ko ha toko tolu ʻoku nau ako fakataha mei he tohi lēsoni EnglishConnect

Ko e Hā ʻOkú Ne ʻAi ke Makehe ʻa e EnglishConnect?

ʻI he EnglishConnect, ʻoku tau “fekumi ki he ‘iló, ʻio ‘i he ako pea ʻi he tui foki” (Tokāteline mo e Ngaahi Fuakava 88:118). ʻOku tau fakatupulaki fakataha ai ha ngaahi taukei ʻi he lea faka-Pilitāniá ʻi ha ʻātakai ʻo e tuí, fakafeohí, mo e tupulakí.

Tuí

ʻI he EnglishConnect, ʻoku tau ngāue ai ʻi he tui ke fekumi ki he tokoni ʻa e ʻEikí ʻi hono ako ʻo e lea faka-Pilitāniá. ʻI heʻetau fekumi ki he tokoni ʻa e ʻEikí ke ako ʻa e lea faka-Pilitāniá, ʻe lava ke tau ofi ange ai ki he ʻOtuá mo aʻusia e mālohi fakaivia ʻo e Fakamoʻuí. ʻOku tau ako mo fakaʻaongaʻi ʻi he lēsoni takitaha ha tefitoʻi moʻoni fakalaumālie ʻo e akó. Ko e faiako moʻoní ʻa e Laumālié, pea te tau lava ʻo fekumi ki he ngaahi meʻa-foaki ʻo e Laumālié ke tokoniʻi kitautolu ke tau ako, kau ai ʻa e meʻa-foaki ʻo e lea ʻi he ngaahi lea kehekehé (vakai, Tokāteline mo e Ngaahi Fuakava 46:8–26).

Fakafeohi

ʻI he EnglishConnect, ʻoku tau fakaafeʻi ʻa e Laumālié ʻi heʻetau feʻofaʻaki, akoʻi, mo fepoupouʻakí. ʻOku tau fokotuʻu ha feohi fakakaungāmeʻa mo fetokoniʻaki ke tau kei loto-vēkeveke pē. ʻOku tau fakatupulaki fakataha ʻetau loto-falalá, ako mei heʻetau ngaahi fehalaākí, mo fakafiefiaʻi ʻetau fakalakalaká. ʻI heʻetau ako mei he Laumālié, te tau “femahinoʻaki [ʻiate kitautolu], pea [mo] fakamāmaʻi [mo] … fiefia fakataha” (Tokāteline mo e Ngaahi Fuakava 50:22).

Tupulakí

ʻI he EnglishConnect, ʻoku tau fai ha meʻa lahi ange ʻi he ako lea faka-Pilitāniá; ʻoku tau fakatupulaki foki ai ʻetau malava ke ako mo faiakó. Neongo pe ko e hā hotau kamataʻangá, ʻoku tau ngāue mālohi mo fengāueʻaki mo e ʻOtuá ke aʻusia ʻetau ngaahi taumuʻá. ʻOku tau ngāue ʻi he tui ke akoako fakaʻaho ʻa e lea faka-Pilitāniá. ʻOku tau feinga ke ako “ʻi he ako pea ʻi he tui foki” (Tokāteline mo e Ngaahi Fuakava 88:118) ʻi he ngaahi tafaʻaki kotoa ʻetau moʻuí.