ʻOku fetalitaliʻaki lelei ʻe he kau ako EnglishConnect kinautolu

Te U Tataki Fēfē ha Kulupu Fepōtalanoaʻakí?

Te ke fakaʻaongaʻi ʻa e EnglishConnect 1 maʻá e Kau Akó pe EnglishConnect 2 maʻá e Kau Akó ke tataki ʻa e kulupú. ʻOku muimui ʻa e lēsoni takitaha ʻi he founga tatau ko ʻení:

Talitali leleí: Talitali loto-māfana ʻa e kau akó mo fakafeʻiloaki ha niʻihi foʻou ʻoku kau mai. Fokotuʻu ʻa e fiemaʻu ke ke lea faka-Pilitāniá pea fakaafeʻi ʻa e tokotaha kotoa pē ke nau fakaʻaongaʻi ʻa e lea faka-Pilitāniá ʻi he lahi taha te nau ala lavá. Fakafeʻiloaki nounou ʻa e tefito ʻo e lēsoní.

Lotú: Fakaafeʻi ha tokotaha ako ke lotu leʻolahi. Feinga ke fili ha tokotaha ako ʻokú ne ongoʻi fiemālie ke lotu ʻi he lea faka-Pilitāniá. Te ke lava ʻo fakaafeʻi ʻa e tokotahá ke tomuʻa teuteu ʻaki ʻene ako ʻa e “Lotu ʻi he Lea Faka-Pilitāniá” ʻi he fakamatala fakalahi ʻo e ngaahi tohi lēsoni ʻa e tokotaha akó.

Tefitoʻi Moʻoni ʻo e Akó: Lau pea aleaʻi ʻa e tefitoʻi moʻoni ʻo e akó ʻi he konga “Personal Study” (Ako Fakatāutahá) ʻi he tohi lēsoni ʻa e tokotaha akó. Ko e taumuʻa ʻo e tefitoʻi moʻoni ʻo e akó ke fakaafeʻi ʻa e Laumālié ʻi hoʻomou fevahevaheʻaki mo ako fakataha “ʻi he ako pea ʻi he tuí foki” (Tokāteline mo e Ngaahi Fuakava 88:118).

Fakatātaaʻi ʻa e founga ke aleaʻi ai e tefitoʻi moʻoní ʻaki hano vahevahe nounou ʻa e founga te ke tali ʻaki ai ha taha ʻo e ngaahi fehuʻi ke aleaʻí. Fakaʻaongaʻi ha ngaahi lea mo e kupuʻi lea faingofua.

Fakaafeʻi e kau akó ke fevahevaheʻaki ʻenau ngaahi fakakaukaú mo e aʻusiá. ʻE lava ke alēlea ʻa e kau akó ʻi heʻenau lea fakafonuá. Kapau ʻoku nau ongoʻi fiemālie, ʻe lava ke fili ʻa e kau akó ke fakaʻaongaʻi ha ngaahi foʻi lea pe kupuʻi lea ʻi he lea faka-Pilitāniá ʻi heʻenau alēleá.

ʻEkitivitī 1: Tataki e kau akó ʻi he ngaahi ʻekitivitī ʻi he konga “Conversation Group” (Kulupu Fepōtalanoaʻakí) ʻo e tohi lēsoni ʻa e tokotaha akó. ʻOku teuteuʻi ʻe he ʻekitivitī takitaha ʻa e kau akó ki he ʻekitivitī hokó. ʻOku tokoni ʻa e ngaahi ʻekitivitií ke fakalakalaka ʻa e kau akó mei he toutou akoakó ki hono kamataʻi haʻanau pōtalanoa pē ʻanautolu.

ʻI he ʻekitivitī 1, tokoni ki he kau akó ke nau toe vakaiʻi ʻa e ngaahi foʻi lea mo e ngaahi sīpinga ʻi he konga “Ako Fakatāutahá” ʻi he tohi lēsoni ʻa e tokotaha akó. Ko e taumuʻá ke teuteuʻi ʻa e kau akó ki he ʻekitivitī 2 mo e 3 ʻaki hono tokoniʻi ke mahino kiate kinautolu ha ngaahi foʻi lea mahuʻinga ʻe niʻihi mo lea ʻaki e ngaahi sīpingá.

