“Lēsoni 192—Ako Maʻá e Laumālié Kotoa: Ko e Fekumi ki he Ako Fakalaumālié mo e Fakamāmaní Fakatouʻosi,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ako Maʻá e Laumālié Kotoa,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 192: Ko e Teuteu ki he Akó mo e Ngāue Maʻuʻanga Moʻuí ʻi he Kahaʻú
Ako maʻá e Laumālié Kotoa
Ko e Fekumi ki he Ako Fakalaumālié mo e Fakamāmaní Fakatouʻosi
ʻOku fakaafeʻi kitautolu ʻe he ʻEikí ke tau fekumi ki he ako fakalaumālié mo e fakamāmaní fakatouʻosi, “koeʻuhí ke mou mateuteu ʻi he ngaahi meʻa kotoa pē” (Tokāteline mo e Ngaahi Fuakava 88:80). ʻE lava ke tokoni ʻa e lēsoni ko ʻení ki he kau akó ke faʻu ha palani ke hoko atu ʻenau ako fakalotú lolotonga ʻenau feinga ki heʻenau ako fakaʻatamai ʻi he kahaʻú.
Ngaahi ʻEkitivitī Ako ʻOku Ala Fakahokó
Tuku ha taimi ki he ʻEikí ʻi hoʻo akó
Fakakaukau ke kamata ʻa e lēsoní ʻaki hano vahevahe ʻa e tūkunga ko ʻení:
Fakakaukauloto ʻokú ke tala ki ha taha ho ngaahi kaungāmeʻá ʻokú ke ʻalu ki he seminelí. Hili hoʻo fakamatalaʻi ʻa e ʻuhinga ʻo e seminelí, ʻoku fehuʻi atu ʻe ho kaungāmeʻá, “Ko e hā ka fie tuku ai ʻe ha taha ha taimi ki ha kalasi pehē?”
-
Ko e hā te ke vahevahe ange ki ho kaungāmeʻá?
Fakakaukau ke fai ha toe ngaahi fehuʻi hangē ko ʻení ke tokoni ki he kau akó ke nau vakai ki he founga kuo faitāpuekina ai ʻenau moʻuí ʻe he ʻalu ki he seminelí.
-
Kuo tāpuekina fēfē koe ʻi hoʻo tuku ha taimi maʻá e ʻEikí ʻi hoʻo akó ʻaki hoʻo ʻalu ki he seminelí?
-
Kuo liliu fēfē nai ‘e he ʻalu ki he seminelí hoʻo ngaahi ako fakaʻatamaí?
Fakamatalaʻi ange ko e hili hono fakakakato ʻe he kau akó ʻenau aʻusia ʻi he seminelí, te nau maʻu ha ngaahi faingamālie lolotonga ʻenau ʻi he kakai lalahi kei talavoú ke hokohoko atu ʻenau ako fakalotú. ʻE fakafeʻiloaki ʻe he lēsoni ko ʻení ʻa e kau akó ki he ngaahi faingamālie ko ʻení.
Poupouʻi ʻa e kau akó ke tokanga ki he ngaahi ueʻi ʻa e Laumālié, ʻa ia ʻe lava ʻo tokoni ke nau fakatokangaʻi ʻa e mahuʻinga ʻo e fekumi ki he ako fakalaumālié ʻi he kotoa ʻo ʻenau ngaahi ako fakaʻatamaí. Te ke lava foki ʻo fakaafeʻi e kau akó ke fekumi ki ha fakahinohino mei he Tamai Hēvaní pe ko e fē ʻa e ngaahi meʻa ke fili mei ai ki he ako fakalotú ke fakahoko ʻi he kahaʻú.
Ko e mahuʻinga ʻo e ako fakalaumālié
ʻI he Tokāteline mo e Ngaahi Fuakavá, ʻoku akoʻi ʻe he ʻEikí ʻoku totonu ke tau tulifua ki ha ngaahi kaveinga lahi ʻo e ʻiló koeʻuhí ke tau lava ʻo mateuteu ke tokoniʻi ʻa e niʻihi kehé. Lau ʻa e Tokāteline mo e Ngaahi Fuakava 88:78–80, 118, ʻo kumi ki he faleʻi ʻa e ʻEikí.
