Lesona 195: Faamanuiaina i le Aoga

Faaaofia ai le Alii i Lou Aoaoina

“Ou te Faatasi ma Oe”

E mananao le Tama Faalelagi ma Iesu Keriso e fesoasoani ia i tatou i vaega uma o o tatou olaga, e aofia ai a tatou taumafaiga e aoao ma maua ni aoaoga aloaia. E mafai ona fesoasoani lenei lesona i tagata aoga e faaaofia ai le Alii i vaega uma o a latou aoaoga a o latou sailia le aoaoina e ala i le suesue ma le faatuatua.

Gaoioiga E Ono Mafai Ona Aoao Ai

Tulaga faigata

E mafai ona e amataina le vasega i le faasoaina atu o tulaga nei ma faatalanoaina o se vasega. Pe a manaomia, fetuunai tulaga ina ia fetaui lelei ma manaoga o au tagata aoga.

Vaai faalemafaufau o loo e iai i se tasi po o le sili atu o tulaga nei:

• Ua e lotovaivai i se vasega i le aoga ma ua e manao e tuu.

• E i ai ni au fesili e uiga i le faaauauina o lau aoaoga i ou tausaga-talavou. E te le iloa le mea e tatau ona faaauau ai pea ona e auai i le aoga pe tatau foi ona e auai.

• O lou vaiaso muamua lea i se galuega fou, ma e te le o lagonaina le gafatia mo le galuega po o faiva.

O le a se mea e te faia pe afai o oe o loo iai i se tasi o nei tulaga? O ai e te liliu i ai mo se fesoasoani?

Mafaufau e fesili atu i tagata aoga pe na latou oo po o tagata latou te iloa i ni tulaga talitutusa ma nei. E mafai ona e valaaulia i latou e faasoa mai mea na latou faia po o isi foi ina ia maua ai le fesoasoani.

Faamalamalama atu faapea i lenei lesona, o le a aoao ai tagata aoga e uiga i le taua o le faaaofia ai o le Alii i vaega uma o o latou olaga, e aofia ai ma a latou aoaoga. Ina ia fesoasoani ia i latou e saunia e suesue lenei mataupu, faaali atu fesili nei ma valaaulia tagata aoga e tali iai i a latou api talaaga mo suesuega.

Faaalu se taimi e mafaufau ai i faamatalaga nei e faaaoga ai se fua o le 1 (leai lava) i le 5 (e masani lava):

1. Ou te tatalo i le Tama Faalelagi mo se fesoasoani ae ou te lei suesue pe amataina se poloketi mo le aoga.

2. I a’u tatalo patino, ou te faailoa atu ai se manao i lo’u Tama Faalelagi ia i ai le Agaga faatasi ma a’u a o ou aoao i le aoga.

3. Ou te taumafai e le aunoa e faaleleia atili au taumafaiga e aoao faatasi ai ma le fesoasoani a Iesu Keriso.

4. Ou te faalagolago ma iloa le fesoasoani a le Agaga i lo’u aoaoina ma aoaoga.

Valaaulia tagata aoga e vaavaai mo aoaoga e mafai ona fesoasoani ia i latou e faaaofia atoatoa ai le Alii i le latou aoaoina ma aoaoga.

Aoaoina mai tagata aoao i tusitusiga paia

Faamalamalama atu o loo i ai i tusitusiga paia le tele o faataitaiga o tagata o e na faaaofia le Alii e fesoasoani ia i latou ia maua le malamalama ma faatoilalo luitau. Mafaufau e vaevae tagata aoga i ni kulupu laiti e faauma ai le gaoioiga suesue lenei. Tuu atu i vaega taitasi se tasi o faataitaiga nei e suesue ai, ona talanoaina lea o fesili e lua o loo mulimuli mai.

Suesue tusitusiga paia nei e uiga i tagata o e na feagai ma tulaga faigata ma le le mautonu. Vaavaai mo faataitaiga o le auala na faaaofia ai e nei tagata le Alii a o latou sailia le malamalamaaga.

• Iosefa Samita (Iosefa Samita—Talafaasolopito 1:10–18)

• Nifae (1 Nifae 11:1–9)

• O le uso o Iareto (Eteru 1:38–42; 2:22–25; 3:1–6)

• Na faapefea ona faaaofia e nei tagata le Alii i lo latou aoaoina?

• O a ni auala na fesoasoani ai le Alii ia i latou?

  A uma se taimi e suesue ai ma talanoaina e tagata aoga, valaaulia tagata o vaega taitasi e lipoti mai mea na latou talanoaina e ala i le faasoaina o a latou tali i fesili na muamua atu.

• E faavae i mea ua e aoaoina, e faapefea ona e faamaeaina le faamatalaga lenei? A o tatou faaaofia ai le Alii i le tatou aoaoina, e mafai e Ia …

  E mafai e tagata aoga ona faamaeaina lenei faamatalaga i ni auala e talitutusa ma lenei: A o tatou faaaofia ai le Alii i le tatou aoaoina, e mafai ona Ia tuuina mai ia i tatou le malamalama e le mafai ona tatou mauaina na o i tatou.

