Fakahinohino Makehe

Tuí, Fakafeohí, mo e Tupulakí

Tanumaki ʻa e tuí, fakafeohí, mo e tupulakí. Tokoni ke fokotuʻu ha ʻātakai ʻe lava ke fakatupulaki ai ʻe he kau akó ʻenau tuí, aʻusia ʻa e fakafeohí, pea mo fakatupulaki honau tuʻunga malavá. Te ke lava ʻo fai ʻeni ʻaki haʻo uiuiʻi ha kau faiako, teuteu ha ngaahi fale, mo fakapapauʻi ʻoku maʻu ʻe he kau akó mo e kau faiakó ʻa e ngaahi maʻuʻanga tokoni ʻoku fiemaʻú. Te ke lava foki ʻo fakafekauʻaki mo e niʻihi kehe te nau lava ʻo poupouʻi ʻa e kau akó, hangē ko e kau faifekaú mo e ngaahi kulupu moʻui fakafalala pē kiate kita kehé.

Kau Taki ʻo e Lakanga Fakataulaʻeikí

Fealēleaʻaki mo e kau taki lakanga fakataulaʻeikí. Fakapapauʻi ʻoku fakangofua mo tokangaʻi ʻa hoʻo polokalamá ʻe he kau taki lakanga fakataulaʻeikí. ʻOku kau ʻi he kau taki lakanga fakataulaʻeikí ʻa kinautolu ʻi he tafaʻaki ʻo e moʻui fakafalala pē kiate kitá, seminelí mo e ʻinisititiutí, mo e ngaahi ngāue fakafaifekaú. Fealēleaʻaki mo e kau taki lakanga fakataulaʻeikí ʻo kau ki he:

• Fokotuʻu mo muimuiʻi ʻo e ngaahi taumuʻá mo e ngaahi lavameʻá (vakai, “ʻOku Poupouʻi ʻe he EnglishConnect e Ngāue ʻa e ʻOtuá ki he Fakamoʻuí mo e Hakeakiʻí”).

• Fakaleleiʻi ʻa e ngaahi ola ʻo e polokalamá.

• Ui ʻo e kau faiako foʻoú (vakai, “Kau Faiako”).

• Fakaafeʻi ha kau ako tokolahi ange ke kau mai (vakai, “Fakaafeʻí mo e ʻIloʻí”).

• Fakalahi ʻo e malava ke hū ki aí (vakai, “Feituʻú mo e Tuʻo Lahí”).

• Ko hono fakaafeʻi ʻo e kau akó ke nau vakaiʻi ha ngaahi maʻuʻanga tokoni kehe ʻa e Siasí (vakai, “Fakafehokotaki ki he Ngaahi Maʻuʻanga Tokoni Kehe ʻa e Siasí”).

Lipooti ki he kau taki lakanga fakataulaʻeikí. Lipooti fakafoki ki he kau taki lakanga fakataulaʻeikí ʻa e ngaahi lavameʻa mo e ngaahi faingataʻa ʻo e ngaahi kulupu EnglishConnect.

Fakapapauʻi ʻoku ngofua fakalao. Fakapapauʻi ʻoku fenāpasi ʻa e polokalama EnglishConnect mo e ngaahi fiemaʻu fakalao fakalotofonua ʻoku maʻu ʻi he englishconnect.org/leader/approved-locations.

Fakatokangaʻi ange: ʻOku maluʻi ʻa e ngaahi maʻuʻanga tokoni EnglishConnect ʻe he lao ʻo e maʻu mafai pulusí pea ʻoku ʻikai totonu ke liliu taʻe maʻu ha ngofua.

Hoa Ngāue Fakafaifekaú

Palani ke fakaʻaongaʻi ʻa e EnglishConnect ke vahevahe ʻa e ongoongoleleí. ʻE lava ke hoko ʻa e EnglishConnect ko ha konga mahuʻinga ʻo ha palani ngāue fakafaifekau ʻa e uōtí. ʻE lava ʻe he ngaahi kulupu EnglishConnect ʻo:

• Fakalahi ha ngaahi faingamālie kumi mo akoʻi maʻá e kau faifekau taimi kakató.

• Fakamālohia ʻa e ngaahi vā fetuʻutaki ʻi he vahaʻa ʻo e kāingalotú, ngaahi kaungāmeʻa ʻo e Siasí, mo e kau faifekaú.

