“Lēsoni 206—ʻOku Tau Fuakava ʻi he Temipalé ke Tauhi e Fono ʻo e Fakatapuí: ʻE Lava ke Tokoni Hono Moʻui ʻAki e Fono ʻo e Fakatapuí ke Tau Hoko ʻo Hangē ko e ʻOtuá,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“ʻOku Tau Fuakava ʻi he Temipalé ke Tauhi e Fono ʻo e Fakatapuí,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 206: Teuteu ki he Temipalé
ʻOku Tau Fuakava ʻi he Temipalé ke Tauhi e Fono ʻo e Fakatapuí
ʻE Lava ke Tokoni Hono Moʻui ʻAki e Fono ʻo e Fakatapuí ke Tau Hoko ʻo Hangē ko e ʻOtuá
Ko e konga ʻo e meʻaʻofa, pe ʻenitaumeni, ʻoku tau lava ʻo maʻu mei he ʻEikí ʻi Hono ngaahi temipalé, ko ʻetau fakahoko ha ngaahi fuakava toputapu. Ko e taha e ngaahi fuakava ʻoku tau fakahoko mo e Tamai Hēvaní, ke tauhi e fono ʻo e fakatapuí. ʻOku palōmesi ʻa e kāingalotu ʻosi maʻu ʻenitaumení te nau fakatapui honau taimí, ngaahi talēnití, mo e ngaahi tāpuaki kehe ʻoku nau maʻú ki hono langa hake ʻo e Siasi ʻo Sīsū Kalaisí ʻi he māmaní. ʻE lava ke tokoni ʻa e lēsoni ko ʻení ke mahino ki he kau akó ʻa e fono toputapu ʻo e fakatapuí, ʻa ia ʻoku tau fuakava ʻi he temipalé mo e ʻOtuá ke talangofua ki aí.
Ngaahi ʻEkitivitī Ako ʻOku Ala Fakahokó
Ko e muimui ʻi ha founga feimeʻatokoní
Fakatokangaʻi ange: ʻOku fakafeʻiloaki ʻe he lēsoni ko ʻení ʻa e ngaahi fuakava ʻoku tau fai ko ha konga ʻo e ouau ʻenitaumeni fakatemipalé pea nofotaha ʻi he fono ʻo e fakatapuí. ʻOku fakamatalaʻi ʻe he ngaahi lēsoni ʻi he ngaahi kalasi semineli kehé ʻa e ngaahi fono kehé.
Fakaafeʻi e kau akó ke kumi ha founga feimeʻatokoni ki ha meʻa te nau ala fiefia hono kaí. Poupouʻi kinautolu ke kumi ha ngaahi fakatātā ʻo e ngaahi ola mei he founga feimeʻatokoni ko ʻení. Te ke lava ʻo kole ki he kau akó ke nau fekumi pea lipooti ʻi ha fanga kiʻi kulupu iiki. Kapau ʻoku ʻikai lava e kau akó ʻo kumi ha ngaahi founga feimeʻatokoni mo e ngaahi fakatātaá ʻi he kalasí, te ke lava ʻo fakaʻaliʻali e fakatātā ko ʻení pea fehuʻi ki he kau akó pe ʻe fakaʻaiʻai fēfē kinautolu ʻi heʻenau sio ki he olá ke nau muimui ʻi he founga feimeʻatokoní.
-
Ko e hā ha meʻa kuó ke ngaohi ʻo fakaʻaongaʻi ha founga feimeʻatokoní?
-
ʻE tokoni fēfē hono maʻu ha fakatātā pe vitiō fakataha mo e founga feimeʻatokoní?
ʻOku tau fai ha ngaahi fuakava mo e ʻOtuá ʻi he ngaahi temipale māʻoniʻoní
Hangē ko ha fakatātā pe vitiō ʻo ha founga feimeʻatokoni kuo kakato, ʻe lava ke tokoni hono ʻiloʻi e ola ʻo hono maʻu hotau ʻenitaumení ʻi he temipalé. ʻOku tau fuakava mo e ʻOtuá ke talangofua ki ha ngaahi fono kehekehe ʻe nima, ko ha konga ʻo e ouau ʻenitaumení. ʻOku hangē hono moʻui ʻaki e ngaahi fono ko ʻení ko e muimui ki he sitepu mahuʻinga takitaha ʻo ha founga feimeʻatokoní. ʻOku tokoniʻi kitautolu ʻe he ngaahi fono ʻoku tau fuakava ke talangofua ki ai ʻi he temipalé ke tau hoko ʻo hangē ange ko e ʻOtuá mo teuteuʻi kitautolu ke nofo mo Ia ʻi he puleʻanga fakasilesitialé.
