Tulongannakayonto ni Jesucristo

Salmo 147:3

Ni Jesucristo ti pigsayo. Inaramidna ti amin a banag a kasapulan tapno agrag-okayo ditoy a lubong ken iti agnanayon. Babaen iti panangpiliyo Kenkuana ken iti ebangheliona, pilpilienyo ti awan patinggana a rag-o.

Uray no aramidenyo ti amin a kabaelanyo tapno agaramid kadagiti nasayaat a pili, no dadduma agaramidkayonto latta kadagiti biddut. Aramidenyonto dagiti banag a tarigagayanyo a saanyo koma nga inaramid. Ar-aramiden ti tunggal maysa. No mapasamak dayta, nalaklaka a mariknayo ti pannakaupay wenno pampanunotenyo no agbalinkayonto a nasayaat a tao. Ngem adda naimbag a damag—nakaskasdaaw, mapangnamnamaan a damag! Gapu ta ay-ayatennakayo ti Dios, imbaonna ti Anakna, a ni Jesucristo, nga inaklon iti Bagina dagiti basolyo tapno makapagbabawikayo ken makapagtultuloy iti panagdur-as.

Dagiti agnanayon a kinapudno

Mapapigsanakayo ni Jesucristo. Matulongannakayo a mangbalbaliw kadagiti tarigagayyo, kapanunotanyo, ken tignayyo. No madanagan, mabuteng, wenno marigrigatankayo iti ania man a wagas, liwliwaennakayonto. Tulongannakayonto iti amin nga aspekto ti biagyo.

Ti panagbabawi ket saan a pannusa iti basol; daytoy ti wagas tapno wayawayaannatayo ti Mangisalakan manipud iti basol. Ti kaipapanan ti panagbabawi ket panagbalbaliw—umadayo iti basol ket agturong iti Dios. Kaipapananna ti mangpasayaat ken umawat iti pammakawan. Saan a maminsan laeng a pasamak daytoy a kita ti panagbalbaliw, agtultuloy daytoy a proseso.

Dagiti Awis

Agbabawikayo. Umasideg iti Apo nga addaan iti tarigagay a sumayaat. No nakaaramidkayo iti maysa a banag a biddut, sipupudno nga annugotenyo daytoy iti sango ti Dios, ken no kasapulan, iti bishopyo wenno iti siasino man a mabalin a nadangranyo. Aramidenyo ti amin a kabaelanyo a mangaramid nga umno dagiti banag.

Agrag-o iti sagut nga agaramid iti nasaysayaat ken agbalin a nasaysayaat. Uray man pay no saan a nalaka ken nabaybayag ngem iti kayatyo, saankayo a pulos nga agsardeng iti panangpadas. Agtultuloy iti panagaramid ken panagtalek iti Apo. Tulongannakayonto ti Mangisalakan iti tunggal addang nga aramidenyo.

Dagiti naikari a bendision

Pakawanennakayonto ni Jesucristo ken agasannakayo no agbabawikayo. Sukatannanto ti basolyo iti talinaay ken rag-o. Saannanton a malagip dagiti basolyo. Iti bilegna, dumakkelto ti tarigagayyo nga agtungpal kadagiti bilinna.

Balbaliwannanto ti pusoyo ken ti biagyo. In-inut, dumur-askayonto ket agbalinkayonto nga ad-adda a kas Kenkuana. Ti katulaganyo a mainaig Kenkuana ket makaisangbayto iti dakdakkel a pannakausaryo iti bilegna.

Dagiti saludsod ken sungbat

Kasano a maammuak no pinakawannakon ti Dios? Ikari ti Dios a pakawanennanto dagiti agbabawi. No mariknayo ti pannakaliwliwa manipud iti Espiritu, maammuanyo a ti pannubbot a bileg ti Mangisalakan ket maiparparangarang iti biagyo.

Kaano a masapulko ti tulong ti bishop iti panagbabawi? Iggem ti bishopyo dagiti tulbek ti priesthood ken naespirituan a sagut a makatulong kadakayo nga agbabawi. Mabalinyo a kiddawen ti tulong ken pammagbagana iti ania man nga oras. No nakaaramidkayo iti nadadagsen a biddut, kas iti panangsalungasing iti linteg ti kinadalus ti dayaw, kasaritayo ti bishopyo. Saannakayonto nga ikondena. Isu ti maysa a mangibagi ken ni Jesucristo ket tulongannakayonto a mangammo no kasano nga agbabawikayo a naan-anay ken umawat iti pangagas ken pangpabileg a pannakabalin ti Mangisalakan.

Padpadasek ti agbabawi, ngem agtultuloyak iti panagaramid kadagiti isu met la a biddut. Ania ti nasken nga aramidek itan? Agkasapulan iti panawen tapno mangpadur-as kadagiti nasayaat nga ugali ken mangsardeng kadagiti dakes nga ugali, isu a saanka a sumuko. Umasideg ken ni Cristo. Umdas ti paraburna. Padasen manen. Saankayo a kaano man nga agmaymaysa kadagiti panagkagumaanyo a dumur-as. Kaduayo a kanayon ni Jesucristo.

Kitaen iti Enos 1:6 (mabalin a maawan ti basol); Mosiah 4:3 (babaen iti Espiritu Santo, ipakaammo ti Dios a napakawankayon); 26:30 (Mamakawan ti Mangisalakan kas kasansan iti panagbabawitayo); Ether 12:27 (maaramid ti parabur ti Mangisalakan a mangpapigsa kadagiti nakapsut); Moroni 6:8 (mapakawan dagiti agbabawi); 10:32 (agbalinkayo a naan-anay ken Cristo); Doktrina ken Katulagan 1:32 (pakawanen ti Apo dagiti agbabawi); 58:42–43 (karaman ti panagbabawi ti panagpudno ken panangtallikud iti basol).

Dagiti saludsod iti rekomenda iti templo

Adda kadi pammatim ken pammaneknekmo iti Dios, ti Agnanayon nga Ama; iti Anakna, ni Jesucristo; ken iti Espiritu Santo?

Adda kadi pammaneknekmo iti Pannubbot ni Jesucristo ken iti akemna a kas Mangisalakan ken Mannubbotmo?