“Ngaahi Sīpingá,” Fakahinohino Ki hono Fakahoko ʻo e EnglishConnect (2023)
“Ngaahi Sīpingá,” Fakahinohino Ki hono Fakahoko ʻo e EnglishConnect
Ngaahi Sīpingá
ʻOku ʻoatu ʻi lalo ha ngaahi sīpinga ʻo e founga ke fokotuʻutuʻu ai ʻa e ngaahi kulupú ke feau e ngaahi fiemaʻu fakalotofonuá.
Ngaahi Kulupu Tataki ʻe he Kau Faifekaú
Ngaahi Kulupu Hokohoko Atú
ʻOku fiemaʻu ʻe ha fakataha alēlea fakasiteiki ke fakalele ha ngaahi kulupu EnglishConnect ʻe lava ke kau ki ai ʻa e kau mēmipa ʻo e siteikí mo e koló ʻi ha faʻahinga taimi pē. ʻOku nau ʻamanaki ʻe maʻu mei he ngaahi kulupu EnglishConnect ha ngaahi faingamālie ki he kāingalotu ʻo e Siasí ke nau tokoni. ʻOku nau ʻamanaki foki ʻe maʻu ʻe he kau mēmipa ʻo e koló mei he ngaahi kulupu ko ʻení ha ngaahi faingamālie ke nau ako lahi ange ai fekauʻaki mo Sīsū Kalaisi mo aʻusia e ʻofa ʻa e kāingalotu ʻo e Siasí.
ʻOku nau fili ha fale ʻoku ofi taha ki he tokolahi taha ʻo e kakai ʻoku ngalingali ke nau kaú. ʻOku nau fili ke fakataha ʻa e ngaahi kulupú ʻi he efiafi Tūsité mei he 7:00 ki he 8:30 p.m. ʻOku nau ui ha kau faiako ʻe toko fā, ko e ua ki he EnglishConnect 1 mo e ua ki he EnglishConnect 2. ʻOku nau kole ki ha taha ʻo e kau faiakó ke hoko ko e kouʻotineita ʻo e polokalamá kotoa pea ʻoange ki he faiako ko iá ʻa e uiuiʻi ʻo e mataotao ki he uelofeá mo e moʻui fakafalala pē kiate kitá ʻi he Maʻuʻanga Tokoni ki he Takí mo e Kalaké. ʻI he uiuiʻi ko ʻení, ʻe lava ke lesisita ʻe he kouʻotineitá ʻa e ngaahi kulupú ʻi he QuickReg.
ʻOku tuʻuaki leva ʻe he fakataha alēlea fakasiteikí ʻa e ngaahi kulupú ʻaki ʻenau tufa ha ngaahi tuʻuaki ʻi he lotú, fakamatala fekauʻaki mo ia ʻi he mītia fakasōsialé, mo kole ki he kau faifekaú ke fakaafeʻi ʻa e kakai ʻoku nau fetaulakí. ʻI he kamataʻangá, ʻoku ʻave ʻe he siteikí ʻa e kau akó ke nau kau ki ha kulupu EnglishConnect 3 ʻi he ʻinitanetí maʻa honau feituʻú ʻi he taimi ʻoku nau mateuteu ai ke hiki mei he EnglishConnect 2. ʻI he fakalau ʻa e taimí, ʻe maʻu ʻe he siteikí ha niʻihi feʻunga ke kau ki ha kulupu EnglishConnect 3 ʻi he ʻapisiasi tatau pē mo ia ʻo ʻenau kulupu EnglishConnect 1 mo e 2. ʻOku nau ngāue mo ʻenau fetuʻutaki BYU–Pathway Fakaemāmani Lahí ke ui ha kau faifekau PathwayConnect ke tokangaʻi ʻa e kulupu EnglishConnect 3.
Ngaahi Kulupu ʻIuniti-Uá
ʻOku fiemaʻu ʻe ha fakataha alēlea fakauooti ke ʻoange ki he kāingalotu ʻo e uōtí mo e koló ha faingamālie ke nau ako ʻa e lea faka-Pilitāniá. Kuo nau feinga ke fakalele ha kulupu EnglishConnect kimuʻa, ka naʻe faingataʻa ki he tokolahi taha ʻo kinautolu ne kau maí ke tukupā ke kau kakato mai ʻi he uike ʻe 25. ʻOku nau fili ke fokotuʻu ha ongo kulupu ʻoku nau akoʻi pē ha ʻiuniti ʻe ua.
ʻOku palani ʻa e kau takí ke fakataha ʻa e ongo kulupú ʻi he ʻaho Tūsité mo e Falaité mei he 7:30 ki he 9:00 p.m. ʻOku nau ui ha kau faiako ʻe toko fā, ko e ua ki he EnglishConnect 1 mo e ua ki he EnglishConnect 2. ʻOku nau lesisita ʻa e ongo kulupú ʻi he QuickReg pea tuʻuaki ʻa e ongo kulupú ʻaki hano ʻai ha fakaʻilonga ʻi tuʻa ʻi he ʻapi Siasí. ʻOku nau ngaohi foki ha fanga kiʻi laʻipepa tuʻuaki ʻe lava ke tufaki ʻe he kāingalotú ki honau ngaahi kaungāmeʻá pe vahevahe ʻi he mītia fakasōsialé.
