Ngaahi Fehuʻi ʻOku Faʻa Lahi Hono ʻEké

ʻOku ʻoatu ʻi lalo ha ngaahi fehuʻi angamaheni fekauʻaki mo e EnglishConnect. ʻE lava ke maʻu ha ngaahi fehuʻi lahi ange maʻá e kau akó, kau faiakó, mo e kau takí ʻi he englishconnect.org/help.

ʻOku ou fiemaʻu nai ha aʻusia fakafaiako ke u hoko ko ha faiako EnglishConnect?

Te u akoʻi fēfē ʻa e kau akó kapau ʻoku ʻikai ke u ʻilo ʻenau lea fakafonuá?

ʻE lava ke mau lea ʻi heʻemau lea fakafonuá lolotonga ʻo e kulupu fepōtalanoaʻakí?

ʻE anga fēfē haʻaku akoʻi ha kulupu ʻoku lea ʻi ha ngaahi lea fakafonua kehekehé?

Te u tokoniʻi fēfē ʻa e kau akó ke nau akoako ʻa e lea faka-Pilitāniá ʻi he ʻaho kotoa pē?

ʻE founga fēfē haʻaku fokotuʻutuʻu ha kulupu EnglishConnect?

Ko e hā hono fuoloa ʻo e fakataha fakakulupu ʻa e EnglishConnect?

Ko e hā ʻa e tuʻo lahi ʻoku totonu ke fakataha ai ʻeku kulupú?

ʻE lava ke u akoʻi ha lēsoni ʻo lahi ange ʻi he tahá ʻi ha fakataha fakakulupu?

Te u ʻiloʻi fēfē ʻa e tuʻunga ʻo e EnglishConnect ʻoku totonu ke kau ki ai ha tokotaha ako?

Ko e hā ʻa e EnglishConnect 3?

Te u tokoniʻi fēfē ha tokotaha ako ʻoku kau ki ha kulupu kuo ʻosi fakalakalaka?

Fēfē kapau ʻe liʻaki ʻe ha tokotaha ako ha fakataha fakakulupu pe ʻikai toe haʻu?

Te u poupouʻi fēfē ʻa e kau ako ʻoku nau ako māmālie ange ʻi he niʻihi kehe ʻi he kulupú?

Te u poupouʻi fēfē ʻa e kau ako ʻoku vave ange ʻenau akó?

Te u poupouʻi fēfē ʻa e kau ako ʻoku kehe ʻenau tuʻunga malava ke lea faka-Pilitāniá?

Ko e hā te u fai ʻi he taimi ʻoku fai mai ai ʻe ha tokotaha ako ha ngaahi fehuʻi fekauʻaki mo e kalamá?

ʻOku totonu nai ke u fakatonutonu ʻa e puʻaki leá?

ʻE founga fēfē haʻaku lesisita mo tokangaʻi ʻeku kulupu EnglishConnect?

ʻOku maʻu fēfē ʻe he kau akó ʻa e tohi fakamoʻoni EnglishConnect?

ʻOku ou fiemaʻu nai ha aʻusia fakafaiako ke u hoko ko ha faiako EnglishConnect?

ʻOku ʻikai fiemaʻu ha aʻusia fakafaiako ke ke hoko ko ha faiako EnglishConnect. Mahalo kuo teʻeki ke ke akoʻi ʻa e lea faka-Pilitāniá kimuʻa pea ongoʻi taʻepauʻia ʻi he founga kamatá. ʻOku sai pē ia. ʻOku fokotuʻutuʻu lelei ʻa e ngaahi lēsoni EnglishConnect ʻo fakaʻaongaʻi e ngaahi tefitoʻi moʻoni akoʻi ʻo e leá mo e ngaahi tefitoʻi moʻoni fakalaumālié ke tokoniʻi koe ke ke lavameʻa. ʻOku ʻikai fiemaʻu ia ke ke hoko ko ha mataotao. ʻOku ʻikai fiemaʻu ia ke ke ʻiloʻi ʻa e tali ki he fehuʻi kotoa pē. Ko ho fatongiá ke tokonia hono fakatupulaki ʻo e leá ʻaki hono ʻoange ha ngaahi faingamālie ki he akoakó. ʻOku ʻikai fiemaʻu ia ke ke akoʻi ʻa e kalamá pe mahino ʻa e meʻa kotoa pē fekauʻaki mo e lea faka-Pilitāniá. Ka ke tokanga taha ki hono faʻu ha ʻātakai ʻe ongoʻi fiemālie ai e kau akó ke lea faka-Pilitānia mo ako mei heʻenau ngaahi fehalaākí.

