaoioiga. Fai atu ia i latou e faasoa mai pe na faapefea ona latou auai pe ua saunia e auai i nei gaoioiga. Talanoaina pe faapefea e a tatou sauniuniga mo mea e tutupu ona fesoasoani ia i tatou ia maua se aafiaga sili atu ona anoa i le taimi o le gaoioiga. A uma ona talanoaina, mafaufau e faaali atu se ata o se aiga o loo matamata i le konafesi aoao.

• O le a se mea e te faia pe faia e lou aiga e saunia ai ma auai i le konafesi aoao?

O le faamoemoega o le konafesi aoao

Ia Fepuari 1831, na tuuina mai ai e le Alii se faaaliga ia Iosefa Samita ma Sini Rikitone e faatonuina i laua e faapotopoto faatasi ia toeaina mo se konafesi, lea sa faia ia Iuni o lena tausaga.

Faitau le Mataupu Faavae ma Feagaiga 44:2 ma vaai mo mea na folafola atu le Alii e fai i lenei konafesi.

• E mafai faapefea e le folafolaga a le Alii i lenei fuaiupu ona fesoasoani ia te oe e malamalama ai pe aisea e fai ai konafesi aoao?

Faitau le saunoaga lenei mai ia Peresitene Russell M. Nelson, ma vaavaai mo le faamoemoega o le konafesi aoao.

O le faamoemoega o lenei konafesi ma konafesi aoao uma o le fesoasoani lea ia i tatou ia faalogo ia te Ia. (Russell M. Nelson, “Tuleiga Amata,” Liahona, Me 2020, 7)

E mafai e tagata aoga ona tusi pe faafesootai le saunoaga a Peresitene Nelson ia latou tusitusiga paia i autafa o le Mataupu Faavae ma Feagaiga 44:2.

Faamamafa atu le upumoni o le faamoemoega o le konafesi aoao o le fesoasoani lea ia i tatou ia faalogo ia Iesu Keriso.

• Aisea e taua ai le iloa o le mea o le a fetalai mai ai Iesu Keriso ia te oe?

• O a nisi o auala e mafai ona e faalogo ai i le Faaola i le konafesi aoao?

Ina ia fesoasoani i tagata aoga e toe manatunatu i a latou sauniuniga mo le konafesi aoao, mafaufau e faaali atu fesili nei o le faavasegaga faaletagata lava ia i luga o le laupapa. E mafai e tagata aoga ona mafaufau loloto i fesili ma tusi a latou tali i se api faamaumau mo suesuega.

• O le a le lelei o lou saunia e faalogo i le Faaola o fetalai mai ia te oe e ala i savali i konafesi aoao?

• O le a se mea e te manaomia pe faamoemoe e maua mai le konafesi aoao?

Sauniuni mo le konafesi aoao

O le faamoemoega o le pepa tufa atu o le fesoasoani lea i tagata aoga ia iloa auala eseese e mafai ona latou saunia ai mo le konafesi aoao. E mafai e tagata aoga ona galulue i ni vaega toalaiti, ma se paga, pe na o i latou lava.

Sauniuni mo le Konafesi Aoao

Ina ua asiasi atu Iesu Keriso i sa Nifae, sa Ia valaaulia i latou e saunia o latou mafaufau e faalogo ma malamalama i Lana savali (tagai i le 3 Nifae 17:3). Vaai faalemafaufau pe faape’i ou aafiaga o le konafesi aoao pe afai e faapena foi ona e faia.

1. Suesue i punaoa nei, ma vaavaai mo auala e mafai ona e saunia ai oe lava ia maua savali a le Alii i le konafesi aoao. Atonu e te manao e faailoga upu anoa ma fasifuaitau e tulaga ese ia te oe.

