“Ko e Hā e Fatongia ʻo e Faiakó?,” EnglishConnect maʻá e Kau Faiakó (2023)
“Ko e Hā e Fatongia ʻo e Faiakó?,” EnglishConnect maʻá e Kau Faiakó
Ko e Hā e Fatongia ʻo e Faiakó?
Ko ho fatongia ko ha faiako EnglishConnect ke tokoniʻi ʻa e kau akó ke fakatupulaki ʻenau ngaahi taukei ʻi he fepōtalanoaʻaki faka-Pilitāniá ʻi ha ʻātakai ʻo e tuí, fakafeohí, mo e tupulakí. Ko e faiako moʻoní ʻa e Laumālié. Te ke lava ʻo tokoniʻi ʻa e kau akó ke nau ongoʻi e Laumālié, ongoʻi ʻoku nau kau mai, mo ongoʻi falala te nau lava ʻo ako ʻa e lea faka-Pilitāniá ʻi he tokoni ʻa e Tamai Hēvaní. Te ke tokoniʻi ʻa e kau akó ʻi hoʻo tokanga taha ki he ngaahi meʻá ni:
Tanumaki e Tuí
Poupouʻi ʻa e kau akó ke nau fekumi mo ʻiloʻi e tokoni ʻa e ʻEikí ʻi hono ako ʻo e lea faka-Pilitāniá. Poupouʻi kinautolu ke nau fakaʻaongaʻi ʻa e ngaahi tefitoʻi moʻoni ʻo e akó “ʻi he ako pea ʻi he tui foki” (Tokāteline mo e Ngaahi Fuakava 88:118). Tokoniʻi ʻa e kau akó ke ʻilo ʻa e ʻofa, mālohi mo e ʻaloʻofa ʻa e ʻEikí ʻi heʻenau moʻuí. Fakaafeʻi kinautolu ke vahevahe ʻenau ngaahi aʻusia langaki tuí. Vahevahe hoʻo ngaahi aʻusia fekauʻaki mo hono maʻu ʻa e tokoni ʻa e ʻEikí. (Vakai ki he konga “Tokoniʻi e Kau Akó ke Haʻu kia Sīsū Kalaisi” mei he Ko e Faiako ʻi he Founga ʻa e Fakamoʻuí [2022].)
Tanumaki ʻa e Fakafeohí
Fakaafeʻi ʻa e Laumālié ʻaki hono tokoniʻi e kau akó ke nau feʻofaʻaki mo fepoupouaki. Tokoni ke nau ongoʻi e ʻofa ʻa e ʻOtuá. Fokotuʻu ha ʻātakai talitali lelei ʻe ongoʻi ai ʻe he kau akó ʻoku nau kau ki ai. ʻAi ke ke maheni mo e kau akó pea tokoni ke nau maheni. Tokoniʻi kinautolu ke langaki ʻa e loto-falalá ʻi heʻenau akoakó, fai ha ngaahi fehalaākí, pea fakalakalaka fakataha. (Vakai ki he konga “ʻOfa ʻi he Niʻihi ʻOkú Ke Akoʻí” mei he Ko e Faiako ʻi he Founga ʻa e Fakamoʻuí [2022].)
Tanumaki e Tupulakí
Tokoniʻi ʻa e kau akó ke nau ngāue ʻi he tui ke akoako ʻa e lea faka-Pilitāniá mo fakalakalaka. Mahalo he ʻikai maʻu ʻe ha kau ako ʻe niʻihi ha loto-falala ki honau tuʻunga malava ke ako ʻa e lea faka-Pilitāniá. Te ke lava ʻo tokoni. ʻI hoʻo lea faka-Pilitānia kiate kinautolú, ʻokú ke fakahaaʻi ai hoʻo tui ʻe lava ke tokoniʻi kinautolu ʻe he ʻOtuá ke nau ako. Poupouʻi ʻa e kau akó ke nau lea faka-Pilitānia. Fakahīkihikiʻi ʻenau ngaahi feingá. Tokoni ke manatuʻi ʻe he kau akó ʻa e ʻuhinga ʻoku nau ako ai e lea faka-Pilitāniá. Poupouʻi kinautolu ke fokotuʻu ha ngaahi taumuʻa pea akoako fakaʻaho ʻa e lea faka-Pilitāniá. (Vakai ki he konga “Fakaafeʻi ʻa e Ako Fakamātoató” mei he Ko e Faiako ʻi he Founga ʻa e Fakamoʻuí [2022].)
Ko Hoku Fatongiá
-
ʻOku ou tanumaki ʻa e tuí ʻaki hono tokoniʻi e kau akó ke nau fekumi mo fakatokangaʻi ʻa e tokoni ʻa e ʻEikí ʻi hono ako e lea faka-Pilitāniá.
-
ʻOku ou tanumaki ʻa e fakafeohí pea fakaafeʻi ʻa e Laumālié ʻi hono tokoniʻi ʻa e kau akó ke nau feʻofaʻaki mo fepoupouakí.
-
ʻOku ou tanumaki ʻa e tupulakí ʻi hono tokoniʻi e kau akó ke nau ngāue ʻi he tui ke akoako ʻa e lea faka-Pilitāniá mo fakalakalaka.