Te u akoʻi fēfē ʻa e kau akó kapau ʻoku ʻikai ke u ʻilo ʻenau lea fakafonuá?

ʻOku angamaheni ʻaki pē hono akoʻi e lea faka-Pilitāniá ʻi he lea faka-Pilitāniá ʻi he funga ʻo e māmaní. Ko hono moʻoní, ʻe lava ke hoko ʻeni ko ha tāpuaki he ʻokú ne fakatupulaki ʻa e lahi ʻo e lea faka-Pilitānia ʻoku fanongo mo fakaʻaongaʻi ʻe he kau akó. Manatuʻi ke ke lea ʻaki ha ngaahi lea faka-Pilitānia faingofua. Fakaʻaongaʻi ha ngaahi fakatātaá, fakaʻilonga nima, pe ngāue ʻa e sinó ke tokoni ke ke mahino ki he kau akó ʻa e ngaahi lea mo e ngaahi sīpinga foʻoú. Te ke lava ʻo fakaʻaliʻali ha laʻitā, tā ha fakatātā, pe fakatātaaʻi ia. Te ke lava ʻo fakahinohino ʻa e kau akó ki he ngaahi maʻuʻanga tokoni kuo liliu ʻi he EnglishConnect 1 maʻá e Kau Akó pe EnglishConnect 2 maʻá e Kau Akó, pe ko hoʻo fakaʻaongaʻi ha tikisinale ʻi he ʻinitanetí. ʻE akoʻi foki heni ʻa e kau akó ʻi he founga hono fakaʻaongaʻi ʻo e ngaahi maʻuʻanga tokoni ʻoku maʻú ke kumi ha ngaahi talí. Fakaʻehiʻehi mei he ngaahi fakamatala lōloá. Ka ke fakahaaʻi pē ki he kau akó e meʻa ke faí ʻaki hono fakatātaaʻí.

Manatuʻi ʻoku mou ako fakataha pē. Fakaafeʻi maʻu pē ʻa e kau akó ke nau tafoki ki he ʻEikí ke maʻu ha tokoni. ʻI hoʻo hoko ko ʻenau faiakó, te ke lava ʻo hoko ko ha faʻifaʻitakiʻanga ʻo e tuí mo e feingá. Ko e lea faka-Pilitānia mo e kau akó ko ha ngāue ia ʻo e tui. ʻE tāpuakiʻi koe mo hoʻo kau akó ʻe he ʻEikí ʻi hoʻomou ngāue ʻi he tui ke lea faka-Pilitāniá.

ʻE lava ke mau lea ʻi heʻemau lea fakafonuá lolotonga ʻo e kulupu fepōtalanoaʻakí?

Te ke tokoniʻi lahi taha ʻa e kau akó ʻi hoʻo nofotaha ʻi he lea faka-Pilitāniá ʻi he kotoa ʻo e kulupu fepōtalanoaʻakí. Te ke lava ʻo fai ʻeni ʻaki hano fokotuʻu ha sīpinga. Fai ho lelei tahá ke lea faka-Pilitānia ʻataʻatā pē. Fakaʻaongaʻi ha ngaahi lea faingofua mo ha ngaahi sētesi nounou. Lea māmālie, pea toutou lea ʻaki. Tohi ʻa e ngaahi lea mo e kupuʻi lea mahuʻingá ʻi he palakipoé. Te ke lava foki ʻo fakaʻaongaʻi ha fakatātā, tā ha fakatātā, pe fakatātaaʻi ia. Fakaʻehiʻehi mei he ngaahi fakamatala lōloá mo hono liliu ʻo e meʻa kotoa pē ʻokú ke lea ʻakí. Kapau kuo pau ke ke fakaʻaongaʻi ʻa e lea fakafonuá, ʻuluaki kole ha ngofua pea fakaʻaongaʻi ʻa e lea fakafonuá ʻi he siʻisiʻi taha ʻe lavá pea toe foki pē ki he lea faka-Pilitāniá. Poupouʻi e kau akó ke nau lea faka-Pilitānia ʻi he lahi taha te nau lavá pea ʻoua naʻa nau manavasiʻi ke fai ha ngaahi fehalaaki. Tokoni ke nau aʻusia ʻa e lavameʻá, mo fakahīkihikiʻi ʻenau ngaahi feingá. Kapau ʻoku fiemaʻu ʻe he kau akó ha tokoni lahi ange, fakahinohino kinautolu ki he ngaahi tohi lēsoni ʻa e tokotaha akó, ʻa ia te nau lava ʻo maʻu ai ʻa e naunaú ʻi heʻenau lea fakafonuá. ʻI hoʻo tokanga taha ki hono tokoniʻi ʻa e kau akó ke ako ʻi he ngāué, ʻe siʻi ange ai haʻo fiemaʻu ke ngāue ʻaki e lea fakafonuá.