-
Makatuʻunga ʻi he meʻa naʻá ke ako ʻi he ngaahi veesi ko ʻení, ko e hā ʻoku kole mai ʻe he ʻEikí ke tau ako kae lava ke tau mateuteu ke tokoniʻi ʻa e niʻihi kehé?
Mahalo ʻe ʻiloʻi ʻe he kau akó ha moʻoni hangē ko ʻení: ʻOku fakaafeʻi kitautolu ʻe he ʻEikí ke tau tokanga taha ki he ʻilo fakalaumālié mo e fakamāmaní fakatouʻosi ʻi heʻetau feinga ke maʻu ʻa e ʻiló. Mahalo ʻe tokoni ke fakamatalaʻi ange ko e ako fakamāmaní ʻoku ʻuhinga ia ki he ako ʻa ia ʻoku ʻikai fekauʻaki hangatonu mo e ngaahi akonaki ʻo e ongoongoleleí.
-
Ko e hā te ke talaange ki ha taha ʻokú ne ongoʻi ʻoku ʻikai ke ʻi ai hano taimi ki he ako fakalotú koeʻuhí he ʻoku nau fuʻu tokanga ki heʻenau ako fakamāmaní?
ʻE ala tokoni ke fakaafeʻi ʻa e kau akó ke nau ako ʻa e Tokāteline mo e Ngaahi Fuakava 29:34, ko ha konga ʻo hoʻo aleaʻi ʻo e fehuʻi kimuʻá. Te nau lava ʻo fekumi ki ha ngaahi akonaki ʻe tokoni ke nau ʻiloʻi lelei ange ai ʻa e ʻuhinga ʻoku finangalo ai ʻe he ʻEikí ke tukutaha ʻenau tokangá ʻi he ako fakalotú mo fakamāmaní fakatouʻosi.
-
ʻE fakamālohia fēfē ho vā fetuʻutaki mo e Tamai Hēvaní mo Sīsū Kalaisí ʻi hoʻo tokanga taha ki he ako fakalotú fakataha mo hoʻo ngaahi ako fakaʻatamai kehé?
Hili hono aleaʻi ʻe he kau akó ʻa e ngaahi fehuʻi kimuʻá, fakakaukau ke fakaʻaliʻali mo vahevahe ʻa e lea ko ʻeni ʻa Palesiteni Henelī B. ʻAealingí.
Naʻe fakamatalaʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻa e ngaahi tāpuaki te tau lava ʻo aʻusia ʻi heʻetau feinga ke fakapalanisi e ako fakalaumālié mo e fakamāmaní:
ʻOku totonu ke hoko ʻa e ako fakalaumālié ko e ʻuluaki meʻa ia ʻoku tau fakamuʻomuʻá. … ʻOku mahino ʻi hono fakamuʻomuʻa ʻo e ako fakalaumālié, ʻoku ʻikai ke ne fakamaʻamaʻa ai kitautolu mei heʻetau ako fakamāmaní. ʻI he tafaʻaki ʻe tahá, ʻokú ne ʻomi ha taumuʻa ki heʻetau ako fakamatelié mo fakaʻaiʻai kitautolu ke tau ngāue mālohi ange ai.
Kuo pau ke tau fakahoko ha ngaahi fili faingataʻa ki he founga ʻoku tau fakaʻaongaʻi ai hotau taimí, kapau te tau fakamuʻomuʻa ʻa e ako fakalaumālié. Ka ʻoku ʻikai totonu ke teitei fakahoko ha fili ʻi he ʻiloʻilo pau ke tuku ʻa e meʻa fakalaumālié ke fika ua hake ko ha sīpinga angamaheni ʻi heʻetau moʻui. ʻOua ʻAupito. ʻE iku ia ki ha fakamamahi. Mahalo he ʻikai ke hā mahino mai ʻa e meʻa fakamamahí ʻi he kamataʻangá, pe ʻe faifai pea mahino ia ʻi he moʻui fakamatelié. Ka ke manatuʻi, ʻokú ke mahuʻingaʻia ʻi he ako fakaʻatamaí, ʻo ʻikai ngata pē ʻi he moʻui fakamatelié, ka ʻi he moʻui taʻengatá foki. ʻI he taimi te ke ʻiloʻi lelei ai ʻa e foʻi moʻoni ko iá ʻaki ha vakai fakalaumālie, te ke fakamuʻomuʻa leva ʻa e ako fakalaumālié kae ʻikai holoki ai ʻa e ako fakamatelié. Ko hono moʻoní, te ke ngāue mālohi ange ʻi hoʻo ako fakamatelié ʻo laka ange ʻi he meʻa naʻá ke mei fai ka ne taʻeʻoua ʻa e vīsone fakalaumālie ko iá. (Henry B. Eyring, “Education for Real Life,” Ensign, Oct. 2002, 17–18).
