“Lēsoni 204—Ko Sīsū Kalaisi ʻa e Uho ʻo e Moihū Kotoa Pē ʻi he Temipalé: ʻKo Sīsū Kalaisi ʻa e ʻUhinga ʻOku Tau Langa Ai ʻa e Ngaahi Temipalé,’” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Ko Sīsū Kalaisi ʻa e Uho ʻo e Moihū Kotoa Pē ʻi he Temipalé,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 204: Teuteu ki he Temipalé
Ko Sīsū Kalaisi ʻa e Uho ʻo e Moihū Kotoa Pē ʻi he Temipalé
“Ko Sīsū Kalaisi ʻa e ʻUhinga ʻOku Tau Langa Ai ʻa e Ngaahi Temipalé”
ʻI hono kotoa ʻo taimí, kuo fekauʻi ʻe he ʻEikí ʻa Hono kakaí ke langa ha ngaahi temipale. Kuo tau mamata ʻi hotau kuongá, ki ha tupulaki lahi ʻi he langa temipalé. Ko Sīsū Kalaisi ʻa e uho ʻo e meʻa kotoa pē ʻoku tau fai ʻi he temipalé. ʻE lava ke tokoni e lēsoni ko ʻení ke ongoʻi ʻe he kau akó ha loto-holi lahi ange ke moihū kia Sīsū Kalaisi ʻi Hono falé.
Ngaahi ʻEkitivitī Ako ʻOku Ala Fakahokó
Ko e Fakamoʻuí ʻa e uho ʻo ʻetau moihuú
Fakakaukau ke fakaʻaliʻali ha ʻū tā ʻo e kakai ʻoku nau maʻu e sākalamēnití, toʻu tupu ʻoku ʻalu ki he lotú, mo e kakai lalahi kei talavou ʻoku nau ngāue fakafaifekau taimi kakato.
-
ʻOkú ke pehē ʻoku founga fēfē ʻa e hoko ʻa Sīsū Kalaisi ko e uho ʻo hono maʻu e sākalamēnití, ʻalu ki he Lotú, pe ngāue fakafaifekau taimi kakató?
-
ʻE uesia fēfē ha aʻusia ʻa ha taha kapau naʻe ʻikai ke nau tokanga taha ki he Fakamoʻuí lolotonga ʻenau kau ki he ngaahi ʻekitivitī ko ʻení?
Fakaʻaliʻali ki he kau akó ha fakatātā ʻo ha temipale ofi atu kiate koe fakataha mo ha fakatātā ʻo e Fakamoʻuí. Fakaafeʻi e kau akó ke nau fakakaukauloto ki he ngaahi fehuʻi ko ʻení. ʻE ala ʻaonga kiate kinautolu hono tohi ʻenau ngaahi talí ʻi heʻenau tohinoa akó.
Fakakaukauloto ki hoʻo ngaahi aʻusia ʻi he temipalé pe teuteu ki he temipalé.
-
Ko e hā e tuʻunga ʻoku hoko ai e Fakamoʻuí ko e uho ʻo hoʻo teuteu ke kau atu ʻi he temipalé pea mo e ngaahi aʻusia kuó ke maʻu ʻi hoʻo ʻi aí?
-
ʻE faitokonia fēfē hoʻo aʻusia ʻi he temipalé ʻi hoʻo tokanga lahi ange ki he Fakamoʻuí?
Poupouʻi e kau akó ke fakaafeʻi e Laumālié ke tataki kinautolu ʻi heʻenau feinga ke ako lahi ange fekauʻaki mo e founga ʻoku hoko ai e Fakamoʻuí ko e uho ʻo e moihū ʻi he temipalé.
ʻOku fekauʻi ʻe he ʻEikí Hono kakaí ke langa ha ngaahi temipale
ʻOku fakatātaaʻi ʻe he ʻū fakatātā ko ʻení ha niʻihi ʻo e ngaahi potu toputapu mo e ngaahi temipale naʻe fekau ʻe he ʻEikí ki Hono kakaí ke nau langa ʻi he kuonga muʻá. Fakakaukau ke fakaʻaliʻali ia pea ʻeke ki he kau akó pe te nau lava ʻo ʻiloʻi e ʻū fale ʻi he fakatātaá (ko e tāpanekale naʻe langa ʻe Mōsese ʻi he toafá [vakai, ʻEkesōtosi 25:8], temipale ʻo Solomoné ʻi Selusalemá [vakai, 1 Ngaahi Tuʻi 6:12–13], ko e temipale ʻo e kau Nīfaí ʻi he kolo ko Mahú [vakai, 3 Nīfai 11:1]).