• Tokoni ki he kāingalotu ʻoku foki maí pe kakai ʻoku akoʻi ʻe he kau faifekaú ke nau kau ki ha uooti.

• Tokoniʻi ʻa e kāingalotú ke nau fakaʻaongaʻi ʻa e tefitoʻi moʻoni ʻo e ʻofá, vahevahé, mo e fakaafé (vakai, Tohi Tuʻutuʻuni Fakakātoá, 23.1).

Ko e tokoni lelei tahá ʻa e ngaahi ngāue ʻoku tataki ʻe he mēmipá, pea poupouʻi ʻe he kau faifekaú ki hono aʻusia ʻo e ngaahi ola ko ʻení. ʻI he taimi ʻoku tataki ai ʻe he kāingalotú ʻa e ngaahi kulupu EnglishConnect, ʻoku meimei ke fokotuʻu ʻe kinautolu ʻoku kau maí ha feohi fakakaungāmeʻa mo e kāingalotú mo vahevahe ha ngaahi aʻusia langaki ʻo e tuí. ʻOku totonu ke fealēleaʻaki fakataha ʻa e kau faifekaú, kau taki fakamisioná, mo e ngaahi kōmiti moʻui fakafalala pē kiate kitá ke ngaohi ʻa e ngaahi kulupu EnglishConnect ko ha feituʻu ʻoku faingofua mo fakanatula ai hono vahevahe mo moʻui ʻaki ʻo e ongoongoleleí.

Fakaafeʻi ʻa e kau faifekaú ke nau tokoni. ʻI he ngaahi feituʻu ʻoku fakahoko ai ʻe he ngaahi siteikí pe uōtí ha ngaahi kulupu EnglishConnect, fakaafeʻi ʻa e kau faifekaú ke nau tokoni ʻaki ʻenau:

• Kau atu ki he ngaahi kulupú pea akoako mo kinautolu lolotonga ʻa e ngaahi ʻekitivitií.

• Akoako mo e kau akó ʻi he vahaʻa ʻo e ngaahi kulupu fepōtalanoaʻakí.

• Akoʻi ha ngaahi lēsoni ʻo ka fiemaʻu.

Kau Faiako

Fatongia ʻo e Kau Faiakó

ʻOku fakahoko ʻe he kau faiakó ha fatongia mahuʻinga ʻi hono fakaafeʻi ʻa e Laumālié mo fakatupulaki e tuí, fakafeohí, mo e tupulakí ʻi he ngaahi kulupu EnglishConnect. ʻOku ʻikai fiemaʻu ia ke nau hoko ko ha kau mataotao ʻi he lea faka-Pilitāniá pe maʻu ha aʻusia fakafaiako. ʻOku ʻikai fiemaʻu ia ke nau lea ʻi ha lea fakafonua tatau mo e kau akó. ʻOku fakataumuʻa ʻa e ngaahi lēsoni EnglishConnect ʻo fakaʻaongaʻi ʻa e ngaahi tefitoʻi moʻoni kuo ʻosi fakamoʻoniʻi ʻo e ako lea fakafonuá, pea ʻe lavameʻa ʻa e kau faiakó ʻi heʻenau tataki ʻi he ʻofa ʻa e kau akó ʻi he ngaahi lēsoní. ʻOku tokoni ʻa e kau faiakó ki he kau akó ke nau ofi ange ki he ʻOtuá ʻi hono ako ʻo e lea faka-Pilitāniá.

Ngaahi ʻUlungaanga ʻo e Faiakó

ʻOku maʻu ʻe he kau faiako leleí ha:

• Loto-vēkeveke, fiefia, mo manako ke akoʻi ʻa e lea faka-Pilitāniá.

• ʻOfa mo e faʻa kātaki ki he kau akó pea mo ha holi mālohi ke sio ʻoku nau lavameʻa.

• ʻUlungaanga lelei mo fakatuʻamelie.

• Falalaʻanga mo e faingamālie ke tataki ʻa e ngaahi kulupú.