   Mosaea 2:9; Mataupu Faavae ma Feagaiga 88:63

   Na aoao mai Peresitene Russell M. Nelson:

   

   Mai lenei pulelaa i le asō ma taeao, o le a faaauau ai pea ona outou faafofoga i upumoni. Faamolemole ia tusi i lalo ni mafaufauga e ta’a’ina i ai lou gauai ma mea e oo atu i lou mafaufau ma tumau ai i lou loto. Ōle atu i le Alii i le agaga tatalo e faamautu mai le moni o mea ua e faalogo i ai. (Russell M. Nelson, “O Le A Le Mea e Moni?,” Liahona, Nov. 2022, 30)

   Sa aoao mai Peresitene Henry B. Eyring o le Au Peresitene Sili:

   

   Ou te iloa o auauna a le Atua o le a saunoa atu ia te outou i lenei konafesi. Ua valaauina i latou e le Atua e tuuina atu savali i Ana fanau. Na fetalai le Alii e uiga ia i latou: “O le mea ua fai atu ai a’u le Alii, ua ou fai atu ai lava, ma ou te le faatoese ai lava a’u; ma e ui ina mavae atu le lagi ma le lalolagi, a e le mavae atu lava la’u upu, a o le a faataunuuina lava, pe fai atu i lo’u lava leo po o le leo o a’u auauna, ua tusa lava ia” [Mataupu Faavae ma Feagaiga 1:38].

   E te faaalia lou faalagolago ia te Ia pe a e faalogo ma le faamoemoe e aoao mai ai, ia salamo ona e alu lea ma faia soo se mea ua Ia poloai mai ai. Afai e lava lou faalagolago i le Atua e faalogologo ai i Lana savali i lauga uma, pese, ma tatalo i lenei konafesi, o le a e mauaina. Ma afai loa e te alu ma faia le mea ua Ia finagalo e te faia, o le a faatupulaia lou mana e faalagolago ai ia te Ia ma o le a oo mai le taimi, o le a lofituina oe i le loto faafetai ina ua e iloa ua Ia faalagolagoina oe. (Henry B. Eyring, “Faalagolago i le Atua, Ona e Alu Ai Lea ma Fai,” Liahona, Nov. 2010, 73)

   Sa aoao mai Peresitene Dieter F. Uchtdorf, a o avea ma uso o le Au Peresitene Sili:

   

   Ao e sauni mo le konafesi aoao, ou te valaaulia oe e mafaufau loloto i fesili e te manaomia ona taliina. Mo se faataitaiga, atonu e te naunau i se taiala ma se taitaiga mai le Alii e faatatau i ni luitau o loo feagai ma oe.

   O tali i au tatalo patino e ono oo sao mai lava i se saunoaga faapitoa po o se fasifuaitau patino. I nisi o taimi atonu e oo mai tali e ala mai i se upu, fasifuaiupu, po o se pese e foliga e leai se sootaga ma fesili. O se loto ua faatumulia i le agaga faafetai mo faamanuiaga o le olaga ma se naunautaiga faamaoni e faalogo ma mulimuli i upu o le fautuaga o le a saunia ai le ala mo faaaliga patino. (Dieter F. Uchtdorf, “General Conference—No Ordinary Blessing,” Ensign, Sept. 2011, 4)

2. Mai mea sa e suesueina, fai se lisi o auala e mafai ona e saunia ai e faalogo i le siufofoga o le Alii i le konafesi aoao.

3. Lisi nisi o auala e mafai ona e saunia ai e faalogo i le siufofoga o le Alii i le konafesi aoao.

O la’u sauniuniga mo le konafesi aoao

O fesili nei e mafai ona fesoasoani i tagata aoga e faaaoga ai le fautuaga mai le saunoaga a Elder Uchtdorf o loo i le pepa e tufa atu. E mafai ona tali mai tamaiti aoga i fesili i a latou api faamaumau mo suesuega po o se tamai kata po o se kata e tusi ai faamatalaga e mafai ona latou aveina i le fale e fai ma faamanatu.

• O a ni a’u fesili o i ai? O le a le taialaga po o le taitaiga ou te manaomia mo luitau o feagai ma au?

