Fakamatala Fakalahi A

Fakamatala Fakalaó

Ngaahi Fiemaʻu Fakalao Fakalūkufua ki he Ngaahi Feituʻu kuo Fakangofuá

Kuo fakangofua ʻe he ʻŌfisi Faifaleʻi Lahí (OGC) ʻa e ngaahi fakahinohino ngāue ko ʻení ki he polokalama EnglishConnect. ʻE fakaʻaongaʻi ʻa e ngaahi fakahinohino ko ʻení ʻi he funga ʻo e māmaní ki he EnglishConnect 1 mo e 2, ʻo fakatatau mo ha faʻahinga fiemaʻu fakalao pau ʻa e fonuá ʻoku fakamatalaʻi ʻi he fakamatala fakanounou fakalao ʻo e EnglishConnect ki he fonua takitaha (vakai ki he ngaahi fiemaʻu pau ʻa e fonuá ʻi he englishconnect.org/leader/approved-locations).

• Maʻu ha fakangofua mei he mātuʻá ki he tokotaha ako takitaha ʻoku taʻu 18 pe siʻi ange ʻo ngāue ʻaki e foomu fakangofua mei he mātuʻá. ʻOku maʻu atu ʻa e ngaahi fōmú ʻi ha ngaahi lea fakafonua kehekehe ʻi he ʻinitanetí ʻi he englishconnect.org/resources/leader.

  • Maʻu e fakamoʻoni hingoa ʻa e ongomātuʻá fakatouʻosi ʻo ka malava. Kapau ʻoku ʻi ai ha taha taʻu 18 pe siʻi ange ʻoku nofo toko taha pē, ʻoku ʻikai fiemaʻu ha fakangofua ia mei he mātuʻá.

  • ʻOku totonu ke tauhi ʻe he kau taki fakalotofonuá ʻa e ngaahi foomu kuo fakakakató pea maau ki hano ʻaotita.

• Fiemaʻu ke fakakakato ʻe he kau faiakó e ako ʻa e Siasí “Ko Hono Maluʻi ʻo e Fānaú mo e Toʻu Tupú.” Muimui ki he ngaahi tuʻunga moʻui fakafonua kotoa ki hono filifili mo uiuiʻi ʻo e kau faiako ʻo e toʻu tupú ki ha faʻahinga faiako EnglishConnect pē te ne akoʻi ha taha ʻoku siʻi hifo ʻi he taʻu 21.

• ʻOua naʻa ʻai ke totongi ʻe he niʻihi ʻoku kaú ha faʻahinga meʻa pe fakamole koeʻuhi ke kau atu ki he polokalamá.

  • ʻE lava ʻe kinautolu ʻoku kau mai ki he EnglishConnect ʻo download ʻa e ngaahi naunau ʻo e polokalamá ʻi he ʻinitanetí taʻetotongi, pe ʻe lava ʻe he ngaahi ʻiuniti fakalotofonuá ʻo fakatau ʻa e naunau maʻá e kulupú ʻo fakafou ʻi he ngaahi founga tufaki angamahení ʻi he store.churchofjesuschrist.org. ʻE lava foki ke fakatau mai ʻe kinautolu ʻoku kau maí ha ngaahi naunau ʻi he founga ko ʻení kapau ʻoku nau fiemaʻu.

  • ʻOku ʻikai totonu ke foaki pe maʻu ʻe he kau faiako EnglishConnect ha paʻanga pe ngaahi meʻaʻofa ko ha konga ʻo ha faʻahinga akoʻi pe vā fetuʻutaki fakafaiako mo kinautolu ʻoku kau ʻi he EnglishConnect.

• Fakakau ha ngaahi meʻa fakalotu lahi ʻo ʻikai toe siʻi ʻi ha vahe tolu ʻe taha ʻo e ngaahi ako kotoa pē. (ʻOku totonu ke miniti ʻe 20 ʻa e ngaahi meʻa fakalotú ʻi he houa akoʻi takitaha pe miniti ʻe 30 ʻo e miniti ʻe 90 kotoa ʻo e fakahinohinó.) Fakatokangaʻi ange: Kapau ʻoku fakahoko ʻa e ngaahi lēsoní ʻo hangē ko hono fokotuʻutuʻú pea ʻoku fakakau maʻu pē ʻe ha faiako ʻa e ʻekitivitī “Aleaʻi ʻa e Tefitoʻi Moʻoni ʻo e Akó” lolotonga e kulupu fepōtalanoaʻakí, ʻe fakakakato ai ʻa e fiemaʻu ko ʻení.

