Lesona 205: Sauniuniga mo le Malumalu

O le Faia o Tapuaiga i le Malumalu o se Sailiga i le Olaga Atoa

Auai i le Malumalu i o Tatou Olaga Atoa

Ua tatou ola i se taimi fiafia e lei tupu muamua o le fausiaina o malumalu. Ua faia e le Alii faamanuiaga o Lona maota paia ia sili ona mauagofie nai lo se isi lava taimi. E mafai ona fesoasoani lenei lesona i tagata aoga ia lagona le taua o le tapuai i le Alii i malumalu i o latou olaga atoa.

Gaoioiga E Ono Mafai Ona Aoao Ai

Faateleina le taimi i le malumalu

O loo faaaogaina se tulaga e suesue ai i lenei lesona atoa e fesoasoani ai i tagata aoga ia iloa pe faapefea e le tapuai i malumalu ona faamanuiaina i latou i o latou olaga atoa. Valaaulia tagata aoga e mafaufau i o latou olaga a o latou mafaufau i le tulaga e suesue ai. Fetuunai le tulaga e suesue ai pe a manaomia ina ia faatatau i au tagata aoga. O se tasi o auala e faia ai lenei mea o le valaaulia lea o tagata aoga e sui mea o loo i totonu o puipui i mea e talafeagai mo tagata aoga.

O (Joses) e (sefuluono tausaga le matua). Ua (lima tausaga) talu ona avea o ia ma se tagata o le Ekalesia. Sa ia te ia ni aafiaga faaleagaga ae e manao i se molimau malosi atu i le Faaola ma Lana Ekalesia toefuataiina. E lagona e (Joses) i nisi taimi le (lofituina i le tele o mea fai ia lelei ai le aoga). E popole o ia i (lona lumanai ma le auala e ola amiotonu ai i se lalolagi amioleaga).

• Vaai faalemafaufau ia (Joses) o fesili atu ia te oe mo se fautuaga e uiga i se tasi o ona popolega. Aisea e ono avea ai le tapuai i le Alii i Lona malumalu ma fautuaga aoga?

Faitau le saunoaga lenei a Peresitene Russell M. Nelson, ma vaavaai mo fesoasoani e tuuina mai e le Alii mo tatou:

Ia ‘aua lava ne’i see ese la tatou vaai mai mea o loo faia e le Alii mo tatou i le taimi nei. O loo Ia faia Ona malumalu ia mauagofie atili. O loo Ia faatelevaveina le saoasaoa o loo tatou fausiaina ai malumalu. O loo Ia faateleina lo tatou gafatia e fesoasoani ai e faapotopoto Isaraelu. O loo Ia faafaigofieina foi mo i tatou taitoatasi ina ia faamamāina faaleagaga. Ou te folafola atu o le faateleina o taimi e i ai i totonu o le malumalu o le a manuia ai lou olaga i auala e le mafai e se isi lava mea ona faia. …

O’u uso e ma tuafafine pele, tau ina ia outou taulai atu i le malumalu i auala tou te le’i taulai atu ai lava muamua. Ou te faamanuia ia te outou ia outou latalata atili i le Atua ma Iesu Keriso i aso uma. (Russell M. Nelson, “Taulai Atu i le Malumalu,” Liahona, Nov. 2022, 121)

• O le a se mea ua faagaeetia ai oe mai lenei faamatalaga?

• O a folafolaga na tuuina atu e le Alii i lana perofeta?

  A o tali mai tagata aoga, fesoasoani ia i latou e faailoa mai se upumoni e pei o lenei: Ua folafola mai e le Alii e faamanuiaina i tatou i auala e le mafai ona tatou oo i ai i se isi mea a o tatou faateleina le taimi tatou te faaaluina i Lona malumalu.

  Afai e faatapulaa le faaaogaina e au tagata aoga o se malumalu, e mafai ona e talanoa e uiga i auala e mafai ona latou taulai atu ai i le malumalu. Mo se faataitaiga, e mafai e tagata aoga ona taumafai ia agavaa mo le malumalu ma auai i le galuega o talafaasolopito o aiga.

