Lesona 211—Aoaoga a Taitai o le Ekalesia

“O Filifiliga mo le Faavavau”

Suesueina o Aoaoga a Taitai o le Ekalesia

I le gasologa o le tausaga, o le a tele avanoa o le a maua e tagata aoga i le seminare e aoao ai mai aoaoga a taitai musuia o aso e gata ai i le Ekalesia a Iesu Keriso. O lenei lesona ua tuuina atu ai se faataitaiga o le auala e mafai ai e faiaoga ona faaaoga le pepa o faamatalaga o le “Mamanu: Aoaoga a Taitai o le Ekalesia” e taiala ai le vasega a o latou suesue i nei savali. O le faataitaiga o loo faaaogaina i lenei lesona “O Filifiliga mo le Faavavau” saunia e Peresitene Russell M. Nelson ([faigalotu i le lalolagi atoa mo le autalavou matutua, 15 Me, 2022], broadcasts.ChurchofJesusChrist.org). O lenei lesona e mafai ona faalolotoina ai le malamalama o tagata aoga i mataupu faavae e fesoasoani ai ia i latou e saunia mo le ola e faavavau.

Gaoioiga E Ono Mafai Ona Aoao Ai

Manatua: O lenei lesona ua tuuina atu ai se faataitaiga o le auala e mafai ai e faiaoga ona faaaoga le pepa o faamatalaga o le “Mamanu:Aoaoga a Taitai o le Ekalesia” e fesoasoani ai i tagata aoga e suesue i savali mai taitai o le Ekalesia. E mafai ona e fetuunaia manatu mai lenei lesona, faaaoga se tuufaatasiga ese o manatu mai le mamanu, pe faaaoga ou lava manatu e sili atu ona fetaui ma manaoga o au tagata aoga.

Amata le Lesona

Amata le lesona i se auala e fatuina ai le fiafia mo tagata aoga ma fesoasoani ai e saunia o latou mafaufau ma loto mo le aoaoga faamasani. Mafaufau e faaaoga se faamatalaga po o se manatu faavae mai le saunoaga a Peresitene Nelson “O Filifiliga mo le Faavavau.” O se tasi lea o faataitaiga o le auala e amata ai le lesona.

Tusi le faamatalaga lenei i luga o le laupapa ma valaaulia tagata aoga e mafaufau e uiga i lo latou lumanai i lenei olaga ma i le faavavau:

I se saunoaga i le autalavou matutua, sa faailoa mai ai e Peresitene Russell M. Nelson:

Ou te fia talanoa atu ai ia te outou e uiga i o outou lumanai. (Russell M. Nelson, “O Filifiliga mo le Faavavau,” [faigalotu i le lalolagi atoa mo le autalavou matutua, 15 Me, 2022], broadcasts.ChurchofJesusChrist.org)

Tali fesili nei i lau api faamaumau mo suesuega:

• O a ni ou manatu ma lagona a o e mafaufau e uiga i lou lumanai i lenei olaga ma i le faavavau?

• Afai e mafai ona e talanoa e uiga i lou lumanai ma le perofeta a le Atua, o a ni fesili o le a e fesili atu ai ia te ia?

Mafaufau e valaaulia ni nai tagata aoga e faasoa mai mea na latou tusia i o latou api o talaaga suesue. E mafai foi ona e valaaulia tagata aoga e tusi i luga o le laupapa nisi o a latou fesili e uiga i o latou lumanai. E mafai ona fesoasoani nei fesili i tagata aoga e saunia ai e suesue le savali.

Suesue le savali

A o suesue tagata aoga, fautuaina i latou e taulai atu i le faateleina o lo latou malamalama ma faamalosia a latou molimau i le Tama Faalelagi ma Iesu Keriso. Valaaulia tagata aoga e tusifaamaumau mafaufauga ma lagona e ono sau mai le Agaga Paia a o latou suesue.

