Lēsoni 207: Teuteu ki he Temipalé

Hisitōlia Fakafāmilí mo e Ngāue Fakatemipalé

Te Tau Lava ʻo Fakahoko ha Ngaahi Ouau Maʻa ʻEtau Ngaahi Kui Kuo Pekiá ʻi he Fale ʻo e ʻEikí

ʻI he palani ʻaloʻofa ʻa e Tamai Hēvaní, ʻoku ʻikai mole ʻo taʻengata ʻa kinautolu kuo pekia ka naʻe teʻeki ke nau maʻu e ngaahi ouau fakamoʻui ʻo e ongoongolelei ʻo Sīsū Kalaisí. Te tau lava ʻo fakahoko ki heʻetau ngaahi kui kuo pekiá ʻa e tokoni ʻoku nau fiemaʻú ʻaki hono fakahoko e hisitōlia fakafāmilí mo e ngāue fakatemipalé. ʻE lava ke tokoni ʻa e lēsoni ko ʻení ki he kau akó ke nau kumi e hingoa ʻo ʻenau ngaahi kui kuo pekiá pea teuteu ke fakahoko e ngaahi ouaú maʻanautolu ʻi he ngaahi temipale ʻo e ʻEikí.

Ngaahi ʻEkitivitī Ako ʻOku Ala Fakahokó

Ngaahi tāpuaki ʻo e hisitōlia fakafāmilí mo e ngāue fakatemipalé

Tokoni ki he kau akó ke nau fakalaulauloto ki he ngaahi tāpuaki ʻoku maʻu ʻo fakafou ʻi he hisitōlia fakafāmilí mo e ngāue fakatemipalé. Kapau kuo maʻu ʻe he kau akó ha ngaahi aʻusia fakataautaha, te ke lava ʻo fakaafeʻi kinautolu ke vahevahe e ngaahi tāpuaki kuo nau mamata aí.

Kapau ʻe fiemaʻu, te ke lava foki ʻo vahevahe e vitiō “Improve Your Temple Experience; Change Your Life” (3:21), ʻoku maʻu ʻi he ChurchofJesusChrist.org, mei he taimi 1:42 ki he 3:21.

Improve Your Temple Experience; Change Your Life

Elder Scott speaks of youth doing family history and how the youth in Kansas City embraced and succeeded in the work.

Ko ha founga ʻe taha ko e vahevahe e fakamoʻoni ko ʻení.

Naʻe vahevahe ʻe Paea-ʻAlapeni, ko ha taha taʻu 17 ʻoku nofo ʻi Falanisē, ʻa e fakamoʻoni ko ʻení fekauʻaki mo ʻene aʻusia ʻi he ʻaʻahi ki he temipalé:

Ko e fuofua taimi naʻá ku ʻalu ai ki he Temipale Peeni Suisalaní, naʻá ku ʻalu mo hoku fāmilí mo e ngaahi kaungāmeʻá. Naʻe fakafiefia ʻa e aʻusiá ni kiate au. Naʻa mau ongoʻi kotoa ʻa e Laumālié. Naʻá ku ʻiloʻi ko e meʻa naʻá ku faí naʻe lelei pea naʻe hōifua ʻa e ʻOtuá ki heʻemau ngāué. ʻOku ou ʻilo ʻoku ʻomi ʻe he temipalé ha ngaahi tāpuaki lahi kiate kitautolu. ʻI he taimi ʻoku tau tuku ai ha taimi ke fakahoko e ngāue fakatemipalé maʻa ʻetau ngaahi kuí, ʻoku tāpuekina kitautolu ʻe he Tamai Hēvaní. Te Ne hōifua ʻi he meʻa kuo tau fai maʻa ʻEne fānaú ʻi Hono falé. (Paea-ʻAlapeni C., Ki Hono Fakamālohia ʻo e Toʻu Tupú, ʻEpeleli 2022, tafaʻaki ki loto ʻi he takafi muʻá)

• Ko e hā ha ngaahi tāpuaki ʻokú ke ʻilo ʻoku maʻu fakafou ʻi he hisitōlia fakafāmilí mo e ngāue fakatemipalé?

• Te ke lava fēfē ʻo kamata tokoniʻi ha taha ʻoku fie kau ʻi he ngāue fakatemipalé mo e hisitōlia fakafāmilí ka ʻoku ʻikai ke ne ʻilo e founga ke kamata aí?

