“Lēsoni 193—Ko Hono ʻIloʻi Ho Ngaahi Mālohingá mo e Meʻa ʻOkú ke Malavá: Teuteu ki he Ngāue Maʻuʻanga Moʻuí mo e Ngaahi Fatongia Kehe ʻi he Kahaʻú,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko Hono ʻIloʻi Ho Ngaahi Mālohingá mo e Meʻa ʻOkú ke Malavá,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 193: Ko e Teuteu ki he Akó mo e Ngāue Maʻuʻanga Moʻuí ʻi he Kahaʻú
Ko Hono ʻIloʻi Ho Ngaahi Mālohingá mo e Meʻa ʻOkú ke Malavá
Teuteu ki he Ngāue Maʻuʻanga Moʻuí mo e Ngaahi Fatongia Kehe ʻi he Kahaʻú
ʻI he teuteu ʻa e toʻu tupú ki he ngaahi fatongia mo e ngaahi faingamālie fakangāue ʻi he kahaʻú, ʻe ala tokoni ke nau ʻiloʻi ʻa e ngaahi mālohinga mo e ngaahi meʻa ʻoku ʻikai ke nau malava pe fiemaʻu ke fakatupulakí. ʻE lava ʻe heʻetau Tamai Hēvaní ʻo tataki kinautolu ke nau ʻiloʻi honau mālohingá mo e vaivaí ʻi heʻenau fekumi ki Heʻene tokoní. ʻE tokoni ʻa e lēsoni ko ʻení ki he kau akó ke nau teuteu ki he ngaahi fatongia mo e ngaahi faingamālie fakangāue ʻi he kahaʻú ʻaki ʻenau fakatokangaʻi ʻa e ngaahi mālohinga mo e ivi malava ʻoku lolotonga fiemaʻu ke nau fakatupulakí.
Ngaahi ʻEkitivitī Ako ʻOku Ala Fakahokó
Fakatokangaʻi ange: ʻE nofotaha ha lēsoni ʻi he kahaʻú ʻoku ui ko e “Ko Hono Fakatupulaki ʻo e Ngaahi Taukeí mo e Ngaahi Ivi Malavá” ʻi hono tokoniʻi ʻo e kau akó ke fakatupulaki ha niʻihi ʻo e ngaahi taukei mo e ngaahi ivi malava ʻoku nau ʻilo ʻi he lēsoni ko ʻení. Kapau ʻoku fiemaʻu ʻe hoʻo taimi-tēpile fakafaiakó ke fakatahaʻi ʻa e ngaahi lēsoní, ʻe lelei ke akoʻi fakataha ʻa e ongo lēsoni ko ʻení.
Ngaahi mālohinga mo e ngaahi ivi malavá ʻoku fiemaʻu ki he ola leleí
Fakakaukau ke hiki ʻi he palakipoé ha ngaahi fatongia kehekehe ʻe ala maʻu ʻe he kau akó ʻi he kahaʻú, hangē ko ʻení.
-
Tokotaha Ako
-
Tokotaha Akoako Ngāue
-
Mātuʻá
-
Hoa Malí
-
Tokotaha Ngāué
ʻE lava ke ke toe mahino ange ʻaki haʻo fakaafeʻi ha niʻihi ʻo e kau akó ke vahevahe ha ngaahi ngāue maʻuʻanga moʻui ʻi he kahaʻú te nau ala saiʻia ai pea hiki kinautolu ʻi he palakipoé kae ʻoua ʻe fakakau ʻa e tokotaha ngāué ko ha taha ʻo e ngaahi fatongiá.
ʻE lava ke aleaʻi ʻe he kau akó ‘a e fehuʻi ko ʻení ʻi ha fanga kiʻi kulupu iiki. Fakakaukau ke vahe ki he kulupu takitaha ha taha ʻo e ngaahi fatongia ke aleaʻí, pe te ke ʻai ke nau aleaʻi fakataha ʻa e ngaahi fatongiá kotoa.
-
Ko e hā ha niʻihi ʻo e ngaahi taukei pe ngaahi ivi malava ʻe lava ke ne tokoniʻi ha taha ke lavameʻa ʻi he ngaahi fatongia ko ʻení?