O le vaega lenei o le lesona o le a faaaoga ai le manatu “Vaavaai mo” manatu mai le vaega o le “Suesue i le Savali” o le pepa o faamatalaga o le “Mamanu: Aoaoga a Taitai o le Ekalesia”. O lenei vaega ua faamoemoe e fesoasoani i tagata aoga e taulai atu a latou suesuega o le lauga.

Afai e le maua e tagata aoga le saunoaga a Peresitene Nelson “O Filifiliga mo le Faavavau,” e mafai ona e saunia pepa e tufa atu e tolu, lea o loo i ai ni vaega o lana saunoaga. E mafai ona e vaevaeina lau vasega i ni vaega se tolu ma tuu atu i vaega taitasi e suesue se tufaaga e ese mai ai. Pe e mafai foi ona e lolomiina ni kopi o le lauga atoa, ma e mafai e tagata aoga ona suesue le lauga i ni vaega toalaiti. Valaaulia tagata aoga e mulimuli i faatonuga o loo i lalo a o latou faamaeaina le gaoioiga.

A o e suesueina le saunoaga a Peresitene Nelson “O Filifiliga mo le Faavavau,” vaavaai mo upumoni e mafai ona fesoasoani ia te oe e saunia ai mo lou lumanai i le lalolagi ma le ola e faavavau faatasi ma le Tama Faalelagi ma Iesu Keriso. E mafai foi ona e vaavaai mo aoaoga e mafai ona tali ai au fesili e uiga i lou lumanai na e tusia i lau api talaaga mo suesuega po o luga o le laupapa.

O Filifiliga mo le Faavavau, Vaega 1

O lo’u faamoemoega i le po nei o le faamautinoa lea ua lautele lau vaai i le upumoni e faapea, o lenei olaga e moni lava o le taimi lea e te filifili ai po o le a le ituaiga o olaga e te manao e ola ai e faavavau. O lou taimi lenei “e saunia ai e fetaiai ma le Atua” [tagai Alema 12:24; 34:32]. …

O filifiliga amiotonu uma e te faia iinei o le a e matua manuia ai i le taimi nei. Ae o filifiliga amiotonu i le olaga nei o le a matua manuia ai e faavavau i mea e lei mafaufauina. Afai e te filifili e osia ni feagaiga ma le Atua ma faamaoni i na feagaiga, e te maua le folafolaga o le “mamalu o le a faaopoopo i luga o [o outou ulu] e faavavau ma faavavau lava” [Aperaamo 3:26]. …

Ioe, o le fili e le manao ia e mafaufau mo a taeao, faapena foi le ola e faavavau. Ae faamolemole, aua nei le iloa pe faatalale foi i avanoa ma luitau o le olaga nei. I lena agaga, e manaomia ona e malamalama i upumoni faavae e tolu o le a fesoasoani ia te oe ia saunia ai lou ala i le lumanai: …

Muamua: ia iloa le upumoni po o ai oe. Ou te talitonu ana faapea o loo fetalai tuusao atu le Alii ia te oe i le po nei, o le mea muamua lava Na te faamautinoa ua e malamalama i ai o lou faasinomaga moni. A’u uo pele, o outou moni lava o fanau agaga a le Atua. Sa outou pepese lava i lenei upumoni talu ina outou iloa upu o le “O le Atua lo’u Tama.” [Viiga, no.184]. Ae pe ua tusia ea lena upumoni e faavavau i lou loto? Pe na laveaiina ea oe e lenei upumoni ina ua oulua fetaiai ma se faaosoosoga?

Ou te popole lava i lo outou faafofoga soo i lenei upumoni ua foliga mai ua na o se faaupuga nai lo o se upumoni paia. Ae, o le auala e te mafaufau ai po o ai moni oe e aafia ai toetoe o faaiuga uma e te faia. …

…O ai oe?

O le mea muamua lava ma le sili, o oe o se atalii ma se afafine o le Atua.

Lua, i le avea ai ma se tagata o le Ekalesia, o oe o se tama o le feagaiga. Ma le tolu, o oe o se so’o o Iesu Keriso.

