Ngaahi Fehuʻi ʻOku Lahi Hono ʻEké

Ko e hā ha ngaahi liliu te u lava ʻo fai ki he ngaahi maʻuʻanga tokoni fakaako mo tuʻuakí?

Ko e kau faiako nai ʻe toko fiha ʻoku ou fiemaʻú?

Ko e hā ʻa e naunau ʻa e tokotaha akó mo e faiakó ki he EnglishConnect?

Te u ʻiloʻi fēfē pe ʻoku lavameʻa ʻa e ngaahi kulupú?

Te u ʻilo fēfē pe ʻoku totonu ke toʻo ʻe ha tokotaha ako ʻa e EnglishConnect 1 pe 2?

Ko e hā ha ngaahi liliu te u lava ʻo fai ki he ngaahi maʻuʻanga tokoni fakaako mo tuʻuakí?

ʻOku maluʻi ʻa e ngaahi maʻuʻanga tokoni EnglishConnect ʻe he lao ʻo e maʻu mafai pulusí pea ʻoku ʻikai totonu ke liliu ia taʻe maʻu ha ngofua. Vakai ki he konga “Fakamatala Fakalahi A: Fakamatala Fakalaó” ki ha fakamatala fekauʻaki mo hono kole ha ngofua ke liliu ʻa e ngaahi maʻuʻanga tokoní.

Ko e kau faiako nai ʻe toko fiha ʻoku ou fiemaʻú?

ʻOku fokotuʻu atu ke maʻu ʻe he kulupu takitaha ha faiako ʻe toko ua pe lahi ange. ʻI he founga ko iá te na lava ai ʻo faiako fakataha pe taufetongi ka nofo pe puke ha taha.

Mahuʻinga: Kuo pau ke muimui ʻa e ngaahi kulupu EnglishConnect ki he tuʻutuʻuni ʻa e Siasí ʻoku totonu ke ʻi ai maʻu pē ha kakai lalahi falalaʻanga ʻe toko ua ʻi he lolotonga ʻo e fakataha fakakulupu takitaha. Kapau ʻoku toko taha pē ʻa e faiakó, pea vahe leva ki ha mēmipa lahi ʻo e kulupú ke kau mai ki he lēsoni takitaha. ʻOua naʻa lele ha kulupu kapau ʻoku ʻikai ke ʻi ai ha kakai lalahi falalaʻanga ʻe toko ua pe lahi ange.

Ko e hā ʻa e naunau ʻa e tokotaha akó mo e faiakó ki he EnglishConnect?

Naunau ʻa e Tokotaha Akó

ʻE fiemaʻu ke hū ʻa e kau akó ki he EnglishConnect 1 maʻá e Kau Akó pe EnglishConnect 2 maʻá e Kau Akó. ʻOku toe ʻi ai foki mo ha ngaahi maʻuʻanga tokoni lahi ange ke fakatupulaki ʻaki ʻa e akó. Vakai ki he lisi ʻi laló ki he ngaahi fakamatala ʻo e ngaahi maʻuʻanga tokoni kotoa ʻoku lava ke maʻu ʻe he kau akó:

• EnglishConnect 1 maʻá e Kau Akó mo e EnglishConnect 2 maʻá e Kau Akó: ʻOku fakaʻaongaʻi ʻe he kau akó ʻa e ngaahi tohi lēsoni ko ʻení ke teuteu mo kau ʻi he kulupu fepōtalanoaʻakí. ʻOku vahevahe ʻa e tohi lēsoni takitaha ʻa e tokotaha akó ki ha ʻiuniti ʻe ono ʻo e ngaahi lēsoni ʻe fā ki he nima. ʻOku kau ʻi he lēsoni takitaha ha ngaahi konga ki he “Ako Fakatāutahá” mo e “Kulupu Fepōtalanoaʻakí.” ʻOku poupouʻi ʻa e kau akó ke nau fakakakato ʻa e ngaahi ʻekitivitī “Ako Fakatāutahá” kimuʻa pea nau toki omi ki he kulupu fepōtalanoaʻakí. Te ke lava ʻo hū ki he ngaahi tohi lēsoni ʻa e tokotaha akó mo e ngaahi maʻuʻanga tokoni ki he ongó ʻi he Gospel Library pe ʻota kinautolu ʻi he store.ChurchofJesusChrist.org (naunau fika 18489 & 19563).

• Tohi Ngāue ʻa e EnglishConnect 1 mo e Tohi Ngāue ʻa e EnglishConnect 2: ʻOku takitaha maʻu ʻe he kulupu EnglishConnect 1 mo e 2 ha tohi ngāue pē ʻanautolu. ʻOku fakaʻaongaʻi ʻe he kau akó ʻa e ngaahi ʻekitivitī ʻi he ʻū tohi ngāue ko ʻení ʻiate kinautolu pē pe mo ha hoa ngāue ko ha akoako makehe ʻi tuʻa ʻi he kulupu fepōtalanoaʻakí. Te ke lava ʻo hū ki he tohi ngāué ʻi he Gospel Library pe ʻota kinautolu ʻi he store.ChurchofJesusChrist.org (naunau fika 17140 & 17323).

