Lesona 198: Faamanuiaina i le Aoga

Mafaufauga lelei o le Tuputupu Ae

Atiina Ae o Uiga Faaalia ma Faatinoga e Faaleleia ai Mamanu o Tatou Mafaufauga

O le a feagai i tatou taitoatasi ma faafitauli i lo tatou aoaoina ma aoaoga. E faalagolago i o tatou mafaufauga, e mafai ona tatou vaai i nei faafitauli o ni papupuni o le a taofia ai i tatou po o ni avanoa e aoao ai ma tuputupu ae ai. O le filifili e fetaiai ma faafitauli i mafaufauga lelei o le tuputupu ae e faaalia ai lo tatou faatuatua ia Iesu Keriso. E mafai ona fesoasoani lenei lesona i tagata aoga e atiina ae se mafaufauga lelei o le tuputupu ae e faatoilalo ai faafitauli i le aoaoina.

Gaoioiga E Ono Mafai Ona Aoao Ai

faafitauli i le aoaoina

Mafaufau e amata le lesona i le faasoa atu le tulaga faataitai lenei. A leai, e mafai ona e fai atu i tagata aoga e fatu se tulaga e feagai ai se talavou ma se faafitauli e iloa i lona aoaoina. Ona mafai lea ona e fetuunai fesili ina ia fesootai atili ai i le tulaga na filifilia.

A o faalogo Caden e uiga i vasega o le a ia aveina mo le tausaga aoga o loo loma, sa ia iloa e iai sana vasega o le matematika. E manatua e Caden le leaga o lana taumafaiga muamua i le matematika. E talitonu o ia afai e alu i le vasega lenei o le matematika, o le a le manuia.

• O le a le mea e tumatila ia te oe e uiga i le mafaufau o Caden?

• O le ā se fautuaga e mafai ona e faasoa atu ia te ia?

Mafaufauga lelei o le tuputupu ae

Faamalamalama atu a tatou oo i luitau po o faafitauli i a tatou aoaoga ma isi vaega o o tatou olaga, e mafai ona tatou vaai i ai ma se mafaufauga lelei o le tuputupu ae po o se mafaufauga ua tatumau.

Faaali atu faamatalaga nei ma valaaulia ni tagata aoga se toalua e faitau atu i le vasega.

Mafaufauga lelei o le tuputupu ae: O tagata e i ai mafaufauga lelei o le tuputupu ae e talitonu e mafai ona latou aoao ma maua le malosi mai ia Iesu Keriso. E vave lava ona latou suia a o latou aoao. Latou te tuleia i latou lava e tusa lava pe faigata mea uma e ala i le faalagolago ia Iesu Keriso.

Mafaufauga tamau: O tagata e i ai mafaufauga tamau e masalosalo i lo latou gafatia e aoao ai. Latou te fefefe e toilalo, ma latou te talitonu e le mafai ona latou aoaoina ni mea patino.

Ina ia fesoasoani i tagata aoga ia malamalama lelei i nei mafaufauga, mafaufau e faasoa atu nisi o faamatalaga nei. E mafai ona e faaali atu le faamatalaga muamua mai koluma taitasi e fesoasoani ai i tagata aoga e vaai i se faataitaiga e fesootai. Ona mafai lea ona e tuuina atu i tagata aoga le vaega o totoe o faamatalaga o mafaufauga tamau. Valaaulia i latou e galulue i ni vaega toalaiti e tusi se faamatalaga e ono fai mai ai se tasi e i ai mafaufauga lelei o le tuputupu ae e faaalia ai lo latou faatuatua i le Faaola.

Mafaufauga Tamau	Mafaufauga lelei o le Tuputupu Ae
Mafaufauga Tamau “O a’u mea sese ua faaalia ai ou te le atamai.”	Mafaufauga lelei o le Tuputupu Ae “Ona o le Faaola, e mafai ai ona ou aoao mai au mea sese ma ou lelei atili ai.”
Mafaufauga Tamau “Ou te le fiafia e faataitai ni mea fou aua atonu o le a ou toilalo.”	Mafaufauga lelei o le Tuputupu Ae “O le iloaina e fiafia Iesu Keriso i taumafaiga uma ou te faia e tuputupu ae ai, e mafai ai ona ou faataitaia ni mea fou ma olioli i luitau.”
Mafaufauga Tamau “E le mafai ona ou aoaoina ni mea.”	Mafaufauga lelei o le Tuputupu Ae “Afai ou te fia aoaoina se mea, e mafai ona ou aoaoina faatasi ma le fesoasoani a le Alii.”
Mafaufauga Tamau “Pe a ou le fiafia, ou te fiu.”	Mafaufauga lelei o le Tuputupu Ae “O le galueaiina o faigata e fesoasoani ia te au e tuputupu ae ai ma avea atili e faapei o Iesu Keriso.”