ʻI he Tokāteline mo e Ngaahi Fuakavá, naʻe fekauʻi ʻe he ʻEikí ʻa e Kāingalotú ke nau langa ha ngaahi temipale (vakai, Tokāteline mo e Ngaahi Fuakava 57:3; 109:2; 115:7–8; 124:26–27). ʻOku muimui ʻa e fekau ko ʻení ʻi he sīpinga naʻe fokotuʻu ʻe he ʻEikí ʻi he kuonga muʻá.
Kuo fakahā ʻe he Kau Palesitenisī ʻUluakí:
Kuo fekauʻi ʻe he ʻEikí ʻi he taimi kotoa pē kuo ʻi ai ha kakai ʻi he māmaní ʻe talangofua ki Heʻene folofolá, ke nau langa ha ngaahi temipale. (“First Presidency Releases Statement on Temples,” Jan. 2, 2019, ChurchofJesusChrist.org)
Lau ʻa e Tokāteline mo e Ngaahi Fuakava 109:2, 5, 12–13, ʻo kumi e meʻa ʻoku akoʻi ʻe he ʻEikí fekauʻaki mo e temipalé.
-
Ko e hā e meʻa naʻá ke ʻiló?
-
Te ke fakamatalaʻi fēfē ʻa e veesi 13 ʻi hoʻo lea pē ʻaʻau?
Ko e moʻoni ʻe taha ʻe lava ke ʻiloʻi ʻe he kau akó ko e temipalé ko e fale ia ʻo e ʻEikí, ko ha potu ʻo ʻEne māʻoniʻoní.
-
Ko e hā ha ngaahi tāpuaki ʻe lava ke tau maʻu ʻi hono ʻiloʻi e moʻoni ko ʻení kiate kitautolú?
ʻI he taimi ʻe feʻunga aí, poupouʻi e kau akó ke nau vahevahe ha ngaahi aʻusia kuo nau maʻu naʻa nau ongoʻi ofi ai ki he ʻEikí ʻi he temipalé pe ongoʻi ko e temipalé ko ha potu māʻoniʻoni ia. ʻE lava ke tokoni hono vahevahe hoʻo ngaahi aʻusiá ke vahevahe foki ai ʻe he kau akó ʻenau ngaahi aʻusiá.
Ko e Fakamoʻuí ʻoku ʻi he uho ʻo e temipalé
ʻE lava e ngaahi fakamatala ko ʻení ʻo tokoni ke mahino ki he kau akó ʻa e founga ʻoku hoko ai ʻa e Fakamoʻuí ko e uho ʻo e temipalé. ʻI hono lau ʻe he kau akó ʻa e ngaahi fakamatalá, fakaafeʻi ke nau kumi ha tefitoʻi taumuʻa ʻo e temipalé.
Naʻe akonaki ʻa Palesiteni Lāsolo M. Nalesoni ʻo pehē:
ʻOku kau ʻa e temipalé ʻi he uho ʻo hono fakamālohia ʻo ʻetau tuí mo e ivi fakalaumālié he ko e Fakamoʻuí mo ʻEne tokāteliné, ko e ʻelito moʻoni ia ʻo e temipalé. Ko e meʻa kotoa ʻoku akoʻi ʻi he temipalé, ʻi he fakahinohinó pea ʻi he Laumālié, ʻokú ne fakatupulaki ʻetau mahino kia Sīsū Kalaisí. ʻOku haʻi kitautolu kiate Ia ʻe Heʻene ngaahi ouau mahuʻingá ʻo fakafou ʻi he ngaahi fuakava toputapu ʻo e lakanga fakataulaʻeikí. (Russell M. Nelson, “Ko e Temipalé mo Ho Fakavaʻe Fakalaumālié,” Liahona, Nōvema 2021, 94)
Naʻe fakamoʻoni ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
Ko e meʻa kotoa pē ʻoku ako pea mo e meʻa kotoa pē oku fakahoko ʻi he temipalé ʻokú ne fakamamafaʻi ʻa e tuʻunga fakaʻotua ʻo Sīsū Kalaisí pea mo Hono fatongia ʻi he palani maʻongoʻonga ʻa e Tamai Hēvaní ki he fiefiá. (David A. Bednar, “Tuku Ke Langa ʻa e Falé Ni ki Hoku Hingoá,” Liahona, Mē 2020, 86)
-
Ko e hā e meʻa ʻokú ke ongoʻi ʻoku mahuʻinga fekauʻaki mo e ngaahi fakamatala ko ʻení?