• E faapefea i lou manatu o le faaaluina o le tele o le taimi i le malumalu o le Alii e mafai ai ona faamanuia i tatou i auala e le mafai e se isi mea?

  O fesili nei ua faamoemoe e te manatunatu ai mo oe lava ia. E ono aoga mo tagata aoga le tali o fesili nei i totonu o a latou api faamaumau mo suesuega. E mafaia e ni tagata aoga naunau ona faasoa mai a latou tali i le vasega.

• Mata e te ono auai atu e le aunoa i le malumalu i lou olaga atoa? Aisea?

• O a ni faafitauli e ono manaomia ona e faatoilaloina ina ia e auai ai i le malumalu i lou olaga atoa?

Faamanuiaga folafolaina

Mafaufau pe mafai faapefea ona e fesoasoani i tagata aoga e faateleina lo latou manao e tapuai i le Alii i Ona malumalu. O se tasi o auala e faia ai lenei mea o le fesoasoani lea i tagata aoga e faailoa mai le tele o faamanuiaga o le tapuai i le Alii i Ona malumalu. E mafai e tagata aoga ona faia se lisi i luga o le laupapa o mea latou te maua i mau ma faamatalaga nei.

Faitau mau ma faamatalaga nei, ma vaavaai mo faamanuiaga ua folafola mai e le Alii ia i latou o e tapuai ia te Ia i Lona maota:

• Mataupu Faavae ma Feagaiga 95:8

• Mataupu Faavae ma Feagaiga 109:22–26

Na folafola mai e Peresitene Russell M. Nelson:

Faamolemole ia faaavanoa se taimi mo le Alii i Lona maota paia. E leai se mea o le a faamalosia lou faavae faaleagaga e pei o auaunaga i le malumalu ma tapuaiga i le malumalu. (Russell M. Nelson, “Faaavanoa se Taimi mo le Alii,” Liahona, Nov. 2021, 121)

Faamolemole talitonu mai ia te a’u pe a ou fai atu, a atiae lou faavae faaleagaga ma le mausali i luga o Iesu Keriso, e lē manaomia la ona e fefe. Pe a e faamaoni i au feagaiga na osia i totonu o le malumalu, o le a faamalosia oe e Lona mana. O lea, pe a oo ina tutupu mafui’e faaleagaga, o le a mafai ona e tu malosi ona ua mautu ma lē maluelue lou faavae faaleagaga. (Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 96)

Na aoao mai Peresitene Henry B. Eyring:

Ua toatele talavou ua iloaina o le foai atu o o latou taimi e faia ai sailiga o talafaasolopito o aiga ma galuega faalemalumalu ua faalolotoina ai la latou molimau o le fuafuaga o le faaolataga. Ua faateleina ai le uunaiga a le Agaga i o latou olaga ma faaitiitia ai faatosinaga a le fili. Ua fesoasoani ai ia i latou e lagona le latalatala atili i o latou aiga ma latalata atili ai i le Alii o Iesu Keriso. Ua latou aoaoina o lenei galuega e le na o tagata ua maliliu e faaolaina ai; e faaolaina ai foi i tatou uma (tagai i leMF&F 128:18). (Henry B. Eyring, “Faapotopotoina o le Aiga o le Atua,” Liahona, Me 2017, 22)

• O a ni mea ua aoaoina ai oe e nei faamanuiaga e uiga i le Tama Faalelagi ma Iesu Keriso?

• Na faapefea ona faamanuiaina oe e le Alii mo le auai i galuega o le malumalu ma talafaasolopito o aiga?

• E mafai faapefea e nei faamanuiaga ona uunaia oe e tapuai i le Alii i le malumalu i le taimi nei? I lou olaga atoa?

Tapuaiga i le malumalu i o tatou olaga atoa

O le tulaga suesue lenei e mafai ona fesoasoani i tagata aoga ia malamalama ai i le taua o le tapuai i le Alii i malumalu i o latou olaga atoa. I le taimi o le tulaga suesue, faamalosiau i tagata aoga e mafaufau e uiga i o latou lumanai ma le auala e mafai ona latou tapuai ai i le Alii i malumalu i o latou olaga atoa.

