“Lesona 197—Saunia mo Suega ma Poloketi Faigata: ‘Afai ua Tou Lava Saunia, O Le A Outou Le Matata’u Lava,’” Tusi Lesona a le Faiaoga Seminare o le Mataupu Faavae ma Feagaiga (2025)
“Saunia mo Suega ma Poloketi Faigata,” Tusi Lesona a le Faiaoga Seminare o le Mataupu Faavae ma Feagaiga
Lesona 197: Faamanuiaina i le Aoga
Saunia mo Suega ma Poloketi Faigata
“Afai ua Tou Lava Saunia, O Le A Outou Le Matata’u Lava”
I a tatou taumafaiga ia maua aoaoga, e masani ona tofia i tatou i galuega faigata e faamaea. A o vaavaai atu le autalavou ia Iesu Keriso ma faia la latou vaega e saunia ai ma tumau ai i le aoga, e mafai e le Faaola ona fesoasoani ia i latou ia tutusa ma a latou galuega faaleaoaoga. E mafai ona fesoasoani lenei lesona i tagata aoga ia malamalama i auala e faasauni ai mo suega ma poloketi faigata.
Gaoioiga E Ono Mafai Ona Aoao Ai
Tauivi ma suega po o poloketi a le aoga
Mafaufau e amata le lesona i le faasoa atu o tulaga faataitai nei. Nai lo le faasoaina atu o le tulaga atoa, e mafai ona e faasoa atu fuaiupu muamua o fuaiupu taitasi ona fai atu lea i tagata aoga e aumai ni mafuaaga e ono lagona ai e Samu ma Ema le mea o loo la lagonaina.
E lē fiafia Samu e sue ni suega i le aoga aua e masani ona le lelei ana taumafaiga. E masani ona ia lagona le popole pe a ia faia le suega ma foliga mai ua galo ai le tele o mea ua ia aoaoina.
E faigata ia Ema pe a tofia o ia i ni poloketi tetele poo pepa i lana vasega i le aoga. E lagona e ia le lofituina i le tele o galuega e tatau ona ia faia ma e matele lava ina tolopoina seia oo i se aso pe lua a o lei manaomia ona auina atu le poloketi poo le pepa. O le i’uga, e masani lava ona lē mae’a pe lē lelei fo’i le galuega na ia faia.
Valaaulia tagata aoga e mafaufau i taimi na latou maua ai nei lagona e pei o Samu ma Ema. Faamalamalama atu e le o se mea e le masani ai le tauivi o tagata aoga ma lo latou talitonuga i le aoga, aemaise lava i suega ma poloketi faigata. Atonu e fesoasoani le faamanatu atu ia i latou o le aoaoina o se faagasologa mo le olaga atoa. Ua tatou i ai i lenei lalolagi e aoao ma alulalu i luma.
Valaaulia tagata aoga a o latou suesue e gauai atu i upumoni faaleagaga ma uunaiga e mafai ona fesoasoani ia i latou ia manuia a latou suega po o poloketi i le aoga.
Aoao mai tusitusiga paia
Faamalamalama atu e le o aoao patino mai tusitusiga paia e uiga i le auala e sauni ai mo suega po o poloketi a le aoga. Ae peitai, a o tatou faatusaina tusitusiga paia ia i tatou lava (tagai 1 Nifae 19:23), e mafai ona tatou maua upumoni e mafai ona fesoasoani ia i tatou i ni auala eseese, e aofia ai pe a tatou feagai ma luitau i a tatou aoaoga.
Mafaufau e vaevae le vasega i ni vaega laiti e faatino ai le gaoioiga suesue lenei.
Suesue i tusitusiga paia mo upumoni e mafai ona fesoasoani ia te oe i au taumafaiga ia faamanuiaina i suega ma poloketi a le aoga. E mafai ona e mauaina na o oe fuaitau o mau, pe mafai foi ona e suesueina nisi po o fuaitau uma nei:
-
O a upumoni na e maua e mafai ona fesoasoani ia te oe e faamanuiaina ai i suega po o poloketi a le aoga?
Ina ia fesoasoani i tagata aoga e aoao e le tasi le isi, mafaufau e valaaulia i latou e lisi i luga o le laupapa upumoni na latou mauaina.
E tatau ona mafai e tagata aoga ona faailoa mai le tele o upumoni mai mau sa latou suesueina. O nisi nei o faataitaiga: e mafai e le Agaga Paia ona faamalamalamaina lo’u mafaufau (tagai Mataupu Faavae ma Feagaiga 6:15); afai ua ou saunia, e le manaomia ona ou fefe (tagai Mataupu Faavae ma Feagaiga 38:9, 30); a o ou tatalo e le aunoa, o le a faapaiaina e le Atua la’u faatinoga mo le manuia o lo’u agaga (tagai i le 2 Nifae 32:8–9); E mafai ona ou faia mea uma e ala ia Iesu Keriso (tagai Filipi 4:13).