• Muimui ki he ngaahi fakahinohino kotoa ʻo e polokalamá ʻoku ʻi he Fakahinohino Ki hono Fakahoko ʻo e EnglishConnect mo e tohi lēsoni ʻa e faiakó, kau ai hono fakaʻaongaʻi ʻo e polokalama lesisita QuickReg ʻi he ʻinitanetí (quickreg.englishconnect.org) ke fakapapauʻi ʻoku malu ʻa e fakamatalá.

• Ke fakaʻehiʻehi mei hano fakafaingataʻaʻiaʻi ʻa e ngaahi visa fakafaifekaú pe tuʻunga fakalao ʻo e Siasí ʻi ha fonua, kuo pau ke maʻu ʻe ha faʻahinga misiona pē kuo teʻeki ai ke nau ngāue ʻaki hono akoʻi ʻo e lea faka-Pilitāniá ko ha founga fetuʻutakí ha fakangofua pau mei he OGC kimuʻa pea nau ngāue ʻaki ʻa e ngaahi naunau ʻo e EnglishConnect.

ʻOku fakalele mo fakahoko ʻa e EnglishConnect 3 ʻe he BYU–Pathway Fakaemāmani Lahí. ʻI heʻene peheé, ʻoku ngāue ia ʻi he ngaahi tuʻunga fakalao tatau mo e BYU–Pathway.

Tuʻuakí

ʻI he ngaahi fonua kuo fakangofua ai hono tuʻuaki ʻo e EnglishConnect 1 mo e 2, ʻe lava ke poupouʻi ʻe he ngaahi siteiki, uooti, mo e misiona fakalotofonuá ʻa hono tuʻuaki ʻo e ngaahi kulupu EnglishConnect 1 mo e 2 ki ha tukui kolo lahi ange ʻo fakatatau mo ha faʻahinga fakahinohino pau fakafonua ki he tuʻuakí (vakai ki he ngaahi fiemaʻu pau fakafonua ki he tuʻuakí ʻi he englishconnect.org/leader/approved-locations). ʻOku totonu ke kau ʻi he ngaahi tuʻuakí ʻa e ngaahi meʻá ni kotoa:

1. Fakahū fakalelei ʻa e hingoa ʻo e Siasí

2. Ko ha fakamatala ʻoku ʻikai ha totongi ki he EnglishConnect 1 mo e 2

3. Ko ha fakamatala ʻoku ʻikai ke maʻu ʻi he EnglishConnect 1 mo e 2 ha faʻahinga fakalangilangi.

Maʻu Mafai Pulusí mo e Laisení

Ko e EnglishConnect ko ha polokalama ia ʻoku fakapaʻanga ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko e totonu fakalao kotoa pē ki he ngaahi naunau EnglishConnect ʻoku maʻu pe laiseni ia ʻe he Intellectual Reserve, Inc. ke fakaʻaongaʻi ʻe he ngaahi ʻiuniti ʻo e Siasí hangē ko e ngaahi siteikí, vahefonuá, mo e misioná. ʻOku fiemaʻu ke tomuʻa maʻu ha tohi fakangofua ki hano toe fakaʻaongaʻi ange ʻa e ngaahi naunau EnglishConnect. Ke kole ha ngofua ke fakaʻaongaʻi ʻa e ngaahi naunau EnglishConnect, kātaki ʻo fakakakato ha foomu kole ʻi he Permissions.ChurchofJesusChrist.org.

Fānau ʻOku ʻIkai Taʻu Fakalaó

Kuo pau ke muimui maʻu pē ʻa e ngaahi kulupu EnglishConnect ki he ngaahi tuʻutuʻuni ʻa e Siasí ki hono maluʻi ʻo e toʻu tupú (ʻa ia ʻoku kau ai ʻa e taʻu 18 pe siʻi angé). Kuo pau ke tomuʻa maʻu ʻe he niʻihi kei taʻu siʻí ha foomu fakangofua mei he mātuʻá kimuʻa pea nau toki kau ki ha kulupu EnglishConnect. ʻOku maʻu atu ʻa e ngaahi fōmú ʻi ha ngaahi lea fakafonua kehekehe ʻi he ʻinitanetí ʻi he englishconnect.org/resources/leader. Kuo pau ke tauhi ʻe he kau taki fakalotofonuá ʻa e ngaahi foomu kuo fakakakató pea maau ki hano ʻaotita.