E mafai ona e faaaogaina ni filifiliga eseese mo suesuega ma ni vaega eseese o le tulaga suesue. E mafai e tagata aoga ona suesueina ni vaega o se vasega, taitoatasi, ma i ni vaega.

A maea vaega taitasi, taofi e talanoaina fesili nei:

• O a ni alofaga e mafai ona faia e (Joses) ma (Isabel) mo le le faamuamuaina o le tapuai i le malumalu?

• O a ni faamanuiaga mai le tapuai i le Alii i Lona maota e mafai ona fesoasoani ia (Joses) ma (Isabel)?

• O a ni osigataulaga e ono manaomia ona faia e (Joses) ma (Isabel) ina ia tapuai soo ai i le Alii i le malumalu?

20 ma ona tupu tausaga o le matua

Ina ua toe foi mai i le fale mai le auauna atu i se misiona, sa saili (Joses) e faalautele lona aotauina i (se aoga o fefaatauaiga i le lotoifale). A o (auai i le inisitituti), sa feiloai ai o ia i se tamaitai talavou e igoa ia (Isabel), ma sa la faaipoipo. Ina ua uma le faauuga, (na amata ai e (Joses) lana lava pisinisi). E popole o ia (e uiga i le tausia o lona aiga). Ua amata le la aiga ma (Isabel) ma ua faamanuiaina i se fanau aulelei e (toatolu). Ua faia e (Joses) ma (Isabel) le mea sili la te mafaia e pulea ai le taimi faatasi ma lo laua aiga, (o le laua pisinisi), ma valaauga o le Ekalesia. I le (fa tausaga), o se tasi o le la fanau (na manua tigaina ai lava i se faalavelave faafuasei).

30 ma ona tupu o la tausaga

E galulue malosi (Joses) ma (Isabel) e tausia lo la aiga e ala i le (faagaoioia o le laua pisinisi). Ua la feagai ma luitau o le tausia o le la fanau ma fesoasoani ia i latou ia (maua a latou lava molimau ia Iesu Keriso). E taumafai (Joses) e faapaleni le taimi e faaaluina faatasi ma lona aiga, (lana pisinisi), ma lona valaauga o se (faufautua i le korama a le au aoao). O loo auauna atu Isabel o se (peresitene o le Peraimeri), e taumafai e fesoasoani (i le pisinisi a le aiga), ma taumafai e i ai iina mo lana fanau.

60 ma ona tupu o la tausaga

O le fanau a (Joses) ma (Isabel) (ua i ai a latou lava aiga). E alolofa (Joses) ma (Isabel) i lo latou aiga ae popole pea i (fanau a le la fanau i le mulimuli ia Iesu Keriso ma faia ni faaiuga lelei). A o faasolo ina matutua, (na faasolo ina vaivai le soifua maloloina o Joses).

Mafaufau e faitau le saunoaga a Peresitene Russell M. Nelson i le “Punaoa Faaopoopo” lea e tali ai le fesili “E mafai faapefea ona tatou faamuamua tapuaiga i le malumalu i le taimi nei ma i le lumanai?” Talanoaina pe faapefea ona faatatau le faamatalaga i le tulaga suesue ma o tatou lava olaga.

O se tusi ia oe lava

Mafaufau e valaaulia tagata aoga e tusi se tusi faamalosiau i o latou tagata i le lumanai e uiga i le taua o le tapuai i le Alii i Ona malumalu. Atonu e mananao tagata aoga e tusi se aso e tatala ai le tusi i luga o se teutusi ma sefe le tusi i totonu o lena teutusi ina ia tatalaina i lena aso.

E mafai ona latou tusia e uiga i:

• O latou aafiaga i le taimi nei i le malumalu.

• Auala e mafai ai e le faaiuga e auai soo i le malumalu ona aafia ai o latou olaga.

• Auala e mafai ai e le faaiuga e auai soo i le malumalu ona aafia ai a latou sootaga ma le Tama Faalelagi ma Iesu Keriso.

• Auala e mafai ona latou faamuamua ai tapuaiga i le malumalu i le taimi nei ma i le lumanai.

