“Magna iti lawag ti Dios,” Para iti Pigsa dagiti Agtutubo: Maysa a Pangiwanwan iti Panagpili (2022)
“Magna iti lawag ti Dios,” Para iti Pigsa dagiti Agtutubo
Magna iti lawag ti Dios
Taga Galacia 5:25
Agaramidkayo kadagiti nasaysayaat a pili no makitayo a nalawlawag dagiti banag. Isu a napateg unay ti silaw: nalaklaka a makita ti umno a dana no adda silaw. Inikkannakayo ti Nailangitan nga Ama iti pannakagun-od iti nailangitan a lawag—ti sagut ti Espiritu Santo—a mangtulong kadakayo a mangkita a silalawag no ania ti nasayaat ken dakes, umno ken biddut.
Dagiti agnanayon a kinapudno
Iti panagbuniag sumrekkayo iti narag-o a relasion a pannakitulag iti Nailangitan nga Ama ken ni Jesucristo. Iti templo, agaramidkayonto kadagiti nayon a katulagan a makapapigsa iti dayta a relasion. Iti linawas bayat ti sakramento, pabaruenyo dagiti katulaganyo. Yebkasyo ti kinatallugodyo nga agtungpal kadagiti bilin, ket bendisionannakayo ti Apo iti gundaway a maaddaan iti Nasantuan nga Espiritu kas kanayon a kaduayo. Daytoy ti maysa kadagiti kaindaklanan a sagutna kadakayo.
Ti panagaramid kadagiti nasayaat a pili ket mangpadur-as iti kabaelanyo a mangrikna iti Espiritu. Adu dagiti naimbag ken makaay-ayo a banag ditoy lubong. Kas iti pannakaapekto iti bagiyo ti no ania ti kanen ken inumenyo, nalaus ti pannakaapekto ti panunot ken espirituyo ti no ania ti basaen, buyaen, ken denggenyo.
Dagiti Awis
Maaddaan iti panawen iti Apo iti inaldaw. Agsursurokayo maipapan Kenkuana. Kanayon a manglaglagip Kenkuana. Agkararagkayo iti Nailangitan nga Amayo. Adalenyo dagiti nasantuan a kasuratan ken balikas dagiti sibibiag a propeta. Kalpasanna ikagumaanyo ti agbiag a mayannurot iti no ania ti masursuroyo.
Ikalikagumyo a gun-oden ti no ania ti makaitag-ay, makaparegta, ken mangawis iti Espiritu. Bayat ti panagpiliyo no ania ti buyaen, basaen. denggen, wenno pakidanggayanyo, panunotenyo no kasano a mariknayo daytoy. Mangyawis kadi daytoy iti nasayaat a pampanunot? Adaywanyo dagiti ania man a banag a manglais kadagiti sagrado a banag wenno ania man nga imoral wenno narugit nga aramid. Saankayo a makiraman iti ania man a banag a mangpakapuy iti kabaelanyo a mangngeddeng wenno panangrikna iti Espiritu, kas iti kinaranggas, makabartek nga inumen, ken dagiti makadangran a druga. Maaddaankayo iti tured a mangiddep iti video wenno game, mangpanaw iti maysa a pagsinean wenno pasala, mangbalbaliw iti kanta, wenno umadayo manipud iti ania man a banag a maikontra iti Espiritu.
Usarenyo ti social media a mangparegta. Mabalin ti social media a maysa a nabileg a ramit iti komunikasion. No usarenyo daytoy, agpokuskayo iti lawag, pammati, ken kinapudno. Saanyo nga idasig ti biagyo iti no ania ti kasla mapaspasaran dagiti sabali a tao. Laglagipenyo a ti pategyo aggapu iti panagbalinyo kas maysa nga anak dagiti nailangitan a nagannak, saan nga aggapu iti social media.