• O le a se mea ua e iloa e uiga i le Alii e tuuina atu ai ia te oe le talitonuga o le a Ia fesoasoani ia te oe i lau aoaoga?

Auala e faaaofia ai le Alii i lou aoaoina

• Pe a oo mai i au meaaoga, o afea e aoga ai le faaaofia ai o le Alii?

Afai e manaomia, fesoasoani i tagata aoga e mafaufau i tali i le fesili na muamua atu. O faataitaiga e mafai ona aofia ai le ao faia meaaoga, sueina o suega, aoaoina i le vasega, ma le galue i galuega atofaina po o poloketi a le vasega. Mafaufau e lisi i luga o le laupapa ia manatu o tagata aoga.

Ona tuu atu lea i tagata aoga o faatonuga nei e fesoasoani ia i latou e mafaufau ai i auala e mafai ona latou faaaofia ai le Alii i faataitaiga na latou faailoa mai. E mafai e tagata aoga ona i ai faatasi ai ma se paga pe i se vaega toalaiti.

Tusi le fuaitau E mafai ona ou faaaofia ai le Alii i lo’u aoaoina e ala i le … i luga o se itulau i lau api faamaumaui mo suesuega. Lisi ia tele o manatu e mafai ona e mafaufau i ai mo le faaaofia ai o le Alii i gaoioiga e faatatau i le aoga na e faailoaina.

A uma ona fai e tagata aoga a latou lisi, valaaulia i latou e faasoa o latou manatu ma le vasega. E mafai ona e fatuina se lisi i luga o le laupapa ma faaopoopo i ai manatu o tagata aoga.

Afai e manaomia, e mafai ona e tuuina atu ni faataitaiga o manatu: tatalo mo se fesoasoani i le manatuaina o mea na e suesueina a o lei faia suega, poloketi, po o meaaoga; faailoa atu le agaga faafetai mo le fesoasoani a le Atua ma avanoa ua Ia tuuina mai ia te oe e aoao ai; faamaumau aafiaga na e maua a o e faaaofia ai le Alii i lou aoaoina; anapogi ma tatalo mo se manao sili atu e aoao; faamuamua le Atua e ala i le faaavanoa o se taimi mo tatalo i aso taitasi ma suesuega o tusitusiga paia.

• O a ni aafiaga na e maua a o e faaaofia ai le Alii i lau aoaoga?

I le avea ai o se vaega o le talanoaga, mafaufau e faaali le “Avea Atili ia Keriso: O Le Faataoto i le Tifato” mai le faailo taimi 0:00 i le 1:05. O loo maua lenei vitiō i le ChurchofJesusChrist.org. I le vitio, o loo faamatala ai e Elder Clark G. Gilbert o le Fitugafulu lona aafiaga i le faaaofia ai o le Alii i lona aoaoina.

Mafaufau ma galue i upumoni

Mafaufau e valaaulia tagata aoga e mafaufau i auala e mafai ona latou faaaogaina ai mea ua latou aoaoina e uiga i le auala e faaaofia ai le Alii i lo latou aoaoina. E latou te ono tali i fesili nei ia latou api faamaumau mo suesuega.

• O le a se mea ua e aoaoina pe lagonaina e uiga i le Alii lea e te manao ai e faaaofia ai o Ia i lou aoaoina?

• O a ni faatinoga se tasi pe lua e mafai ona e faia e faaaofia ai le Alii i lou aoaoina?

Mafaufau e valaaulia tagata aoga e faasoa mai mea na latou lagonaina ma aoaoina. Molimau atu i upumoni na e talanoaina, ma uunaia tagata aoga e galulue i a latou fuafuaga ma gaioi i ia uunaiga latou te maua mai le Agaga.

Punaoa Faaopoopo

E faapefea e le faaaofia ai o le Alii i lo’u aoaoina ona fesoasoani ia te au ia manuia i la’u aoga?

Na aoao mai Elder D. Todd Christoffferson o le Korama a Aposetolo e Toasefululua:

E tatau ona e manatua pea e le o tuua na o oe i lenei mea. E i ai tagata e alolofa ma tatalo mo oe. Atonu e i ai nisi e le talitonu e tau atu ia te oe e te le mafai ona e faia pe o ai foi, mo se mafuaaga, e le manao ia e taulau. Ae e le mafai ona latou taofia oe, ma e toatele atu i latou e lagolagoina oe. O le mea e sili ona taua, ua silafia oe e lou Tama Faalelagi ma lou Faaola ma e mafai ma o le a tuuina atu ia te oe le fesoasoani faalelagi. Ia avea le Atua ma au paaga. …

E alofa tele lo outou Tama Faalelagi ma Lona Alo Pele ia te outou e pei foi o a’u, ma ua outou agavaa mo La la’ua fesoasoani e pei lava o a’u. Faatasi ai ma La Laua fesoasoani, e mafai ona e faamanuiaina i [lau aoaoga] ma isi taumafaiga agavaa uma i lou olaga. E te le galue ma suesue na o oe. (D. Todd Christofferson,“O Le Loto e Saunia” [faigalotu a le BYU–Ala i le Lalolagi Atoa, 12 Nov., 2019])

Na aoao mai Elder Kim B. Clark o le Fitugafulu:

Afai e taofi lou aoaoina, e le mafai ona avea oe ma se tagata e sili atu le malamalama, sili atu ona lelei, sili atu le aoga, sili atu ona faamaoni, po o le sili atu ona pei o lo outou Tama i le Lagi.