Ui ʻo e kau faiakó. Koeʻuhí ʻe lava ke kau ʻi he kau ako ʻo e EnglishConnect ha niʻihi taʻu siʻi, ʻoku totonu ke ʻinitaviu ʻe he kau taki lakanga fakataulaʻeiki fakalotofonuá ʻa e niʻihi takitaha ʻe ala hoko ko ha faiakó mo vakaiʻi ʻenau lekooti mēmipasipí ki ha ngaahi fakamatala kimuʻa pea toki fakahoko ha uiuiʻí. Kuo pau ke ʻi ai ha kakai lalahi ʻe toko ua ʻi he ngaahi kulupu ʻoku ʻi ai ha niʻihi taʻu siʻí pea muimui ki he ngaahi tuʻutuʻuni ʻa e Siasí ki hono maluʻi ʻo e toʻu tupú. ʻOku fokotuʻu atu ke ʻi ai foki ha ongo faiako ʻi he ngaahi kulupu ʻoku ʻikai ko ha toʻu tupú koeʻuhí ke na lava ʻo faiako fakataha pe taufetongi ka nofo pe puke ha taha.

Akoʻi ʻo e kau faiakó. Te ke lava ʻo akoʻi ʻa e kau faiakó ʻo fakaʻaongaʻi ʻa e EnglishConnect maʻá e Kau Faiakó mo e ngaahi maʻuʻanga tokoni ʻi he englishconnect.org/teacher. ʻOku totonu foki ke ke ʻoange ki he kau faiakó ha tatau ʻo e tohi lēsoni mo e tohi ngāue ʻa e tokotaha akó (vakai, “Ngaahi Naunaú”). ʻOku poupouʻi foki ʻa e kau faiakó ke nau fakataha maʻu pē ke fealēleaʻaki fakataha, vahevahe ʻa e ngaahi founga lelei tahá, fetaliʻaki ʻenau ngaahi fehuʻí, mo toe vakaiʻi ʻa e ngaahi naunau akó.

Tokoniʻi ʻa e kau akó ke nau fakalakalaka ʻo hoko ko ha kau faiako. ʻE lava ke ʻiloʻi ʻe he kau faiakó ʻa e kau ako ʻi he kulupú te nau lava ʻo teuteu ke akoʻi ha kulupu ʻi he kahaʻú. ʻOku tokoni ʻa e akoʻí ki he kau akó ke hokohoko atu ʻenau tupulakí mo fakalahi ʻa e malava ko ia ke kau ki he polokalamá.

Naunaú

ʻOange ki he kau akó ha naunau. ʻE fiemaʻu ke hū ʻa e kau akó ki he EnglishConnect 1 maʻá e Kau Akó pe EnglishConnect 2 maʻá e Kau Akó, ʻi he Gospel Library pe paaki ʻi he falekoloa ʻinitaneti ʻa e Siasí ʻi he store.ChurchofJesusChrist.org. ʻOku ʻi ai foki mo ha ngaahi maʻuʻanga tokoni kehe ke tokoni ki heʻenau akó, kau ai e ngaahi tohi ngāué mo e ngaahi ʻekitivitī ʻi he ʻinitanetí. Ki ha fakamatala ʻo e ngaahi maʻuʻanga tokoni kotoa ʻoku ʻatā maʻá e kau akó, vakai ki he “Ko e hā ʻa e naunau ʻa e tokotaha akó mo e faiakó ki he EnglishConnect?” ʻi he konga “Ngaahi Fehuʻi ʻOku Lahi Hono ʻEké.”

Ngaahi Maʻuʻanga Tokoni ʻOku Pākí

Kapau ʻokú ke tufa ha ngaahi maʻuʻanga tokoni ʻoku paaki, ʻe poupouʻi ʻe he ngaahi ʻiuniti fakalotofonuá ʻa e ngāué ni ʻi heʻenau patiseti lolotongá. Kapau ʻokú ke fiemaʻu tokoni fakapaʻanga, ʻoku totonu ke muimui ʻa e kau palesiteni fakasiteikí ʻi he founga kuo fakangofuá ke kole hano fakapaʻanga. ʻOua naʻá ke hilifaki ha faʻahinga totongi ʻo e kau maí ki he kau akó. Kapau ʻoku fiemaʻu ke fakatau ʻe he kau akó ha ngaahi maʻuʻanga tokoni kuo paaki maʻanautolu, ʻe lava ke nau fai ia ʻo fakafou ʻi he ngaahi senitā tufakiʻanga naunau fakalotofonuá pe ko e falekoloa ʻo e Siasí ʻi he ʻinitanetí.