Ko hono fakahoko e ngaahi ouaú maʻanautolu kuo pekiá

Fakakaukau ke vahevahe ha niʻihi ʻo e ngaahi aʻusia mei he hisitōlia ʻo e Siasí ʻo ha kakai naʻa nau ako fekauʻaki mo e papitaiso maʻá e pekiá ʻi hono fuofua akoʻi ʻi he kuonga fakakosipeli ko ʻení. Te ke lava ʻo fakaafeʻi e kau akó ke nau lau e konga ko ʻeni naʻe toʻo mei he Kau Māʻoniʻoní, Voliume 1, Ko e Fuka ʻo e Moʻoní pea aleaʻi e meʻa ʻoku nau akó mo ha hoa.

Naʻe fakataha ʻa e Kāingalotú ki Nāvū ki he konifelenisi lahi ʻo ʻOkatopa 1840. Naʻe akoʻi lahi ange ʻe Siosefa kiate kinautolu fekauʻaki mo e papitaiso maʻá e kau pekiá, ʻo ne fakamatalaʻi ange ʻoku talitali mai ʻa e ngaahi laumālie ʻo e kau pekiá ki honau kāinga ʻoku kei moʻuí ke nau maʻu ʻa e ouau faifakamoʻuí maʻanautolu.

ʻI he taimi mālōlō ʻo e ngaahi sēsini ʻo e konifelenisí, ne fakavave atu e Kāingalotú ki he Vaitafe Misisipí, ʻa ia ne tuʻu ai ha kaumātuʻa ʻe niʻihi ʻi he loto vaí ʻo taʻalo mai kiate kinautolu ke nau papitaiso maʻa ʻenau ngaahi kui, tamai, faʻē, tokoua, tuongaʻane, tuofefine mo e fānau kuo pekiá. Ne ʻikai fuoloa mei ai ne papitaiso ʻa Hailame maʻa hono tokoua ko ʻAlaviní.

ʻI he siofi ʻe Vilate Kimipolo ʻa e kaumātuʻá ʻi he loto vaitafé, naʻá ne fakaʻānaua ke papitaiso maʻa ʻene faʻeé, ʻa ia ne mate ʻi ha taʻu ʻe hongofulu tupu kimuʻa ai. Naʻá ne fakaʻamu ne ʻosi foki mai ʻa Hiipa mei ʻIngilani ke fakahoko e ouaú, ka koeʻuhí kuo naʻinaʻi ʻe Siosefa ki he Kāingalotú ke nau huhuʻi ʻa e kau pekiá ʻi he vave tahá, naʻá ne fakakaukau leva ke papitaiso maʻa ʻene faʻeé ʻi he taimi pē ko iá.

Naʻe fakakaukau foki mo ʻEma Sāmita ki hono fāmilí. Naʻe mālōlō ʻene tamai ko ʻAisake Heilí ʻi Sānuali 1839. …

… Naʻe ʻofa ʻa ʻEma ʻi heʻene tamaí pea naʻá ne papitaiso maʻana ʻi he vaitafé. Naʻe teʻeki ke ne tali e ongoongolelei [kuo fakafoki maí] ʻi he moʻui fakamatelié, ka naʻá ne fakaʻamu he ʻikai ke pehē ai pē ʻo taʻengata. (Kau Māʻoniʻoní, 1:469–70)

• Ko e hā e meʻa naʻá ke maʻu ʻoku ʻuhingamālie mei he ngaahi aʻusia ko ʻení?

Makehe mei he ngaahi meʻa kehe ne fakamatala ki aí, te ke lava ʻo fakamahinoʻi ange naʻe fakahoko e ngaahi papitaiso ko ʻení ʻi he Vaitafe Misisipí kae ʻikai ʻi he temipalé. ʻI he taimi ko iá, naʻe ʻikai ke ʻi ai ha temipale pe faiʻanga papitaiso ʻi Nāvū. Mahalo ʻe fakatokangaʻi foki ʻe he kau akó naʻe papitaiso ʻa ʻEma Sāmita maʻa ʻene tamaí. Te ke lava ʻo fakamatalaʻi ange naʻe fakahā mai ʻe he ʻEikí kimui ange ʻa e sīpinga ki hono fakahoko ʻe he houʻeiki fafiné ʻa e ngaahi ouau maʻá e houʻeiki fafine pea houʻeiki tangata maʻá e houʻeiki tangata (vakai, Kau Māʻoniʻoní, 1:634–35).

Lau ʻa e Tokāteline mo e Ngaahi Fuakava 124:29–36, ʻo kumi e meʻa naʻe fakahā ʻe he ʻEikí kia Siosefa Sāmita fekauʻaki mo e ngaahi papitaiso naʻe fakahoko ʻe he Kāingalotu ʻi Nāvuú maʻá e kau pekiá.