Valaaulia tagata aoga e mafaufau pe masani ona latou vaai i luitau i se mafaufauga lelei o le tuputupu ae po o se mafaufauga tamau. Valaaulia i latou a o faaauau pea ona latou suesue e vaavaai mo upumoni aoga ma gauai atu i uunaiga mai le Agaga Paia e mafai ona fesoasoani ia i latou e atiina ae mafaufauga lelei o le tuputupu ae.

Upumoni e faavavau e mafai ona fesoasoani ia i tatou e atiina ae mafaufauga lelei o le tuputupu ae

Na faamalamalama mai e Uso Devin G. Durrant, o le sa avea muamua ma Au Peresitene Aoao o le Aoga Sa, le mafuaaga e tatau ai i soo o Iesu Keriso ona atiina ae mafaufauga lelei o le tuputupu ae:.

Ua uunaia i tatou e le Tama Faalelagi e saili e atiina ae meaalofa ma faaleleia i tatou lava aua o Ia, i le avea ai ma se matua alofa, e talitonu e mafai ona tatou ausia mea tetele, e aofia ai, mulimuli ane, le faaeaga. O ia o se matua e i ai mafaufauga lelei o le tuputupu ae. Afai tatou te fia avea faapei o Ia, e tatau ona tatou faaaogaina lena lava faatulagaga o le mafaufau ma aoao e tuputupu ae i auala uma ua Ia faatalitalia. (Devin G. Durrant,“Fesoasoani i Tamaiti ma le Autalavou e Atiina Ae Mafaufauga Lelei o le Tuputpu Ae,” Ensign, Fep. 2020)

• O le a se mea e fesoasoani lenei faamatalaga ia te oe e malamalama ai e uiga i le auala e mafai ai e mafaufauga lelei o le tuputupu ae ona aafia ai lou olaga?

• O le a sou manatu e mafai ona fesoasoani ia te oe e atiina ae ai mafaufauga lelei o le tuputupu ae?

Afai e manaomia, faamalamalama atu o le malamalama ma le manatuaina o upumoni e uiga i lo tatou Tama Faalelagi ma Iesu Keriso e mafai ona fesoasoani i tagata aoga e atiina ae ai mafaufauga lelei o le tuputupu ae pe a latou feagai ma faafitauli, e aofia ai faafitauli i a latou aoaoga.

Valaaulia tagata aoga e sue nisi o nei upumoni i a latou tusitusiga paia. E mafai ona e valaaulia i latou e faailoa mai mau latou te iloa pe suesue foi i nisi o fuaiupu nei.

• Isaia 41:10, 13

• Alema 26:12

• Mataupu Faavae ma Feagaiga 24:8

• Mataupu Faavae ma Feagaiga 84:88

A uma ua lava se taimi o tagata aoga e maua ai upumoni, valaaulia i latou e faasoa ane i le vasega mea sa latou maua. E mafai foi ona latou tusia i luga o le laupapa upumoni na latou mauaina. Atonu latou te iloaina upumoni e talitutusa ma upumoni nei: I le malosi o le Atua e mafai ona tatou faia ai mea uma.

• E mafai faapefea e le manatuaina o nei upumoni e uiga i le Tama Faalelagi ma Iesu Keriso ona fesoasoani ia te oe e maua ai se mafaufauga lelei o le tuputupu ae i lau aoaoga?

• O a nisi o faataitaiga o tagata i tusitusiga paia o e na faaaogaina lo latou faatuatua i le Atua e taulima ai o latou luitau ma se mafaufauga lelei o le tuputupu ae?

  I le avea ai o se vaega o lau talanoaga o le fesili na muamua atu, e mafai ona e valaaulia tagata aoga e sue ni faataitaiga mai le soifuaga o Nifae. E mafai foi ona e fai atu i tagata aoga e vaai i faataitaiga a Lamana ma Lemuelu o loo faaalia ai se mafaufauga tamau.

  O nisi nei o faataitaiga e mafai ona e faasino i ai tagata aoga: o le tali atu i le poloaiga ia toe foi atu i Ierusalema e aumai papatusi apamemea mai ia Lapana (tagai 1 Nifae 3:4–7); o taumafaiga e aumai papatusi apamemea (tagai 1 Nifae 3:24–31; 4:1–6); o gaoioiga a uso ina ua uma ona faasoa mai e Liae lana faaaliga vaaia o le laau o le ola (tagai 1 Nifae 10:17–19; 11:1–6; 15:1–3, 8–9); Ua gau le aufana a Nifae (tagai 1 Nifae 16:18–23, 30–32); ma Nifae ua poloaiina e fausia se vaa (tagai 1 Nifae 17:7–11, 17–18).