Koeʻuhí ʻe lava ke kau ʻi he kau ako EnglishConnect ha niʻihi ʻoku taʻu siʻi, ʻoku totonu ke ʻinitaviu ʻe he kau taki faka-Siasí ʻa e taha kotoa ʻe ala hoko ko ha faiakó mo vakaiʻi ʻa e lekooti mēmipasipi ʻo e tokotahá ki ha ngaahi fakamatala kimuʻa pea toki fakahoko ha uiuiʻí. ʻIkai ngata aí, ʻoku totonu ke ʻi ai maʻu pē ha kakai lalahi falalaʻanga ʻe toko ua lolotonga ʻa e ngaahi fakataha fakakulupú. ʻOku ʻikai totonu ke ngāue fakataautaha ʻa e ongo faiakó mo ha niʻihi taʻu siʻi. Kuo pau ke ke muimui ki he ngaahi tuʻutuʻuni ko ʻení neongo kapau ʻoku fakataha ʻa e kulupú ʻi he ʻinitanetí.

Niʻihi Taʻu Siʻi ʻOku Kau ʻi he Ngaahi Kulupu Fepōtalanoaʻaki ʻi he ʻInitanetí

ʻE lava ke kau ʻa e niʻihi taʻu siʻí ʻi he ngaahi kulupu fepōtalanoaʻaki ʻi he EnglishConnect 1 mo e 2 ʻi hano fakangofua ʻe he mātuʻá pea mo e taimi ʻoku tokangaʻi ai ʻa e kulupú ʻe ha ongo faiako ʻe toko ua pe lahi ange.

Ke fakamuʻomuʻa ʻa e tuʻunga malú, kuo pau ke fokotuʻutuʻu ʻa e ngaahi kulupu fepōtalanoaʻaki ʻi he ʻinitanetí ʻoku kau ai ha niʻihi taʻu siʻí ke fakaʻehiʻehi mei he ngaahi talanoa fakataautaha ʻi he ʻinitanetí ʻi he vahaʻa ʻo e kau taʻu siʻí mo e kau faiakó. ʻE toki lava pē ke kau ʻa e niʻihi taʻu siʻí ʻi he ngaahi kulupu fepōtalanoaʻaki ʻi he ʻinitanetí kapau ʻoku ʻi ai ha faiako ʻe toko ua pe tokolahi ange ʻi he fakataha fakakulupú.

ʻIkai ngata aí, ʻoku ʻikai totonu ke text/ʻīmeili/fetuʻutaki ha faiako ki ha tokotaha ʻoku teʻeki taʻu fakalao taʻe fakakau atu mo ha tokotaha kehe ʻi he fetuʻutakí. ʻOku totonu ke ʻi ai mo ha taha lahi kehe ki he ngaahi ʻaʻahi pe telefoni fakatāutahá. ʻI he ngaahi feituʻu ʻe lava aí, ʻoku totonu ke tokangaʻi ʻe he faiakó ʻa e fanga kiʻi fengāueʻaki fakakulupu ʻoku vahevahe lolotonga ʻo e kulupu fepōtalanoaʻaki ʻi he ʻinitanetí.

Totonu Fakafoʻituituí

Ko e EnglishConnect ko ha polokalama ia ʻoku fakapaʻanga ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ki ha fakaikiiki ʻi he founga ʻoku tauhi ai hoʻo fakamatala fakatāutahá, kātaki ʻo hū ki he ChurchofJesusChrist.org pea lomiʻi ʻi he Privacy Notice ʻi he konga ki lalo ʻo e pēsí.

Kuo pau ke tali ʻe kinautolu kotoa ʻoku kaú ʻa e ngaahi fiemaʻu ʻo e kau maí, ʻa ia ʻe lava ke maʻu ʻi he ChurchofJesusChrist.org/legal/englishconnect-terms-of-participation. ʻE lava ke tali ʻe kinautolu ʻoku kau maí ʻa e ngaahi tuʻunga ʻo e kau fakaʻilekitulōniká ʻi he taimi ʻoku lesisita ai kinautolu ʻe ha fakataukei EnglishConnect ʻi he QuickReg.

ʻOku ʻikai totonu ke tuku hake ʻe he kau faiako EnglishConnect ha ʻū tā ʻi he mītia fakasōsialé ʻo kinautolu ʻoku nau akoʻí.

Fakalangilangí

ʻOku ʻikai foaki ʻe he EnglishConnect ha faʻahinga fakalangilangi ako, mataʻitohi pe maaka ʻi ha faʻahinga polokalama fakaako pe ako ngāue pe kautaha ako ngāue. ʻOku ʻikai fakakounaʻi hoʻo kau maí. ʻE lava ke mavahe ʻa kinautolu ʻoku kau maí mei he polokalamá pe taʻofi ʻenau kau maí ʻi ha faʻahinga taimi pē.