• Ko e hā e meʻa naʻe fakahā ʻe he ʻEikí?

• Ko e hā ʻe lava ke akoʻi mai foki ʻe he ngaahi veesi ko ʻení fekauʻaki mo Iá?

  ʻOku ngalingali ʻe ʻiloʻi ʻe he kau akó ha ngaahi moʻoni kehekehe fekauʻaki mo e ʻEikí ʻoku fakamamafaʻi ai ʻa ʻEne fakamahuʻingaʻi ʻEne ngaahi temipalé. Ko e sīpinga ʻe taha ʻoku tali ʻe he ʻEikí ʻa e ngaahi ouau ʻoku tau fakahoko maʻa ʻetau ngaahi kui kuo pekiá ʻi Hono ngaahi temipale māʻoniʻoní.

  ʻE lava foki ke tala atu ʻe he kau akó ha ngaahi moʻoni fekauʻaki mo e ʻulungaanga ʻo e ʻEikí. Mahalo te nau ʻiloʻi ʻoku faʻa kātaki mo totonu ʻa Sīsū Kalaisi koeʻuhí naʻá Ne palōmesi ki he Kāingalotú ha “taimi feʻunga” (veesi 31, 33) ke langa e temipalé. Neongo ʻoku nofotaha e lēsoni ko ʻení ʻi hono fakahoko e ngaahi ouau ʻi he temipalé tautautefito ki heʻetau ngaahi kuí, kapau ʻoku loto ki ai e kau akó, ongoʻi tauʻatāina ke aleaʻi e ngaahi ʻulungaanga ʻo Sīsū Kalaisí.

• Ko e hā ha meʻa te tau lava ʻo ako mei hono fakaʻaongaʻi ʻe he ʻEikí e ngaahi lea “ngaahi papitaiso maʻa homou kau pekiá”? (vakai, Tokāteline mo e Ngaahi Fuakava 124:32–33; 127:5).

Naʻe lea ʻaki ʻeni ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo ʻetau ngaahi kuí:

Naʻe folofola ʻa e ʻEikí ʻi he ngaahi ʻuluaki fakahinohino ʻo e fakahaá ʻo kau ki he “papitaiso ki homou kau pekiá” [Tokāteline mo e Ngaahi Fuakava 127:5; tānaki atu hono fakamamafaʻí]. Ko hotau tufakanga fakatokāteliné ki heʻetau ngaahi kuí. ʻOku tupu ʻeni he ko e faʻunga fakasilesitiale ʻo e langí ʻoku makatuʻunga ia ʻi he ngaahi fāmilí. (Quentin L. Cook, “Ngaahi Aká mo e Vaʻá,” Liahona, Mē 2014, 45)

• Kuo tākiekina fēfē koe ʻi hoʻo ako fekauʻaki mo hoʻo ngaahi kuí? ʻE founga fēfē ʻene tākiekina koé?

• ʻOkú ke pehē ʻe kaunga fēfē hono fakahoko e ngaahi ouau fakatemipalé maʻa hoʻo ngaahi kui kuo pekiá ki ho vā fetuʻutaki mo hoʻo Tamai Hēvaní?

Ko e konga te ke lava ʻo fakahoko ʻi he ngāue ʻa e ʻEikí ki he fakamoʻuí

Te ke lava ʻo fakaafeʻi e kau akó ke nau fakakaukau ki heʻenau ngaahi aʻusia ‘i he hisitōlia fakafāmilí mo e ngāue fakatemipalé ʻaki ʻenau fakakaukauloto ki he kaunga lelei ʻa e ngaahi fakamatala ko ʻení kiate kinautolú.

ʻI ha meʻafua ʻo e 1 ki he 5 (1 = ʻikai moʻoni mo e 5 = moʻoni ʻaupito), fakafuofuaʻi e founga hono fakamatalaʻi lelei koe ʻe he ngaahi fakamatalá ni.

ʻOku ou ʻilo e founga ke kumi ʻaki e hingoa ʻo ʻeku fanga kuí.

ʻOku ou ʻilo e founga hono fakahū e hingoa ʻo ʻeku ngaahi kuí ki he temipalé.

ʻOku ou fie kumi e hingoa ʻo ʻeku ngaahi kuí pea fakahoko e ngaahi ouaú maʻanautolu ʻi he temipalé.

ʻOku ou ongoʻi e mahuʻinga hono fakahoko e ngāue maʻa hoku kāinga kuo pekiá.