Ngaahi fili ki he ako fakalotú ʻi he Potungāue Ako ʻa e Siasí
Kuo tāpuekina kitautolu ʻe he Tamai Hēvaní ʻaki ha ngaahi akoʻanga fakaako ʻoku fakalele ʻe he Siasí ʻe lava ʻo tokoni ke tau fakamuʻomuʻa ʻa e ako fakalaumālié. Naʻe fakatupu ʻa e ngaahi faʻunga fakalaumālie ko ʻení ke tāpuekina ʻa e fānau ʻa e ʻOtuá.
Tokoniʻi ʻa e kau akó ke nau maheni mo e ngaahi meʻa ke fili mei ai ki he ako fakalotú lolotonga honau ngaahi taʻu kakai lalahi kei talavoú. Te ke lava ʻo fai ʻeni ʻaki hano huluʻi ʻa e vitiō “The Growth and Momentum of the Church Educational System.”
Te ke lava foki ʻo tufa ʻa e laʻipepa tufa ʻoku ui ko e “Potungāue Ako ʻa e Siasí” pea ʻoange ha taimi ki he kau akó ke nau lau mo ako fekauʻaki mo e ngaahi meʻa kehekehe ke fili mei aí.
Tuku ha taimi ke lau mo aleaʻi fakakalasi ai ʻa e konga ʻoku ui ko e “Ngaahi ʻInisititiuti ʻo e Lēsoni Fakalotú.” ʻOange ha faingamālie ki he kau akó ke nau fai ha ngaahi fehuʻi fekauʻaki mo e ʻinisititiutí. Mahalo ʻe tokoni ke fakaafeʻi ha faiako ʻinisititiuti pe tokotaha ako fakalotofonua ke talanoa fekauʻaki mo e ʻinisititiutí mo tali ʻa e ngaahi fehuʻí.
Hili hono aleaʻi ʻa e ʻinisititiutí, ʻoange ha taimi ki he kau akó ke nau lau mo ako fekauʻaki mo e ngaahi fili kehe ʻoku lisi ʻi he laʻipepa tufá. Fakaafeʻi ʻa e kau akó ke kumi ha fakamoʻoni ʻo e ʻofa ʻa e ʻOtuá mo ʻEne ngaahi finangalo kiate kitautolú ʻi heʻenau ako ʻa e ngaahi fili kehekehe ke faí. Neongo ʻoku ʻalu ʻa e kau ako mei he funga ʻo e māmaní ki he ngaahi ʻapiako takitaha ʻi he Potungāue Ako ʻa e Siasí (CES), ka ʻe tokoni ke fakaʻaliʻali ki he kau akó ʻa e ngaahi fili ʻoku fekauʻaki lahi taha ʻi homou feituʻú. ʻE lava ke tokoni ʻa e saati ko ʻení:
|
Ngaahi ʻĒlia Fakasiokālafi ʻOku Fakataumuʻa Ki Aí |
Ngaahi Akoʻangá ʻa e Potungāue Ako ʻa e Siasí (CES) |
|---|---|
Ngaahi ʻĒlia Fakasiokālafi ʻOku Fakataumuʻa Ki Aí Fakaemāmani Lahi | Ngaahi Akoʻangá ʻa e Potungāue Ako ʻa e Siasí (CES) ʻInisititiuti Fakalotú; BYU–Pathway Fakaemāmani Lahí |
Ngaahi ʻĒlia Fakasiokālafi ʻOku Fakataumuʻa Ki Aí ʻIunaiteti Siteití mo Kānata | Ngaahi Akoʻangá ʻa e Potungāue Ako ʻa e Siasí (CES) ʻUnivēsiti Pilikihami ʻIongí; BYU–ʻAitahō |
Ngaahi ʻĒlia Fakasiokālafi ʻOku Fakataumuʻa Ki Aí ʻĒsia mo e ʻOtu Motu Pasifikí | Ngaahi Akoʻangá ʻa e Potungāue Ako ʻa e Siasí (CES) BYU–Hauaiʻi |
Ngaahi ʻĒlia Fakasiokālafi ʻOku Fakataumuʻa Ki Aí ʻIutā mo e ngaahi siteiti takatakaí | Ngaahi Akoʻangá ʻa e Potungāue Ako ʻa e Siasí (CES) Kolisi Ensign |
Kimuʻa pea fakaafeʻi ʻa e kau akó ke ako ki he ngaahi akoʻanga CES kehé, fakakaukau ke tokoniʻi ʻa e kau akó ke nau fakafuofuaʻi pe ko e fē ʻi he ngaahi akoʻangá ʻe ʻaonga taha kiate kinautolú.