• O le a se mea patino o le a ou faia e saunia ai e faalogo i le taitaiga a le Alii mo au i konafesi aoao? (Filifili se auala se tasi pe lua na e lisiina i lau pepa e tufa atu.)

Fesoasoani i tagata aoga e lipoti mai o latou aafiaga i le konafesi aoao

A uma le konafesi aoao, mafaufau e fai atu i tagata aoga e faasoa mai pe na faapefea ona aafia o latou aafiaga i a latou sauniuniga mo le konafesi aoao. Atonu e lei auai nisi o tagata aoga i le konafesi. E mafai ona e tuuina atu se taimi mo nei tagata aoga e iloilo ai aotelega o lauga.

• O a au mea na fai e saunia ai? O a ni auala e fesoasoani ai lenei mea?

• Na faapefea ona fesoasoani au sauniuniga ia te oe e faalogo ai i le siufofoga o le Faaola ma maua ai le taitaiga mai ia te Ia?

E mafai foi e tagata aoga ona faasoa mai o latou lagona po o molimau e uiga i mea na latou lagonaina pe faalogo i ai i le taimi o le konafesi aoao.

Punaoa Faaopoopo

O le a le taulaiga o savali o konafesi aoao?

Na aoao mai Peresitene Russell M. Nelson:

O le Au Pulega Aoao ma Ofisa Aoao o le Ekalesia o le a saunoa e taulai atu a latou sāvali i lo tatou Faaola, o Iesu Keriso, o Lona alofa mutimutivale, ma Lona mana togiola le i’u. E le’i i ai lava se taimi i le talafaasolopito o le lalolagi [i lo le taimi nei] ua sili atu ai ona taua patino ma talafeagai le iloa e uiga i lo tatou Faaola i agaga o tagata soifua uma. Mafaufau i le vave tele o le a fo’ia ai fetaua’iga faatauma’oi i le lalolagi atoa—ma feteenaiga i o tatou olaga patino—pe afai tatou te filifili uma e mulimuli ia Iesu Keriso ma gaua’i atu i Ana a’oa’oga. (Russell M. Nelson, “Upumoni Mamā, Mataupu Faavae Mamā, ma Faaaliga Mamā,” Liahona, Nov. 2021, 6)

O le a se auala se tasi e tusi ai faamatalaga i le taimi o le konafesi aoao?

Na aoao mai Elder Robert D. Hales (1932–2017) o le Korama a Aposetolo e Toasefululua:

A ou tusitusi ni manatu i konafesi, ou te le tusia i lalo i taimi uma mea tonu o loo saunoa ai le failauga; ae ou te tusia faatonuga patino a le Agaga o loo tuuina mai ia te au.

O le mea o loo tautalagia e le tutusa le taua e pei o mea tatou te faalogoina ma mea tatou te lagonaina. (Robert D. Hales, “Konafesi Aoao: Faamalosia o le Faatuatua ma le Molimau,” Liahona, Nov. 2013, 6)

Aisea e tatau ai ona ou auai i le konafesi aoao?

Ua aoao mai Elder Neil L. Andersen o le Korama a Aposetolo e Toasefululua:

Ou te tuu atu la’u molimau o Iesu o le Keriso, o loo Ia taitaia mataupu o lenei galuega paia, ma o le konafesi aoao o se tasi lea o taimi taua tele Na te tuu mai ai faatonuga i Lana Ekalesia ma ia i tatou taitoatasi. …

O aoaoga o le konafesi aoao o mea ia ua finagalo le Alii tatou te mafaufau loloto i ai i masina o i luma. (Neil L. Andersen, “O le Siufofoga o le Alii,” Liahona, Nov. 2017, 122, 124)

Gaoioiga Faaopoopo e Aoao Ai

Se isi amataga

O se isi auala e amata ai le lesona, mafaufau e fesili pe aisea e taua ai le faafou soo o le polokalama o le faagaoioiga i luga o se telefoni feaveai. E faapefea ona fesootai lena mea i le filifili e auai i konafesi aoao?