Fakatokangaʻi ange: ʻE lava ke aʻu ki ha uike ʻe ono pea aʻu atu ʻa e ngaahi tohi lēsoní.

ʻOange ki he kau faiakó ha ngaahi naunau. ʻOku totonu ke ako ʻe he kau faiakó ʻa e EnglishConnect maʻá e Kau Faiakó ʻi he Gospel Library kae pehē ki he ngaahi maʻuʻanga tokoni fakaako kehé ʻi he englishconnect.org/teacher.

Ngaahi Fakamatala Fakaʻaliʻali ʻi he Lēsoní

ʻE lava ke fakaʻaongaʻi ʻe he kau faiakó ʻa e ngaahi maʻuʻanga tokoni fakavitiō ʻa e EnglishConnect ke tokoni ki hono tataki ʻo e ngaahi kulupu fepōtalanoaʻaki ʻi he ʻinitanetí. ʻOku lava ke maʻu atu ʻa e ngaahi fakaʻaliʻali ʻo e lēsoní ʻi he englishconnect.org/resources/teaching-materials.

Feituʻú mo e Tuʻo Lahí

Fakapapauʻi pe te ke fakalele ha ngaahi kulupu ako fakahangatonu pe ʻi he ʻinitanetí. ʻOku fokotuʻu atu ki he ngaahi kulupu ako fakahangatonu ʻi he ngaahi fale ʻo e Siasí ke nau fokotuʻu ha ngaahi faingamālie fakafeohi. Kapau ʻoku faingataʻa kiate kinautolu ʻoku kau maí ʻa e hū ki he ngaahi fale ʻo e Siasí, fakakaukau ke fakalele ha ngaahi kulupu ʻi he ʻinitanetí. ʻE lava ke tokoni ʻa e “Fakahinohino ki hono Tataki ha Ngaahi Kulupu ʻi he ʻInitanetí” mo e “Fakahinohino ki he Tokotaha Ako ʻi ha Kulupu ʻi he ʻInitanetí” ki he kau takí, kau faiakó, mo e kau akó ke faʻu ha ʻātakai ako fakalaumālie ʻi he ʻinitanetí. ʻOku lava ke maʻu atu ʻa e ngaahi fakaʻaliʻali fakaako ʻo e lēsoní ʻi he ʻinitanetí ʻi he englishconnect.org/resources/teaching-materials.

Fakapapauʻi ʻa e tuʻo lahi ʻe fakataha ai ʻa e ngaahi kulupú. Ko e lahi taha ʻo e ngaahi kulupú ʻoku nau fakataha tuʻo taha pe tuʻo ua ʻi he uike, ka ʻoku hiki ʻa e ngaahi lēsoní ke lava ʻo fakataha lahi ange ʻa e ngaahi kulupú kapau ʻe fiemaʻu. Manatuʻi ʻoku fiemaʻu ʻe he kau akó ha taimi ke fakakakato ai ʻa e ngaahi ʻekitivitī ako fakatāutahá kimuʻa ʻi he lēsoni takitaha.

Fakapapauʻi ʻa e taimi mo e fuoloa ʻo e fakataha ʻa e ngaahi kulupú. Fili ha ʻaho mo ha taimi ʻe ʻaonga taha ki he kau akó mo e kau faiakó. Ko e tokolahi taha ʻo e ngaahi kulupú ʻoku nau fakataha ʻi ha miniti ʻe 90, ka ʻe lava ke fakataha ʻa e ngaahi kulupú ʻi ha taimi kehekehe ʻo ka fiemaʻu.

Fakapapauʻi ʻa e fuoloa ʻo e ngaahi kulupú pea mo e ngaahi ʻiuniti te nau akoʻí. ʻOku lahi ha ngaahi kulupu ʻoku hokohoko atu, ʻo ʻuhinga ia ʻoku nau kamata mei he lēsoni 1 ʻi he ʻosi ʻa e tohi lēsoní. ʻOku ʻi ai mo ha ngaahi kulupu kehe ʻoku nau fakakakato tuʻo taha pē pe akoʻi pē ha konga ʻo e ngaahi ʻiuniti ʻi he tohi lēsoní.

