kau akó ʻoku malimali ʻi heʻenau kulupu fepōtalanoaʻakí

Te u Teuteu Fēfē ki ha Kulupu Fepōtalanoaʻaki?

ʻOku mahuʻinga ʻa e kulupu fepōtalanoaʻakí ki he aʻusia ʻi he EnglishConnect. ʻI he kulupu fepōtalanoaʻakí, ʻoku maʻu ai ʻe he kau akó ha ngaahi faingamālie ke akoako ha ngaahi fepōtalanoaʻaki ʻoku mahuʻingamālié. ʻI heʻenau fakatahá, ʻe lava ke maʻu ʻe he kau akó ha loto-falala, ako mei he Laumālié, mo fepoupouaki.

ʻOku tokoni ʻa e lea faka-Pilitāniá ke fakalakalaka ʻa e kau akó pea ko ha founga mahuʻinga ia ke fekumi ai ki he meʻa-foaki ʻo e lea ʻi he ngaahi lea kehekehé. Te ke lava ʻo tataki ha kulupu fepōtalanoaʻaki ʻo fakaʻaongaʻi ʻa e lea faka-Pilitānia faingofuá. Kapau ʻe fiemaʻu, ʻe lava ke vakai ʻa e kau akó ki he ngaahi liliu lea ʻi he ngaahi tohi lēsoni EnglishConnect ʻa e tokotaha akó ʻi heʻenau lea fakafonuá. ʻOku ʻoatu ʻa e liliú ki he ngaahi taumuʻá, ngaahi tefitoʻi moʻoni ʻo e akó, ngaahi foʻi leá, mo e ngaahi fakahinohinó.

Kimuʻa pea fakataha hoʻomou kulupu fepōtalanoaʻakí, toe vakaiʻi ʻa e konga takitaha ʻi he ngaahi tohi lēsoni EnglishConnect ʻa e tokotaha akó. Ko ha ngaahi sitepu ʻeni ke tokoniʻi koe ke ke teuteu:

1. Lotu pea fekumi ki he tokoni ʻa e ʻOtuá.

2. Fakakaukau ki he founga te ke tanumaki ai ʻa e tuí, fakafeohí, mo e tupulaki ʻi he kulupú.

   1. Te u lava fēfē ʻo fakaafeʻi ʻa e Laumālié?

   2. Te u tokoniʻi fēfē ʻa e kau akó ke nau fekumi mo ʻiloʻi e tokoni ʻa e ʻEikí?

   3. Te u tokoniʻi fēfē ʻa e kau akó ke nau feʻofaʻaki mo fepoupouakí?

   4. Te u tokoniʻi fēfē ʻa e kau akó ke nau lea faka-Pilitānia mo fakalakalaká?

3. Ako ʻa e tefitoʻi moʻoni ʻo e akó.

   1. Kuó u aʻusia fēfē ʻa e tefitoʻi moʻoni ko ʻení?

   2. Te u tokoni fēfē ki he kau akó ke nau fakaʻaongaʻi ʻa e tefitoʻi moʻoni ko ʻení?

   3. Te u fakaʻaongaʻi fēfē ʻa e tefitoʻi moʻoní ʻi heʻeku faiakó?

4. Toe vakaiʻi ʻa e ngaahi foʻi leá mo e sīpingá.

   1. ʻE lava nai ke u fakaʻaongaʻi ʻi he loto-falala ʻa e ngaahi foʻi leá mo e sīpingá ʻi ha fepōtalanoaʻaki?

5. Lau ʻa e ʻekitivitī 1–3.

   1. Te u fakatātaaʻi fēfē ʻa e ʻekitivitī takitaha?

   2. Te u tauhoa fēfē ʻa e kau akó ki he akoakó?

   3. Te u poupouʻi fēfē ʻa e kau akó ʻi heʻenau akoakó?

6. Toe vakaiʻi ʻa e konga ki he “Fakafuofuaʻí.”

   1. Te u tokoniʻi fēfē ʻa e kau akó ke nau ongoʻi lavameʻa?

   2. Te u tokoniʻi fēfē ʻa e kau akó ke nau fakaʻaongaʻi ʻa e “Muimuiʻi ʻo e Ako Fakatāutahá” ʻi he tohi lēsoni ʻa e tokotaha akó?

7. Toe vakaiʻi ʻa e konga “Ngāue ʻi he Tui ke Akoako Fakaʻaho ʻa e Lea Faka-Pilitāniá.”

   1. Te u poupouʻi fēfē ʻa e kau akó ke nau fakahoko ʻa e konga “Ako Fakatāutahá” kimuʻa pea fakataha ʻa e kulupú mo akoako fakaʻaho ʻa e lea faka-Pilitāniá?