ʻE anga fēfē haʻaku akoʻi ha kulupu ʻoku lea ʻi ha ngaahi lea fakafonua kehekehé?

Ko ha faingamālie fakaʻofoʻofa hono akoʻi ʻo ha kulupu lea fakafonua kehekehe ke poupouʻi ʻa e lea faka-Pilitāniá he ko e lea faka-Pilitāniá ʻa e lea fakafonua ʻoku nau tatau ai ʻi he kulupú. ʻI hoʻo hoko ko ha faiakó, fakaʻaongaʻi ʻa e tatau faka-Pilitānia ʻo e tohi lēsoni ʻa e tokotaha akó. Tokoniʻi e kau akó ke nau fakaʻaongaʻi ʻa e tohi lēsoni ʻa e tokotaha akó ʻi heʻenau lea fakafonuá, kapau ʻoku maʻu, koeʻuhí ke ʻaonga kiate kinautolu ʻa e liliú. Kapau ʻe lava, fokotuʻutuʻu ʻa e kau akó ki ha fanga kiʻi kulupu iiki ke nau aleaʻi ʻa e tefitoʻi moʻoni ʻo e akó ʻi heʻenau lea fakafonuá, kae fakapapauʻi ʻoku kau ʻa e taha kotoa. Kapau ko e tokotaha pē ʻoku lea ʻi ha lea fakafonua pau ʻi he kulupú, ʻai ke aleaʻi ʻe he kulupu ko iá ʻa e tefitoʻi moʻoni ʻo e akó ʻi he lea faka-Pilitānia faingofua ke lava ʻo fakakau kotoa kinautolu.

Te u tokoniʻi fēfē ʻa e kau akó ke nau akoako ʻa e lea faka-Pilitāniá ʻi he ʻaho kotoa pē?

Ke ako e lea faka-Pilitāniá, ʻoku fiemaʻu ke fakatupulaki ʻe he kau akó ha tōʻonga ʻo e akoako fakaʻahó. Poupouʻi ʻa e kau akó ke kamataʻi ʻa e tōʻonga moʻui ko ʻení ʻaki hono kumi ha ngaahi founga faingofua ke fakakau ai ʻa e lea faka-Pilitāniá ʻi heʻenau ngaahi ngāue fakaʻahó (vakai ki he konga “Akoako Fakaʻahó”). Hangē ko ʻení, ʻe lava ke fili e kau akó ke sio faiva pe fanongo hiva ʻi he lea faka-Pilitāniá. Te ke lava ʻo poupouʻi ʻa e kau akó ke fakaʻaongaʻi e lisi ʻo e ngaahi fakaukau ke fakatupulaki ʻa e ako fakaʻahó, ʻoku maʻu hili ʻa e “Personal Study Tracker” ʻi he talateu ki he tohi lēsoni ʻa e tokotaha akó. Fakaʻaongaʻi ʻa e lisi ko ʻení ke ueʻi fakalaumālie e kau akó ke nau kumi ha ngaahi founga lelei mo ʻuhingamālie ke akoako fakaʻaho ai.

Lolotonga ʻa e fakataha ʻa e kulupú, fakaafeʻi e kau akó ke nau ako mo akoako fakaʻaho ʻa e lea faka-Pilitāniá pea toe muimuiʻi ʻenau ngaahi feingá. Te ke lava ʻo kole ki ha niʻihi ʻo e kau akó ke vahevahe ha ngaahi meʻa pau ne nau fai ʻi he akoako fakaʻahó. Mahalo te ke fakakaukau ke teuteu ha feituʻu ʻi he ʻinitanetí, hangē ko ha fetalanoaʻaki fakakulupu, maʻá e kau ako ʻi he kulupú. Fealeaʻaki mo hoʻo kau takí ke ʻiloʻi ha ngaahi founga lelei ke tokoniʻi ʻaki ʻa e kulupú ke kei fetuʻutaki pē ʻi he lolotonga ʻo e uiké ʻo fakafou ʻi he fepōpoakiʻaki ʻa e kulupú (group messaging) pe ngaahi founga kehé. Te ke lava ʻo poupouʻi ʻa e kau akó ʻi heʻenau ngāue ke aʻusia ʻenau ngaahi taumuʻá, ka ke manatuʻi, ʻoku nau fatongia ʻaki pē ʻenau akó.

ʻE founga fēfē haʻaku fokotuʻutuʻu ha kulupu EnglishConnect?