Poupouʻi e kau akó ke vahevahe e mahino ʻoku nau maʻú pea mo ʻenau aʻusia ʻi he ngāue fakatemipalé mo e hisitōlia fakafāmilí. ʻEke ange e meʻa ʻoku nau fie akó mo e meʻa ʻoku nau fiemaʻu tokoni aí. Fakaafeʻi ke nau feakoʻaki ʻiate kinautolu pea mo e Laumālie Māʻoniʻoní ʻaki hono aleaʻi e ngaahi tāpuaki ʻe lava ke ʻomi ʻe he ngāue fakatemipalé mo e hisitōlia fakafāmilí.

ʻO ka fiemaʻu, fakakaukau ke huluʻi ha taha ʻo e ngaahi vitiō ko ʻení.

“Tokanga Taha ki he Temipalé” (7:18; mamata mei he taimi 3:50 ki he 4:36)

Tokanga Taha ki he Temipalé

ʻOku akonaki ʻa Palesiteni Nalesoni fekauʻaki mo e mahuʻinga ʻo e ngaahi temipalé mo fanongonongo ʻa e ngaahi palani ke langa ha ngaahi temipale lahi ange.

“Spiritual Dynamite” (2:40)

Spiritual Dynamite

Family history and temple service combine to create a spiritual power that will enable you to become the person God wants you to be. You can read Elder Renlund's talk from Family Discovery Day here.Read about Alfred Nobel - Man of Peace.

“Ko Hono Tānaki e Fāmili ʻo e ʻOtuá” (4:18)

Gathering the Family of God

Family History enthusiasts share touching experiences they had while finding their ancestors’ stories.

Ngaahi sitepu te ke lava ʻo fakahokó

Fakaʻaliʻali e ngaahi sitepu ko ʻení ʻe lava ʻo tokoni ki he kau akó ke nau kau ki he hisitōlia fakafāmilí mo e ngāue fakatemipalé. Poupouʻi e kau ako kuo nau fakahoko e ngaahi sitepu ko ʻení kimuʻá ke nau tokoni ki he toenga ʻo e kau akó ʻi he lahi taha ʻe malavá.

• Sitepu 1. Faʻu ha ʻakauni ʻi he Siasí.

• Sitepu 2. Vakaiʻi e kiʻi tohi Ko Hoku Fāmilí: Ngaahi Talanoa ʻOkú ne Fakatahatahaʻi Kimautolú, FamilySearch, pe ko e app Family Tree.

• Sitepu 3. Fakaʻaongaʻi e Ngaahi Ouau Kuo Māú.

• Sitepu 4. Fakataimi-tēpileʻi ha ʻapoinimeni pea ʻalu ki he temipalé.

Fakaafeʻi ha tokotaha ako ke ne fakatātaaʻi e founga ke fakaʻaongaʻi ai e Ngaahi Ouau Kuo Māú. Poupouʻi e kau akó ke nau download pea ako ke fakaʻaongaʻi e app Family Tree. ʻI he polokalamá, te nau lava ʻo lomi ʻi he fakaʻilonga temipalé mo e fehokotakiʻanga Ordinances Ready ke kumi ha hingoa ʻo e kau mēmipa ʻo e fāmilí te nau lava ʻo fakahoko ki ai e ngaahi ouaú. Tokoni ke ako ʻe he kau akó ʻa e founga ke likuesi mo paaki e ʻū kaati hingoá ke ʻave ki he temipalé. ʻI hono maʻu pē ʻe he kau akó e hingoa ʻo ha ngaahi kui ʻe niʻihi, poupouʻi kinautolu ke ako e founga ʻoku nau pīkinga aí mo ha faʻahinga fakamatala fakataautaha ʻoku maʻu fekauʻaki mo e ngaahi kui ko iá. Fakaafeʻi e kau ako ʻoku ʻi ai hanau lekomeni temipalé ke fakataimi-tēpileʻi ha ʻapoinimeni ke ʻalu ki he temipalé.

Kapau ʻe fiemaʻu, ʻe lava ke ʻoatu ʻe he fakamatala ko ʻení ha fakahinohino lahi ange.

• “How do I create a Church account using ChurchofJesusChrist.org?”

• “Ko e hā e founga ʻokú ke loto ke ke kamata ʻaki?”