ʻEkitivitī 2: ʻI he ʻekitivitī 2, ʻoku fakaʻaongaʻi ʻe he kau akó ʻa e ngaahi foʻi leá mo e sīpingá ke akoako ʻeke mo tali ʻa e ngaahi fehuʻí mo ha hoa ngāue ʻo fakaʻaongaʻi e fakamatala ʻoku ʻoangé. Ko e taumuʻá ke faʻu ʻe he kau akó ʻa e ngaahi sētesí ki he lahi taha te nau lavá ʻi he lea faka-Pilitāniá.

Poupouʻi e kau akó ke nau fetongi hoa ke fakalahi honau ngaahi faingamālie akoakó. ʻI hoʻo fengāueʻaki mo e kau akó, feinga ke kumi ʻa kinautolu ʻoku nau fiemaʻu ha tokoni lahi angé. Poupou mo langaki moʻui.

ʻEkitivitī 3: ʻI he ʻekitivitī 3, ʻoku maʻu ai ʻe he kau akó ha faingamālie ke fakaʻaongaʻi ʻa e ngaahi foʻi leá mo e sīpingá ke fakahoko ha fepōtalanoaʻaki kakato ʻi ha tūkunga moʻoni ʻo e moʻuí. Ko e taumuʻá ke fakahoko ʻe he kau akó ha fepōtalanoaʻaki mahuʻingamālie ʻi he lea faka-Pilitāniá.

Poupouʻi ʻa e kau akó ke nau toutou fetongi hoa ke nau maʻu ha ngaahi faingamālie akoako lahi ange. ʻI he fakaʻosinga ʻo e ʻekitivitī 3, ko e totonú ke lea faka-Pilitānia ʻa e kau akó kotoa ʻo ʻikai toe vakai ki heʻenau ngaahi tohi lēsoní. ʻOku totonu ke maʻu ʻe he kulupú ha ivi mo nau longomoʻui ʻi he fengāueʻaki mo e akoako fakataha ʻa e kau akó. ʻI hoʻo kau mo e kau akó, mahalo te ke fakatokangaʻi ʻoku mahino lelei ki ha niʻihi pea nau lavameʻa ʻi he ʻekitivitī ko ʻení. Fakakaukau ke poleʻi ʻa e kau ako ko ʻení ke fakaloloto ʻenau akó ʻaki hono fakakau ha ngaahi fakaikiiki lahi ange pe fai ʻa e ʻekitivitī tatau ʻi ha tūkunga kehe. Hangē ko ʻení, ʻi he akoako fetaulaki ʻa e kau akó mo ha tahá, kole ange ke nau akoako ha ngaahi tūkunga kehekehe hangē ko e fetaulaki mo ha kaungāmeʻa foʻou pe ko ha pule foʻou.

Ki he ʻekitivitī takitaha:

• Fakatātaaʻi ʻa e founga hono fakahoko ʻo e ʻekitivitií.

• ʻAi ke tauhoa e kau akó pe fakakulupu iiki ke nau akoako.

• Siofi ʻa e kulupu takitaha pea fai ha tokoni.

Fakafuofuaʻi: Tokoniʻi ʻa e kau akó ke nau fakafuofuaʻi ʻenau fakalakalaká mo e feingá. Tokoniʻi kinautolu ke nau ongoʻi lavameʻa ʻaki hono fakamahinoʻi ange ʻa e meʻa te nau lava ʻo fai ke nau fakalakalaka aí. Tokoni ki he kau akó ke fakaʻaongaʻi ʻa e “Personal Study Tracker” (Muimuiʻi ʻo e Ako Fakatāutahá) ke fokotuʻu ha ngaahi taumuʻa akoako fakaʻaho.