Fealēleaʻaki mo e kau taki fakalotofonua ʻo e Siasí ke fai ha ngaahi tuʻutuʻuni fekauʻaki mo hono fokotuʻutuʻu mo fakalele ʻo e ngaahi kulupu EnglishConnect. Ko e angamahení, ʻoku vahe ha faiako lalahi ʻe toko ua pe lahi ange ki he kulupu takitaha. Fakakaukau ki he ngaahi fiemaʻu ʻa e kau akó pea mo e tokolahí ʻi hoʻo fakahoko ha ngaahi fili fekauʻaki mo e feituʻú, taimi-tēpilé, mo e vave hono akoʻí.

Ko e hā hono fuoloa ʻo e fakataha fakakulupu ʻa e EnglishConnect?

ʻE lava e ngaahi lēsoni EnglishConnect ke lele ʻi ha miniti ʻe 60 ki he 90. Muimui ʻi he ngaahi taimi ʻoku lisi atu ki he ʻekitivitī takitaha. ʻOua naʻa toʻo ha faʻahinga ʻekitivitī; fakaʻaongaʻi pē ʻa e taimi siʻisiʻi taha ʻoku fokotuʻu atú ki ha fakataha fakakulupu nounou pea fakaʻaongaʻi ʻa e taimi lōloa ʻoku fokotuʻu atú kapau ʻoku lahi ʻa e taimí.

Fakatokangaʻi ange: Fealeaʻaki mo kinautolu ʻoku nau tokangaʻi ʻa e polokalamá pea fakakaukau ki he ngaahi fiemaʻu ʻa e kau akó pea mo e tokolahí ʻi hoʻo fai e ngaahi fili ko ʻení.

Ko e hā ʻa e tuʻo lahi ʻoku totonu ke fakataha ai ʻeku kulupú?

Ko e angamahení, ʻoku fakataha tuʻo taha ʻi he uike ʻa e ngaahi kulupú. Kapau ʻe fiemaʻu, ʻe lava ke toutou fakataha ʻa e ngaahi kulupú. Ki he tuʻunga lelei taha ʻo e ngaahi kulupu fakatahá, ʻoku fiemaʻu ke maʻu ʻe he kau akó ha taimi feʻunga ʻi he vahaʻa ʻo e ngaahi fakatahá ke fakakakato ʻa e konga “Personal Study”

ʻOku ʻi ai ha ngaahi lēsoni ʻe 25 ʻi he EnglishConnect 1 mo e 2. Kapau ʻe fakataha tuʻo taha ʻa e ngaahi kulupú ʻi he uike, ʻe feʻunga mo ha māhina ʻe ono ke fakakakato ha tuʻunga ʻe taha. Kapau ʻe fakataha tuʻo ua ʻa e ngaahi kulupú ʻi he uike, ʻe māhina ʻe tolu. Kapau ʻe fiemaʻu, te ke lava ʻo vahevahe ʻa e polokalamá ki ha fanga kiʻi konga iiki ange, pe ngaahi lēsoni. Hangē ko ʻení, te ke lava ʻo fili ke kamataʻi ha kulupu ʻe fakataha ʻi ha māhina pē ʻe tolu tuʻo taha ʻi he uike, ke fakakakato ʻa e ʻiuniti 1 ki he 3. ʻE lava ke tokoni hono fakaʻaongaʻi ʻo e founga ko ʻení ke kei vēkeveke pē ʻa e kau akó.

Fakatokangaʻi ange: ʻI he taimi ʻoku fakataimi-tēpileʻi ai ha fakataha fakakulupu ʻoku ʻikai kamata ʻaki ʻa e ʻiuniti 1, fakakaukau ke kamata e taimi-tēpile ʻo e lēsoni hoʻomou kulupú ʻaki ʻa e lēsoni 1. ʻE tokoni ʻeni ki hono fakataukeiʻi ʻa e kau akó ʻi he founga hono fakaʻaongaʻi ʻo e tohi lēsoní. Fealeaʻaki mo kinautolu ʻoku nau tokangaʻi ʻa e polokalamá pea fakakaukau ki he ngaahi fiemaʻu ʻa e kau akó pea mo e tokolahí ʻi hoʻo fai e ngaahi fili ko ʻení.

ʻE lava ke u akoʻi ha lēsoni ʻo lahi ange ʻi he tahá ʻi ha fakataha fakakulupu?

Kapau ʻe fiemaʻu, ʻe lava ke akoʻi ʻe he ngaahi kulupú ha lēsoni lahi ange he tahá lolotonga ha fakataha fakakulupu. Ki he tuʻunga lelei taha ʻo e ngaahi fakataha fakakulupú, ʻoku fiemaʻu ke maʻu ʻe he kau akó ha taimi feʻunga kimuʻa ʻi he fakataha fakakulupú ke fakakakato ʻa e konga “Personal Study” ki he lēsoni takitaha.