Fakaafeʻi ʻa e ngaahi kulupú takitaha ke nau vahevahe ʻa e meʻa ne nau aleaʻí. Te ke lava ʻo fakaafeʻi e ngaahi kulupú ke nau omi ki he palakipoé pea hiki ʻi he tafaʻaki ʻo e fatongia totonú ha niʻihi ʻo e ngaahi taukei pe ngaahi ivi malava naʻa nau ʻiló. Kapau ʻoku fiemaʻu tokoni ʻa e kau akó, fakakaukau ke fokotuʻu ange ha niʻihi ʻo e ngaahi taukei kuo lisi ʻi he laʻipepa tufá ʻamui ange ʻi he lēsoní.
Hili hoʻomou fealēleaʻakí, vahevahe ʻeni ke tokoni ki hono teuteuʻi ʻo e kau akó ki he toenga ʻo e lēsoní:
Fakakaukau ki he ngaahi fatongia pe ngaahi faingamālie fakangāue ʻokú ke fie fakahoko ʻi he kahaʻú. ʻI hoʻo ako ʻi he ʻaho ní, fekumi ki he fakahinohino ʻa e Tamai Hēvaní ʻo fakafou ʻi he Laumālie Māʻoniʻoní ke tokoni atu ke ke ʻiloʻi ʻa e ngaahi mālohinga mo e ngaahi taukei kuó ke ʻosi maʻú ʻa ia te ne lava ʻo teuteuʻi koe ki he ngaahi fatongia ko ʻení. Feinga foki ke ke ʻiloʻi ʻa e ngaahi taukei mo e ngaahi ivi malava ʻokú ke kei fiemaʻu ke fakatupulakí ʻa ia ʻe tokoni ke ke mateuteu lelei ange ai ki he kahaʻú.
Ko e meʻa te tau malava ʻo fakafou ʻia Sīsū Kalaisí
Fakamatalaʻi ange ʻe lava ke ongoʻi loto-foʻi ha kakai ʻe niʻihi ʻi he taimi ʻoku kole ange ai ke nau fakakaukau ki heʻenau ngaahi taukeí mo e meʻa ʻoku nau malavá koeʻuhí ʻoku ʻikai ke nau ongoʻi talēnitiʻia pe taukei ʻo hangē ko e niʻihi kehé. ʻOku ʻi ai ha ngaahi moʻoni taʻengata ʻoku akoʻi ʻi he folofolá ʻe lava ʻo tokoni ʻi he taimi ʻoku tau ongoʻi pehē aí.
Ako ha niʻihi ʻo e ngaahi potufolofola ko ʻení, ʻo kumi ʻa e ngaahi moʻoni taʻengata ʻe lava ʻo tokoni ke tau ʻiloʻi ʻetau malava ke aʻusia ʻa e meʻa te tau malavá ʻo fakafou ʻia Sīsū Kalaisí.
1 Samuela 16:7; Filipai 4:13; Sēkope 4:7; ʻAlamā 26:12; Tokāteline mo e Ngaahi Fuakava 18:10.
-
Ko e hā ha ngaahi moʻoni naʻá ke maʻu ʻe lava ʻo tokoni ki ha taha ʻokú ne ongoʻi ʻoku ʻikai ke nau taukei pe malava ke lavameʻa ʻi he moʻuí?
ʻE lava ke fakamahinoʻi ʻe he kau akó ha ngaahi moʻoni hangē ko ʻení: ʻOku ʻikai ʻafio ʻa e ʻEikí ki he fōtunga ʻoku hā ki tuʻá, ka ki he lotó (vakai, 1 Samuela 16:7); Te tau lava ʻo fai ʻa e meʻa kotoa pē ʻia Sīsū Kalaisi, ʻa ia te Ne lava ʻo fakamālohia kitautolú (vakai, Filipai 4:13; ʻAlamā 26:12); ʻOku mahuʻinga lahi ʻa hotau laumālié ʻi he ʻao ʻo e ʻOtuá (vakai, Tokāteline mo e Ngaahi Fuakava 18:10).
-
ʻE tokoniʻi fēfē kitautolu ʻe he ngaahi moʻoni ko ʻení ʻi he taimi ʻoku tau ongoʻi loto-foʻi ai fekauʻaki mo e meʻa ʻoku tau malavá?
Ko hono ʻiloʻi ho ngaahi mālohingá mo e ivi malavá
Fakamanatu ki he kau akó ʻi heʻetau hoko ko e fānau ʻa e ʻOtuá ʻa ia naʻe fakatupu ʻi Hono tataú, ʻoku tāpuekina kitautolu takitaha ʻaki ha ngaahi mālohinga mo ha ivi malava kehekehe. ʻE lava ke ʻi ai ha kau ako ʻoku faingataʻa ke nau fakatokangaʻi ʻa e ngaahi mālohinga mo e ngaahi ivi malava kuo tāpuekina ʻaki kinautolu ʻe he ʻOtuá.
