ko ha fefine ʻoku malimali ʻi ha fanga kiʻi kulupu iiki ʻi tuʻa

ʻOku talitali lelei koe ki he EnglishConnect

Fakamālō atu ʻi hoʻo loto-fiemālie ke hoko ko ha faiako EnglishConnect. ʻOku mau fakatauange te ke ongoʻi ʻa e ʻofa ʻa hoʻo Tamai Hēvaní ʻi hoʻo ngāué. ʻE lava ʻe hono tokoniʻi ʻo e niʻihi kehé ke ako ʻa e lea faka-Pilitāniá ke fakalahi ai honau ngaahi faingamālie ki he akó, ngāue maʻuʻanga moʻuí, mo e ngāue tokoní. ʻE tāpuekina ʻe hoʻo ngaahi ngāué e moʻui ʻa e kau akó ʻi he taimí ni pea ʻi he kahaʻú.

ʻI hoʻo fekumi ki he fakahinohino mo e ivi ʻo e ʻOtuá, te Ne tokoniʻi koe ke ke ʻofa mo tokoniʻi ʻa e kau ako ʻi hoʻo kulupú. ʻOku ʻikai fiemaʻu ia ke ke lea ʻaki ʻa e lea fakafonua tatau mo kinautolu ʻokú ke akoʻí. ʻOku ʻikai fiemaʻu ia ke ke taukei ʻi he lea faka-Pilitāniá pe maʻu ha taukei fakafaiako ke tataki ha kulupu EnglishConnect. ʻOku maʻu ʻe he ngaahi naunau EnglishConnect ʻa e meʻa ʻoku fiemaʻu ke ke lavameʻa aí. ʻI hoʻo fekumi ki he Laumālié mo tataki ʻi he ʻofa ʻa e kau akó ʻi he ngaahi lēsoní, te ke lava ʻo tokoniʻi kinautolu ke nau ofi ange ki he ʻOtuá ʻi hono ako ʻa e lea faka-Pilitāniá.