Ko e founga ʻe taha te ke lava ʻo fai ai ʻení ko hano faʻu ha ngaahi fakatotolo ʻe niʻihi ʻokú ne fakamatalaʻi ʻa e kakai ʻoku nau feʻunga lelei mo e ngaahi akoʻanga takitaha. Ko ha founga ʻe taha ko hono ʻoange ki he kau akó ʻa e laʻipepa tufa ʻoku ui “Ko e Akoʻanga CES Fē ʻOku Totonu Maʻakú?” Hili hono lau ʻe he kau akó ʻa e laʻipepa tufá pea ʻiloʻi ʻenau ngaahi fiemaʻú mo e ngaahi holí, fakaafeʻi kinautolu ke kumi ʻa e ngaahi akoʻanga ʻe lava ke feʻunga mo kinautolú.
Ko e Akoʻanga CES Fē ʻOku Totonu Maʻakú?
Fakaʻilongaʻi ʻa e ngaahi fakamatala ʻokú ke ongoʻi ʻokú ne fakamatalaʻi lelei taha koé:
-
Koeʻuhí ko e ngāué pe ngaahi fatongia kehé, te u fiemaʻu ha feliliuaki ʻi heʻeku taimi-tēpilé.
-
Kuó u maʻu ha ngaahi maaka lelei ʻi he kuohilí.
-
ʻE ʻaonga kiate au ke ʻi ai haʻaku faiako fakaʻatamai.
-
ʻE faingataʻa ke u maʻu ʻa e paʻanga ʻoku fiemaʻu ke totongi ʻaki ʻeku ako ʻunivēsití.
-
Mahalo ʻe faingataʻa ke u feʻunga mo e ngaahi kolisi pe ʻunivēsiti lahi.
-
ʻOku ou saiʻia ʻi ha aʻusia fakaʻatamai fakamātoato.
-
ʻOku ou saiʻia ʻi he kalasi ʻoku tokosiʻí.
-
ʻOku ou palani ke hū ki he ʻunivēsití kae ʻikai ʻi ha taha ʻo e ngaahi kolisi pe ʻunivēsiti ʻa e Siasí.
Potungāue Ako ʻa e Siasí
Taumuʻa ʻa e CES: Fakatupulaki ʻa e kau ākonga ʻa Sīsū Kalaisi ʻoku nau hoko ko e kau taki ʻi honau ngaahi ʻapí, Siasí, mo honau tukui koló.
[Peesi 1]
Tānaki ʻo ʻIsilelí:
“ʻOku fakaʻaongaʻi ʻe he ʻEikí ʻa e akó ʻi he tānaki maʻongoʻonga ʻo ʻIsileli ʻoku hoko ʻi he Siasí ʻi he ʻaho ní. ʻOkú Ne teuteuʻi ʻa e māmaní ki Heʻene toe hāʻele maí, pea ko e Polokalama Ako ʻa e Siasí ko e taha ia ʻo e ngaahi maʻuʻanga tokoni lahi te Ne fakaʻaongaʻi ʻi he ngāue ko iá. ʻOku fai ʻe he akoʻanga takitaha ha meʻa ʻoku kehe ke tāpuekina ai ha Siasi fakaemāmani lahi. ʻOku kehekehe pē taumuʻa ʻa e akoʻanga takitaha mo e tuʻutuʻuni mei he kau taki ʻo e Siasí ke nau kehe mei māmani, pea ko e mālié, ke nau faikehekehe ʻiate kinautolu.”