ʻI he fakaʻosinga ʻo e māhiná, ʻʻoku fakaʻosi ʻe he kau takí ʻa e ongo kulupú ʻi he QuickReg pea faʻu ha palani ke akoʻi ʻa e ongo ʻiuniti hokó ʻi he kahaʻu vave maí.
Ngaahi Kulupu Toʻu Tupú
ʻOku fiemaʻu ʻe ha fakataha alēlea fakasiteiki ke tokoni ki he toʻu tupú ke nau maʻu ha ngaahi faingamālie fakaako mo fakangāue hili ʻenau fakaʻosi e polokalama ʻa e toʻu tupú pea foki ki ʻapi mei heʻenau ngāue fakafaifekaú. ʻOku toe ʻamanaki foki ʻa e kau takí ʻe tokoni hono ako ʻa e lea faka-Pilitāniá ʻi he EnglishConnect ki he toʻu tupú ke nau ako e founga ke fengāueʻaki ai mo e ʻOtuá ke aʻusia ha ngaahi taumuʻa mahuʻinga. ʻOku nau fili ke kamata ha ngaahi kulupu EnglishConnect maʻá e toʻu tupu ʻi honau siteikí.
ʻOku nofo vāmamaʻo ʻa e toʻu tupú, ko ia ai ʻoku fili ʻa e kau takí ke fakataha ʻa e ongo kulupú ʻi he Tūsité mei he 8:00 ki he 9:00 efiafi. ʻOku nau ui ha taha ʻosi ngāue fakafaifekau mo ha toʻu tupu ʻoku ʻi ai haʻane ʻilo ki he lea faka-Pilitāniá ke akoʻi ʻa e kulupú. ʻOku fakapapauʻi ʻe he kau takí ʻoku nau muimui ki he ngaahi tuʻutuʻuni ʻa e Siasí ki hono maluʻi ʻo e toʻu tupú. Hangē ko ʻení, te nau fakapapauʻi ʻoku ʻi ai ha ongomeʻa lalahi kuó na fakakakato ʻa e ako maluʻi ʻo e toʻu tupú ʻi he fakataha ʻinitaneti takitaha pea ʻoku ʻi ai ha foomu fakangofua ʻa e mātuʻá maʻá e toʻu tupu takitaha kuo nau ʻosi fakamoʻoni hingoa ki ai.
ʻOku fokotuʻu foki ʻe he kau takí ha kulupu WhatsApp ʻoku tokangaʻi ʻe he faiakó pe takí ke lava ʻe he toʻu tupú ʻo akoako fakaʻaongaʻi fakaʻaho ʻa e lea faka-Pilitāniá. ʻOku tokoni ʻa e kulupu WhatsApp ke fakakau ʻa e toʻu tupu ʻoku ʻikai lava ʻo kau mai ki he ngaahi fakataha ʻo e Tūsité.
ʻOku ngāue ʻa e kau takí mo ʻenau pule uelofea fakaʻēliá mo e moʻui fakafalala pē kiate kitá ke kamataʻi ha kulupu toʻu tupu EnglishConnect 3 ʻi honau feituʻú maʻanautolu ʻoku māʻolunga ʻenau ʻilo ki he lea faka-Pilitāniá ʻi he EnglishConnect 2.
Ngaahi Kulupu Tataki ʻe he Kau Faifekaú
ʻOku fie fakaʻaongaʻi ʻe he kau taki fakamisioná ʻa e EnglishConnect ke vahevahe ʻa e ongoongolelei ʻo Sīsū Kalaisí. ʻOku nau ʻiloʻi ʻoku ngāue lelei taha ʻa e ngaahi kulupu EnglishConnect ʻi he taimi ʻoku fakalele ai ʻe he kāingalotú pea poupouʻi ʻe he kau faifekaú. ʻI he fakataha alēlea mo e kau palesiteni fakasiteiki ʻi he misioná, ʻoku nau fakapapauʻi ai ʻe kamata ʻe he misioná ʻa e ngaahi kulupu EnglishConnect pea nau ngāue ke tuku atu kinautolu ki he ngaahi siteikí.
ʻOku fili ʻe he kau faifekaú ʻa e ngaahi taimi fakataha maʻá e ngaahi kulupu ʻoku ngāue lelei ki heʻenau taimi-tēpile malangá mo fakaʻatā ki he kakai ʻi he koló. Neongo e kamata ʻa e kau faifekaú ko ha kau faiako EnglishConnect, ʻoku nau toe ngāue foki mo e kau taki lakanga fakataulaʻeikí ke kumi ha kāingalotu fakalotofonua ke fetongi kinautolu, ko e niʻihi ʻo kinautolu ko ha kau ako mei he EnglishConnect 1 mo e 2. ʻI he fakalau ʻa e taimí, ʻe ngaʻunu leva ʻa e kau faifekaú ki ha fatongia tokoni pē. ʻOku hokohoko atu hono poupouʻi ʻe he kau faifekaú ʻa e ngaahi kulupú ʻaki ʻenau kau atu maʻu pē, fakakau atu ha kau ako foʻou, pea mo hono poupouʻi ʻa e kau akó ke fekumi ki he tokoni ʻa e ʻOtuá ke ako ʻa e lea faka-Pilitāniá.