Agkalikagumkayo a maaddaan kadagiti nasayaat a padas ken pudno ken manayon a relasion. Agannadkayo a ti panangusaryo iti teknolohia ken media ket saan a mangsukat iti panangbubosyo iti panawenyo a sangunsango iti pamilia ken gagayyemyo. Mabalin nga alaen ti kaaduan a panawenyo ti panangusar iti social media ken dadduma pay a teknolohia ngem awan met unay mait-itedna a pateg kas subadna. Maaddaan iti panaginana manipud iti virtual a lubong, ket makipulapolkayo kadagii tao iti pudno a biag.
Dagiti naikari a bendision
Maaddaankayo iti Espiritu a kanayon a kaduayo. Agpaneknekto kadakayo ti Espiritu Santo maipapan iti Nailangitan nga Ama ken ni Jesucristo. Liwliwaen, iwanwan, ballaagan, ken pasantuennakayonto. Tulongannakayonto a mangbigbig iti kinapudno ken mangkita iti kinaimbag iti lubong.
Dagiti saludsod ken sungbat
Kasano a maammuak no marikriknak ti Espiritu Santo? Ti panangsursuro a mangammo iti Espiritu ket agkasapulan iti panawen, panangsanay, ken panaganus. Makisao isuna iti nadumaduma a tao iti nadumaduma a wagas. Diyo liplipatan dagiti simple a banag—ti natalna a rikna a maawatyo iti panagdengngegyo iti pammaneknek ti maysa a tao wenno ti saan a natalged a rikna a maawatyo kalpasan ti panagpiliyo iti biddut. Sukisokenyo dagiti nasantuan a kasuratan para iti nadumaduma a wagas a pannakisarita ti Espiritu, ikararaganyo daytoy, ken aggtultuloy iti panangsapul kadagiti gundaway a mangrikna iti Espiritu.
Ania ti pornograpia? Apay a nasken a liklikak daytoy? Ti pornograpia ket maysa a panangibagi, iti ladawan wenno balikas, a naisangrat a mangabbukay kadagiti seksual a rikna. Adu ti kita ti pornograpia, agraman dagiti video, ladawan, libro, ken kanta. Mabalin pay daytoy a mensahe wenno ladawan a maipatulod kadagiti aggagayyem. Tratuen ti pornagrapia dagiti banag a sagrado—dagiti pisikal a bagitayo ken seksual a rikna—a buyogan ti kinaawan panagraem. Mabalin a makitayo ti pornograpia nga awan kaipapananna. Makitayo man ti pornograpia a naigagara wenno saan, tallikudanyo a dagus. Mabalin a kayatyo ti makisarita iti nagannak wenno sabali pay a mapagtalkan a nataengan. Ti naigagara a panagbuya iti pornograpia ket basol ken mangdangran iti kabaelanyo a mangrikna iti Espiritu. Pakapsutenna ti panagteppelyo ken ballikugenna ti panangkitayo iti bagiyo ken iti dadduma. Addaan iti bileg ni Jesucristo a mangtulong kadakayo a mangsaranget iti pornograpia ken agbabawi. Umasidegkayo Kenkuana; tallikudanyo ti kasipngetan. Matulongannakayo ti bishopyo nga umawat iti pigsa ken pammakawan, babaen iti Mangisalakan.
Kitaen iti Amos 5:14 (sapulem ti naimbag); Taga Galacia 5:22–23 (dagiti bunga ti Espiritu); Moroni 7:18–19 (ti lawag ni Cristo); Doktrina ken Katulagan 6:23 (agsao ti Apo maipanggep iti talna); 20:77, 79 (dagiti kararag iti sakramento).
Dagiti saludsod iti rekomenda iti templo
Kinuna ti Apo nga amin a banag ket “aramiden a nadalus” iti imatangna (Doktrina ken Katulagan 42:41). Ikarkarigatam kadi nga aramiden a nadalus ti panunot ken galadmo? Tungtungpalem kadi ti linteg ti kinadalus ti dayaw?
Ikarkarigatam kadi a mangpatalinaed a nasantuan iti aldaw ti Sabbath, iti pagtaengan ken iti simbaan; dumardar-ayka kadagiti mitingmo; agsagsagana ken maikarika a makiranud iti sakramento; ken agbibiagka a maitunos kadagiti paglintegan ken bilin ti ebanghelio?