O le po nei, ou te augani atu ia te outou e ’aua ne’i suitulagaina nei faailoga silisili e tolu ma lē masuia i soo se mea lava, ona o le faia o lena mea o le a taofia ai lou alualu i luma pe tuu ai oe i se tulaga lē talafeagai e ono taofia ai lou alualu i luma e faavavau. …

O le mea moni, o loo i ai ni igoa valaau eseese atonu e taua tele ia te outou. Faamolemole aua ne’i malamalama sese mai ia te au. Ou te le o fai atu o isi faailoga ma igoa e iloa ai e le taua. E faigofie lava lau tala e leai se faailoga e tatau ona aveesea, suitulaga, pe faamuamua foi i lo nei faailoga tumau e tolu: “atalii/afafine o le Atua,” “tama o le feagaiga,” ma le “soo o Iesu Keriso.”

Soo se igoa e iloa ai outou e le ogatusa ma nei faailoga autu e tolu o le a iu lava ina latou faatoilaloina outou. O isi igoa valaau o le a tou le fiafia ai i se taimi ona e le o ia i latou le mana e taitai atu ai outou e agai atu i le ola e faavavau i le malo selesitila o le Atua. …

Aua ne’i e sasi ai: O lou gafatia e paia. Faatasi ai ma lau sailiga filiga, o le a avatu e le Atua ia te oe nai vaaiga o le tagata e mafai ona e avea ai. (Russell M. Nelson, “Filifiliga mo le Faavavau” [faigalotu i le lalolagi atoa mo le autalavou matutua, 15 Me, 2022], broadcasts.ChurchofJesusChrist.org)

O Filifiliga mo le Faavavau, Vaega 2

Lua: Ia iloa le upumoni e uiga i mea ua ofoina atu e le Atua le Tama ma Lona Alo o Iesu Keriso ia te oe.

I se faapuupuuga, ua La ofoina atu ia te oe mea uma!

O le fuafuaga a le Tama Faalelagi mo Ana fanau ua faatagaina ai i tatou ia ola i le nofoaga ma le auala o loo Ia soifua ai ma ia avea atili e faapei o Ia. O Lana fuafuaga ua avanoa moni ai mo i tatou ia faamanuiaga silisili o le faavavau, e aofia ai le gafatia mo i tatou e avea ai ma ‘suli faatasi ma Keriso [Roma 8:17].

Ua silafia e le Atua mea uma ma silasila i mea uma. I le faavavau atoa, e leai se tasi o le a sili atu ona iloaina oe pe popole ia te oe nai lo Ia. E leai se tasi o le a sili ona latalata ia te oe nai lo Ia. E mafai ona sasaa atu lou loto ia te Ia ma faatuatuaina o Ia e auina mai le Agaga Paia ma agelu e tausi oe. Na ia faaalia Lona alofa silisili ina ua Ia auina mai Lona Alo e Toatasi na Fanaua e maliu mo oe—e avea ma ou Faaola ma Togiola!

E ala i Lana Togiola, na manumalo ai le Alii o Iesu Keriso i le lalolagi [tagai Ioane 16:33; Mataupu Faavae ma Feagaiga 50:41]. O le mea lea, o Ia o lē ua “malosi e … faamama [outou] mai i amioletonu uma.” [Alema 7:14]. O le a Ia laveaiina outou mai i o outou tulaga sili ona pagatia i Lana lava ala ma le taimi. Pe a outou o mai ia te Ia i le faatuatua, o le a Ia taiala, faasaoina, ma puipuia outou. O le a Ia faamaloloina lou loto mo ma faamafanafanaina oe i ou mafatiaga [tagai i le Luka 4:18; Alema 7:10–12]. O le a Ia tuu atu ia te oe le avanoa e maua ai Lona mana. Ma o le a Ia faia mea faigata i lou olaga e avea ma mea faigofie. …

Ua i ai i le Atua se alofa faapitoa mo tagata taitoatasi e osia se feagaiga ma Ia i vai o le papatisoga. Ma o lena alofa paia e faalolotoina a o osia isi feagaiga faaopoopo ma tausia ma le faamaoni. Ona oo lea i le iuga o le olaga faaletino, e maeu le toefaatasia o fanau taitasi o le feagaiga ma lo tatou Tama Faalelagi [tagai i le Salamo 116:15].