-
ʻOkú ke pehē ko e hā ʻoku mahuʻinga ai ke ʻiloʻi ʻoku tokoni e temipalé ke mahino kiate kitautolu pea tau ʻiloʻi lelei ange ai ʻa Sīsū Kalaisí?
Kapau ʻe malava, fakaafeʻi e kau akó ke nau fekumi ʻi he ʻū tā ʻo e temipalé ʻi he temples.ChurchofJesusChrist.org pea fakamatalaʻi e founga ʻoku fakamanatu ange ai ʻe ha tā pau ʻa Sīsū Kalaisi kiate kinautolú. Mahalo foki te ke fie aleaʻi e mahuʻinga ʻo e ngaahi kupuʻi lea “Māʻoniʻoni ki he ʻEikí” mo e “Ko e Fale ʻo e ʻEikí,” ʻoku tohi ʻi he temipale takitaha.
ʻOku fakataumuʻa ʻa e ngaahi fakamatala ko ʻení ke tokoniʻi e kau akó ke nau aleaʻi ha ngaahi founga te nau lava ai ʻo vakai ki he Fakamoʻuí ʻi he uho ʻo ʻenau aʻusia ʻi he temipalé. Fakaafeʻi e kau akó ke nau fakakakato fakataha e ngaahi fakamatala ko ʻení ʻi ha fanga kiʻi kulupu tokosiʻi. ʻE lava e kulupu takitaha ʻo fakakakato fakataha e ngaahi fakamatala ko ʻení ʻi ha laʻipepa pē ʻe taha.
ʻI hoʻo fakakakato e ngaahi fakamatala ko ʻení, fakakaukau ki he founga ʻoku fakamanatu atu ai ʻe he temipalé kiate koe ʻa Sīsū Kalaisí.
-
ʻOku fakamanatu mai ʻe he teunga hina ʻoku tau tui ʻi he temipalé ʻa Sīsū Kalaisi koeʻuhí …
-
ʻOku fakamanatu mai ʻe he meʻa ʻoku tau sio ki ai ʻi he temipalé ʻa Sīsū Kalaisi koeʻuhí …
-
Ko e meʻa ʻoku tau fakahoko ʻi he temipalé ʻokú ne fakamanatu mai ʻa Sīsū Kalaisi koeʻuhí …
-
ʻOku fakamanatu mai ʻe he founga ʻoku ou teuteu ai ke ʻalu ki he temipalé ʻa Sīsū Kalaisi koeʻuhí …
ʻI he ʻosi ʻa e ngaahi kulupú, te ke lava ʻo fakaafeʻi kinautolu ke vahevahe e meʻa naʻa nau tohí mo ha kulupu ʻe taha ʻi he kalasí. ʻI hono vahevahe e meʻa naʻa nau akó, te nau lava ʻo fakaloloto e mahino ʻoku nau maʻú mo fakamālohia ʻenau fakamoʻoni ki he Fakamoʻuí.
Ko ha holi ke nofo mo Sīsū Kalaisi ʻi he temipalé
Fakakaukau ke fakaafeʻi e kau akó ke nau tali e fehuʻi ko ʻení ʻi heʻenau tohinoa akó. Kapau ʻe lava, mahalo te ke fie tā leʻosiʻi ha hiva ʻe lava ʻo tokoni ke fakakaukau e kau akó ki he temipalé. ʻE lava ʻa e hivá ʻo tokoni ke fakaafeʻi mai ʻa e Laumālié ki hono ako ʻo e ongoongoleleí. Te ke lava ʻo tā ha hiva mei ha himi fekauʻaki mo e temipalé. Pe te ke lava ʻo huluʻi ha vitiō ʻo ha kuaea ʻo e kau finemui ʻoku nau hivaʻi e “In That Holy Place,” ʻoku maʻu ʻi he ChurchofJesusChrist.org.
-
Ko e hā ha meʻa kuó ke ʻilo pe ongoʻi he ʻahó ni fekauʻaki mo e Fakamoʻuí ko e uho ʻo ʻetau moihū ʻi he temipalé?
-
ʻE tākiekina fēfē ʻe he meʻa naʻá ke ako pe ongoʻí ʻa e founga hoʻo teuteu mo moihū ki he ʻEikí ʻi Hono falé?
Fakapapauʻi ʻoku maʻu ʻe he kau akó ha taimi feʻunga ke tali ai kimuʻa pea fakaafeʻi e kau ako ʻoku loto ke vahevahe ʻenau fakakaukaú. Te ke lava foki ʻo vahevahe ʻa e ngaahi founga ʻokú ke tuku ai ke hoko e Fakamoʻuí ko e uho ʻo ho aʻusia ʻi he temipalé.