Mafaufau e valaaulia ni tagata aoga se toatele e tali le fesili muamua o fesili nei. E mafai ona e faasino atu i ni upumoni mautinoa i luga o le laupapa ma vaalaulia tagata aoga na tusia e tali le fesili i le upumoni i lona mafaufau.
-
E faapefea i ou manatu ona fesoasoani upumoni na e mauaina i suega po o poloketi a le aoga?
-
O a nisi o auala e mafai ona fesoasoani ai le Alii ia te oe i au meaaoga a o e faaaogaina nei upumoni i au suesuega?
I le avea ai o se vaega o lau talanoaga o fesili na muamua atu, mafaufau e fai atu i ni nai tagata aoga e faasoa mai ni faataitaiga o auala na latou maua ai le fesoasoani a le Alii i a latou meaaoga. Valaaulia i latou e faasoa mai pe na faapefea ona aafia o latou lagona mo le Faaola i na aafiaga.
Avatu fautuaga
O le vaega lenei o le lesona ua faamoemoe e fesoasoani ai i tagata aoga e mafaufau i ni auala faapitoa e mafai ai ona latou sauni ia faamanuiaina i suega ma poloketi. Ina ia faia lenei mea, e mafai ona e faaali atu faatonuga nei ma tuu atu i tagata aoga se taimi e fatu ai se tali faatasi ma se paga po o se vaega toalaiti.
Vaai faalemafaufau faapea na e maua le avanoa e tuuina atu ai se fautuaga i se tasi e pei o Samu po o Ema e uiga i le auala e faamanuiaina ai i suega po o poloketi faigata a le aoga. Tusi i lalo po o le a se fautuaga e te tuuina atu. Ia faaaofia ai fuaitau mai tusitusiga paia e te manatu e ono aoga. O fesili nei e mafai ona fesoasoani e fai ma taiala i lau tali atu:
-
O le a se mea e mafai ona fesoasoani ia te oe e manatua ai ma faaaoga mea ua uma ona e aoaoina?
-
E mafai faapefea ona e aloese mai le faalavelaveina a o e suesue?
-
O le ā se mea e fesoasoani iā te oe e ’alofia ai le faatuai?
-
O le a se mea e mafai ona fesoasoani ia te oe e faaleleia ai lou tomai e mafaufau manino ai?
-
O le a le mea e mafaia ona e faia e faaaofia ai le Alii i au sauniuniga?
Pe a uma ona tuuina atu i tagata aoga se taimi ia lava e talanoaina ai a latou tali, valaaulia i latou e faasoa mai i le vasega. E mafai ona e tusia i luga o le laupapa ia malamalamaaga o loo faasoa mai ma uunaia tagata aoga e faamaumau i a latou api talaaga mo suesuega fautuaga latou te lei mafaufauina. E mafai foi ona e valaaulia tagata aoga e faasoa mai ni faataitaiga o le auala na fesoasoani ai nisi o nei fautuaga ia i latou.
Afai e manaomia e tagata aoga le fesoasoani e mafaufau ai i manatu, mafaufau e tuuina atu ni nai fautuaga, e aofia ai nisi o mea nei:
-
Fai ni faamaumauga o mea o loo e aoaoina i le vasega ma iloilo e le aunoa. Faamatala atu mea o loo e aoaoina i se tamaitiiti o le vasega, tagata o le aiga, po o se uo.
-
Tuu ese lau telefoni ma poloka lou faaaogaina o itulau upega tafai lagi faalavaelave ao e suesue.
-
Faasalalau atu au suesuega i le tele o aso po o vaiaso. Fai se faatulagaga ma pipii i ai. Afai na e misia ni lesona, aua le faatalitali i le iuga e toe maua ai.
-
Saili se nofoaga filemu e suesue ai, ma suesue i taimi o le aso e te le o vaivai tele ai. Ia tausia lelei lou tino e ala i le taumafaina o meaai paleni, ia lava le moe, ma faamalositino e le aunoa.
-
Faaalu se taimi e aoao ai ma saunia lou agaga e ala i le suesueina o tusitusiga paia. Tatalo ma anapogi i nisi taimi mo se fesoasoani ma se taitaiga.
O isi manatu e fesoasoani i suega a le aoga e mafai ona maua i le vaega “Gaoioiga Faaopoopo e Aoao Ai”.
Mafaufau i mea na e aoaoina
Valaaulia tagata aoga e mafaufau i mea ua latou aoaoina ma lagonaina i le lesona e mafai ona fesoasoani ia i latou i o latou olaga. O se tasi auala e faia ai lenei mea o le mafai ona tali tagata a’oga i fesili nei i a latou api faamaumau mo suesuega.
-
O le a se mea ua e aoaoina pe lagonaina e te manao e manatua?
-
O a nisi o fuafuaga na e aoaoina i le asō e te manao e faaaoga i au suesuega?
Mafaufau e faamanatu atu i tagata aoga o le avea ma se tagata aoao faamanuiaina e manaomia ai le taimi, sauniuniga, onosai, ma le faataitai. Uunaia i latou e faaauau pea ona faalagolago i le Faaola mo le fesoasoani ma le taitaiga.