• “How to Start a Family Tree on FamilySearch: Adding the First Four Generations”

• Ko Hoku Fāmilí: Ngaahi Talanoa ʻOkú Ne Fakatahatahaʻi Kimautolú

• “Ngaahi Ouau Kuo Māú”

ʻI he ʻosi pē e fetokoniʻaki ʻa e kau akó ke kumi ha hingoa ke ʻave ki he temipalé, te ke lava ʻo fakaafeʻi kinautolu ke vahevahe ha ngaahi fakakaukau mo e ngaahi lēsoni naʻe akó. Poupouʻi kinautolu ke fakakaukau ki he Fakamoʻuí mo ʻEne finangalo ke tau tokoni ki heʻetau ngaahi kuí. Te ke lava ʻo fehuʻi ange:

• ʻOkú ke pehē ʻe tokoni fēfē ʻa e kau ki he ngāue fakatemipalé mo e hisitōlia fakafāmilí he taimi ní ke teuteuʻi koe ke fakahoko mo tauhi e ngaahi fuakava mo e ʻOtuá ʻi Hono temipalé?

• ʻE fakaloloto fēfē hoʻo ʻofa ki he Fakamoʻuí ʻi hono fakahoko e hisitōlia fakafāmilí mo e ngāue fakatemipalé?

Ngaahi Maʻuʻanga Tokoni Kehé

Ko e hā ʻoku fiemaʻu ai au ʻe heʻeku ngaahi kuí?

Naʻe akoʻi ʻe ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku tau fakalāngilangiʻi ʻetau ngaahi kuí ʻaki ʻetau fakaava ʻa e ngaahi langí ʻo fakafou ʻi he ngāue fakatemipalé mo e hisitōlia fakafāmilí pea mo ʻetau hoko ko ha fehokotakiʻanga mālohi ʻi he sēini ʻo hotau toʻu tangatá. …

… ʻOku hanga ʻe he ngāue tokoni taʻesiokita ʻi he temipalé maʻá e kāinga ʻofeiná ʻo ʻai ke moʻoni e Fakalelei ʻa hotau Fakamoʻuí kiate kinautolu pea mo kitautolu. ʻI hono fakamāʻoniʻoniʻi kitautolú, te tau lava ʻo toe foki hake ki he ʻao ʻo e ʻOtuá ko ha ngaahi fāmili kuo fakatahaʻi ʻo taʻengata. (Gerrit W. Gong, “ʻOku ʻI Ai Hotau Hisitōlia Takitaha,” Liahona, Mē 2022, 44–45)

Ko e hā e ngaahi tāpuaki ʻoku maʻu mei he ngāue fakatemipalé mo e hisitōlia fakafāmilí?

Naʻe palōmesi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ou palōmesi atu ʻe fakaivia mo maluʻi hotau toʻu tupú mo e ngaahi fāmilí ʻi hono fakahoko ʻi he ʻofa e ngaahi ouaú maʻá e ngaahi kuí ʻi ha māmani ʻoku fakautuutu ʻene koví. (Quentin L. Cook, “ʻOfa Lahi ki he Fānau ʻa ʻEtau Tamaí,” Liahona, Mē 2019, 79)

Naʻe akoʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku mātuʻaki fakaofo ʻetau lava ʻo tokoni ke huhuʻi ʻa e pekiá, ʻo fakafou ʻi he hisitōlia fakafāmilí mo e ngāue fakatemipalé.

Ka, ʻi heʻetau kau he ʻahó ni ʻi he hisitōlia fakafāmilí mo e ngāue fakatemipalé, ʻoku tau feʻunga foki ai ki he ngaahi tāpuaki “fai fakamoʻui” ne talaʻofa ʻe he kau palōfitá mo e kau ʻaposetoló. … ʻOku kau ʻi he lisi lōloá ni ʻa e ngaahi tāpuakí ni:

• Mahino lahi ange ki he Fakamoʻuí mo ʻEne feilaulau fakaleleí;

• Ivi tākiekina lahi ange ʻo e Laumālie Māʻoniʻoní ke fakamālohia mo ʻomi ha fakahinohino ki heʻetau moʻuí;

• Tui lahi ange, kae hoko ʻo loloto mo tolonga ʻa e ului ki he Fakamoʻuí;

• Lahi ange ʻetau malava mo e fakaʻaiʻai ke ako mo fakatomalá koeʻuhi ko e mahino ko hai kitautolu, feituʻu naʻa tau haʻu mei aí, mo ha vīsone mahino ange ʻo e feituʻu ʻoku tau fakataumuʻa ki aí;

• Tupulaki e ngaahi ivi tākiekina ʻo e fakaleleí, fakamāʻoniʻoniʻí, mo e mapuleʻí ʻi hotau lotó,

