“Lēsoni 205—Ko Hono ʻAi ke Hoko e Moihū ʻi he Temipalé ko ha Meʻa ke Tulifua Ki Ai ʻi he Moʻuí Kotoa: Ko e ʻAlu ki he Temipalé ʻi he Kotoa ʻEtau Moʻuí,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Ko Hono ʻAi ke Hoko e Moihū ʻi he Temipalé ko ha Meʻa ke Tulifua Ki Ai ʻi he Moʻuí Kotoa,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 205: Teuteu ki he Temipalé
Ko Hono ʻAi ke Hoko e Moihū ʻi he Temipalé ko ha Meʻa ke Tulifua Ki Ai ʻi he Moʻuí Kotoa
Ko e ʻAlu ki he Temipalé ʻi he Kotoa ʻEtau Moʻuí
ʻOku tau moʻui ʻi ha taimi fakafiefia ʻoku taʻe-hano-tatau hono langa e temipalé. ʻOku fakafaingamālieʻi ʻe he ʻEikí ʻa e ngaahi tāpuaki ʻo Hono fale māʻoniʻoní ʻo lahi ange ʻi ha toe taimi kimuʻa. ʻE lava ke tokoni e lēsoni ko ʻení ke ongoʻi ʻe he kau akó e mahuʻinga ʻo e moihū ki he ʻEikí ʻi he temipalé he kotoa ʻo ʻenau moʻuí.
Ngaahi ʻEkitivitī Ako ʻOku Ala Fakahokó
Fakalahi e taimi ʻi he temipalé
ʻOku fakaʻaongaʻi ha talanoa ke ako mei ai ʻi he lēsoni ko ʻení ke tokoni ke vakai e kau akó ki he founga ʻe lava ai ʻe he moihū ʻi he ngaahi temipalé ʻo faitāpuekina kinautolu ʻi he kotoa ʻo ʻenau moʻuí. Fakaafeʻi e kau akó ke fakakaukau ki heʻenau moʻuí ʻi heʻenau fakakaukau ki he talanoa ke ako mei aí. Liliu e talanoa ke ako mei aí ʻo ka fiemaʻu ke ʻai ke felāveʻi ange ki ho kau akó. Ko e founga ʻe taha ke fai ai ʻení ko hono fakaafeʻi e kau akó ke fetongi e meʻa ʻoku haʻi atú ʻaki e meʻa ʻoku felāveʻi mo e kau akó.
ʻOku (taʻu hongofulu mā ono) ʻa (Hōsea). Kuó ne hoko ko ha mēmipa ʻo e Siasí he (taʻu ʻe nima). Kuó ne maʻu ha ngaahi aʻusia fakalaumālie ka ʻokú ne fiemaʻu ha fakamoʻoni mālohi ange ki he Fakamoʻuí pea mo Hono Siasi kuo fakafoki maí. ʻOku faʻa ongoʻi ʻe (Hōsea) he taimi ʻe niʻihi ʻoku (lōmekina ia ʻe he teke mālohi ke fakalakalaka ʻi he akó). ʻOkú ne hohaʻa ki (hono kahaʻú mo e founga ke moʻui angamāʻoniʻoni ai ʻi ha māmani faiangahalá).
-
Fakakaukauloto naʻe kole faleʻi atu ʻa (Hōsea) ʻi ha taha ʻo e ngaahi meʻa ʻokú ne hohaʻa ki aí. Ko e hā e ʻuhinga ʻe ala hoko ai e moihū ki he ʻEikí ʻi Hono temipalé ko ha faleʻi ʻaongá?
Lau e fakamatala ko ʻeni ʻa Palesiteni Lāsolo M. Nalesoní, ʻo kumi e tokoni ʻoku fakahoko ʻe he ʻEikí kiate kitautolú:
ʻOua muʻa naʻa teitei ngalo ʻiate kitautolu ʻa ia ʻoku fakahoko ʻe he ʻEikí maʻatautolu he taimi ní. ʻOkú Ne fakafaingamālieʻi lahi ange Hono ngaahi temipalé. ʻOkú Ne hiki e tuʻunga vave ʻo ʻetau langa e ngaahi temipalé. ʻOkú Ne fakalahi hotau ivi malava ke tānaki fakataha ʻa ʻIsilelí. ʻOkú Ne fakafaingofuaʻi ange foki ʻetau fakahaohaoaʻi fakalaumālie kitautolu takitahá. ʻOku ou palōmesi atu ʻi he lahi ange homou taimi ʻi he temipalé, ʻe tāpuekina hoʻomou moʻuí ʻi ha ngaahi founga taʻe-hano-tatau. …
Siʻoku kāinga ʻofeina, fakatauange ke tukutaha homou tokangá ki he temipalé ʻi ha ngaahi founga kuo teʻeki ke mou fakahoko kimuʻa. ʻOku ou tāpuekina kimoutolu ke mou ofi ange ki he ʻOtuá mo Sīsū Kalaisi ʻi he ʻaho kotoa pē. (Russell M. Nelson, “Tokanga Taha ki he Temipalé,” Liahona, Nōvema 2022, 121)
-
Ko e hā ʻoku mahuʻinga kiate koe mei he fakamatala ko ʻení?