• Na faapefea ona fesoasoani le Alii ia te oe, po o le o le a sou mafaufau e faapefea ona fesoasoani le Alii ia te oe, ia i ai se mafaufauga lelei o le tuputupu ae ma faatoilalo faafitauli i au aoaoga?

Mafaufau e faasoa atu se faataitaiga mai lou lava olaga.

E mafai foi ona e mafaufau e faaali atu se tasi o vitio i le vaega “Gaoioiga Faaopoopo e Aoao Ai”.

O o’u mafaufauga lelei o le tuputupu ae

Valaaulia tagata aoga e mafaufau i nisi o faafitauli latou te feagai i a latou aoaoga po o le aoaoina e mafai ona fesoasoani i ai mafaufauga lelei o le tuputupu ae. E mafai ona latou tusi nei faafitauli i a latou api faamaumau mo suesuega. Atonu latou te ta’ua tauiviga e faitau, faigata i se mataupu i le aoga, po o le leai o ni avanoa faaleaoaoga o loo maua. Ona vaalaaulia lea o i latou e fai mea nei.

Filifili ni faafitauli se lua pe tolu e ono tulai mai i lau aoaoga ma le aoaoina. Mo faafitauli taitasi, tusi i lalo se faamatalaga o le mafaufauga lelei o le tuputupu ae lea e faaalia ai lou faatuatua i le gafatia o le Faaola e fesoasoani ia te oe ia faamanuiaina.

Valaaulia tagata aoga e faasoa mai se faamatalaga sa latou tusia. E mafai ona latou faasoa atu i se tuaoi pe savalivali solo i le potu ma faasoa atu i isi.

A uma ona faasoa mai e tagata aoga, uunaia i latou e fuafua ni auala o le a latou mulimuli ai i faamatalaga na latou mauaina. Molimau atu i upumoni na outou talanoaina i le asō. Uunaia tagata aoga e taumafai e faatoilalo faafitauli i a latou aoaoga i mafaufauga lelei o le tuputupu ae.

Punaoa Faaopoopo

O le a se mea e mafai ona fesoasoani e manatua pe a ou feagai ma faafitauli i lo’u aoaoina?

Na faamalamalama mai e Elder Carlos A. Godoy o le Fitugafulu:

O lenei aafiaga faaletino o se taimi mo le aoaoina ma le tuputupu ae, ae o nisi taimi e le faigofie. E pei lava ona e maua i au suesuega, atonu e te lagonaina le le agavaa pe le fiafia i lou lava alualu i luma patino, ae ou te fia faamautinoa atu ia te oe e mafai ona e faia. Ioe, e i ai foi se tau e tatau ona totogi, ae e mafai. Ma o le mafuaaga autu lava e mafai ai ona ua tatou maua le Faaola o Iesu Keriso ma Lona alofa tunoa e avea ma punaoa i taimi o faigata. (Carlos A. Godoy, “Enter to Learn; Go Forth to Fight!” [Brigham Young University devotional, March 12, 2019], 3, speeches.byu.edu)

E mafai faapefea ona ou atiina ae se mafaufauga lelei o le tuputupu ae i lo’u aoaoina?

Na aoao mai Elder Clark G. Gilbert o le Fitugafulu:

Ou te iloa o le tulitulimatagauina o lau aoaoga e mafai ona avea ma luitau ma e manaomia ai le faataulaga. Ou te iloa le malosi o lou galue ma e tele po faigata a o e ala tuai e faamaea ia au meaaoga, aoao ni manatu faavae fou, ma faatino isi tautinoga faigata i lou olaga. Ae ia tumau pea iina. Ia faaauau pea ona faaalia le lototele moni. Ae ia saunia foi e agai atu mai le lototele i le alofa tunoa. Faaaofia le Alii. Tatalo mo Lana fesoasoani, ma o le a Ia faalauteleina au taumafaiga. (Clark G. Gilbert, “From Grit to Grace” [BYU–Pathway Worldwide devotional, Sept. 25, 2018], byupathway.org)

Aisea atonu ou te le maua ai se faamanuiaga vave?