   2. Te u poupouʻi fēfē ʻa e kau akó ke nau falala ki he ʻEikí?

Toe vakaiʻi ʻa e konga “Ngaahi Maʻuʻanga Tokoni Fakakulupú” ʻi he tohi lēsoni ko ʻení. (ʻOku fakakau foki ʻa e ngaahi maʻuʻanga tokoni ko ʻení ʻi he ngaahi tohi lēsoni ʻa e tokotaha ako EnglishConnect.) Palani ʻa e founga te ke fakaʻaongaʻi ai e ngaahi maʻuʻanga tokoni ko ʻení. ʻOku kau ʻi he konga “Ngaahi Kupuʻi Lea ʻa e Kulupu Fepōtalanoaʻakí” ha ngaahi kupuʻi lea faingofua ʻe lava ʻo tokoni ki he kulupú ke nau fetalanoaʻaki ʻi he lea faka-Pilitāniá. ʻOku kau ʻi he “Lotu ʻi he lea faka-Pilitāniá” ha fanga kiʻi sīpinga faingofua ke tokoni ki he kau akó ke nau lotu ʻi he lea faka-Pilitāniá. Te ke lava ʻo fakaafeʻi ʻa kinautolu ʻoku kau maí ke nau toe vakaiʻi ʻa e konga ko ʻení ke nau teuteu ke fakahoko e ngaahi fua lotú pe lotu tukú.

ʻOku maʻu ha ngaahi maʻuʻanga tokoni fakafaiako mo ha ngaahi sīpinga kehe ʻi he Gospel Library pea ʻi he englishconnect.org/teacher.

Ngaahi Kaungāmeʻa ʻi he Ngaahi Tui Fakalotu Kehé

ongo tamaiki ako ʻokú na akoako fepōtalanoaʻaki ʻi he lea faka-Pilitāniá

Ko e taha ʻo e ngaahi meʻa ʻokú ne ʻai ʻa e EnglishConnect ke makehé ko ʻene nofotaha ki he ako ʻoku makatuʻunga ʻi he tuí. Te ke lava ʻo fakakau mai ha kakai mei ha ngaahi puipuituʻa kehekehe ʻo e tuí ʻaki hono tokoniʻi kinautolu ke nau fakakaukau ki he founga ʻe lava ke nau fakaʻaongaʻi ai ʻa e tefitoʻi moʻoni ʻo e akó. Te ke lava ʻo fakaʻaongaʻi ʻa e “Fakahokohoko Fakamotuʻalea ʻo e Ngaahi Tefitoʻi Moʻoni ʻo e Akó” ʻi he ngaahi tohi lēsoni ʻa e tokotaha ako EnglishConnect ke tokoni ke mahino kiate kinautolu ʻa e ngaahi lea ʻo e ongoongoleleí. ʻI hono tataki ʻe he Laumālié, fakakaukau ke fakaafeʻi kinautolu ke vahevahe ʻa e meʻa ʻoku nau akó ʻi hoʻomou aleaʻi ʻa e tefitoʻi moʻoni ʻo e akó. Fakahaaʻi maʻu pē hoʻo fakaʻapaʻapa ki he ngaahi tui ʻa e niʻihi kehé lolotonga hoʻo vahevahe tauʻatāina hoʻo tui ʻe lava ke tokoniʻi kinautolu ʻe he ʻOtuá ke nau ako e lea faka-Pilitāniá.

Te ke lava ʻo maʻu ha ngaahi fakakaukau lahi ange ʻi he talateu ʻo e tohi lēsoni Malangaʻaki ʻEku Ongoongoleleí; vakai ki he konga “Fakaʻaongaʻi ʻo e Malanga ʻAki ʻEku Ongoongoleleí ʻe he Kāingalotu ʻo e Siasí.”

Ngāue mo e Toʻu Tupú

finemui ʻoku malimali

ʻE lava ʻe he EnglishConnect ʻo tāpuekina e moʻui ʻa e toʻu tupú. ʻE lava ke fokotuʻutuʻu ʻe he ngaahi siteikí, uōtí, mo e misioná ha ngaahi kulupu maʻá e toʻu tupú pē. Kapau ʻoku fakatahaʻi ʻa e ngaahi kulupu ʻo e toʻu tupú mo e kakai lalahí, fakakaukau ke fakakulupu fakataha ʻa e toʻu tupú ki he ngaahi ʻekitivitī akoakó.

Manatuʻi ke muimui ki he ngaahi tuʻutuʻuni ʻa e Siasí ki hono maluʻi ʻo e toʻu tupú. Kuo pau ke maʻu ʻe he niʻihi taʻu siʻí (taʻu 18 pe siʻi hifo ai pea nofo ʻi ʻapí) ha foomu fakangofua mei he mātuʻá kuo ʻosi fakamoʻoni hingoa ki ai kimuʻa pea nau toki ʻalu ki he kulupú. ʻOku maʻu atu ʻa e ngaahi fōmú ʻi ha ngaahi lea fakafonua kehekehe ʻi he ʻinitanetí ʻi he englishconnect.org/resources/leader. ʻIkai ngata aí, kuo pau ke muimui ʻa e ngaahi kalasi EnglishConnect ki he tuʻutuʻuni ʻa e Siasí ke ʻi ai maʻu pē ha kakai lalahi falalaʻanga ʻe toko ua pe lahi ange ʻi he lolotonga ʻo e ngaahi fakataha fakakulupú. Kuo pau ke ke muimui ki he ngaahi tuʻutuʻuni ko ʻení neongo kapau ʻoku fakataha ʻa e kulupú ʻi he ʻinitanetí.