-
Ko e hā e talaʻofa naʻe fakahoko ʻe he ʻEikí ʻo fakafou ʻi Heʻene palōfitá?
ʻI he tali ʻa e kau akó, tokoni ke nau ʻiloʻi ha moʻoni hangē ko ʻení: ʻOku talaʻofa ʻa e ʻEikí ke tāpuekina kitautolu ʻi ha ngaahi founga he ʻikai ke tau lava ʻo aʻusia ʻi ha toe founga kehe mei heʻetau fakalahi hotau taimí ʻi Hono temipalé.
Kapau ʻoku fakangatangata e lava hoʻo kau akó ʻo ʻalu ki ha temipalé, te mou lava ʻo talanoa ki he ngaahi founga te nau lava ai ʻo tokanga taha ki he temipalé. Hangē ko ʻení, ʻe lava e kau akó ʻo fāifeinga ke moʻui taau mo e temipalé pea kau ki he ngāue hisitōlia fakafāmilí.
-
ʻOkú ke pehē ʻoku lava fēfē ʻe he fakaʻaongaʻi ha taimi lahi ange ʻi he temipale ʻo e ʻEikí ʻo tāpuekina kitautolu ʻi ha ngaahi founga ʻoku ʻikai mo ha toe meʻa te ne lavá?
ʻOku fakataumuʻa ʻa e ngaahi fehuʻi ko ʻení ke fakakaukauloto fakataautaha ki ai. ʻE ala ʻaonga ki he kau akó ke tohi ʻi heʻenau tohinoa akó. ʻE lava ʻe he kau ako ʻoku loto-fiemālie ki aí ʻo vahevahe ʻenau talí mo e kalasí.
-
ʻOku ngalingali te ke toutou ʻalu maʻu pē ki he temipalé he kotoa hoʻo moʻuí? Ko e hā hono ʻuhingá?
-
Ko e hā ha ngaahi fakafeʻātungia ʻoku fiemaʻu ke ke ikunaʻi ke ke ʻalu ki he temipalé ʻi he kotoa hoʻo moʻuí?
Ngaahi tāpuaki kuo talaʻofa maí
Fakakaukau ki he founga te ke lava ai ʻo tokoni ki he kau akó ke fakalahi ʻenau holi ke moihū ki he ʻEikí ʻi Hono temipalé. Ko e founga ʻe taha te ke lava ʻo fakahoko ai ʻení ko e tokoni ke ʻiloʻi ʻe he kau akó ʻa e ngaahi tāpuaki lahi ʻo e moihū ki he ʻEikí ʻi Hono temipalé. ʻE lava ke hiki ʻe he kau akó ha lisi ʻi he palakipoé ʻo e meʻa ʻoku nau maʻu ʻi he ngaahi potufolofola mo e fakamatala ko ʻení.