• Tupulaki e fiefiá ʻi he malava lahi ange ke ongoʻi e ʻofa ʻa e ʻEikí;

• Tupulaki e ngaahi tāpuaki fakafāmilí, neongo pe ko e hā hotau tūkunga fakafāmili he lolotongá, kuohilí, mo e kahaʻú pe taʻe-kakato ʻetau ʻakau fakafāmilí;

• Tupulaki e ʻofa mo e fakahoungaʻi ʻetau ngaahi kuí mo e kāinga kei moʻuí, koeʻuhí ke ʻoua naʻa tau toe ongoʻi taʻelata;

• Tupulaki e mālohi ke ʻiloʻi e taha ʻoku fie maʻu ke fakamoʻuí, pea ʻi he tokoni ʻa e ʻEikí, tokoniʻi e niʻihi kehé;

• Tupulaki e maluʻi mei he ngaahi ʻahiʻahí pea mo e ivi tākiekina lahi fau ʻa e filí; pea mo e

• Tokoni lahi ange ke fakaleleiʻi e ngaahi loto palopalemá, laveá, pe hohaʻá pea mo fakamoʻui ʻa e kafó.

Kapau ne ke lotua ha taha ʻo e ngaahi tāpuaki ko ʻení, kau ʻi he hisitōlia fakafāmilí mo e ngāue fakatemipalé. ʻI hoʻo fai iá, ʻe tali leva hoʻo ngaahi lotú. (Dale G. Renlund, “Hisitōlia Fakafāmilí mo e Ngāue Fakatemipalé: Silá mo e Fakamoʻuí,” Liahona, Mē 2018, 47)

Ko e hā te u lava ʻo fai kapau ʻoku ou nofo mamaʻo mei ha temipale?

Naʻe pehē ʻe ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku fakaʻau ke ofi atu e temipalé kiate kimoutolu. Ka ʻoku totonu ke moʻui taau mo e temipalé ʻa kimoutolu ʻoku ʻikai lava maʻu pē ki he temipalé koeʻuhí ko ʻene mamaʻó pe ko ha ngaahi tūkunga. Te mou lava ʻo fai ha ngāue mahuʻinga ʻi tuʻa ʻi he temipalé ʻi hoʻomou fekumi mo ʻave hoʻomou ngaahi hingoa fakafāmilí. (Gary E. Stevenson, “ʻOku ʻi Fē ʻa e Ngaahi Kī mo e Mafai ʻo e Lakanga Fakataulaʻeikí?,” Liahona, Mē 2016, 31)

Fēfē kapau ʻoku ʻikai ke u ʻilo e founga ke kumi ai ki heʻeku ngaahi kuí?

Naʻe pehē ʻe ʻEletā Penisimani Ti Hoio ʻo e Kau Fitungofulú:

Ko kimoutolu ko ia ʻoku ʻikai ongoʻi te mou lava ʻo fai ʻa e ngāue ko ʻení, ʻoku totonu ke mou ʻiloʻi ʻoku ʻikai ko kimoutolu pē. Te tau lava kotoa ʻo fakaʻaongaʻi ʻa e ngaahi naunau kuo teuteu ʻe he Siasí mo maʻu ʻi he ngaahi senitā FamilySearch, ʻa ia naʻa tau angamaheni ʻaki ko e ngaahi senitā hisitōlia fakafāmilí. Kuo faʻu ʻa e ngaahi senitā FamilySearch ko ʻení ke faingofua ki he taha kotoa, ʻi ha kiʻi tokoni siʻi, ke kumi ʻa e fakamatala ki heʻene ngaahi kuí pea fokotuʻutuʻu lelei ia ke ne lava ʻo ʻave ki he fale ʻo e ʻEikí. Kātaki ʻo fetuʻutaki ki he kau faifaleʻi hisitōlia fakafāmili ʻi hoʻomou uōtí pe koló ke nau fakahinohino koe ʻi he founga kotoa pē. (Benjamín De Hoyos, “Ko e Ngāue ʻo e Temipalé mo e Hisitōlia Fakafāmilí—Ngāue ʻe Taha mo Tatau Pē,” Liahona, Mē 2023, 53–54)

