Premye Vizyon Joseph Smith la

Yon repons pou yon priyè enb

Joseph Smith k ap koute moun k ap preche konsènan divès kwayans relijye yo.

Kote fanmi Joseph Smith te viv la, te gen anpil legliz ki t ap pale de Jezikri. Yo tout t ap di bagay ki diferan de Li. Joseph pa t sèten kiyès ki te gen rezon. Li te konnen li bezwen Sovè a, men li pa t konnen nan ki legliz pou l te mache.

Istwa—Joseph Smith 1:5–6; Les saints, 1: 9

Joseph te reflechi sou sa lontan. Li te vle pou peche l yo padone. Li te vizite anpil legliz, men li te toujou santi l nan konfizyon.

Istwa—Joseph Smith 1:8–10; Les Saints, 1:9–12

Joseph Smith ki ap li Bib la nan limyè yon chandèl.

Yon jou, Joseph te li Jak 1:5 nan Bib la. Li te di si nou bezwen sajès, nou kapab mande Bondye. Joseph te konnen nan kè l se sa l te bezwen fè.

Istwa—Joseph Smith 1:11–13

Joseph Smith k ap mache nan boskè toupre lakay li a pou l al priye.

Yon bèl jou maten nan sezon prentan an 1820, Joseph te ale nan boskè toupre lakay li yo. Li te vle ale nan yon plas kote li te kapab poukont li pou l te priye Papa nou ki nan Syèl la.

Istwa—Joseph Smith 1:14–15

Joseph te mete l ajenou epi li te kòmanse priye. Lè li te fè sa, li te santi yon move pouvwa pran l. Li te santi fènwa toutotou li. Sa te sanble kòmsi se yon moun ki t ap eseye anpeche l pale avèk Bondye. Joseph te itilize tout fòs li pou l te mande Bondye sove l.

Istwa—Joseph Smith 1:15–16

Papa nou ki nan Syèl la ak Jezikri te parèt devan Joseph Smith. Li ajenou devan yo.

Toudenkou, Joseph te wè yon bèl limyè ki t ap desann soti nan syèl la. Fènwa a te ale, epi li te santi lapè. Nan limyè a, Joseph te wè Papa nou ki nan Syèl la ak Jezikri kanpe nan lè a. Papa nou ki nan Syèl la te site non Joseph Apresa Li te lonje dwèt Li sou Jezi epi L te di, “Sa se Pitit Gason Byenneme m nan. Koute l!”

Istwa—Joseph Smith 1:16–17

Jezi di Joseph Smith ke peche l yo te padone.

Jezi te di Joseph ke peche l yo te padone. Joseph te mande Jezi nan ki legliz pou l te mache. Jezi te di li pou l pa t mache nan okenn nan yo.

Istwa—Joseph Smith 1:18–19; Les Saints, 1:16

Joseph Smith, ajenou nan yon boskè a, ap koute Sovè a.

Jezi te di ke verite enpòtan konsènan levanjil li a te pèdi. Li te di L ap voye zanj pou te anseye Joseph verite sa yo, pou l te pataje avèk mond lan.

Les Saints, 1:16–17

Joseph Smith k ap mache soti nan boskè a pou l tounen lakay li.

Apre vizyon an te fini, Joseph te ranpli avèk lanmou ak lajwa. Li pa t nan konfizyon ankò. Li te konnen Bondye renmen li. Menm si gen kèk moun ki te rayi l paske l te di ke li te wè Papa nou ki nan Syèl la ak Jezikri, Joseph te konnen se te verite.

Istwa—Joseph Smith 1:20–26; Les Saints, 1:16