Naʻe vahevahe ʻe ʻEletā Lānolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá ha niʻihi ʻo e ngaahi founga te tau lava ai ʻo ʻiloʻi ʻa e ngaahi talēnití, mālohingá, mo e ngaahi ivi malava kuo tāpuekina ʻaki kitautolu ʻe heʻetau Tamai Hēvaní:
ʻOku mahino ʻa e ngaahi talēniti kuo foaki mai ʻe he ʻOtuá kiate kitautolú ʻi he ngaahi meʻa ʻoku tau manako aí. Kapau ʻokú ke fifili ki ho ngaahi talēnití, hiki ha lisi ʻo e ngaahi meʻa ʻokú ke manako ke faí. Fakakau kotoa ʻa e ngaahi ʻekitivitī ʻokú ke fiefia aí mei he ngaahi tafaʻaki kehekehe ʻo hoʻo moʻuí—fakalaumālie, hiva, fakaofo, fakaʻatamai, sipoti, mo e ngaahi meʻa peheé. Ako mo fakalaulauloto ki ho tāpuaki fakapēteliaké ki ha ngaahi fakakaukau mo ha ueʻi fakalaumālie. Fetuʻutaki ki he kau mēmipa ʻo e fāmilí, ngaahi kaungāmeʻa falalaʻangá, kau faiakó, mo e kau takí; ʻoku faʻa fakatokangaʻi ʻe he niʻihi kehé ʻiate kitautolu ʻa e meʻa ʻoku faingataʻa ke tau fakatokangaʻi ʻiate kitautolú. (Ronald A. Rasband, “Parables of Jesus: The Parable of the Talents,” Ensign, Aug. 2003, 34)
-
ʻE tokoniʻi fēfē koe ʻi hoʻo ʻiloʻi ho ngaahi talēniti lolotongá, mālohingá, pe ngaahi meʻa te ke malavá ʻi hoʻo fakakaukau ki he ngaahi fatongia pe ngaahi faingamālie fakangāue ʻi he kahaʻú?
ʻOange ha taimi ʻi he kalasí ki he kau akó ke nau ʻiloʻi ai ʻa e ngaahi mālohinga mo e ngaahi meʻa ʻoku nau malavá pea fiemaʻu ke nau fakatupulaki ke nau mateuteu lelei ange ai ki he ngaahi fatongia pe ngaahi faingamālie fakangāue ʻi he kahaʻú. Ko ha ngaahi fakakaukau ʻeni ʻe niʻihi ki he founga te ke lava ʻo tokoniʻi ai e kau akó ke nau fai ʻení. ʻI heʻenau ngāue ki he ngaahi ʻekitivitī ko ʻení, fakaafeʻi kinautolu ke nau fekumi ki ha ueʻi fakalaumālie mei he Tamai Hēvaní ke nau lava ʻo vakai kiate kinautolu ʻo hangē ko ʻEne ʻafio mai kiate kinautolú.
-
Fakaafeʻi e kau akó ke hiki hifo ʻa e ngaahi meʻa ʻoku nau lolotonga saiʻia ke faí. Fakaafeʻi kinautolu ke fakakaukau ki ha ngaahi faingamālie fakangāue te nau lava ʻo tulifua ki ai ʻa ia ʻoku fekauʻaki mo e ngaahi meʻa ʻoku nau saiʻia ke faí. Fakakaukau ke fai ha tokoni ʻaki hano fokotuʻu ange ha ngaahi faingamālie fakangāue ʻe lava ke tatau mo e ngaahi meʻa ʻoku saiʻia ai e kau akó.
-
Fakaafeʻi ʻa e kau ako kuo nau ʻosi maʻu honau tāpuaki fakapēteliaké ke nau lau ia, ʻo kumi ʻa e meʻa ʻoku tokoni ke mahino kiate kinautolu fekauʻaki mo kinautolú.
-
Fakaafeʻi ha fanga kiʻi kulupu iiki ʻo e kau akó ke nau aleaʻi ʻa e ngaahi mālohinga mo e ngaahi meʻa ʻoku nau malavá kuo nau fakatokangaʻi ʻiate kinautolú. Te ke lava foki ʻo fetuʻutaki ki he mātuʻá pe kau taki lakanga fakataulaʻeikí kimuʻa pea fai ʻa e kalasí pea kole ange ke nau fai ha kiʻi tohi ʻokú ne fakamatalaʻi ha niʻihi ʻo e ngaahi ivi malava ʻoku nau fakatokangaʻi ʻi heʻenau fānau akó.