Ngaahi ʻEkitivitī Fakalahi ki he Akó

Fakafehokotaki mo ʻetau ngaahi kuí

Fakakaukau ke fakaafeʻi ʻa e kau akó ke nau vahevahe ʻa e meʻa ʻoku nau ʻiloʻi fekauʻaki mo ʻenau ngaahi kuí. Poupouʻi e kau akó ke vahevahe ha ngaahi fakaikiiki ʻoku tokoni ke nau ongoʻi ha fehokotaki mo e kau mēmipa ko ʻeni ʻo e fāmilí. Te ke lava ʻo fakaʻaliʻali ha kaati ouau pea kole ki he kau akó ke vahevahe e founga ʻoku tokoni ai e ngaahi kaati ko ʻení ke tau fakahoko e ngaahi ouaú maʻa ʻetau ngaahi kuí ʻi he temipalé. Kapau ʻe fiemaʻu, fakamatalaʻi ange ʻoku tokoni e ngaahi kaati ouaú ke muimuiʻi e ngāue fakatemipalé ʻi hono fakahoko e ngaahi ouaú maʻa ʻetau ngaahi kuí.

ʻE lava ke tokoni e fakamatala “Preparing Your Child for Temple Baptisms and Confirmations” ke teuteu hoʻo kau akó ki he temipalé ʻaki hono kumi ha hingoa ʻo ha kui.

“Glad Tidings: The History of Baptisms for the Dead”

Mahalo ʻe ʻaonga ki he kau akó ha ako fekauʻaki mo e hisitōlia ʻo e papitaiso maʻá e kau pekiá ʻi he kuonga fakakosipeli ko ʻení. Fakakaukau ke fakaʻaongaʻi e vitiō ko ʻení pea taʻofi ʻi ha ngaahi taimi kehekehe ke fakaʻatā e kau akó ke nau ʻeke ha fehuʻi pe vahevahe haʻanau fakakaukau.

“Glad Tidings: The History of Baptisms for the Dead” (6:55)

Glad Tidings: The History of Baptisms for the Dead

Joseph Smith's struggle with his brother Alvin's death led eventually to the introduction of baptisms for the dead. This new ordinance was embraced by saints in Nauvoo who did the first genealogical and family history research in Church history.

Ngaahi tāpuaki kuo talaʻofa mai ki hono tānaki hotau ngaahi fāmilí

Kapau ʻoku loto e kau akó ke nofotaha ʻi he ngaahi tāpuaki hono fakahoko e ngaahi ouaú maʻá e ngaahi kui kuo pekiá ʻi he temipalé, te ke lava ʻo huluʻi ha taha ʻo e ngaahi vitiō ko ʻení. Poupouʻi e kau akó ke nau hiki e ngaahi tāpuaki kuo talaʻofa ʻe he ʻEikí pea mahalo te nau lava ʻo fili ha tāpuaki ʻe taha pe ua ke fekumi ki ai.

• “Ko Hono Tānaki e Fāmili ʻo e ʻOtuá” (2:10)

  Gathering the Family of God

  President Henry B. Eyring describes how we can grow closer to our ancestors through family history and temple work.

• “The Promised Blessings of Temple and Family History Work” (3:26)

  Ko e Ngaahi Tāpuaki ʻo e Ngāue Fakatemipalé mo e Hisitōlia Fakafāmilí kuo Talaʻofa Maí

  Modern apostles, including David A. Bednar, Quentin L. Cook, Neil L. Andersen and Dale G. Renlund have promised many powerful blessings to those who participate in Family History and Temple Service.

• “The Promised Blessings of Temple and Family History Work 2” (4:04)

  The Promised Blessings of Temple and Family History Work 2

  Temple and family history work can provide you with purpose and strength as you selflessly engage in it. It can also help you understand that you are precious in the eyes of God.

ʻOku loto ha tokolahi kuo pekia ke sila ki honau ngaahi fāmilí

Tokoni ke ʻiloʻi ʻe he kau akó ʻoku loto ha tokolahi ʻo honau ngaahi kuí ke fakahoko honau ngaahi ouau fakatemipalé. Te ke lava ʻo vahevahe ha ngaahi fakamatala kuo fai ʻe he kau taki ʻo e Siasí ʻi he konifelenisi lahí.