Fakakaukau ke hiki ʻeni ʻi he palakipoé (ʻo ʻikai kau ai e ngaahi foʻi lea ʻi he haʻí) pea kole ki he kau akó ke nau hiki ʻa e ngaahi fono takitaha ʻoku tau fuakava ke moʻui ʻakí ʻi hono maʻu hotau ʻenitaumení ʻi he temipalé. Kapau ʻoku fiemaʻu tokoni ʻa e kau akó, te ke lava ʻo fakahinohino kinautolu ki he 27.2, “Ko e ʻEnitaumení,” ʻi he Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku maʻu ʻi he ChurchofJesusChrist.org.
-
Fono ʻo e (talangofuá)
-
Fono ʻo e (feilaulaú)
-
Fono ʻo e (Ongoongolelei ʻo Sīsū Kalaisí)
-
Fono ʻo e (angamaʻá)
-
Fono ʻo e (fakatapuí)
Hiki ʻa e moʻoni ko ʻení ʻi he palakipoé: ʻOku tau fuakava mo e ʻOtuá ke moʻui ʻaki e fono ʻo e fakatapuí, ko ha konga ʻo e ʻenitaumeni fakatemipalé.
Mahalo kuo ako e kau akó fekauʻaki mo e fono ʻo e fakatapuí ʻi ha lēsoni kimuʻa. (Vakai, “Lēsoni 57: Tokāteline mo e Ngaahi Fuakava 42:29–39: Fakatapui ki he ʻEikí”)
Fakaafeʻi e kau akó ke vahevahe ʻa e meʻa ʻoku nau ʻilo fekauʻaki mo e fono ko ʻení. ʻE lava ke tokoni hono siviʻi e ʻilo kuo maʻu ʻe he kau akó ke ke ʻiloʻi e meʻa ke tokoni ki he kau akó ke nau tokanga taha ki ai lolotonga e lēsoní. Te ke lava ʻo toe ʻeke ha niʻihi ʻo e ngaahi fehuʻi ko ʻení ʻi he fakaʻosinga ʻo e lēsoní ke tokoni ke fakahaaʻi ʻe he kau akó ʻa e meʻa naʻa nau akó.
-
Ko e hā e meʻa ʻokú ke ʻilo fekauʻaki mo e fono ʻo e fakatapuí?
-
Ko e hā ha ngaahi fehuʻi ʻokú ke kei maʻu fekauʻaki mo e fono ʻo e fakatapuí?
-
Poupouʻi e kau akó ke nau fekumi ki ha tokoni mei he Laumālie Māʻoniʻoní ke mahino ʻa e fono ʻo e fakatapuí mo e founga ʻe lava ke tāpuekina ai kinautolu ʻe he teuteu ke fai ha ngaahi fuakava mo e ʻOtuá ʻi he temipalé.
ʻOange ki he kau akó ʻa e laʻipepa tufa ko ʻení pea fakaafeʻi kinautolu ke nau kumi pe ko e hā ʻa e fono ʻo e fakatapuí pea mo e founga ʻoku tokoniʻi ai kitautolu ʻi hono moʻui ʻaki ʻa e fono ko ʻení ke tau hoko ʻo hangē ange ko e ʻOtuá. Ke maʻu ha fakamatala lahi ange, ʻe lava ke kumi ʻe he kau akó ʻa e Topics and Questions, “Consecration.”