E popole tele foi o Ia ia maua e Ana fanau uma se avanoa e faalogo ai i tala fiafia o le talalelei toefuataiina. Ua auina mai e le Tama Faalelagi Ana fanau i le lalolagi mo le silia ma le ono afe tausaga. O le toatele o nei tagata e lei mauaina lava sauniga e agavaa ai i latou mo le ola e faavavau. O le mea lena e taua tele ai malumalu. O le mafuaaga lena ua avea ai le faapotopotoina o Isaraelu i itu uma e lua o le veli, o le galuega aupito maoae i le lalolagi i aso nei. O outou, au uo pele i lenei galuega paia, ua i ai se matafaioi taua i lenei faapotopotoina, ma ou te faafetai atu ia te outou mo lena mea. (Russell M. Nelson, “Filifiliga mo le Faavavau” [faigalotu i le lalolagi atoa mo le autalavou matutua, 15 Me, 2022], broadcasts.ChurchofJesusChrist.org)

O Filifiliga mo le Faavavau, Vaega 3

Ia iloa le upumoni e fesootai ma lou liuaina. O le mea moni e tatau ona e umia e oe lava ia lou liuaina. E leai se isi e mafai ona ia faia mo oe.

Ia, e mafai ona ou valaaulia outou ia mafaufau i ni nai fesili? E te fia manao e lagona le filemu e uiga i popolega ua lofituina ai oe i le taimi nei? E te fia manao ia iloa atili Iesu Keriso? E te fia manao e aoao i le auala e mafai ai e Lona mana paia ona faamalolo ou manua ma vaivaiga? E te fia manao e lagona le mana matagofie ma mālū o le Togiola a Iesu Keriso o galue i lou olaga?

O le saili e tali nei fesili o le a manaomia ai se taumafaiga—se taumafaiga tele. Ou te augani atu ia te outou ia pulea lau molimau. Galue i ai. Pulea. Tausi i ai. Faafailele ina ia tuputupu ae. Fafaga i upumoni. ’Aua ne’i faaleagaina i filosofia sesē o alii ma tamaitai lē talitonu ona e tuufesili lea pe aisea ua vaivai ai lau molimau.

Punouai i tatalo faatauanau ma lotomaualalo i aso taitasi. Tausia lelei oe lava ia i afioga a perofeta anamua ma aso nei. Ole atu i le Alii e aoao oe i le auala e faalogo lelei ai ia te Ia. Faaalu atili se taimi i totonu o le malumalu ma i galuega o talafaasolopito o aiga.

A o e faia lau molimau ma au faamuamua sili ona maualuga, vaavaai mo ni vavega e tutupu i lou olaga.

Afai e i ai ni au fesili—ma ou te faamoemoe e i ai—saili ni tali faatasi ma manaoga faatauanau ia talitonu. Aoao mea uma e te mafaia e uiga i le talalelei ma ia mautinoa e te liliu atu i puna e faatumulia i upumoni mo le taitaiga. Ua tatou ola i le tisipenisione pe a “leai se mea e taofia” [Mataupu Faavae ma Feagaiga 121:28]. O lea, o le a i ai le taimi o le a tali mai ai e le Alii a tatou fesili uma.

I le taimi nei, faatofu oe lava ia i le faatanoavai faamanuiaina o faaaliga ua tatou maua i o tatou tamatamailima. Ou te folafola atu o le faia o lena mea ole a faamalosia ai lau molimau, e tusa lava pe lei taliina nisi o au fesili. O au fesili faamaoni, e fesiligia i le faatuatua, o le a taitai atu ai e le aunoa i le faatuatua sili atu ma le iloa sili atu. …

A o e puleaina lau molimau ma faatupulaia, o le a avea oe ma se meafaigaluega sili ona malosi i aao o le Alii. O le a “musuia oe e se galuega sili atu” [Alema 43:45]—o le galuega a Iesu Keriso!