Faitotoa o ala o faasalalauga faaagafesootai a taitai o le Ekalesia

I aso ma vaiaso e tau atu i le konafesi aoao, e masani ona tuu i luga e taitai o le Ekalesia le konafesi aoao i luga o a latou faitotoa o ala o faasalalauga faaagafesootai. Valaaulia tagata aoga e vaavaai i nisi o faasalalauga faaagafesootai a taitai o le Ekalesia na tuuina i totonu o ni nai vaiaso o le konafesi aoao talu ai. Mafaufau e faaali atu nisi o faataitaiga. Valaaulia tagata aoga e vaavaai mo soo se fautuaga o le a fesoasoani ia i latou e saunia ai e auai i le konafesi aoao. E mafai ona outou talanoaina soo se faamanuiaga na folafola mai e taitai o le Ekalesia.

Valaaulia a Elder Neil L. Andersen e saunia mo le konafesi aoao

A o lei oo i le konafesi aoao ia Oketopa 2020, sa tuuina i luga e Elder Neil L. Andersen se vitio i luga o le Facebook. I le vitio, na ia tuuina mai ai ni fautuaga se tolu i le auala e saunia ai mo le konafesi aoao. Mafaufau e matamata le vitio atoa, “Invitation to Prepare for General Conference” (Facebook, Sept. 30, 2020, facebook.com/neill.andersen; video, 3:01) pe na o ana fautuaga e tolu (mai le faailotaimi 1:27 i le 2:51). Valaaulia tagata aoga e mafaufau pe mafai faapefea e ana fautuaga ona fesoasoani ia i latou e saunia ai e faalogo i le siufofoga o le Alii.

Suesue i le Mekasini Mo Le Malosi o le Autalavou

O lomiga o Mati ma Setema o mekasini o le Mo Le Malosi o le Autalavou e masani ona i ai se “Tusigamanatu o le Konafesi Aoao” lea e mafai ona sii mai, lolomiina, ma faaaogaina a o auai ai i le konafesi aoao. Aumai ni nai kopi talu ai nei o le “Tusigāmanatu o le Konafesi Aoao” mo tamaiti aoga e vaavaai i ai, pe fautuaina tagata aoga ia maua mai i luga o le polokalama o le Potutusi o le Talalelei. Mafaufau e fai i tagata aoga e faasoa mai nisi o manatu na latou mauaina mai le “Tusigamanatu o le Konafesi Aoao” e mafai ona fesoasoani ia i latou e saunia ai mo le konafesi aoao.

Auala e sauniuni ai failauga mo le konafesi aoao

Mafaufau e faaali le “O le Siufofoga o le Alii” mai le faailo taimi 3:07 i le 5:17. Ua talanoaina e Elder Neil L. Andersen le taumafaiga a failauga i le sauniaina o se lauga mo le konafesi aoao. Valaaulia tagata aoga e talanoaina mea e mafai ona tatou aoaoina e ala i le iloaina pe faapefea ona saunia failauga. E mafai ona fesoasoani le fesili lenei mo le talanoaga.

• E mafai faapefea e le aoao e uiga i taumafaiga e tuu e failauga i sauniuniga ona faaosofia ai oe ina ia saunia atili?

Gaoioiga o le toe faamanatuina o le konafesi aoao

Mafaufau e tuu atu i tagata aoga se avanoa e toe faamanatu ai mea sa latou aoaoina i le konafesi aoao. E mafai ona e tusia ni nai fesili i luga o le laupapa e pei o nei: O le a se mea na e ata ai? O le a le lauga ua e fiafia e toe suesue? O a ni mea na e aoaoina e mafai ona fesoasoani ia te oe i lou olaga? O a ni mea na e aoaoina e uiga i le Faaola?

E mafai ona e valaaulia tagata aoga e tusi i luga o le laupapa tali i soo se fesili. Mafaufau e faasoa atu se tali mai lou aafiaga i le konafesi aoao. E mafai e tagata aoga ona piki nisi o tali i luga o le laupapa ma valaaulia a latou uo i le vasega e faamalamalama atili o latou aafiaga.