—ʻEletā Clark G. Gilbert, Komisiona ʻo e Potungāue Ako ʻa e Siasí
-
LESISITA ke maʻu ha fakamatala lahi ange fekauʻaki mo e faingamālie takitaha: cesinfo.byu.edu.
-
KE KOLE ki ha taha ʻo e ngaahi fili ko ʻení, ʻalu ki he apply.ChurchofJesusChrist.org.
-
AKO LAHI ANGE fekauʻaki mo e akoʻanga takitaha ʻi he peesi hono hoko ʻo e laʻipepa tufa ko ʻení.
[Peesi 2]
Ngaahi ʻInisititiuti Fakalotú
Ko e ʻinisititiutí ko ha feituʻu ia maʻá e kakai lalahi kei talavoú ke nau fakataha ai mo honau ngaahi kaungāmeʻá—ʻi he akó pe ʻikai—ʻoku nau maʻu ha holi ke moʻui ʻaki ʻa e ngaahi moʻoni taʻengatá lolotonga ʻenau fehangahangai mo e ngaahi moʻoniʻi meʻa fakamāmani ʻo e moʻui fakaʻahó. Ko e taumuʻa ʻo e ʻinisititiutí ke tokoniʻi ʻa e kakai lalahi kei talavoú ke nau ʻiloʻi mo fakaʻaongaʻi ʻa e ngaahi hala ʻoku ʻaongá ke nau hoko ai ʻo hangē ange ko Sīsū Kalaisí.
ʻOku feʻiloaki ʻa e ʻinisititiutí mo e kau akó ʻi he feituʻu ʻoku nau ʻi ai ʻi heʻenau fononga ʻi he tuí. Ko ha feituʻu ia te nau aʻusia ai ʻa e:
-
Naunau fakalēsoni ʻoku fakatefito ʻia Kalaisí mei he folofolá mo e ngaahi akonaki fakaepalōfitá.
-
Fekumi ki he founga ke fakaʻaongaʻi ai ʻa e ngaahi tūkunga fakalaumālie mo fakapotopoto ʻo e moʻuí.
-
Ko ha feituʻu ʻo e fakaʻapaʻapa, mahino, mo e malu ke kau mai, fai ha ngaahi fehuʻi, mo maʻu ha ngaahi fakakaukau.
-
Fakahinohino ʻi he ʻinitanetí mo e tokotaha totonú, ngaahi ako ngāué, mo e ngaahi fealēleaʻaki fengāueʻakí.
Ako lahi ange ʻi he institute.ChurchofJesusChrist.org.
BYU–Pathway Fakaemāmani Lahí
ʻOku ʻai ʻe he BYU–Pathway Fakaemāmani Lahí ke malava ʻo maʻu ha mataʻitohi ʻi he ʻunivēsití maʻá e tokotaha kotoa pē.
Ko e fānau ako ko ia ʻoku nau fiemaʻu ke lava ʻo feliliuaki ha ako ʻi he ʻinitanetí, fiemaʻu ke langaki ha loto-falala fakaʻekatēmika, pe fiemaʻu ha taimi lahi ange ke ʻiloʻi ai ʻa e meʻa ke fai hili ʻa e ako māʻolungá, ʻe lava ke ʻaonga ia mei he BYU–Pathway Fakaemāmani Lahí.
-
ʻOku tokoniʻi ʻe he BYU–Pathway Fakaemāmani Lahí ʻa e fānau akó ʻi ha ngaahi fonua ʻe 180 tupu.
-
ʻOku maʻulalo ʻaupito ʻa e totongi ʻo e ngaahi kalasí ʻi he ʻinitanetí, pea ʻoku maʻulalo ange ʻa e totongi akó ʻi he ngaahi ʻapiako kehé.
-
ʻE lava ke maʻu ʻe he kau akó ha ngaahi tohi fakamoʻoni ʻe lava ke fakataukeiʻi pea lava ke nau hiki ki he ngaahi mataʻitohi ʻi he ʻinitanetí ʻo fakafou ʻi he BYU–ʻAitahoó mo e Kolisi Ensign.