O lou aafiaga i le aoaoina i lou talavou ma tausaga o le talavou matua ua faataatiaina se faavae mo se olaga atoa o le aoaoina. Afai e te atiina ae le tomai e aoao loloto i le ala a le Alii—e ala i le Agaga ma i le suesue ma le filiga, ma le mataalia—o le a avea o se faamanuiaga sili ia te oe. (Kim B. Clark, “O Le Aoaoina mo le Agaga Atoa,” Ensign, Auk. 2017, 29).

O le a le ituaiga o aoaoga e tatau ona avea ma au faamuamua aupito maualuga?

Na aoao mai Peresitene Russell M. Nelson:

I lou tulitulimatagauina o le malamalama, ia iloa o le upumoni sili ona taua e mafai ona e aoaoina e mai le Alii. I Lana Tatalo Faatoga i Lona Tama, na faamaonia ai e le Faaola lava Ia le mea lenei. Na fetalai o Ia, “O le ola e faavavau foi lenei, ia latou iloa oe le Atua moni e toatasi, atoa ma Le ua E auina mai, o Iesu Keriso lea” (Ioane 17:3). E sili atu i isi mea uma o loo outou saili e aoaoina, saili ia iloa le Atua, lou Tama Faalelagi, ma Lona Alo, o Iesu Keriso. Ia iloa i Latou ma alolofa ia i Laua, e pei ona Ou faia. (Russell M. Nelson, “O le a se Mea O Le a E Filifilia?,” Ensign, Ian. 2015, 32)

Gaoioiga Faaopoopo e Aoao Ai

Faamuamuaina o le Alii

A uma ona fatuina e tagata aoga se lisi o auala e mafai ona latou faaaofia ai le Alii i a latou aoaoga, mafaufau e faaali atu le “O Le Manao Faamaoni o le Agaga” (3:28), o loo maua i ChurchofJesusChrist.org. Valaaulia tagata aoga e vaavaai mo faataitaiga i le auala na faaaofia ai e le tamaitai talavou i le vitio le Alii i lona aoaoina.

Fatu ni mamanu patino e aoaoina ai e faaaofia ai le Alii

I le faaiuga o le lesona, mafaufau e tuu atu i tagata aoga se avanoa e fatu ai se faatusa vaaia e aotele ai mea ua latou aoaoina e uiga i le faaaofia ai o le Alii i a latou aoaoga. Mafaufau e valaaulia tagata aoga e tusi le Faaaofia ai le Alii i Lou Aoaoina i le ogatotonu o se fasi pepa. Ona valaaulia lea o i latou e lisi ni amioga ma ni uiga faaalia patino e faailoa ai pe faapefea ona latou faaaofia ai le Alii i le latou aoaoina ma aoaoga. Valaaulia i latou e tusi se ata po o le fatuina o se mamanu faafuainumera e aoao ai e faasoa atu i a latou uo i le taimi o le lesona. (Tagai i le ata lenei mai ia Oketopa 2016 Liahona mo se faataitaiga.)

Valaaulia tagata aoga e fatu se faamatalaga patino e aoao ai

E mafai ona faamanuiaina tagata aoga mai le fatuina o se “faamatalaga patino e aoao ai” lea e mafai ona latou faaaogaina i o latou olaga atoa e fesoasoani ai e faamanatu atu ia i latou a latou sini faaleaoaoga. E mafai ona amata a latou faamatalaga i se fuaitau e pei o le “O le a ou …” po o le “O au …” po o le “O lou faamoemoe o le …”

Ina ia fesoasoani i tagata aoga e fatu ni faamatalaga, mafaufau e valaaulia i latou e toe mafaufau i vaega o a latou aoaoga latou te mananao e faaleleia pe atiina ae. Fai atu ni fesili e pei o le “E mafai faapefea ona e faaaofia ai le Alii i lou aoaoina?” po o le “E mafai faapefea ona fesoasoani le Alii ia te oe i lau fuafuaga?” E mafai e tagata aoga ona faailoa mai gaoioiga ma uiga faaalia latou te mananao e faaaofia i a latou faamatalaga.

O faamatalaga e aoao ai e masani lava ona pupuu ma mamana. E mafai ona faaaofia e tagata aoga ni sini faaleaoaoga po o ni moomooga ma mea o le a latou faia ia ausia ai a latou sini.

O faataitaiga nei e lua o faamatalaga e aoaoina ai tagata aoga:

• O le a ou lotomaualalo ma ao gofie a o ou sailia le fesoasoani a le Alii e faaleleia ai o se tagata aoao.

• A o lei amata le a’oga, o le a ou tatalo i lo’u Tama Faalelagi ma faailoa atu lo’u manao ia i ai le Agaga faatasi ma a’u i lo’u aoaoina.