Faamanatu i tagata aoga e faatino soo se uunaiga atonu na latou maua mai le Agaga Paia ma tusi e uiga i isi o latou manatu o i ai.

Punaoa Faaopoopo

Ae faapefea pe afai ou te le fiafia e alu i le malumalu?

Na aoao mai Peresitene Russell M. Nelson:

Afai e te lei fiafia e auai i le malumalu, ia alu soo—ae lē o le faaitiitia. Ia faataga le Alii, e ala i Lona Agaga, e a’oa’o ma musuia oe iina. Ou te folafola atu ia te oe i le gasologa o taimi, o le a avea le malumalu ma se nofoaga o le saogalemu, mafanafana, ma faaaliga. (Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 95)

E mafai faapefea ona tatou faamuamua le tapuai i le malumalu i le taimi nei ma i le lumanai?

Na fautua mai Peresitene Russell M. Nelson:

“O’u uso e ma tuafafine pele, o sauaga a le fili ua matuā faateteleina le saoasaoa, i le malolosi ma le eseese naua. O le manaomia ona tatou i ai i le malumalu e le aunoa ua matuā sili ona manaomia i le taimi nei. Ou te aioi atu ia te outou ia tagai ma le agaga tatalo pe faapefea ona faaalu lou taimi. Ia saofagā lou taimi i lou lumanai ma i lou aiga. Afai e te latalata i se malumalu, ou te uunaia oe ia saili se auala e fai ai sou taimi faatulagaina ma le Alii—ia i ai i totonu o Lona maota paia—ona tausia lea o lena taimi faatulagaina ma le sa’olele atoatoa ma le olioli. Ou te folafola atu ia te outou o le a aumai e le Alii ni vavega ua Ia silafia tou te manaomia a o outou faia ni osigataulaga e auauna atu ma tapuai i totonu o Ona malumalu. (Russell M. Nelson, “Avea ma Faataitaiga Lelei o le Au Paia o Aso e Gata Ai,” Liahona, Nov. 2018, 114)

Na tautino mai e Elder Richard G. Scott (1928–2015) o le Korama a Aposetolo e Toasefululua:

Ona ou te alofa ia te outou, o le a ou tautala atu ai ia te outou ma le loto i le loto, e aunoa ma le faavaivai i upu. Ua ou vaai i le tele o taimi ua faia e tagata taitoatasi ni osigataulaga tetele ina ia o atu ai i se malumalu mamao. Ae a fausia se malumalu e latalata ane, i totonu o se taimi puupuu, e toatele e le asiasi soo i ai. E i ai lou manatu: A faigofie ma lata mai se malumalu, e mafai e mea laiti ona faalavelave i au fuafuaga e alu i le malumalu. Faatutu ni sini faapitoa, mafaufau i ou tulaga, i taimi e mafai ai ma o le a auai ai i sauniga o le malumalu. Ona aua lea nei faatagaina se isi lava mea e faalavelave i lena fuafuaga. O lenei mamanu o le a faamautinoa ai o i latou o e nonofo i le ata o se malumalu o le a faamanuiaina e pei foi o i latou o e fuafua mamao ma faia se malaga umi i le malumalu. …

Ou te faamalosiau ia te outou e faatulaga lau lava sini i le tele o taimi o le a e maua ai sauniga o loo ofoina atu i a tatou malumalu o loo faagaoioia. O le a se mea e sili atu ona taua nai lo le alu atu ma auai i sauniga o le malumalu? O le a se gaoioiga e sili atu sona aafiaga ma tuuina atu ai se olioli sili atu ma le fiafiaga loloto nai lo le tapuai i le malumalu? (Richard G. Scott, “Tapuaiga i le Malumalu: O le Puna o le Malosi ma le Mana i Taimi e Manaomia Ai,” Liahona, Me 2009, 43)

Ua aoao mai Elder Neil L. Andersen o le Korama a Aposetolo e Toasefululua:

Ua sili atu nei ona latalata ma maua malumalu nai lo se isi lava taimi muamua. Ae i nei taimi o le vevesi, ua faamoemoe le Alii ia tatou fetuunai o tatou mausa ma ia tele atu taimi e i ai i Lona fale. (Neil L. Andersen, “A Compensatory Spiritual Power for the Righteous” [Brigham Young University Education Week devotional, Aug. 18, 2015], speeches.byu.edu)

Na aoao mai Elder David A. Bednar o le Korama a Aposetolo e Toasefululua:

I totonu o lou leo o loo i ai le toatele o tamaitai talavou, alii talavou, ma tamaiti. Ou te augani atu ia te outou ia agavaa, ia mausali, ma ia tulimatai atu ma le naunautai tele i le aso o le a outou maua ai sauniga ma faamanuiaga o le malumalu. (David A. Bednar, “Taofia ma le Mamalu o se Igoa ma Tulaga,” Liahona, Me 2009, 100)

Gaoioiga Faaopoopo e Aoao Ai

Isi mea e sui i le tulaga suesue

Nai lo le faaaogaina o le tulaga suesue, e mafai ona e tuuina atu i tagata aoga ni fasi pepa laiti ma valaaulia i latou e tusi i lalo ni faaiuga taua ma luitau eseese latou te manatu o le a latou fetaiai i le lumanai. Talanoaina pe faapefea e le tapuai soo i le Alii i Lona maota ona fesoasoani ia i latou e faia ai faaiuga ma feagai ai ma luitau. E mafai foi ona e talanoaina faafitauli latou te ono feagai i le tapuai soo i le Alii i totonu o le malumalu ma osigataulaga o le a manaomia ona latou faia ina ia faia ai.

Sa alu Iesu i le malumalu i Lona soifuaga atoa

Ina ia fesoasoani i tagata aoga e aoao mai le faataitaiga a le Faaola, e mafai ona e fesoasoani ia i latou ia iloa le auala na faamuamua ai e Iesu le malumalu. E mafai e tagata aoga ona suesue i taimi eseese na alu ai Iesu i le malumalu i Ierusalema. Atonu e te manao e taua na malaga le Faaola i se mamao tele i le savali (pe tusa o le 100 maila po o le 160 kilomita) mai Kalilaia i Ierusalema. Mafaufau e valaaulia tagata aoga e faitau se mau se tasi pe sili atu nei ma talanoaina pe na faapefea ona faaalu e le Faaola le taimi i le malumalu i le taimi o Lana galuega. Ona mafai lea e tagata aoga ona talanoaina auala e faamuamua ai le malumalu i o latou olaga.

• Luka 2:41–47

• Ioane 2:13–16

• Mataio 21:12–14

• Luka 20:1; Ioane 8:2

Vitiō

Ina ia fesoasoani i tagata aoga ia iloa se faataitaiga o le auala na maua ai e se tamaitai talavou le malosi mai le auai i le malumalu, e mafai ona e faaali atu le vitio “The Temple Landmark for Eternity: Karen” (3:48). E mafai ona e faaali atu le vitio ae lei faasoa mai e tagata aoga le auala na faamanuiaina ai i latou e ala i le auai i le malumalu.

O mea tatou te faamuamua

Mafaufau e faaaoga se lesona o mea faitino e fesoasoani ai i tagata aoga e mafaufau i mea latou te faamuamua ma le auala latou te ono faamuamua ai le malumalu. Aumai se fagu tioata; oneone, iliili, po o le araisa; ma maa tetele e ofi i totonu o le fagu. O maa ma oneone e faatusa i auala eseese tatou te faaaluina ai o tatou taimi. Afai e faatumu muamua le fagu i le oneone, o le a le ofi maa. Afai e tuu muamua maa i totonu o le fagu, o le a ofi le oneone. Talanoaina pe faapefea ona pei tapuaiga i le malumalu o se tasi o maa ma pe faapefea ona avea e tagata aoga le tapuaiga i le malumalu o se mea e faamuamua i o latou olaga. O le tusiga “Faaaogaina Lelei o Lou Taimi” (New Era, Iulai 2020, 34–35) o loo faamatala mai ai le auala e mafai ona e faia ai lenei mea.