A o avea ai o se tasi o Fitugafulu, sa faamalamalama mai e Elder Lynn G. Robbins:

Seia Fitugafulu ni Fitu

O le faatuatua e le femoumoua’i o Nifae sa fesoasoani ia te ia e sau ai mai le toilalo i le toilalo seia i’u lava ina ia maua ia papatusi apamemea. E 10 taumafaiga na fai e Mose a o lei i’u ina faamanuiaina o ia e sosola ese mai Aikupito ma tagata Isaraelu.

Atonu tatou te tuufesili—afai sa i ai uma Nifae ma Mose i le feau a le Alii, aisea na le faasalavei mai ai le Alii ma fesoasoani ia i la’ua ia ausia le tulaga manuia i a la taumafaiga muamua? Aisea na Ia faatagaina ai i la’ua—ma pe aisea foi Na te faatagaina ai i tatou—e oo i le tele o faigata ma toilalo i a tatou taumafaiga ina ia manuia? Faatasi ai ma le tele o tali taua i lena fesili, o nisi nei o tali:

• Muamua, ua silafia e le Alii o “nei mea uma [tatou] te maua ai le poto masani, ma o le a avea mo [o tatou] lelei” [Mataupu Faavae ma Feagaiga 122:7].

• Lua, ia faataga ai i tatou e “tofo i le oona, ina ia [tatou] iloa ai ona faataua le lelei” [Mose 6:55].

• Tolu, ia faamaonia ai “o loo ia le Alii le taua,” [1 Samuelu 17:47], ma ua na o Lona alofa tunoa lava e mafai ai ona tatou faataunuuina Lana galuega ma avea ai e faapei o Ia.

• Fa, ina ia fesoasoani ia i tatou e atiae ma maua le tele o uiga FaaKeriso ia e le mafai ona faaleleia vagana ai e ala i mea faafeagai ma “i le ogaumu o i ai le puapuaga” (Isaia 48:10; 1 Nifae 20:10).

(Lynn G. Robbins, “Seia Fitugafulu ni Fitu,” Liahona, Me 2018, 21)

Gaoioiga Faaopoopo e Aoao Ai

Se isi amataga

Ina ia fesoasoani i tagata aoga e iloilo faafitauli o le aoaoina e ala i tioata eseese, mafaufau e amata le vasega e ala i le tusiaina po o le faaali atu o se maa tele i se ala. Na mafai lea ona e faia ni fesili e pei o nei:

• Pe e te vaai i lenei papa o se maa laa po o se maa taavalevale? Aisea?

• O le ā e iloa ai pe o le papa o se laasaga po o se maa tautevateva?

Ona mafai lea ona e talanoaina faafitauli o loo feagai ma talavou i le aoaoina. Valaaulia tagata aoga e iloilo pe faapefea ona vaaia nei faafitauli o ni maa laa po o ni maa tautevateva.

Faataitaiga faaopoopo

Ina ia fesoasoani i tagata aoga e faataitai le suia o manatu tumau o le mafaufauga tatumau i manatu o mafaufauga lelei o le tuputupu ae, e mafai ona e tuuina atu ia i latou le siata lenei. E mafai ona galulue tagata aoga ma se paga e maua mai ni fuaitau i le koluma “Taumafai e fai atu”. Ona mafai lea ona latou faasoa atu i nisi vaega mea na latou mauaina.

Nai lo le fai mai …	Taumafai e fai atu …
Nai lo le fai mai … “Ua le mafai ona ou faia lenei mea.”
Nai lo le fai mai … “Ua ou fiu.”
Nai lo le fai mai … “Ou te le lelei i lenei mataupu.”
Nai lo le fai mai … “O le a le mafai lava ona ou atamai e pei o la’u uo.”
Nai lo le fai mai … “Sa ou taumafai, ae sa le mafai lava ona ou faia.”
Nai lo le fai mai … “Faigata tele lenei mea.”

Filifiliga o le vitiō

Na faasoa mai e Elder Clark G. Gilbert o le Fitugafulu le auala na fesoasoani ai le Alii ia te ia e atiina ae i le aluga o taimi. E mafai ona e matamata i le “The Mismeasure of Man,” o loo maua i byupathway.org, mai le faailo taimi 0:21 i le 3:05.

Sa faasoa mai e Uso Devin G. Durrant, o lē sa avea muamua ma fesoasoani i le Au Peresitene Aoao o le Aoga Sa, le auala na mafai ai e mafaufauga lelei o le tuputupu ae o lona toalua ona ia ausia se mea sa ia lagonaina o le a faigata. E mafai ona e matamata i le “Choose a Growth Mindset,” o loo maua i le speeches.byuh.edu, mai le faailo taimi 30:54 i le 33:08.