Vakai ki he konga “Ngaahi Sīpingá” ki ha ngaahi founga kuo fokotuʻutuʻu ai ʻe he kau takí ha ngaahi kulupú.

Lesisitá mo e Ngaahi Tohi Fakamoʻoní (QuickReg)

Faʻu mo tokangaʻi ʻa e ngaahi kulupú ʻi he QuickReg. Ko e QuickReg ko ha meʻangāue ia kuo fakangofua ʻe he Siasí ke tokangaʻi ʻa e ngaahi kulupu moʻui fakafalala pē kiate kitá. Faʻu ha ngaahi kulupu ʻi he QuickReg ʻaki haʻo ʻalu ki he quickreg.englishconnect.org. Hokohoko atu ke fakaʻaongaʻi ʻa e QuickReg ke:

• Tuʻuaki ʻa e ngaahi kulupú.

• Liliu ʻa e ʻaho, taimi, mo e feituʻu ʻo e ngaahi kulupú.

• Paaki ʻa e tohi fakamoʻoni ʻa e tokotaha ʻoku kaú.

• Liliu ʻa e tuʻunga ʻo ha tokotaha ako.

• Aofangatuku ʻo e ngaahi kulupú.

Vakai ki he kalasi QuickReg ʻi he englishconnect.org/leader ki he akó.

Fakatokangaʻi ange: Ke fakaʻaongaʻi ʻa e QuickReg, kuo pau ke maʻu ʻe he mēmipá (1) ha uiuiʻi ʻi he Siasí pea (2) lekooti honau uiuiʻí ʻi he Maʻuʻanga Tokoni ki he Takí mo e Kalaké.

Paaki mo foaki ʻa e ngaahi tohi fakamoʻoní mei he QuickReg. ʻE lava ke paaki mo foaki ʻe he kau faiakó mo e kau mataotao ki he moʻui fakafalala pē kiate kitá ʻa e ngaahi tohi fakamoʻoni ʻo e kau maí ki he kau ako ʻoku lesisita ʻi he QuickReg.

Fakaafeʻí mo e ʻIloʻí

Fakaʻaongaʻi ʻa e ngaahi naunau ki hono ʻiloʻí. ʻOku lava ke maʻu ʻa e ngaahi naunau tuʻuakí ʻi he falekoloa ʻinitaneti ʻa e Siasí ʻi he store.ChurchofJesusChrist.org pea ʻi he englishconnect.org/resources/leader#publicity.

Fakaafeʻi ʻa e kau akó. Te ke lava ʻo fakaʻaongaʻi e ngaahi founga fetuʻutaki angamahení ke tuʻuaki ʻaki ʻa e ngaahi kulupu EnglishConnect, hangē ko e kau fafine mo e kau tangata ngāue fakaetauhí, kau faifekaú, ngaahi fanongonongo fakauōtí, ngaahi tuʻuakí, mo e ngaahi alā meʻa peheé. ʻI he ngaahi feituʻu kuo fakamafaiʻi mo fakapaʻanga ʻe he ngaahi ʻiuniti fakalotofonuá, ʻe lava foki ke fakakaukauʻi ʻe he ngaahi kulupú ha tuʻuaki ʻi he mītia fakasōsialé pe peesi uepisaiti fakalotofonua ʻa e uōtí pe siteikí. Kimuʻa pea tuku atu ha taha ʻo e ngaahi founga tuʻuaki ko ʻení, toe vakaiʻi ʻa e ngaahi fakahinohino fakalao fakalotofonuá ʻi he englishconnect.org/leader/approved-locations.

Talitali lelei ʻa e kau akó. Fokotuʻu ha palani ki he founga te ke talitali lelei ai ʻa e kau akó ʻi he taimi te nau lesisita ai ki he kulupú.

Fakaafeʻi ha ngaahi kaungāmeʻa mei he ngaahi tui fakalotu kehé. ʻOku poupouʻi koe ke ke fakakau mai ha kakai mei ha ngaahi puipuituʻa tui fakalotu kehekehe. Fakahaaʻi maʻu pē hoʻo fakaʻapaʻapa ki he ngaahi tui ʻa e niʻihi kehé lolotonga hoʻo vahevahe tauʻatāina hoʻo tui ʻe lava ke tokoniʻi ʻe he ʻOtuá ʻa kinautolu ʻoku kau maí ke nau ako ʻa e lea faka-Pilitāniá.