Vakai ki he “Ko e hā ʻa e tuʻo lahi ʻoku totonu ke fakataha ai ʻeku kulupú?” ki ha fakamatala lahi ange ʻi he fakataimi-tēpileʻi mo e fuoloa hono akoʻi ha lēsoní.

Te u ʻiloʻi fēfē ʻa e tuʻunga EnglishConnect ʻoku totonu ke kau ki ai ha tokotaha ako?

ʻOku fiemaʻu ʻi he EnglishConnect 1 ke poto ʻi he laukonga mo tohi ʻi he lea fakafonua ʻa e tokotahá pea mo lava ke lau ʻa e ʻalafapeti faka-Pilitāniá mo e ngaahi lea angamaheni faka-Pilitāniá. Ko e EnglishConnect 2, ʻoku maʻá e kau ako ia te nau lava ʻo lea ʻaki ha ngaahi sētesi angamaheni pea tali ʻa e ngaahi fehuʻi angamaheni ʻi he lea faka-Pilitāniá. Ke fakapapauʻi pe ʻoku totonu ke kau atu ha tokotaha ako ki he EnglishConnect 1 pe EnglishConnect 2, te ke lava ʻo fakaʻaongaʻi ʻa e ʻinitaviu pōtoʻi lea ʻi he fakamatala fakalahi E.

Ko e EnglishConnect 3 ko ha kalasi māʻolunga ange ia ʻoku tokoni ki he kau akó ke fakatupulaki ha ngaahi taukei fakaako ʻi he lea faka-Pilitāniá. Ke kau ki he EnglishConnect 3, kuo pau ke kole mo maʻu ʻe he kau akó ha maaka feʻunga ʻi he sivi huú. ʻE lava ke kole hū ʻa e kau akó ʻi he englishconnect.org/join kalasí.

Ko e hā ʻa e EnglishConnect 3?

ʻOku lahi ha ngaahi tuʻunga ʻo e EnglishConnect ke tokoniʻi kinautolu ʻoku kaú ke nau fakalakalaka. ʻOku tokoni ʻa e EnglishConnect 1 mo e 2 ki he kau akó ke fakatupulaki ha ngaahi tefitoʻi taukei ʻi he lea faka-Pilitaniá. Ko e EnglishConnect 3 ko ha kalasi māʻolunga ange ia ʻoku tokoni ki he kau akó ke fakatupulaki ha ngaahi taukei fakaako ʻi he lea faka-Pilitāniá. ʻOku tokoni ia ki he kau akó ke nau teuteu ki he BYU–Pathway Fakaemāmani Lahí. (Ako lahi ange fekauʻaki mo e BYU–Pathway Fakaemāmani Lahí ʻi he byupathway.org.)

Ko e EnglishConnect 3 ko ha kalasi totongi maʻamaʻa ia ʻi he ʻinitanetí mo ha fakataha fakauike ʻoku fakahoko ʻi he ʻinitanetí pe ʻi ha ʻapisiasi fakalotofonua. ʻOku kau ʻi he EnglishConnect 3 ha ngaahi maʻuʻanga tokoni fakaako ʻi he ʻinitanetí mo ha ngaahi fakamatala tokoni ʻi he fanongó, leá, laukongá, mo e tohí. ʻE lava ke fakalakalaka ʻa e kau akó ʻi he kalasí ʻi he taimi ʻoku lelei taha kia nautolú. ʻE lava ke toe nofo ʻa e kau akó ʻi he EnglishConnect 3 ʻi he lahi taha te nau fiemaʻú ke ikunaʻi ʻenau ngaahi taumuʻá. ʻOku fakaʻatā ʻe hono fakakakato ʻo e EnglishConnect 3 ʻa e kau akó ke ʻoua naʻa nau toe fai e sivi faka-Pilitāniá ʻi heenau kole hū ki he BYU–Pathway Fakaemāmani Lahí.

Ke teuteu ki he EnglishConnect 3, ʻoku totonu ke fakakakato ʻe he kau akó ʻa e EnglishConnect 1 mo e 2—kau ai ʻa e ngaahi ʻekitivitī ʻi he tohi ngāué, tautautefito ki he ngaahi ʻekitivitī laukongá mo e tohí. Poupouʻi ʻa e kau ako EnglishConnect 2 ke nau tohi kole hū ki he EnglishConnect 3 ʻi he englishconnect.org/join.

