“Lesson 209—Pag-aaral ng mga Mensahe ng mga Tagapaglingkod ng Panginoon: Maririnig Natin ang Tinig ng Tagapagligtas sa pamamagitan ng mga Salita ng Kanyang mga Lider,” Manwal ng Titser ng Seminary para sa Doktrina at mga Tipan (2025)
“Pag-aaral ng mga Mensahe ng mga Tagapaglingkod ng Panginoon,” Manwal ng Titser ng Seminary para sa Doktrina at mga Tipan
Lesson 209: Mga Turo ng mga Lider ng Simbahan
Pag-aaral ng mga Mensahe ng mga Tagapaglingkod ng Panginoon
Maririnig Natin ang Tinig ng Tagapagligtas sa pamamagitan ng mga Salita ng Kanyang mga Lider
Ito ay isang pambungad na lesson para sa magkakasunod na lesson na ituturo sa buong taon gamit ang mensahe ng isang lider ng Simbahan. Gagamitin ng mga lesson na ito ang template na “Mga Turo ng mga Lider ng Simbahan.” Ang lesson na ito ay makatutulong sa mga estudyante na madama ang kahalagahan ng pag-aaral at pagsasabuhay ng mga mensahe ng Panginoon na ibinigay ng Kanyang mga tagapaglingkod.
Paghahanda ng estudyante: Sabihin sa mga estudyante na dumating sa klase na handang magbahagi ng pahayag mula sa isang lider ng Simbahan na makabuluhan sa kanila at ipaliwanag kung bakit. Ang pahayag na ito ay maaaring mula sa isang mensahe sa pangkalahatang kumperensya, mensahe sa broadcast, social media post, o isang bagay na katulad nito.
Mga Posibleng Aktibidad sa Pag-aaral
Ang mga tagapaglingkod ng Tagapagligtas ay nagbabahagi ng mga mensahe mula sa Kanya
Magpakita ng kasalukuyang larawan ng Unang Panguluhan at Korum ng Labindalawang Apostol. Sabihin sa mga estudyante na talakayin ang isang bagay na itinuro kamakailan ng mga lider na ito. Sabihin sa mga estudyante na ilista ang ilan sa mga setting na ginagamit ng mga lider ng Simbahan upang ibahagi sa atin ang mga mensahe ng Panginoon. Pagkatapos ay sabihin sa mga estudyante na sagutin ang mga sumusunod na tanong sa klase o sa kanilang study journal:
-
Kung may isang taong mag-oobserba sa inyong buhay, ano ang makikita niya na nagpapamalas ng pagpapahalaga ninyo sa mga salita ng mga tagapaglingkod ng Panginoon?
Basahin ang Doktrina at mga Tipan 1:37–38, at alamin ang iniuutos ng Tagapagligtas na gawin natin sa mga salita ng Kanyang mga tagapaglingkod.
-
Ano sa palagay ninyo ang mahalagang tandaan mula sa passage na ito?
-
Anong mga katotohanan ang matutukoy ninyo?
Maaaring matukoy ng mga estudyante ang katotohanang tulad ng sumusunod: Inuutusan tayo ng Panginoon na saliksikin ang mga salitang sinasabi Niya sa atin sa pamamagitan ng Kanyang mga tagapaglingkod (Doktrina at mga Tipan 1:37–38).
-
Paano ninyo pinagsikapang saliksikin ang mga salita ng mga tagapaglingkod ng Panginoon bilang bahagi ng inyong regular na pag-aaral ng ebanghelyo?
Sa pagtatapos ng pangkalahatang kumperensya noong Abril 2018, ipinaabot ni Pangulong Russell M. Nelson ang sumusunod na paanyaya. Maghanap ng mga salita o parirala na makatutulong sa isang tao na maunawaan ang kahalagahan ng pag-aaral ng mga mensahe ng mga lider ng Simbahan.
Pinapayuhan ko kayo na pag-aralan ang mga mensahe ng kumperensyang ito nang madalas—kahit paulit-ulit—sa susunod na anim na buwan. Matapat na maghanap ng paraan para maisama ang mga mensaheng ito sa inyong family home evening, inyong pagtuturo ng ebanghelyo, inyong pakikipag-usap sa pamilya at mga kaibigan, at maging mga pakikipag-usap ninyo sa mga hindi natin kamiyembro. Maraming mabubuting tao ang aayon sa mga katotohanan na itinuro sa kumperensyang ito kapag ibinahagi ng may pag-ibig. Ang hangarin ninyong sumunod ay titindi habang inaaalala at pinag-iisipan ninyo ang mga nadama ninyo nitong nakaraang dalawang araw. (Russell M. Nelson, “Magpatuloy Tayo,” Liahona, Mayo 2018, 118)
-
Ano ang natuklasan ninyo?