Ko e Fono ʻa e ʻEikí ki he Fakatapuí
Naʻe fakamatalaʻi ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
[Ko e] fono ʻa e ʻEikí ki he fakatapuí (hangē ko ʻení, vakai, T&F 42:32, 53) … ʻoku ʻi ai hono fatongia fakaʻekonōmika, kae mahulu angé, ko hono fakahoko ia ʻo ha fono ʻo e puleʻanga fakasilesitiale ki he moʻui ní (vakai, T&F 105:5). Ko e fakatapuí ko hono fakamavaheʻi pe tekaki ha meʻa ke toputapu, ʻo tukutaha ki he ngaahi taumuʻa māʻoniʻoní. Ko e lavameʻa moʻoni ʻi he moʻui ní ʻoku maʻu ia ʻi hono fakatapui ʻetau moʻuí—ʻa ia ko hotau taimí mo ʻetau ngaahi filí—ki he ngaahi taumuʻa ʻa e ʻOtuá (vakai, Sione 17:1, 4; T&F 19:19). ʻI heʻetau fai ʻení, ʻokú Ne hiki ai kitautolu ki hotau ikuʻanga māʻolunga tahá. (D. Todd Christofferson, “Fakakaukauloto ki ha Moʻui Kuo Fakatapui,” Liahona, Nōvema 2010, 16)
Naʻe akonaki ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
Ko e feilaulaú mo e fakatapuí ko ha ongo fono fakalangi ia ʻoku tau fuakava ʻi he temipale māʻoniʻoní ke talangofua ki ai. ʻOku faitatau ʻa e ongo fono ko ʻení ka ʻoku ʻikai ke na tatau. …
ʻOku kehe ʻa e fakatapuí mei he feilaulaú ʻi ha founga mahuʻinga. ʻI heʻetau fakatapui ha meʻa, ʻoku ʻikai ke tau tuku ia ke tutu pē ʻi he funga ʻōlitá. Ka ʻoku tau fakaʻaongaʻi ia ʻi he ngāue ʻa e ʻEikí. ʻOku tau fakatapui ia kiate Ia mo ʻEne ngaahi taumuʻa māʻoniʻoní. ʻOku tau maʻu ʻa e ngaahi talēniti kuo foaki mai ʻe he ʻEikí pea fāifeinga ke fakatupulaki ia ke lahi, ke hoko ʻo ʻaonga ange ʻi hono langa ʻa e puleʻanga ʻo e ʻEikí.
ʻE tokosiʻi ʻaupito hotau niʻihi ʻe kole mai ke feilaulauʻi ʻetau moʻuí maʻá e Fakamoʻuí. Ka ʻoku fakaafeʻi kotoa kitautolu ke fakatapui ʻetau moʻuí kiate Ia. (Dieter F. Uchtdorf, “Kotoa Hotau Lotó,” Liahona, Mē 2022, 124)
Ko e hā ʻa e fono ʻo e fakatapuí? ʻOku kaunga fēfē ia kiate au?
ʻI he ʻaho ní ʻoku tau moʻui ʻaki ʻa e fono ko ʻení ʻi ha ngaahi founga kehekehe. Hangē ko ʻení, ʻoku tau tokoniʻi ʻa e niʻihi kehé, tali ʻa e ngaahi uiuiʻi mo e ngaahi ngāue kuo vahe mai ʻi he Siasí pea fakahoko hotau lelei tahá ʻi hono fakahoko iá, mo totongi kakato ʻetau vahehongofulú mo ʻoatu ha foaki ʻaukai ʻoku lahí. ʻI heʻetau fakahoko ʻa e meʻa ʻoku tataki kitautolu ʻe he kau palōfitá mo e Laumālie Māʻoniʻoní ke langa hake ai ʻa e puleʻanga ʻo e ʻOtuá pea tokoniʻi ʻa e faingataʻaʻiá, ʻoku tau moʻui ʻaki ai ʻa e fono ʻo e fakatapuí. (“Ko e hā ʻa e fono ʻo e fakatapuí? ʻOku kaunga fēfē ia kiate au?,” Ki Hono Fakamālohia ʻo e Toʻu Tupú, ʻEpeleli 2021, 31)
-
Fakatatau mo e mahino ʻokú ke maʻu ki he fono ʻo e fakatapuí, ʻoku hoko fēfē ia ko ha tāpuaki mei he ʻOtuá?
-
ʻOkú ke pehē ʻe tokoni fēfē hono moʻui ʻaki e fono ʻo e fakatapuí ke tau hoko ʻo hangē ko e Tamai Hēvaní mo Sīsū Kalaisí?