E leai se mea o tupu i lenei lalolagi e sili atu ona taua nai lo le faapotopotoina o Isaraelu mo Ia. Faailoa atu i lou Tama Faalelagi e te manao e fesoasoani. Ole atu ia te Ia e faagalue oe i lenei galuega mamalu. Ona e me’i lea i tua ma maofa i mea e tutupu pe a e faamuamuaina le Atua i lou olaga.

A‘u uo talavou pele, ou te alofa ia te outou. Ou te faafetai atu ia te outou. Ou te talitonu ia te outou. I le avea ai ma perofeta a le Alii, ou te faamanuia ia te outou ia iloa le upumoni po o ai oe ma ia faataua le upumoni e uiga i lou gafatia moni mamalu o i ai. Ou te faamanuia ia te outou ia pulea a outou molimau. Ma ou te faamanuia ia te outou ia i ai le manao ma le malosi e tausi ai a outou feagaiga.

A outou faia, ou te folafola atu o le a outou lagonaina le tuputupu a’e faaleagaga, saoloto mai le fefe, ma se talitonuga maumaututu e seāseā e mafaufauina i le taimi nei. O le a outou maua le malosi e maua ai se tosinaga lelei e sili atu i lou malosiaga faalenatura. Ma ou te folafola atu o le a matua sili ona faafiafiaina o outou lumanai nai lo se mea e mafai ona outou talitonu i ai i le taimi nei. (Russell M. Nelson, “Filifiliga mo le Faavavau” [faigalotu i le lalolagi atoa mo le autalavou matutua, 15 Me, 2022], broadcasts.ChurchofJesusChrist.org)

Valaaulia tagata aoga e mafaufau loloto i mea na latou aoaoina e mafai ona fesoasoani ia i latou e saunia ai mo o latou olaga i le lumanai i le lalolagi ma le ola e faavavau. E mafai foi ona latou manatunatu po o fea o a latou fesili e faatatau i le lumanai na taliina ma pe na faapefea. Mafaufau e fai atu i ni nai tagata aoga e faasoa mai pe na faapefea ona taliina a latou fesili.

Faaloloto le malamalama

O le vaega lenei o le lesona o le a faaaoga ai le manatu “Fatu se Mea” mai le vaega o le “Malamalama Loloto” o le pepa o faamatalaga o le “Mamanu: Aoaoga a Taitai o le Ekalesia”.

O le faamoemoega o lenei vaega o le fesoasoani lea i tagata aoga e toe manatunatu ma talanoaina le saunoaga a Peresitene Nelson “O Filifiliga mo le Faavavau.”

Mafaufau loloto i malamalamaaga na e mauaina a o e suesueina le savali a Peresitene Nelson. Fatu se mea e mafai ona fesoasoani ia te oe e manatua ai mea sa e aoaoina pe e mafai ona musuia ai isi e saunia mo se lumanai anoa ma le ola e faavavau. O nisi nei o faataitaiga o mea e mafai ona e fatuina:

• O se ata

• O se solo

• O se meme

• O se faasalalauga faaleagafesootai

  Afai e mafai, atonu e te manao e tuuina atu pepa ma isi sapalai e manaomia. A uma ona fai e tagata aoga, mafaufau e valaaulia nisi o i latou e faasoa mai mea na latou fatuina. Ao latou faasoa, e mafai ona e fai atu fesili tulitatao e pei o fesili nei:

• O le a se vaega o le savali a Peresitene Nelson na musuia ai oe e fatu lena mea? Aisea na musuia ai oe?

• E mafai faapefea e le manatuaina o lena savali ona fesoasoani e taiala ai oe i le taimi nei ma i le lumanai?

• E mafai faapefea e lau fatufatuga ona faaosofia se tasi e vaai atu i le Tama Faalelagi ma Iesu Keriso?

Mafaufau e faasoa atu lau molimau i upumoni na musuia ai oe mai le savali a Peresitene Nelson. Fautuaina tagata aoga e faatino soo se uunaiga latou te ono lagonaina.