Lau e potufolofola mo e fakamatala ko ʻení, ʻo kumi e ngaahi tāpuaki ʻoku talaʻofa ʻe he ʻEikí kiate kinautolu ʻoku moihū kiate Ia ʻi Hono falé:
Naʻe pehē ʻe Palesiteni Lāsolo M. Nalesoni:
Kātaki ʻo fokotuʻu ha taimi moʻó e ʻEikí ʻi Hono fale tapú. ʻOku ʻikai ha meʻa te ne fakamālohia ho tuʻunga fakalaumālié ʻo tatau mo e ngāue ʻi he temipalé mo e moihū ʻi he temipalé. (Russell M. Nelson, “Fokotuʻu ha Taimi moʻó e ʻEikí,” Liahona, Nōvema 2021, 121)
Kātaki ʻo tui mai ʻi he taimi ʻoku ou pehē ai ko e taimi ʻoku fokotuʻu mālohi ai ho tuʻunga fakalaumālié ʻia Sīsū Kalaisí, ʻoku ʻikai fiemaʻu ke ke manavahē. ʻI hoʻo fai pau ko ia ki hoʻo ngaahi fuakava ne fakahoko ʻi he temipalé, ʻe fakamālohia koe ʻe Hono mālohí. Pea, ʻi he tō mai ʻa e ngaahi mofuike fakalaumālié, te ke lava ʻo tuʻu mālohi koeʻuhí ʻoku fefeka mo taʻeueʻia hoʻo fakavaʻe fakalaumālié. (Russell M. Nelson, “Ko e Temipalé mo Hoʻo Fakavaʻe Fakalaumālié,” Liahona, Nōvema 2021, 96)
Naʻe akoʻi ʻe Palesiteni Henelī B. ʻAealingi ʻo pehē:
ʻOku tokolahi ha toʻu tupu kuo nau foaki honau taimí ke fai ha fekumi he hisitōlia fakafāmilí pea kuo hanga ʻe he ngāue fakatemipalé ʻo fakamālohia ʻenau fakamoʻoni ki he palani ʻo e fakamoʻuí. Kuó ne fakatupulaki ʻenau ongoʻi e Laumālié ʻi heʻenau moʻuí kae holoki e ivi tākiekina ʻo e filí. Kuo tokoni ia ke nau ongoʻi ofi ange ki honau fāmilí pea mo e ʻEiki ko Sīsū Kalaisí. Kuo nau ako ʻoku ʻikai ngata pē ʻi hono fakahaofi ʻe he ngāué ni ʻa e kau pekiá, ka ʻokú ne fakahaofi kotoa kitautolu (vakai, T&F 128:18). (Henry B. Eyring, “Ko Hono Tānaki e Fāmili ʻo e ʻOtuá,” Liahona, Mē 2017, 22)
-
Ko e hā e meʻa ʻoku akoʻi atu ʻe he ngaahi tāpuaki ko ʻení fekauʻaki mo e Tamai Hēvaní mo Sīsū Kalaisí?
-
Kuo tāpuekina fēfē koe ʻe he ʻEikí ʻi hoʻo kau ʻi he ngāue fakatemipalé mo e hisitōlia fakafāmilí?
-
Kuo fakaʻaiʻai fēfē koe ʻe he ngaahi tāpuakí ni ke ke moihū ki he ʻEikí ʻi he temipalé he taimi ní? ʻI he kotoa hoʻo moʻuí?
Moihū ʻi he temipalé he kotoa ʻo ʻetau moʻuí
ʻE lava e talanoa ko ʻeni ke ako mei aí ʻo tokoni ke mahino ki he kau akó e mahuʻinga ʻo e moihū ki he ʻEikí ʻi he temipalé he kotoa ʻo ʻenau moʻuí. Lolotonga hono ako e talanoá, poupouʻi e kau akó ke fakakaukau ki honau kahaʻú mo e founga te nau lava ai ʻo moihū ki he ʻEikí ʻi he temipalé he kotoa ʻo ʻenau moʻuí.
Te ke lava ʻo fakaʻaongaʻi ha ngaahi founga ako kehekehe ʻi ha ngaahi konga kehekehe ʻo e talanoá. ʻE lava e kau akó ʻo ako fakakalasi, fakafoʻituitui, mo fakakulupu e ngaahi kongá.
Hili ʻa e konga takitaha, kiʻi taʻofi ke aleaʻi e ngaahi fehuʻi ko ʻení:
-
Ko e hā ha ngaahi ʻuhinga ʻe lava ke maʻu ʻe (Hōsea) mo (ʻIsapela) ki he ʻikai ke na fakamuʻomuʻa e moihū ʻi he temipalé?
-
Ko e hā ha ngaahi tāpuaki mei he moihū ki he ʻEikí ʻi Hono falé ʻe lava ʻo tokoni kia (Hōsea) mo (ʻIsapelá)?
-
Ko e hā ha ngaahi feilaulau ʻe ala fiemaʻu ke fakahoko ʻe (Hōsea) mo (ʻIsapela) ke na moihū maʻu pē ki he ʻEikí ʻi he temipalé?