Fakakaukau ke fakaafeʻi ʻa e toʻu tupú. Te ke lava ʻo fokotuʻutuʻu ha ngaahi kulupu maʻá e toʻu tupú pē, pe ko hoʻo fakaafeʻi ʻa e toʻu tupú ke nau kau mai mo e kakai lalahí. ʻI he EnglishConnect, ʻoku ako ai ʻe he toʻu tangata kei tupu haké ʻa e founga ke maʻu e tokoni ʻa e ʻOtuá ke ako ʻa e lea faka-Pilitāniá. ʻE lava ke tokoniʻi kinautolu ʻe he ngaahi lēsoni ko ʻení ke nau tui ʻe tokoniʻi kinautolu ʻe he ʻOtuá ʻi he tapa kotoa pē ʻo ʻenau moʻuí.

Muimui ki he ngaahi tuʻutuʻuni ʻa e Siasí ki hono maluʻi ʻo e toʻu tupú. Kuo pau ke ʻi ai ha foomu fakangofua ʻa e mātuʻá kuo nau ʻosi fakamoʻoni hingoa ki ai maʻá e niʻihi kei taʻu siʻí (ʻa kinautolu ʻoku taʻu 18 pe siʻi ange pea nofo ʻi ʻapí) kimuʻa pea nau toki kau ki he kulupú. ʻOku maʻu atu ʻa e ngaahi fōmú ʻi ha ngaahi lea fakafonua kehekehe ʻi he englishconnect.org/resources/leader. ʻIkai ngata aí, kuo pau ke muimui maʻu pē ʻa e ngaahi kulupu EnglishConnect ʻi he tuʻutuʻuni ʻa e Siasí ke ʻi ai ha kakai lalahi falalaʻanga ʻe toko ua pe lahi ange ʻi he taimi kotoa pē lolotonga ʻo e ngaahi fakataha fakakuatá. Kuo pau ke muimuiʻi ʻa e ngaahi tuʻutuʻuni ko ʻení neongo kapau ʻoku fakataha ʻa e kulupú ʻi he ʻinitanetí.

Fakalakalaka ki he Tuʻunga Hono Hokó

Akoʻi ʻa e kau akó ʻi he ako mo e halanga moʻui ʻi he EnglishConnect mo e BYU–Pathway Fakaemāmani Lahí. ʻOku ʻomi ʻe he EnglishConnect mo e BYU–Pathway Fakaemāmani Lahí ha hala maʻá e kau akó ke nau maʻu ai ha ngaahi taukei foʻou ʻi ha ʻātakai ʻo e fakafeohí mo e tuí. Te ke lava ʻo maʻu ʻa e ngaahi maʻuʻanga tokoní ʻi he byupathway.org/englishconnect.

Tokoniʻi ʻa e kau akó ke nau lesisita ʻi he EnglishConnect 3. Vakai ki he konga “Ko Hono Fakafehokotaki ʻo e Kau Akó ki he Ngaahi Kulupu EnglishConnect 3.”

Fakafehokotaki mo hoʻo kau faifekau ngāue tokoni fakalotofonua ʻi BYU–Pathway Fakaemāmani Lahí. Aleaʻi ha ngaahi founga ke poupouʻi ai ʻa e kau akó ʻi heʻenau hiki mei he EnglishConnect 3 ki he BYU–Pathway Fakaemāmani Lahí.

Fakafehokotaki ki he Ngaahi Maʻuʻanga Tokoni Kehe ʻa e Siasí

Fakafehokotaki ki he ngaahi maʻuʻanga tokoni lahi ange ʻa e Siasí. Faʻu ha ngaahi palani ke fakafehokotaki ʻa kinautolu ʻoku kau maí ki ha ngaahi maʻuʻanga tokoni lahi ange ʻa e Siasí, hangē ko e ngaahi kulupu kehe ki he moʻui fakafalala pē kiate kitá, ngaahi ʻekitivitī ʻa e toʻu tupú, mo ha ngaahi faingamālie ke ako lahi ange fekauʻaki mo e ongoongolelei ʻo Sīsū Kalaisí. Vakai ki he peesi “Ngaahi Maʻuʻanga Tokoni ki he Ngāué mo e Akó” ʻi he ChurchofJesusChrist.org ki ha fakamatala lahi ange.