ʻUhinga ʻo e moʻui ʻaki e fono ʻo e fakatapuí
Ke tokoni ke fakatātaaʻi ʻe he kau akó ʻa e meʻa ʻoku nau akó, te ke lava ʻo fakaafeʻi kinautolu ke fakahoko fakafoʻituitui ʻa e ʻekitivitī ko ʻení, mo hanau hoa, pe ʻi ha fanga kiʻi kulupu iiki. Kapau ʻe fili ʻe he kau akó ha taha ʻo e ongo ʻuluaki fokotuʻú, poupouʻi kinautolu ke fakakau ai ha ngaahi ʻīmisi pe ngaahi fakatātā.
Kapau ʻoku fiemaʻu tokoni ʻa e kau akó ʻi hono kumi ha ngaahi sīpinga fakafolofola ki he ʻuluaki filí, te ke lava ʻo fokotuʻu ange ʻa e Mātiu 4:23; 26:36–44; Luke 8:1–3; 10:30–37; Ngāue 3:2–8; 4:32.
Fakaʻaongaʻi ha taha ʻo e ngaahi fili ko ʻení ke faʻu ha meʻa ʻe lava ʻo tokoni atu ke ke fakamatalaʻi ʻa e ngaahi fakaikiiki mahuʻinga fekauʻaki mo e fono ʻo e fakatapuí. ʻE lava foki ke hoko ʻa e meʻa ʻokú ke faʻú ko ha fakamanatu ʻi hoʻo teuteu ke maʻu ho ʻenitaumení mei he ʻEikí.
-
Hiki ha sētesi ʻe ua pe tolu ʻokú ne fakamatalaʻi ʻa e fono ʻo e fakatapuí ki ha taha taʻu hongofulu tupu. Fakakau ha ngaahi sīpinga mei he folofolá naʻe fakahaaʻi ai ʻe Sīsū Kalaisi pe ko ʻEne kau ākongá ʻa hono moʻui ʻaki e fono ko ʻení ʻaki hono vahevahe honau taimí, talēnití, pe ngaahi tāpuaki kehé mo e niʻihi kehé.
-
Hiki ha fakamatala nounou ki he makasini Ki Hono Fakamālohia ʻo e Toʻu Tupú. Te ke lava ʻo fili ke fakatefito hoʻo pōpoakí ʻi hono tokoniʻi e toʻu tupu ʻoku teuteu ke maʻu honau ʻenitaumení mei he ʻEikí.
-
Fokotuʻutuʻu ha kiʻi tulama nounou ke fakatātaaʻi e ngaahi founga ke moʻui ʻaki ai e fono ʻo e fakatapuí. Feinga ke fakakau ha ngaahi sīpinga ʻe felāveʻi mo e fili ʻa e toʻu tupú ke moʻui ʻaki e fono ko ʻení.
ʻOange ki he kau akó ha ngaahi faingamālie ke fakahaaʻi ʻenau mahino ki he fono ʻo e fakatapuí ʻaki hono vahevahe e meʻa ne nau teuteú. Te ke lava ʻo fakaafeʻi e kau akó ke lipooti ki he kalasí, pe te nau fie fevahevaheʻaki ʻi ha fanga kiʻi kulupu iiki.
Fakakaukau ke fakaafeʻi e kau akó ke vahevahe ʻa e founga kuo ʻosi hoko ai hono kamata moʻui ʻaki e ngaahi tefitoʻi moʻoni ʻo e fono ʻo e fakatapuí ko ha tāpuaki kiate kinautolu mo e niʻihi kehé he taimí ni. Te ke lava ʻo fakaafeʻi ha alēlea fakakalasi ʻaki hano fakaʻaliʻali e ngaahi fehuʻi ko ʻení pea kole ki he kau akó ke nau tali ha taha ʻo kinautolu. Te ke lava foki ʻo tānaki atu hoʻo fakamoʻoní ki he meʻa ʻoku vahevahe ʻe he kau akó.
-
Ko e hā ha meʻa naʻá ke ako he ʻahó ni ʻe lava ʻo tokoni atu ke ke teuteu ke ʻalu ki he temipalé pea maʻu ho ʻenitaumení mei he ʻEikí?
-
ʻOkú ke pehē ʻe liliu fēfē ʻe he moʻui ʻaki e fono ʻo e fakatapuí ho vā fetuʻutaki mo e Tamai Hēvaní mo Sīsū Kalaisí?
-