“Lesona 204—O Iesu Keriso o loo i le Totonugalemu o Tapuaiga Uma i le Malumalu: ‘O Iesu Keriso o le Mafuaaga Lea Tatou te Fausia ai Malumalu,’” Tusi Lesona a le Faiaoga Seminare o le Mataupu Faavae ma Feagaiga (2025)
“O Iesu Keriso o loo i le Totonugalemu o Tapuaiga Uma i le Malumalu,” Tusi Lesona a le Faiaoga Seminare o le Mataupu Faavae ma Feagaiga
Lesona 204: Sauniuniga mo le Malumalu
O Iesu Keriso o loo i le Totonugalemu o Tapuaiga Uma i le Malumalu
“O Iesu Keriso o le Mafuaaga Lea Tatou te Fausia ai Malumalu”
I le talafaasolopito atoa lava, na poloaiina ai e le Alii Ona tagata ia fausia ni malumalu. I o tatou aso, ua tatou vaaia ai se faatelega tele i le fausiaina o malumalu. O Iesu Keriso o loo i ai i le totonugalemu o sauniga uma i le malumalu. O lenei lesona e mafai ona fesoasoani i tagata aoga ia lagona se manao faateleina e tapuai ia Iesu Keriso i Lona maota.
Gaoioiga E Ono Mafai Ona Aoao Ai
O le Faaola i le totonugalemu o a tatou tapuaiga
Mafaufau e faaali atu ata o tagata o loo aai ma feinu i le faamanatuga, talavou o loo auai i le lotu, ma talavou matutua o loo auauna atu o ni faifeautalai faamisiona.
-
E faapefea i lou manatu ona avea Iesu Keriso ma totonugalemu o le aai ma feinu i le faamanatuga, auai i le Ekalesia, po o le auauna atu i se misiona?
-
E faapefea ona aafia le aafiaga o se tasi pe afai latou te le taulai atu i le Faaola a o auai i nei gaoioiga?
Faaali atu i tagata aoga se ata o se malumalu e latalata ane ia te oe faatasi ai ma se ata o le Faaola. Valaaulia tagata aoga e tomanatu i fesili nei. E ono aoga mo tagata aoga le tali o fesili nei i totonu o a latou api faamaumau mo suesuega.
Mafaufau i ou lava aafiaga i le malumalu po o le sauniuni mo le malumalu.
-
O le a le tulaga o loo i ai le Faaola i le totonugalemu o au sauniuniga e auai i le malumalu ma aafiaga e te maua pe a e i ai iina?
-
E mafai faapefea e le taulai atili atu i le Faaola ona aafia ai lou aafiaga i le malumalu?
Uunaia tagata aoga e valaaulia le Agaga e taiala i latou a o latou saili e aoao atili e uiga i le auala o loo i ai le Faaola i le totonugalemu o tapuaiga i le malumalu.
Na poloaiina e le Aliii ona tagata e fausia malumalu
O ata nei o ni ata o nisi o nofoaga paia ma malumalu na poloaiina e le Alii Lona nuu e fausia anamua. Mafaufau e faaali ma fesili atu i tagata aoga pe mafai ona latou faailoa mai fale o loo faaalia (o le fale fetafai na fausia e Mose i le vao [tagai Esoto 25:8], malumalu o Solomona i Ierusalema [tagai 1 Tupu 6:12–13], o le malumalu o sa Nifae i le aai o Nuumau [tagai 3 Nifae 11:1]).
I le Mataupu Faavae ma Feagaiga, na poloaiina ai e le Alii le Au Paia e fausia malumalu (tagai Mataupu Faavae ma Feagaiga 57:3; 109:2; 115:7–8; 124:26–27). O lenei poloaiga e mulimuli i le mamanu na faavaeina e le Alii anamua.
Na saunoa le Au Peresitene Sili:
Soo se taimi lava e i ai tagata o le Alii i luga o le fogaeleele o e o le a usitai i Lana afioga, ua poloaiina i latou e fausia malumalu. (“Faamatalaga a le Au Peresitene Sili i Malumalu,” 2 Ian. 2019, ChurchofJesusChrist.org)
Faitau le Mataupu Faavae ma Feagaiga 109:2, 5, 12–13, ma vaavaai mo mea na aoao mai e le Alii e uiga i le malumalu.
-
O le a se mea na e mauaina?
-
E faapefea ona e faamatalaina le fuaiupu e 13 i au lava upu?
O se tasi o upumoni e ono faailoa mai e tagata aoga, o le malumalu o le maota o le Alii, o se nofoaga o Lona paia.
-
O a faamanuiaga e mafai ona oo mai ia i tatou i le iloaina o lenei upumoni mo i tatou lava?
Pe a talafeagai ai, uunaia tagata aoga e faasoa mai ni aafiaga na latou maua lea na latou lagona ai le latalata atu i le Alii i le malumalu pe lagona foi o le malumalu o se nofoaga paia. O le faasoaina atu o ou lava aafiaga e mafai ona fesoasoani i tagata aoga e faasoa atu ai foi a latou aafiaga.