Sabihin sa mga estudyante na i-assess ang kanilang kasalukuyang pagsisikap na pag-aralan ang mga mensahe mula sa mga lider ng Simbahan. Maaari nilang isipin kung gaano kadalas silang mag-aral o makinig ng mga mensahe mula sa mga lider ng Simbahan at kung paano maaaring pag-aralan ng kanilang pamilya ang mga gayong mensahe. Maaaring pag-isipan ng mga estudyante kung nais nilang mas pagtuunan ng pansin ang mga mensahe sa pangkalahatang kumperensya bilang bahagi ng kanilang pag-aaral ng ebanghelyo.
-
Ano ang ilang paraan na maisasama ninyo ang mga turo ng mga lider ng Simbahan sa inyong pag-aaral ng ebanghelyo?
-
Paano kayo napagpala ng Panginoon sa paggawa nito?
Palalimin ang inyong pag-aaral
Ang susunod na bahagi ng lesson ay naglalayong bigyan ang mga estudyante ng pagkakataong magsanay sa pag-aaral ng mga mensahe ng lider ng Simbahan gamit ang mga ideya mula sa template na “Mga Turo ng mga Lider ng Simbahan.” Maihahanda nito ang mga estudyante na pag-aralan ang mga mensahe ng mga lider ng Simbahan sa mga lesson sa hinaharap.
Ang mga sumusunod na ideya ay hango sa bahaging “Pag-aralan ang mensahe” at “Palalimin ang pag-unawa” ng template. Maaari kang pumili ng iba pang ideya mula sa template o magbigay ng mga katulad na opsiyon na ginawa mo.
Pumili ng isa sa mga sumusunod upang matulungan kang magsanay na pag-aralan ang isang mensahe mula sa isa sa mga tagapaglingkod ng Panginoon:
-
Isulat ang salitang Jesucristo sa gitna ng isang pahina ng iyong study journal. Habang pinag-aaralan mo ang mensahe, hanapin ang mga salita o parirala na nagtuturo tungkol sa pagkatao, mga katangian, at mga tungkulin ni Jesucristo. Isulat sa iyong journal ang natutuhan at nadama mo tungkol kay Jesucristo at kung paano ito makatutulong sa iyo na sundin Siya.
-
Tukuyin ang mga banal na kasulatan na binanggit sa mensahe (o sa mga endnote). Basahin ang mga talata at bigyang-pansin ang itinuturo o ipinauunawa sa iyo ng mga ito tungkol sa paksa. Maaari mong pag-ugnayin ang talata at ang mensahe sa iyong Gospel Library o maaari kang magsulat ng tala sa iyong mga banal na kasulatan.
-
Gamit ang natutuhan mo sa mensahe, gumawa ng larawan, drowing, poster, meme, social media post, o isang bagay na katulad nito na maaaring magsilbing paalala o magbigay-inspirasyon sa isang tao. Maghandang ibahagi ang ginawa mo, at ipaliwanag ang mensahe at kung paano nito mapagpapala o mabibigyang-inspirasyon ang iba.
Upang matulungan ang mga estudyante na magsanay sa pag-aaral ng mensahe mula sa mga lider ng Simbahan, magbigay ng isang bahagi ng mensahe o buong mensahe mula sa pangkalahatang kumperensya, isang artikulo sa magasin na Liahona o Para sa Lakas ng mga Kabataan, o sa mga debosyonal o broadcast ng Simbahan. Bigyan ang mga estudyante ng sapat na oras upang makapag-aral gamit ang ideyang pinili nila sa itaas.
Maaari kang maglakad-lakad sa silid-aralan at tulungan at hikayatin ang mga estudyante habang nagsasanay sila. Kasunod ng aktibidad, maaari mong isaayos ang mga estudyante sa mas maliliit na grupo upang maibahagi ang ideyang pinili nila, ang kasanayang pinraktis nila, at ang mga naiisip at nadarama nila habang nag-aaral sila.
Kung may oras pa, maaari mong sabihin sa mga estudyante na magpraktis ng isa pang kasanayan mula sa template gamit ang parehong mensahe.
Ang kahalagahan ng pag-aaral ng mga salita ng mga tagapaglingkod ng Panginoon
Sabihin sa mga estudyante na pumili ng isa sa mga sumusunod na tanong na tatalakayin o sasagutin sa kanilang study journal:
-
Ano ang natutuhan o nadama mo ngayon na nakatulong sa iyo na madama ang kahalagahan ng mga salita ng Tagapagligtas na ibinigay ng Kanyang mga tagapaglingkod?
-
Ano ang gusto mong maalala habang patuloy mong pinag-aaralan ang mga mensahe ng mga tagapaglingkod ng Panginoon?
-
Paano ka makikinabang sa pag-aaral ng mga mensahe mula sa mga lider ng Simbahan bilang bahagi ng iyong regular na pag-aaral ng ebanghelyo?
Maaari mong anyayahan ang mga estudyante na magplano kung paano nila pag-aaralan ang mga mensahe ng mga tagapaglingkod ng Panginoon bilang bahagi ng kanilang regular na pag-aaral ng ebanghelyo. Maaari kang magbahagi ng iyong karanasan nang marinig mo ang tinig ng Panginoon habang pinag-aaralan mo ang mga mensahe ng Kanyang mga lider.