Taumuʻá

Ko e EnglishConnect ko ha polokalama ako lea faka-Pilitānia ia ʻoku ʻoatu ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko e taumuʻa ʻo e EnglishConnect ke tokoniʻi ʻa e fakafoʻituituí ke fakatupulaki e moʻui fakafalala fakalaumālie mo fakatuʻasino pē kiate kitá ʻo fakafou ʻi hono fakatupulaki ʻa e ngaahi taukei ʻi he lea faka-Pilitāniá ʻi ha ʻātakai ʻo e tuí, fakafeohí, mo e tupulakí.

ʻOku Poupouʻi ʻe he EnglishConnect e Ngāue ʻa e ʻOtuá ki he Fakamoʻuí mo e Hakeakiʻí

ʻE lava ke tokoni ʻa e EnglishConnect ki he fānau ʻa e ʻOtuá:

Moʻui ʻaki ʻa e ongoongolelei ʻo Sīsū Kalaisí. ʻI he EnglishConnect, ʻoku fakaʻaongaʻi ʻe he kau akó ʻa e ngaahi tefitoʻi moʻoni ʻo e akó “ʻi he ako pea ʻi he tui foki” (Tokāteline mo e Ngaahi Fuakava 88:118). ʻOku fakamālohia ʻe he kau faiakó mo e kau akó ʻenau tuí ʻi heʻenau fekumi mo maʻu e tokoni ʻa e ʻEikí. (Ngaahi Sīpingá)
Tokangaʻi ʻo kinautolu ʻoku faingataʻaʻiá. ʻE lava ke fakalahi ʻe he ngaahi taukei lea faka-Pilitāniá ʻa e ngaahi faingamālie ki he moʻui fakafalala pē kiate kitá mo e ngāue tokoní. ʻOku tokoni ʻa e EnglishConnect kiate kinautolu ʻoku kau ki aí ke teuteu ki ha ngāue tokoni, ngāue maʻuʻanga moʻui, mo e ngaahi faingamālie fakaakó. ʻIkai ngata aí, ʻoku fetokoniʻaki mo feʻofaʻaki ʻa kinautolu ʻoku kau ki aí ʻi heʻenau akoʻi mo ako fakatahá. (Ngaahi Sīpingá)
Fakaafeʻi ʻa e tokotaha kotoa pē ke nau tali ʻa e ongoongoleleí. ʻI he ngaahi kulupu EnglishConnect, ʻoku ako mo fakaʻaongaʻi ai ʻe he kau akó ʻa e ngaahi tefitoʻi moʻoni ʻo e ongoongoleleí mo langaki ha feohi fakakaungāmeʻa. ʻI he EnglishConnect, ʻoku maʻu ai ʻe he kau akó ha ngaahi faingamālie lahi ke muimui ki he Laumālié ʻi heʻenau ʻofa, vahevahe, mo fakaafeʻi ʻa e niʻihi kehé ke nau aʻusia e ngaahi tāpuaki ʻo e ongoongoleleí. (Ngaahi Sīpingá)