-
ʻOku feʻunga mo ha taʻu ʻe taha pe siʻi ange hono fakakakato ʻa e tohi fakamoʻoni takitaha naʻe foakí.
Ako lahi ange ʻi he cesinfo.byu.edu.
ʻUnivēsiti Pilikihami ʻIongí
Ko e misiona ʻa e Brigham Young ʻUnivēsití (BYU) ke tokoniʻi ʻa e fakafoʻituituí ʻi heʻenau feinga ki he haohaoá mo e moʻui taʻengatá. ʻOku ʻomi ʻe BYU ha vahaʻataimi ʻo e ako lahi ʻi ha feituʻu fakaʻaiʻai ʻa ia ʻoku fiemaʻu ai ke fai ha tukupā ki he lelei tahá pea mo ʻiloʻi kakato ʻa e meʻa ʻe malava ʻe he tangatá. ʻOku feinga ʻa BYU ke fakatupulaki ʻa e fānau ako ʻo e tuí, potó, mo e ʻulungaanga ʻoku nau maʻu ʻa e ngaahi pōtoʻi ngāue mo e holi ke hokohoko atu ʻenau akó mo tokoniʻi ʻa e niʻihi kehé ʻi he kotoa ʻo ʻenau moʻuí.
-
ʻOku maʻu ʻe BYU ha ngaahi faingamālie ako fakalaumālie ʻokú ne fakatahaʻi ʻa e ngaahi moʻoni fakalaumālié, aʻusia fakatotoló, mo e ako ʻaki hono fakahokó [hands on] maʻá e fānau ako kotoa pē.
-
Ko ha kamataʻanga ia ki he ako mataʻitohí mo e ngaahi ngāue maʻuʻanga moʻui ʻoku fakafiemālié.
-
ʻOkú ne ʻomi ha aʻusia angamaheni ʻo e ʻunivēsití ʻi he sipoti ʻa e NCAA mo e ʻaati ʻa e māmaní pea mo e ngaahi fakaʻaliʻali hivá.
Ako lahi ange ʻi he cesinfo.byu.edu.
BYU–ʻAitahō
ʻOku fakatupulaki ʻe BYU–ʻAitahō ʻa e ngaahi fakamoʻoni ki he ongoongolelei ʻo Sīsū Kalaisi kuo fakafoki maí mo ohi mai hono ngaahi tefitoʻi moʻoní ʻi ha ʻātakai fakaʻekatēmika, fakafonua, mo fakasōsiale lelei. ʻOku fakataumuʻa ʻa e ngaahi kalasí ke ʻoatu ha aʻusia moʻoni ʻi he māmaní ke teuteuʻi ʻa e kau akó ki he ngaahi meʻa kehekehe ʻoku nau manako aí mo e ngaahi meʻa ʻoku nau malavá ki he akó mo e ngāue maʻuʻanga moʻuí kotoa. ʻOku feinga ʻa BYU–ʻAitahō ke fai ha ako lelei ʻaupito ʻi ha mahuʻinga maʻamaʻa ki he tokolahi taha ʻo e fānau ako ʻe lavá.
-
ʻOku laka hake ʻi he meisa (major) ʻe 100 ʻa hono foaki ʻo e ngaahi mataʻitohí.
-
ʻOku hoko ʻa e kau mēmipa ʻo e kau faiakó ko ha kau mataotao ʻi honau takitaha malaʻé pea fakamuʻomuʻa hono akoʻi mo fakahinohinoʻi ʻa e fānau akó.
-
ʻAvalisi ʻo e tokolahi ʻo e kalasí ko e fānau ako ʻe toko 30.
Ako lahi ange ʻi he cesinfo.byu.edu.
BYU–Hauaiʻi
ʻOku teuteuʻi ʻe BYU–Hauaiʻi ʻa e kau akó ʻi heʻenau tokanga taha ki he fānau ako mei he Pasifikí mo e Feituʻu Takatakai ʻo ʻĒsiá, ke nau hoko ko ha faʻifaʻitakiʻanga ki māmani ʻo e melino mo e uouangataha ʻo fakafou ʻi hono moʻui ʻaki ʻa e ngaahi akonaki ʻa Sīsū Kalaisí. ʻOku mateuteu ʻa e kau ʻosi mei BYU–Hauaiʻí ki he ngāue tokoni ʻi he kotoa ʻo e moʻuí. ʻOku nau fakatātaaʻi ʻa e ngaahi taukei ʻi he fakakaukaú mo e ʻulungaanga ʻo ha tamaioʻeiki-taki.