ʻOku ʻoatu ʻa e EnglishConnect 3 ʻo fakafou ʻi he BYU–Pathway Fakaemāmani Lahí ʻi he fengāueʻaki mo e kau taki fakalotofonuá mo e kau faifekau tokoni ʻa e Siasí. ʻE lava ke ngāue ʻa e kau taki ʻoku nau fiemaʻu ʻa e kalasi ko iá mo e kau pule ʻo e uelofeá mo e moʻui fakafalala pē kiate kita ʻi honau feituʻú ke fakahoko ʻa e EnglishConnect 3 ʻi honau feituʻú.

Te u tokoniʻi fēfē ha tokotaha ako ʻoku kau ki ha kulupu kuo ʻosi fakalakalaka?

ʻOku fakataumuʻa ʻa e ngaahi lēsoní ke lava ʻa e kau ako foʻoú ʻo kau ki ha kulupu EnglishConnect ʻi ha faʻahinga taimi pē. Kapau ʻoku fie kau atu ʻa e kau akó hili e kamata ʻa e ngaahi kulupú, talitali lelei kinautolu, ʻoange kiate kinautolu ʻa e EnglishConnect 1 maʻá e Kau Akó pe EnglishConnect 2 maʻá e Kau Akó (pe fakaʻaliʻali ange ʻa e founga ke hū ai ki he tohi lēsoní ʻi he Gospel Library), pea tokoni ke nau kau atu. Te ke lava pe ko ha tokotaha ako ʻe taha ʻo tokoni ki he kau ako foʻoú ke nau feohi mo e kulupú ʻaki hano fakaʻaliʻali ange kiate kinautolu ʻa e founga ke teuteu ai ki he lēsoni hokó. ʻE lava foki ke fili ʻa e kau akó ke toe nofo ʻi ha tuʻunga pau kapau ʻoku nau fiemaʻu ha akoako lahi ange.

Fēfē kapau ʻe liʻaki ʻe ha tokotaha ako ha fakataha fakakulupu pe ʻikai toe haʻu?

ʻOku fehangahangai ʻa e kau akó ʻi he taimi ʻe niʻihi mo ha pole ʻokú ne fakafaingataʻaʻiaʻi ʻenau kau atu ki he kulupú, pea ʻoku nau faʻa momou ke toe foki mai koeʻuhí ko ʻenau ongoʻi mā pe manavasiʻí. Mahalo te nau pehē kuo fuʻu lahi ʻenau nofó pea ʻikai lava ʻo ako ʻa e ngaahi meʻa ne nau liʻaki aí. Fetuʻutaki kia nautolu pea fakaafeʻi ʻa e kau ako ʻoku ʻikai omí ke nau omi ki he lēsoni hokó neongo pe ko e hā e lahi ʻo e ngaahi fakataha kuo nau liʻakí. Fai ha poupou mo ha fakalotolahi. Fakapapauʻi ange ʻoku fokotuʻutuʻu ʻa e EnglishConnect ke lava ʻa e kau akó ʻo toe kau mai ʻi ha faʻahinga taimi pē. ʻE lava ke toe kamata ʻa e kau akó ʻaki ʻenau ʻalu ki he kulupú mo teuteu ki he lēsoni hokó. Fakakaukau ke fakaafeʻi ha mēmipa ʻe toko taha pe tokolahi ange ʻo e kulupú ke fetuʻutaki ki he tokotaha liʻaki fakatahá pea fakahaaʻi ha poupou.

Fakatokangaʻi ange: ʻOua naʻa vahevahe ʻa e fakamatala fetuʻutaki ʻo ha taha taʻe maʻu ha tohi fakangofua meiate ia.

Te u poupouʻi fēfē ʻa e kau ako ʻoku nau ako māmālie ange ʻi he niʻihi kehe ʻi he kulupú?

ʻOku fiemaʻu ʻe he kau ako ʻe niʻihi ha taimi lahi ange ke mahino kiate kinautolu mo nau lea ʻaki ha lea fakafonua. ʻE ʻaonga lahi taha ki he kau ako ko ʻení hono fakakakato ʻo e konga “Personal Study” kimuʻa pea nau toki kau atu ki he kulupu fepōtalanoaʻaki takitaha. Fakaafeʻi kinautolu ke nau akoako ʻa e ngaahi foʻi leá mo e ngaahi sīpinga sētesí kimuʻa pea fakataha ʻa e kulupú. Lolotonga ʻa e lēsoní, fakahoa ʻa e kau ako ko ʻení mo ha kau ako kehe te nau lava ʻo fai ha fakalotolahi mo ha poupou. Poupouʻi ʻa e kau akó kotoa ke nau fai ʻa e lahi taha te nau lavá pea ke nau tali ʻa e ngaahi fehalaākí ko ha konga ia ʻo e ʻenau akó. Te ke lava foki ʻo fili ke toe vakaiʻi mo toutou fakahoko ʻa e ngaahi ʻekitivitií. Fakamanatu ki he kau akó kotoa ʻoku mahuʻinga ki heʻenau fakalakalaká ʻa hono fakakakato ʻo e “Personal Study” kimuʻa pea nau toki kau atu ki he kulupu fepōtalanoaʻaki hokó.

