1817–1820

Te ’Ōrama Mātāmua a Iosepha Semita

E pāhonora’a i te hō’ē pure ha’eha’a

I te vāhi e ora ra te ’utuāfare o Iosepha Semita, e rave rahi ’ēkālesia tei ha’api’i nō ni’a ia Iesu Mesia. E ha’api’i rātou pā’āto’a i te hō’ē mea ta’a ’ē nō ni’a iāna. ’Aita ’o Iosepha i pāpū ’o vai tei tano. ’Ite ihora ’oia ē e tītauhia te Fa’aora, ’aita rā ’oia i ’ite e aha te ’ēkālesia e ’āmui atu.

Iosepha Semita—’Ā’amu 1:5–6 ; Saints, 1:9

E mea maoro tō Iosepha ferurira’a i te reira. I hina’aro ’oia ’ia fa’a’orehia tāna mau hara. ’Ua haere ’oia e hi’o i te mau ’ēkālesia e rave rahi, terā rā, e ’ua vai noa te ta’a ’ore.

Iosepha Semita—’Ā’amu 1:8–10 ; Saints, 1:9–12

I te hō’ē mahana, ’ua tai’o Iosepha i te Iakobo 1:5 i roto i te Bibilia. Tē nā ’ō ra, tē ’ere ra tātou i te ’ite, e ani i te Atua. I roto i tōna ’ā’au, ’ua ’ite ’o Iosepha ē, teie te mea tei tītauhia nōna.

Iosepha Semita—’Ā’amu 1:11–13

I te po’ipo’i nō te hō’ē mahana nehenehe nō te pu’e tau fa’atupura’a rā’au i te matahiti 1820, ’ua haere Iosepha i roto i te uru rā’au piri i tōna fare. ’Ua hina’aro ’oia i te hō’ē vāhi e nehenehe ai iāna ’ia vai ’ōtahi nō te pure i te Metua i te ao ra.

Iosepha Semita—’Ā’amu 1:14–15

’Ua tūturi ’oia ’e ha’amata a’era i te pure. ’A nā reira ai ’oia, mai te huru ē e mana ’ino tei haru iāna. Mai te huru e pōiri ana’e ’ati a’e iāna. Mai te huru ē, tē tāmata ra te hō’ē ta’ata e tāpe’a iāna ’eiaha e paraparau i te Atua. ’Ua fa’a’ohipa Iosepha i tōna pūai ato’a nō te ani i te Atua ’ia fa’aora mai iāna.

Iosepha Semita—’Ā’amu 1:15–16

I reira iho, ’ite atu ra Iosepha i te hō’ē māramarama ’ana’ana i te poura’a mai ni’a mai i te ra’i. Mo’e ihora te pōiri, ’e fa’ari’i atu ra ’oia i te hau. I roto i te māramarama, ’ite a’era Iosepha i te Metua i te ao ra ’e ia Iesu Mesia i te ti’ara’a i roto i te reva. ’Ua parau te Metua i te ao ra i te i’oa o Iosepha. I reira, ’ua fa’atoro ’oia i te rima i ni’a ia Iesu Mesia ma te parau ē : « ’O tā’u Tamaiti here teie. ’A fa’aro’o iāna ! »

Iosepha Semita—’Ā’amu 1:16–17

’Ua parau Iesu ia Iosepha ē, ’ua fa’a’orehia tāna mau hara. Ani ihora Iosepha tei hea te ’ēkālesia tāna e ’āmui atu. ’Ua parau Iesu ē, ’eiaha e ’āmui i te hō’ē noa atu o rātou.

Iosepha Semita—’Ā’amu 1:8–19 ; Saints, 1:16

’Ua parau Iesu ē, e mau parau mau faufa’a rahi nō ni’a i tāna ’evanelia tei mo’e. ’Ua parau ’oia ē, e tono mai ’oia i te mau melahi nō te ha’api’i i teie mau parau mau ia Iosepha, nō te fa’a’ite i tō te ao nei.

Saints, 1:16–17

I te hopera’a te ’ōrama, ’ī a’era Iosepha i te here ’e i te ’oa’oa. ’Aita fa’ahou te mana’o ta’a ’ore. I ’ite ’oia ē ’ua here te Atua iāna. Noa atu ē, e ta’ata tei riri iāna nō te paraura’a ē ’ua ’ite ’oia i te Metua i te ao ra ’e ia Iesu Mesia, ’ua ’ite Iosepha e parau mau.

Iosepha Semita—’Ā’amu 1:20–26 ; Saints, 1:16