-
ʻOku palani ʻe he kau akó honau ngaahi hala fakaʻekatēmika makehé ʻaki hono fili ha mēsia lahi ʻe taha mo ha ongo foʻi maina pe tohi fakamoʻoni ʻe ua ʻi he ngaahi tafaʻaki kehekehe ʻo e akó.
Ako lahi ange ʻi he cesinfo.byu.edu.
Kolisi Ensign
ʻI he tokanga taha ʻa e Kolisi Ensign ki he fānau ako mei he ʻēlia lahi ange ʻo ʻIutaá, ʻoku fakatupulaki ai ʻe he Kolisi Ensign ha kau ākonga lavameʻa mo falalaʻanga ʻo Sīsū Kalaisi. ʻOku fakapapauʻi ʻe he naunau fakalēsoni ʻoku fakatefito ʻi he ngaahi taukeí ʻoku maʻu ʻe he kau akó ha aʻusia ʻokú ne teuteuʻi kinautolu ke nau maʻu ha vāhenga feʻauʻauhi ʻi ha taʻu ʻe taha ki he fā. ʻOku tokoni ha ʻātakai ʻoku tanumaki fakalaumālié ki he ako fakamātoato ʻi he loki akó.
-
ʻE lava ke kole hū mai ki ai ha taha pē.
-
ʻOku ʻi ai ha ngaahi tohi fakamoʻoni ʻe 25 pe lahi ange ke fili mei ai, ʻa ia ʻe lava ke fakaʻaongaʻi ki ha mataʻitohi AA pe mataʻitohi B.A.
-
ʻOku maʻu ʻa e ngaahi tohi fakamoʻoni mo e ngaahi mataʻitohi ʻi he ʻinitanetí ʻo fakafou ʻi he BYU–Pathway Fakaemāmani Lahí.
-
ʻOku ʻi ai ha matakali kehekehe ʻo e fānau akó.
Ako lahi ange ʻi he cesinfo.byu.edu.
Hili hono maʻu ʻe he kau akó ha taimi feʻunga ke lau mo ako ʻa e ngaahi meʻa ke fili mei aí, ʻoange ha taimi ke nau vahevahe ai ʻa e meʻa ne nau akó ʻaki hano aleaʻi ʻa e ngaahi fehuʻi hangē ko ʻení:
-
Ko e hā ha ngaahi fakakaukau naʻá ke maʻu ʻi hoʻo ako ʻa e ngaahi fili ko ʻení?
-
Ko e hā ha fakamoʻoni naʻá ke maʻu ki he ʻofa mo e finangalo ʻa e ʻOtuá ki Heʻene fānaú?
-
ʻOku kei ʻi ai haʻo ngaahi fehuʻi?
Faʻu ha palani
Faʻu ha palani ke fakamuʻomuʻa hoʻo ako fakalaumālié ʻi he taimí ni pea ʻi he kahaʻú fakatouʻosi.
-
Kapau ʻoku kei toe haʻo ngaahi taʻu ʻi he seminelí, hiki hifo ha taumuʻa ke hokohoko atu hono fakamuʻomuʻa ʻo e ako fakalaumālié.
-
Kapau ʻoku mei ʻosi hoʻo fakakakato ʻo e seminelí, hiki hifo pe ko e hā hoʻo sitepu hokó.
-
ʻE tokoniʻi fēfē koe ʻe hoʻo palaní ke hokohoko atu hoʻo ʻunu ke ofi ange ki he Fakamoʻuí?
Fakaafeʻi ha kau ako ʻe niʻihi te nau loto-fiemālie ke vahevahe ʻenau ngaahi palaní mo e kalasí. Poupouʻi kinautolu ke talanoa mo ha mātuʻa, taki ʻo e Siasí, pe fakataukei fekauʻaki mo ʻenau ngaahi palaní mo e ʻamanaki ki he kahaʻú.
Vahevahe hoʻo fakamoʻoní ki hono mahuʻinga ʻo hono fakamuʻomuʻa ʻo e ako fakalaumālié.