O le Faaola o loo i le ogatotonu o le malumalu
O faamatalaga nei e mafai ona fesoasoani i tagata aoga ia malamalama ai i le auala o loo i ai le Faaola i le totonugalemu o le malumalu. A o faitau e tagata aoga ia faamatalaga, valaaulia i latou e vaavaai mo se faamoemoega totonugalemu o le malumalu.
Na aoao mai Peresitene Russell M. Nelson:
O Le Malumalu ma Lou Faavae Faaleagaga
Ua ta‘ua e Peresitene Nelson le galue ai i le faavae o le Malumalu o Sate Leki e aoao atu ai le ala e faamalosia ai e sauniga ma feagaiga o le malumalu lo tatou faavae faaleagaga.
O le malumalu o le totonugalemu lea o le faamalosia o lo tatou faatuatua ma le malosiaga faaleagaga ona o le Faaola ma Lana aoaoga faavae o le taulaiga autu lea o le malumalu. O mea uma o loo aoaoina i totonu o le malumalu, e ala i aoaoga ma e ala i le Agaga, e faateleina ai lo tatou malamalama ia Iesu Keriso. O ana sauniga tāua e fusia ai i tatou ia te Ia e ala i feagaiga paia o le perisitua. (Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 93, 94)
Na molimau Elder David A. Bednar o le Korama a Aposetolo e Toasefululua e faapea:
O mea uma e aoaoina ma mea uma e faia i totonu o le malumalu ua faamamafa mai ai le paia o Iesu Keriso ma Lana matafaioi i le fuafuaga sili o le fiafia a le Tama Faalelagi. (David A. Bednar, “Ia Fausia Lenei Fale mo Lo’u Igoa,” Liahona, Me 2020, 86)
-
O le a sou lagona i le mea e taua ai ona malamalama i nei faamatalaga?
-
Aisea e te manatu ai e taua le iloa o le malumalu e fesoasoani ia i tatou ia malamalama ma iloa lelei ai Iesu Keriso?
Afai e mafai, valaaulia tagata aoga e suesue i ata o le malumalu i le temples.ChurchofJesusChrist.org ma faamatala pe faapefea e se ata patino ona faamanatu atu ia i latou ia Iesu Keriso. Atonu foi e te manao e talanoaina le taua o fuaitau “Paia i le Alii” ma le “O Le Maota o le Alii,” o loo maua i malumalu taitasi.
O uunaiga nei ua faamoemoe e fesoasoani ai i tagata aoga e talanoaina auala e mafai ona latou vaai ai i le Faaola i le totonugalemu o latou aafiaga i le malumalu. Valaaulia tagata aoga e faatumu faatasi nei uunaiga o ni vaega toalaiti. E mafai e vaega taitasi ona faatumu faatasi nei uunaiga i se pepa se tasi.
A o e faamaeaina ia uunaiga nei, mafaufau pe faapefea ona faamanatu atu e le malumalu ia te oe ia Iesu Keriso.
-
O ofu papae tatou te ofuina i le malumalu e faamanatu mai ai ia i tatou ia Iesu Keriso aua …
-
O mea tatou te vaaia i le malumalu e faamanatu mai ai ia i tatou ia Iesu Keriso aua …
-
O mea tatou te faia i le malumalu e faamanatu mai ai ia i tatou ia Iesu Keriso aua …
-
O le auala ou te saunia ai e alu i le malumalu ua faamanatu mai ai ia te au ia Iesu Keriso ona …
A maea vaega, e mafai ona e valaaulia i latou e faasoa mai mea na latou tusia i se isi vaega i le vasega. O le faasoaina atu o mea na latou aoaoina, e mafai ai ona latou faalolotoina lo latou malamalama ma faamalosia a latou molimau i le Faaola.
O se manao e faatasi ma Iesu Keriso i le malumalu
Mafaufau e valaaulia tagata aoga e tali fesili nei i totonu o a latou api faamaumau mo suesuega. Afai e mafai, atonu e te manao e taina ni musika malū e mafai ona fesoasoani i tagata aoga e mafaufau ai i le malumalu. E mafai ona fesoasoani musika e valaaulia ai le Agaga i le aoaoina o le talalelei. E mafai ona e taina musika mai se viiga e uiga i le malumalu. Pe mafai foi ona e taina se vitio o se aufaipese a tamaitai talavou o loo faatinoina le “In That Holy Place,” o loo maua i le ChurchofJesusChrist.org.
In That Holy Place
A Young Women choir from stakes in Highland sings “In That Holy Place.”
-
O le a se mea ua e iloaina pe lagonaina i le asō e uiga i le Faaola o le totonugalemu o la tatou tapuaiga i le malumalu?
-
E mafai faapefea e mea na e aoaoina pe lagonaina ona uunaia ai le auala e te saunia ai ma tapuai i le Alii i Lona fale?
Ia mautinoa ua lava le taimi e tali atu ai tagata aoga a o lei valaauliaina tagata aoga naunautai e faasoa mai o latou manatu. E mafai foi ona e faasoa atu ni auala e te avea ai le Faaola ma totonugalemu o lou aafiaga i le malumalu.