• EnglishConnect.org: ʻOku kau ʻi he uepisaiti EnglishConnect ha ngaahi ʻekitivitī akoako ki he lēsoni takitaha.

• Polokalama Gospel Library: ʻE lava ke lau pe fanongo ʻa e kau akó ki he ngaahi lea ʻo e konifelenisi lahí, Tohi ʻa Molomoná, mo e ngaahi himí.

• Ngaahi Tohi mo e Polokalama Kehé: ʻOku lahi ha ngaahi maʻuʻanga tokoni kuo faʻu ke tokoniʻi ʻa e kakaí ke nau ako e lea faka-Pilitāniá. ʻOku totonu ke feinga ʻa e kau akó ke, “fekumi mei he ngaahi tohi lelei tahá ʻa e ngaahi lea ʻo e potó; mou fekumi ki he ʻiló, ʻio, ʻi he ako pea ʻi he tui foki” (Tokāteline mo e Ngaahi Fuakava 88:118).

ʻOku totonu ke poupouʻi ʻe he kau faiakó ʻa e kau akó ke nau ʻahiʻahiʻi ha ngaahi maʻuʻanga tokoni kehekehe pea vakaiʻi ʻenau lelei takitaha kiate kinautolú.

Fika ʻo e Ngaahi Naunaú ʻi he Falekoloa ʻa e Siasí

EnglishConnect 1 maʻá e Kau Akó	18489
EnglishConnect 2 maʻá e Kau Akó	19563
Tohi Ngāue ʻa e EnglishConnect 1	17140
Tohi Ngāue ʻa e EnglishConnect 2	17323

Naunau ʻa e Faiakó

ʻOku totonu ke ako ʻe he kau faiakó ʻa e EnglishConnect maʻá e Kau Faiakó ʻi he Gospel Library kae pehē ki he ngaahi maʻuʻanga tokoni fakaako kehé ʻi he englishconnect.org/teacher/training. ʻE lava foki ke fakaʻaongaʻi ʻe he kau faiakó ʻa e ngaahi maʻuʻanga tokoni ki he fakamatala ʻa e EnglishConnect ke tataki ʻaki ʻa e ngaahi ʻekitivitī fepōtalanoaʻakí. ʻOku maʻu atu ʻa e ngaahi maʻuʻanga tokoni ki he fakamatalá ʻi he englishconnect.org/resources/teaching-materials.

Te u ʻiloʻi fēfē pe ʻoku lavameʻa ʻa e ngaahi kulupú?

Ko e taumuʻa ʻo e EnglishConnect ke tokoniʻi ʻa e kau akó ke fakatupulaki ʻenau moʻui fakafalala fakalaumālie mo fakatuʻasino pē kiate kinautolú ʻi heʻenau fekumi ki he tokoni ʻa e ʻEikí ke ako ʻa e lea faka-Pilitāniá. ʻE lava foki ʻe hono ako ʻo e lea faka-Pilitāniá ʻo fakalahi honau ngaahi faingamālie fakaakó mo e ngāué. ʻOku fakataumuʻa ʻa e ngaahi kalasi EnglishConnect ke tokoni ki he kau akó ke nau fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau ngāue fakataha ke aʻusia ʻenau ngaahi taumuʻa akó.

Te ke ʻiloʻi ʻoku lavameʻa ʻa e kau faiakó ʻi he taimi ʻoku nau:

• Fakaafeʻi ai ʻa e Laumālié ʻo fakafou ʻi heʻenau fakamoʻoní, lotú, mo hono fakahaaʻi ʻo e ʻofá mo e fakalotolahí.

• Vaheʻi ha miniti ʻe 20 ki he 30 ke aleaʻi ai ʻa e tefitoʻi moʻoni ʻo e ako mei he lēsoní.

• Fakaʻaongaʻi ʻa e konga lahi taha ʻo e taimí ke tokoniʻi ʻa e kau akó ke nau kau ʻi he ngaahi ʻekitivitī akoako leá.

Te ke ʻiloʻi ʻoku lavameʻa ʻa e kau akó ʻi he taimi ʻoku nau:

• ʻAlu mo kau maʻu ai pē ki he ngaahi fakataha fakakulupu fakauiké.

• Feakoʻiʻaki, fakahaaʻi ʻa e tuí, mo vahevahe ʻenau fakamoʻoní.

• Ngāue ʻi he tui ke ako mo akoako fakahoko fakaʻaho ʻa e lea faka-Pilitāniá ʻi tuʻa ʻi he kulupú.

Te u ʻilo fēfē pe ʻoku totonu ke toʻo ʻe ha tokotaha ako ʻa e EnglishConnect 1 pe 2?

Te ke lava ʻo fakaʻaongaʻi ʻa e kiʻi sivi lea nounou ʻi he “Fakamatala Fakalahi E: ʻInitaviu Pōtoʻi Lea ke Kau ʻi he Ngaahi Kulupu EnglishConnect” ke fakapapauʻi pe ʻoku totonu ke fakahū ha tokotaha ako ʻi he EnglishConnect 1 pe EnglishConnect 2. Kapau ʻoku taha pē ʻa e kulupu ʻoku lelé, ʻe lava ke ngāue fakataha ʻa e kau ako mei he ongo kalasí fakatouʻosi ke fakahoko mo maʻu ha tokoni.