Ngāue ʻi he Tui ke Akoako Fakaʻaho ʻa e Lea Faka-Pilitāniá: Lau leʻolahi ʻa e kupuʻi leá mo hoʻo kulupú. Fakahaaʻi hoʻo tui ʻe lava ke tokoniʻi kinautolu ʻe he ʻEikí ke nau ako ʻa e lea faka-Pilitāniá. Fakaafeʻi kinautolu ke akoako fakaʻaho e lea faka-Pilitāniá pea teuteu ki he lēsoni hokó ʻaki hono fakakakato ʻa e ngaahi ʻekitivitī Personal Study” (Ako Fakatāutahá).

Lotú: Fakaafeʻi ha tokotaha ako ke ne fai ha lotu tuku ʻi he lea faka-Pilitāniá. Fili ha tokotaha ako ʻokú ne ongoʻi loto-falala pe ko ha taha naʻá ke tomuʻa fakaafeʻi.

ʻOku fokotuʻutuʻu ʻa e ngaahi lēsoni EnglishConnect ʻo fakaʻaongaʻi ʻa e ngaahi tefitoʻi moʻoni kuo ʻosi fakamoʻoniʻi ʻo e ako lea fakafonuá. Te ke lavameʻa ʻi hoʻo muimui ki he ngaahi lēsoní mo fakatupu ha ʻātakai ʻo e tuí, fakafeohí, mo e tupulakí.

Ngaahi Kulupu ʻi he ʻInitanetí

Kapau ʻe fiemaʻu, ʻe lava ke fakataha ʻa e ngaahi kulupú ʻi he ʻinitanetí ʻo fakaʻaongaʻi ha polokalama faiʻanga fakataha mamaʻo. Manatuʻi ʻoku ola lelei taha ʻa e EnglishConnect ʻi he taimi ʻoku fengāueʻaki mo akoako ai e kau akó ke fepōtalanoaʻakí. Fakapapauʻi ʻoku ʻi ai ha fetalanoaʻaki ʻi he lolotonga ʻo e aʻusiá. Ko e founga lelei taha ke fakafaingofuaʻi ai ʻa e fetalanoaʻakí ko hono ʻai ke tauhoa pe fakakulupu iiki ʻa e kau akó. Fakaʻaongaʻi ha fanga kiʻi loki fakataha mo ha ngaahi naunau kehe ke tokoniʻi ʻa e kau akó ke nau fetalanoaʻaki ʻi he lahi taha ʻe ala lavá. Hangē ko ʻení, ʻoua ʻe ʻai ha tokotaha ako pē ʻe taha ke lea kae fanongo kotoa ʻa e kulupú, ka ke vahevahe e kau akó ki ha ngaahi kulupu tautau toko ua pe lahi ange ke fai ha fepōtalanoaʻaki. Hili iá pea toe fakakulupu foʻou ki he ʻekitivitī hokó. Poupouʻi ʻa e tokotaha kotoa pē ke fakaʻaongaʻi e vitioó kapau ʻe lava.

Fakaʻaongaʻi ʻa e “Fakahinohino ki hono Tataki e Ngaahi Kulupu ʻi he ʻInitanetí” ʻi hoʻo teuteu mo tataki ʻa e ngaahi kulupu EnglishConnect ʻi he ʻinitanetí.

Vahevahe ki hoʻo kau akó ʻa e “Fakahinohino ki hono Tataki e Ngaahi Kulupu ʻi he ʻInitanetí” ʻaki hono fokotuʻu e fehokotakiʻangá ʻi he fetalanoaʻakí lolotonga hoʻomou ngaahi fakatahá. Toutou vakai ki ai ʻi hono fiemaʻú.

Fakaʻaongaʻi ʻa e “Fakamatala Ako ʻa e Kulupu Fepōtalanoaʻakí” ʻa ia kuo fakangofua maʻá e EnglishConnect 1 mo e 2 ʻi he englishconnect.org/resources/teaching-materials. Te ke lava ʻo fakaʻaliʻali ʻa e fakamatala akó ke tokoni ke fakahinohino ʻa e kau akó ʻi he ngaahi ʻekitivitī ʻi he lēsoni takitaha.