Te u poupouʻi fēfē ʻa e kau ako ʻoku vave ange ʻenau akó?

ʻI hoʻo kau mo e kau akó, mahalo te ke fakatokangaʻi ʻoku mahino lelei ki ha niʻihi pea lava ke nau fakakakato ngofua ʻa e ngaahi ʻekitivitī akoakó. Fakakaukau ke poleʻi ʻa e kau ako ko ʻení ke fakaloloto ʻenau akó ʻaki hono fakakau ha ngaahi fakaikiiki lahi ange pe fai ʻa e ʻekitivitī tatau ʻi ha tūkunga kehe. Hangē ko ʻení, ʻi he akoako fetaulaki ʻa e kau akó mo ha tahá, kole ange ke nau akoako fetaulaki mo ha kaungāmeʻa foʻou pe ko ha pule foʻou. ʻE lava foki ke fakamālohia ʻe he kau ako ko ʻení ʻenau ʻilo ki he lea faka-Pilitāniá ʻaki hono poupouʻi ʻa e kau ako ʻoku nau ako tuai angé. ʻE lava ke ʻaonga ki he kau akó kotoa hono akoʻi ha kaungā ako mo tokoniʻi e niʻihi kehé ke nau akoako ʻa e ngaahi foʻi leá mo e sīpingá ʻi he lea faka-Pilitāniá.

Te u poupouʻi fēfē ʻa e kau ako ʻoku kehe ʻenau tuʻunga malava ke lea faka-Pilitāniá?

ʻOku fakanatula pē ʻa e ʻi ai ha kau ako ʻoku kehekehe honau tuʻunga malava ke lea faka-Pilitāniá pea ko ha faingamālie ia ke nau fetokoniʻaki ai. ʻE lava ke tanumaki ʻe he fetokoniʻakí ʻa e feohí mo e tupulakí. ʻOku ʻi ai ʻa e meʻa ke fakahoko ʻe he tokotaha kotoa pē. Hangē ko ʻení, ʻe lava ke tokoniʻi ʻe ha kau ako ʻe niʻihi ke ongoʻi loto-falala ha niʻihi kehe koeʻuhí ʻoku nau loto-fiemālie ke fai ha ngaahi fehalaaki. Fakahoa e kau akó ʻi ha ngaahi founga kehekehe. Te ke lava ʻo fakahoa ʻa e kau akó mo ha taha ʻi ha tuʻunga tatau ke tokoniʻi kinautolu ke fakatupulaki fakataha ʻa e ngaahi meʻa ʻoku nau malavá. Pe ko hoʻo fakahoa e kau akó mo ha taha ʻi ha tuʻunga kehe. ʻE lelei ki he tokotaha ako ʻi he tuʻunga maʻulalo angé ʻa e fakamatala tokoní mo e poupoú. ʻE lelei ki he tokotaha ako ʻi ha tuʻunga māʻolunga angé hono akoʻi ha kaungā ako mo fakamatala ʻi he lea faka-Pilitāniá. Manatuʻi, ʻoku angamaheni pē ke ʻi ai ha kulupu ʻoku kehekehe ʻenau tuʻunga poto ʻi he lea faka-Pilitāniá pea ʻe lava ke hoko ia ko ha faingamālie lelei ki he kau akó ke nau maʻu ha lelei mei heʻenau fetokoniʻakí.

Ko e hā te u fai ʻi he taimi ʻoku fai mai ai ʻe ha tokotaha ako ha ngaahi fehuʻi fekauʻaki mo e kalamá?

ʻOua ʻe ʻoange ha fakahinohino fakakalama lōloa pe fakamoleki ha taimi lahi ke talanoa fekauʻaki mo e ngaahi laó, kae tataki fakafoki ʻa e kau akó ki he ngaahi sīpingá. He ʻikai toe fou e kau akó ʻi ha ngaahi fehalaaki lahi ʻi heʻenau muimui ʻi he ngaahi sīpingá. ʻOku lelei ange ke ako ʻi hono akoako fakaʻaongaʻi ʻo e lea fakafonuá, kae ʻikai ko e talanoa fekauʻaki mo e lea fakafonuá. ʻOku totonu ke nounou mo mahinongofua ha faʻahinga fakamatala pē fekauʻaki mo e kalamá. Kapau te ke akoʻi ha tefitoʻi moʻoni, ʻoange ha ngaahi sētesi fakatātā pea fakaafeʻi ʻa e kau akó ke nau akoako fakaʻaongaʻi e tefitoʻi moʻoní. ʻOku ʻaonga lahi taha ki he kau akó ʻa e fanongo mo e akoako lea faka-Pilitāniá.