-
Tufa ʻa e laʻipepa tufa ʻoku ui ko e “Vakaiʻi Fakaekita ʻo e Ngaahi Taukeí mo e Ngaahi Ivi Malavá ” pea ʻoange ha taimi ki he kau akó ke nau fakakakato ia. Fakamatalaʻi ange ʻoku ʻi he fakafuofuaʻi ko ʻení ha lisi ʻo e ngaahi pōtoʻi ngāue ʻoku faʻa fekumi ki ai ʻa e kau pule ngāué ʻi heʻenau kau ngāué.
Vakaiʻi Fakaekita ʻo e Ngaahi Taukeí mo e Ngaahi Ivi Malavá
Fakafuofuaʻi ʻa e tuʻunga ʻo hoʻo loto-falalá ʻi ha meʻafua ʻo e 1 (ʻikai falala) ki he 5 (loto-falala ʻaupito) ki he ngaahi fakamatala takitaha ko ʻení.
-
Te u lava ʻo fetuʻutaki lelei mo e niʻihi kehé.
-
ʻOku ou fakalotolahi pē kiate au.
-
Ko ha tokotaha ngāue mālohi au.
-
Te u lava ʻo fakakaukau ʻi he ngaahi tūkunga faingataʻá mo maʻu ha fakalelei kiate kinautolu.
-
ʻOku ou loto-fiemālie ke ako mo ʻahiʻahiʻi ha ngaahi meʻa foʻou.
-
ʻOku ou faitotonu mo falalaʻanga.
-
ʻOku ou fengāueʻaki lelei mo e niʻihi kehé.
-
ʻE lava ke fakafalala mai ʻa e kakaí kiate au ke fai ha ngāue kuo vahe mai.
-
Te u lava ʻo fokotuʻutuʻu mo fakaʻaongaʻi lelei hoku taimí.
-
Te u lava ʻo aʻu taimi totonu.
Hili hono maʻu ʻe he kau akó ha taimi feʻunga ke fai ʻa e ngaahi ʻekitivitī fakakaukau kimuʻá, fakaafeʻi kinautolu ke vahevahe ha niʻihi ʻo ʻenau ngaahi fakakaukaú ʻaki hono fai ha ngaahi fehuʻi hangē ko ʻení.
-
Ko e hā ʻa e ngaahi fakakaukau naʻá ke ako kau kia koé?
-
ʻE tokoniʻi fēfē koe ʻe he meʻa kuó ke akó ke ke mateuteu lelei ange ai ki he kahaʻú?
Ke tokoni ke fakamatalaʻi fakanounou mo manatuʻi ʻe he kau akó ʻa e meʻa kuo nau ako fekauʻaki mo kinautolu pē ʻi he ʻaho ní, fakakaukau ke fakaʻaliʻali ʻa e ngaahi fehuʻi ko ʻení pea fakaafeʻi ʻa e kau akó ke hiki ʻenau talí ʻi heʻenau tohinoa akó:
-
Ko e mālohi pe ivi malava ʻe taha ʻoku ou maʻu ʻe lava ʻo tokoni kiate au ʻi he ngaahi fatongia te u maʻu ʻi he kahaʻú ko e …
-
Ko e taukei pe ivi malava ʻe taha ʻoku ou fie fakatupulaki ke tokoniʻi au ke u mateuteu lelei ange ki he ngaahi fatongia ʻi he kahaʻú ko e …
Fakamatalaʻi ange ʻi ha lēsoni ka hoko mai (“Ko Hono Fakatupulaki ʻa e Ngaahi Taukeí mo e Ngaahi Ivi Malavá”) ʻe ʻoange ki he kau akó ha ngaahi faingamālie ke nau fakakaukau ki he founga te nau lava ai ʻo fakatupulaki ʻa e ngaahi taukei mo e ngaahi ivi malava kuo nau ʻilo ʻi he fehuʻi hono uá. Te ke lava ʻo fakaafeʻi kinautolu ke nau kamata fakakaukau ki ha ngaahi founga te nau lava ai ʻo fakatupulaki ʻa e ngaahi taukei pe ivi malava ko ʻení ʻi he taimí ni. Fakamoʻoni ki he malava mo e loto-fiemālie ʻa e ʻEikí ke tokoniʻi kinautolu ke nau tupulaki mo fakalakalaká.