Taʻu 20 tupú
Hili e foki ʻa (Hōsea) ki ʻapi mei heʻene ngāue fakafaifekau taimi kakató, ʻokú ne feinga ke hoko atu ʻene akó ʻi (ha akoʻanga ngāue fakalotofonua). Lolotonga ʻene (ʻalu ki he ʻinisititiutí), ʻokú ne fetaulaki ai mo ha finemui ko (ʻIsapela), peá na mali. Hili e fakaʻosi akó, (ʻoku fokotuʻu ʻe Hōsea) (haʻane pisinisi). ʻOkú ne hohaʻa (fekauʻaki mo e tokonaki maʻa hono fāmilí). ʻOkú ne kamata mo (ʻIsapela) hona fāmilí pea tāpuekina kinaua ʻaki ha fānau fakaʻofoʻofa ʻe toko (tolu). ʻOku fakahoko ʻe (Hōsea) mo (ʻIsapela) hona lelei tahá ke levaʻi e taimi mo hono fāmilí, (ko ʻena pisinisí), mo e ngaahi uiuiʻi ʻi he Siasí. ʻI he taʻu (fā) ha taha ʻo ʻena fānaú, (ʻokú ne lavea lahi ʻi ha fakatuʻutāmaki).
Taʻu 30 tupú
ʻOku ngāue mālohi ʻa (Hōsea) mo (ʻIsapela) ke tokonaki maʻa hona fāmilí ʻaki hono (fakalele ʻena pisinisí). ʻOkú na fepaki mo e ngaahi faingataʻa ʻo hono ohi hake ʻena fānaú mo tokoniʻi kinautolu ke (maʻu ʻenau fakamoʻoni kia Sīsū Kalaisí). ʻOku feinga ʻa (Hōsea) ke fakapalanisi e taimi mo hono fāmilí, (ko ʻene pisinisí), pea mo hono uiuiʻi ko (ha ʻetivaisa ʻi he kōlomu ʻo e kau akonakí). ʻOku hoko ʻa ʻIsapela ko e (palesiteni ʻo e Palaimelí), ʻokú ne feinga ke tokoni (ʻi he pisinisi fakafāmilí), mo feinga ke feohi mo ʻene fānaú.
Taʻu 60+
ʻOku (maʻu fāmili) e fānau ʻa (Hōsea) mo ʻIsapelá. ʻOku ʻofa ʻa (Hōsea) mo (ʻIsapela) ʻi hona fāmilí ka ʻokú na kei hohaʻa ki (he muimui hona makapuná kia Sīsū Kalaisí mo ʻenau fakahoko ha ngaahi fili leleí). ʻI he fakaʻau ke na motuʻá, (ʻoku hōloa ange e moʻui lelei ʻa Hōseá).
Fakakaukau ke lau e fakamatala ʻa Palesiteni Lāsolo M. Nalesoni ʻi he “Ngaahi Maʻuʻanga Tokoni Lahi Ange” ʻoku tali ai e fehuʻi “Te tau fakamuʻomuʻa fēfē ʻa e moihū ʻi he temipalé ʻi he taimí ni pea ʻi he kahaʻú?” Aleaʻi e founga ʻoku kaunga ai e fakamatalá ki he talanoa ʻoku akó pea mo ʻetau moʻuí.
Ko ha tohi kiate koe
Fakakaukau ke fakaafeʻi e kau akó ke nau fai ha tohi fakalotolahi kiate kinautolu he kahaʻú fekauʻaki mo e mahuʻinga ʻo e moihū ki he ʻEikí ʻi Hono ngaahi temipalé. Mahalo ʻe fiemaʻu ke tohi ʻe he kau akó ha ʻaho ke fakaava ai e tohí ʻi ha kiʻi sila pea tauhi e tohí ʻi he sila ko iá ke toki fakaava pē he ʻaho ko iá.
Te nau lava ʻo tohi fekauʻaki mo e:
-
ʻEnau ngaahi aʻusia lolotonga ʻi he temipalé.
-
Founga ʻe lava ke tokoniʻi ai ʻenau moʻuí ʻe he fili ke ʻalu maʻu pē ki he temipalé.
-
Founga ʻe lava ai ʻe he fili ke ʻalu maʻu pē ki he temipalé ʻo tokonia honau vā fetuʻutaki mo e Tamai Hēvaní mo Sīsū Kalaisí.
-
Ngaahi founga te nau lava ai ʻo fakamuʻomuʻa ʻa e moihū ʻi he temipalé ʻi he taimí ni pea ʻi he kahaʻú.
Fakamanatu ki he kau akó ke nau ngāueʻi ha faʻahinga ueʻi pē kuo nau maʻu mei he Laumālie Māʻoniʻoní pea mo tohi mo ha ngaahi fakakaukau kehe kuo nau maʻu.