ʻOku totonu nai ke u fakatonutonu ʻa e puʻaki leá?

ʻOua ʻe fakamoleki ha taimi lahi ʻi he fakatonutonu ʻo e puʻaki leá. Fakamanatu ki he kau akó ʻoku mahuʻinga ange ke mahino ʻa e puʻakí ʻi ha puʻaki lea haohaoa. Poupouʻi ʻa e kau akó ke nau akoako e puʻaki leá lolotonga ʻenau ako fakatāutahá koeʻuhí ke nau lava ʻo akoako fakatatau mo ʻenau fiemaʻú. Manatuʻi kapau ʻoku fuʻu hohaʻa ʻa e kau akó ki heʻenau puʻaki leá, mahalo te nau momou ke akoako e fepōtalanoaʻakí. Poupouʻi ʻa e kau akó ke nau fakaʻaongaʻi e ngaahi lēsoni puʻaki lea ʻi he ʻinitanetí ʻi he englishconnect.org/learner/resources.

ʻE founga fēfē haʻaku lesisita mo tokangaʻi ʻeku kulupu EnglishConnect?

Fakaʻaongaʻi ʻa e QuickReg (quickreg.englishconnect.org) ke lesisita mo tokangaʻi hoʻo kulupu EnglishConnect. Ko e QuickReg ko ha polokalama lesisita fakakulupu ia ʻoku ʻomi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Te ke lava ʻo fakaʻaongaʻi ʻa e QuickReg ke:

• Faʻu ha kulupu: Fili ʻa e ʻaho, taimi, mo e feituʻu ʻo hoʻo kulupú.

• Tokangaʻi ha kulupú: Vakai ki he fakamatala ʻo e tokotaha ʻoku kaú mo fakatonutonu ʻa e fakamatala ki he kulupú.

• Fakaafeʻi ʻa e kakaí ke nau kau mai: ʻE lisi hoʻo kulupú ʻi he ʻinitanetí ʻi he englishconnect.org/join. Te ke lava ʻo vahevahe ha fehokotakiʻanga ke fakaafeʻi ai ʻa e kakaí ke lesisita ki hoʻo kulupú.

• Tufaki ʻo e ngaahi tohi fakamoʻoní: ʻI he fakaʻosinga hoʻo kulupú, te ke lava ʻo hū mo paaki ʻa e ngaahi tohi fakamoʻoní.

ʻOku maʻu fēfē ʻe he kau akó ʻa e tohi fakamoʻoni EnglishConnect?

EnglishConnect 1 mo e 2: ʻI he fakaʻosinga ʻo e kulupú, ʻe lava ke maʻu ʻe he kau akó ʻa e ngaahi tohi fakamoʻoni ʻo ʻenau kau maí. ʻE lava ke tufaki ʻe he kau takí, mataotaó pe kau faiakó ʻa e ngaahi tohi fakamoʻoní. Mahalo ʻe ʻi ai ha ngaahi fonua he ʻikai fakangofua ke nau tufaki ʻa e ngaahi tohi fakamoʻoni EnglishConnect. Kātaki ʻo toe vakaiʻi e ngaahi fiemaʻu fakalao fakalotofonuá kimuʻa pea foaki ʻa e ngaahi tohi fakamoʻoní (vakai, englishconnect.org/leader/approved-locations).

Fakatokangaʻi ange: Ke maʻu mo tufaki e ngaahi tohi fakamoʻoní, kuo pau ke lesisita hoʻo kulupú ʻi he QuickReg ʻi he quickreg.englishconnect.org. (Vakai, “ʻE founga fēfē haʻaku lesisita mo tokangaʻi ʻeku kulupu EnglishConnect?” ʻi he konga FAQ ko ʻení.)

EnglishConnect 3: ʻE lava ke maʻu ʻe he kau akó ha ngaahi tohi fakamoʻoni kuo kakato, ʻi he taimi kuo nau fakakakato ai e ngaahi tuʻunga ʻoku fiemaʻu ʻi he kalasí. ʻOku fakaʻatā ʻe hono fakakakato ʻo e EnglishConnect 3 ʻa e kau akó ke ʻoua naʻa nau toe fai e sivi faka-Pilitāniá ʻi heenau kole hū ki he BYU–Pathway Fakaemāmani Lahí.