« Te ’utuāfare o Iosepha Semita », Te mau ’ā’amu o Te Parau Ha’api’ira’a ’e Te Mau Parau Fafau (2024)

« Te ’utuāfare o Iosepha Semita », Te mau ’ā’amu o te Ha’api’ira’a Tumu ’e te mau Fafaura’a

1805–1817

Te ’utuāfare o Iosepha Semita

E ’utuāfare nō te fa’aro’o

’O Iosepha Semita ’e tōna ’utuāfare e ’ohipa ’āmui ra i tō rātou fare fa’a’apu.

’Ua fānauhia ’o Iosepha Semita i te 23 nō Tītema 1805, i te mau pae apato’erau hiti’a o te rā o te Fenua Marite. ’O Iosepha ato’a te i’oa o tōna metua tāne. ’O Lucy te i’oa o tōna metua vahine. E rave rahi tōna mau taea’e ’e mau tuahine. E feiā fa’a’apu te ’utuāfare o Iosepha. E mea ti’aturi rātou i te Atua ’e ’ua here i te tahi ’e te tahi.

Iosepha Semita—’Ā’amu 1:3–4

Te tamāroa ra ’o Iosepha Semita. ’Ua tā’amuhia tōna ’āvae ’aui. Tē ha’ape’ape’a nei tōna metua vahine nōna.

I tōna tamari’ira’a, ’ua ma’ihia Iosepha ’e ’ua fifi roa tōna ’āvae. ’Ua māuiui roa ’oia. ’Ua tāmata te ’utuāfare o Iosepha i te tauturu iāna ’ia maita’i ri’i mai, terā rā, tē māuiui noa ra tōna ’āvae. ’Ua tāmata te mau taote i te rapa’au i tōna ’āvae, ’aita rā i roa’a ia rātou.

Saints, 1:7

Iosepha Semita i roto i te ro’i. Tē tūturi ra tōna taea’e i pīha’i iho i te ro’i. Tē paraparau ra tōna metua vahine i tōna taote i muri mai.

’Ua parau te mau taote ē, e tītauhia ’ia tāpū i te ’āvae o Iosepha ’ia ora mai ’oia. ’Aita rā tōna metua vahine i hina’aro. ’Ua ani ’oia ’aita ānei e rāve’a ē nō te tauturu ia Iosepha. ’Ua fa’aoti te mau taote e ’īriti maoti i te hō’ē tuha’a nō te ivi o tōna ’āvae. ’Ua ’ite Iosepha ē, e mea māuiui te reira, e fa’aro’o rā tōna ē, e tauturu mai te Atua iāna.

Saints, 1:7

’Ua parau te mau taote ia Iosepha Semita ’ia inu i te ’ava nō te tāpū i tōna ’āvae. ’Ua pāto’i o Iosepha. ’Ua tāpe’a tōna metua tāne iāna.

’Ua hina’aro te mau taote ’ia marū ri’i mai te māuiui. ’Ua parau rā Iosepha ’aita. ’Ua hina’aro noa ’oia ’ia tāpe’a tōna metua tāne iāna.

Saints, 1:7

Tē haere ra te metua vahine o Iosepha Semita i rāpae i te piha ’a fa’aineine ai te taote i te tāpū.

’Ua ani Iosepha i tōna metua vahine ’ia haere i rāpae. ’Aita ’oia i hina’aro i tōna māmā ’ia ’ite i tōna māuiui rahi ’a tāpū ai te taote i tōna ’āvae.

E taote e tāpū ra i te ’āvae o Iosepha Semita. ’Ua tāpe’a tōna metua tāne iāna nō te tauturu.

’Ua tāpe’a te metua tāne o Iosepha iāna ’a ’īriti ai te taote i te mau tuha’a ’ino o te ivi o tōna ’āvae. E mea māuiui mau te reira, ’ua tauturu rā te Atua ia Iosepha ’ia fa’a’oroma’i. Ma’a matahiti i muri mai, ’ua maita’i mai te ’āvae o Iosepha, e mea māuiui noa rā ’ia hāhaere ana’e.

Saints, 1:6–7

Iosepha Semita ’e tōna ’utuāfare i New York. Tā rātou ’ohipa, ’o te paopaora’a tumu ’ērapa ïa.

I tō Iosepha pa’arira’a mai, ’ua fa’anu’u tōna ’utuāfare i te tuha’a fenua nō New York. E mea veve te ’utuāfare o Iosepha. E mea itoito rātou i te ’ohipa ’ia nava’i te mā’a nō te ’utuāfare. E tamāroa maita’i ’o Iosepha. E mea ’oa’oa ’oia ’e te ’ata’ata rahi ’e te ’ārearea.

Saints, 1:5–9

Te ’utuāfare o Iosepha Semita e pārahi ra ma te hau i ni’a i te ’aira’amā’a.

E mea here te ’utuāfare o Iosepha ia Iesu Mesia. E mea pure rātou ’e e mea tai’o ’āmui i te Bibilia. ’Aita rā nā metua o Iosepha i pāpū e aha te ’ēkālesia e tomo atu. I te hō’ē pō, ’ua pure te metua vahine o Iosepha, ’o Lucy, ma te parau i te Atua ē, ’ua hina’aro ’oia e ’ite mai i te ’Ēkālesia mau a Iesu Mesia. ’Ua pāhono te Atua i tāna pure ma te fafau ē, e ’itehia mai iāna.

Saints, 1:10–11