Naʻe vahevahe ʻeni ʻe Palesiteni Lāsolo M. Nalesoni ʻi ʻEpeleli 2016:

Naʻá ku fakamatala ʻi heʻeku pōpoaki he konifelenisi kuo ʻosí ʻa ʻeku aʻusia fakamamahi he ngaahi taʻu lahi kuo hilí, ʻi he taimi naʻe ʻikai ke u lava ai, ʻi heʻeku hoko ko e toketā faitafá, ke fakahaofi e moʻui ʻa ha ongo kiʻi tautehina fefine ʻe toko ua. …

Naʻe uesia ʻe he mahaki mafú ha fānau ʻe toko tolu ne fanauʻi kia Lute mo Simi Hetifila. Naʻe mālōlō hona ʻuluaki fohá, ko Simi ko e Siʻí, teʻeki fakapapauʻi hano sivi. Ne mau toki feʻilongaki ʻi he taimi naʻe kumi tokoni mai ai e ongomātuʻá maʻa hona ongo ʻōfefiné, ko Lola ʻAna mo hono kiʻi tehiná, ko Kei Lini. Naʻá ku loto-mamahi ʻi he fakatou mālōlō ʻa e ongo kiʻi tamaiki fefiné ʻi he hili hona tafá. ʻOku mahino, naʻe uesia fakalaumālie ʻa Lute mo Simi. …

Pea ʻi ha pō ʻe taha ʻi Mē ʻo e taʻu kuo ʻosí, ne fakaʻaaki au ʻe he ongo kiʻi tamaiki fefiné ni mei he tafaʻaki ʻe taha ʻo e veilí. Neongo naʻe ʻikai ke u sio pe fanongo kiate kinaua fakatuʻasino, ka naʻá ku ongoʻi ʻena ʻi aí. Naʻá ku ongoʻi ʻena kolé, fakalaumālie. Ko ʻena pōpoakí naʻe nounou mo mahino: “Misa Nalesoni, ʻoku ʻikai te ma sila ki ha taha! Te ke lava ʻo tokoni mai?” …

Naʻá ku tūʻulutui hifo ʻi muʻa ʻia Simi ʻi Sune, kuó ne taʻu 88 ʻeni, ʻo fai ha fepōtalanoaʻaki ongo moʻoni mo ia. Naʻá ku talanoa kau ki he kole hono ongo ʻōfefiné mo fakahā ange te u lāngilangiʻia ke fakahoko e ouau silá maʻa hono fāmilí. …

… Pea ʻikai fuoloa mei ai, kuó u taʻimālie ʻi he faingamālie kāfakafa ke silaʻi ʻa Lute kia Simi pea mo ʻena fānau ʻe toko faá kiate kinaua ʻi he Temipale Peisoni ʻIutaá. Naʻá ku tangi mo Uenitī ʻi heʻema kau ʻi he aʻusia fakalaumālie ko iá. Naʻe lahi ha ngaahi loto ne fakamoʻui ʻi he ʻaho ko iá! (Russell M. Nelson, “Ko Hono Ngāueʻi ʻo e Mālohi ʻo e Lakanga Fakataulaʻeikí,” Liahona, Mē 2016, 66–67).

Naʻe vahevahe ʻe ʻEletā Keuli E. Sitīvenisoni ʻa e aʻusiá ni ʻi ʻEpeleli 2016:

ʻOku ʻi Fē aʻ e Ngaahi Kī mo e Mafai ʻo e Lakanga Fakataulaʻeikí?

Elder Stevenson teaches about how priesthood keys and authority were restored and how they can bless young men and young women.

Ne u toki ʻilo ha faʻē naʻá ne ʻalu maʻu pē mo ʻene fānaú ki he temipalé ke fakahoko e papitaiso maʻá e kau pekiá. ʻI he ʻaho ko ʻení, hili hono fakahoko ʻe he fāmilí e papitaisó pea teu ke nau mavahe mei he temipalé, ne hū atu ha tangata ki he feituʻu faiʻanga papitaisó mo ha fatunga hingoa ʻo hono fāmilí. ʻI he ʻilo ʻe ha taha ngāue temipale ʻoku ʻikai ha taha he faiʻanga papitaisó ke tokoni ʻi he ngaahi hingoa fakafāmili ko ʻení, naʻá ne kole ki he fāmilí pea ki he fānaú pe ʻe lava ke nau toe foki ʻo fetongi ke tokoni ki he papitaisó. Naʻa nau loto-fiemālie ki ai pea nau foki atu. ʻI hono fakahoko ʻe he fānaú e papitaisó, naʻe fakafanongo pē ʻenau faʻeé ʻo kamata ke ne fakatokangaʻi ʻokú ne ʻilo e ngaahi hingoá, ʻo ne ofo lahi ʻi heʻene ʻilo ko ʻene ngaahi kui ʻeni e ngaahi hingoa fakafāmili ʻa e tangatá. Ko ha ʻaloʻofa ongongofua maʻanautolu. (Gary E. Stevenson, “ʻOku ʻi Fē ʻa e Ngaahi Kī mo e Mafai ʻo e Lakanga Fakataulaʻeikí?,” Liahona, Mē 2016, 31)