“Sagrado ti bagiyo,” Para iti Pigsa dagiti Agtutubo: Maysa a Pangiwanwan iti Panagpili (2022)
“Sagrado ti bagiyo,” Para iti Pigsa dagiti Agtutubo
Sagrado ti bagiyo
1 Taga Corinto 6:18–20
Maysa a naisangsangayan a sagut ti bagiyo manipud iti Nailangitan nga Amayo. Intedna kadakayo daytoy a mangtulong kadakayo nga agbalin a kas Kenkuana. Ti kaadda iti bagi ti mangted kadakayo iti napigsa a bileg a mangaramat iti wayawayayo nga agpili. Ti naisubli nga ebanghelio ni Jesucristo ket makatulong kadakayo a mangkita iti bagiyo manipud iti pannirigan ti Dios. Ket dakkel ti maitulong dayta kadagiti panagpiliyo maipapan iti no ania ti aramidenyo iti bagiyo ken no kasano nga aywananyo daytoy.
Dagiti agnanayon a kinapudno
Adda iti bagiyo iti ladawan ti Dios—ti kadayagan, kangayedan a Kinatao iti uniberso. Idasig dagiti nasantuan a kasuratan dagiti bagitayo iti maysa a nasantuan a templo, ti lugar a pakapagtalinaedan ti Espiritu. Siempre, saan a naan-anay ti bagiyo ita. Ngem dagiti padasyo iti bagiyo ti makatulong kadakayo nga agsagana iti maysa nga aldaw nga umawat iti naan-anay, nagungar, ken naitan-ok a bagi.
Buklen ti kararuayo iti bagiyo ken espirituyo. Iti daytoy a gapu, nasinged nga agkanaig ti salun-at ti bagi ken salun-at ti espiritu. Impalgak ti Mangisalakan ti Nainsiriban a Balikas tapno mangisuro kadagiti pagbatayan iti panangaywan iti bagiyo—ken tapno mangikari kadagiti pisikal ken naespirituan a bendision.
Napateg a paset iti plano ti Dios dagiti seksual a rikna tapno mangparnuay iti naragsak a panagasawa ken agnanayon a pamilia. Dagitoy a karirikna ket saan a pakabasolan—sagrado dagitoy. Gapu ta sagrado ken nabileg unay dagiti seksual a rikna, inted kadakayo ti Apo ti linteg ti kinadalus ti dayaw tapno mangisagana kadakayo a mangusar kadagitoy a karirikna kas panggepna. Dakamaten ti linteg ti kinadalus ti dayaw nga anamongan ti Dios ti seksual nga aramid iti nagbaetan laeng ti maysa a lalaki ken maysa a babai a nagkallaysa. Adu iti lubong ti saan a mangikankano wenno manglais iti linteg ti Dios, ngem awisennatayo ti Apo nga agbalin a disipulona ken agbiag iti pagrukodan a nangatngato ngem iti pagrukodan ti lubong.
Dagiti Awis
Tratuenyo ti bagiyo—ken dagiti bagi ti dadduma—nga addaan panagraem. No mangngeddengkayo maipapan iti panagkawes, estilo ti buok, ken panaglanglangayo, damagenyo iti bagiyo, “Daydayawek kadi ti bagik kas maysa a sagrado a sagut manipud iti Dios?” Kayat ti Nailangitan nga Ama a makitatayo iti tunggal maysa no asinotayo a talaga: saan laeng a pisikal a bagi no di ketdi maipatpateg nga annakna nga addaan iti nadiosan a pagtungpalan. Liklikanyo dagiti estilo a mangipaganetget wenno mangyawis iti saan a maitutop nga atension iti pisikal a bagiyo imbes a ti kinasiasinoyo kas maysa nga anak ti Dios nga addaan iti agnanayon a masakbayan. Pagbalinenyo a pangiwanwan kadagiti piliyo ti kinadalus iti moralidad ken panagayat iti Dios. Agpabalakadkayo kadagiti nagannakyo.
Aramidenyo dagiti banag a mangpapigsa iti bagiyo—awan ti mangdangran wenno mangdadael iti daytoy. Tagiragsakenyo a pagyamanan dagiti adu a nasayaat a banag nga impaay ti Dios. Ngem laglagipenyo a ti arak, tabako, kape, tsaa ken dadduma pay a makadangran a druga ken sustansia ket saan a para iti bagiyo wenno iti espirituyo. Uray dagiti makatulong a sustansia, kas kadagiti naireseta nga agas, ket makadadael met no saan a nasayaat ti pannakausarda.
Tratuenyo a sagrado ti sekso ken dagiti seksual a karirikna. Saan a nasken a pagang-angawan wenno paglinglingayan dagitoy. iti ruar ti kallaysa iti nagbaetan ti maysa a lalaki ken maysa a babai, dakes ti mangsagid kadagiti pribado, sagrado a paset ti bagi ti sabali a tao uray no sikakawes. Kadagiti panagpiliyo maipapan iti no ania ti aramiden, kitaen, basaen, denggen, panunoten, ipaskil, wenno iteksyo, liklikanyo ti ania man a naigagara a mangpataud iti panagartem a karirikna para iti dadduma wenno iti bagiyo. Iraman daytoy ti ania man a kita ti pornograpia. No makitayo a napigpigsa dagita a situasion wenno aktibidad, liklikanyo ida. Ammoyo no ania dagita a situasion wenno aktibidad. Ket no saankayo sigurado, ti Espiritu, ti nagannakyo, ken dagiti lideryo ti makatulong kadakayo a mangammo kadagitoy. Ipakitayo iti Amayo iti Langit a dayawen ken raemenyo ti sagrado a bileg nga agparsua iti biag.
Dagiti naikari a bendision
Dumakkel ti panagraemyo iti bagiyo ken kadagiti dadduma bayat ti panangdayawyo iti bagiyo babaen iti ugali, langa, ken kawesyo.
Inkari ti Apo dagiti naindaklan a gameng ti pannakaammo kadagiti agtungpal iti Nainsiriban a Balikas [Word of Wisdom]. Ti maysa a nasalun-at a bagi, awanan iti bisio, ket mangpadur-as pay iti kabaelanyo nga umawat iti bukodyo a paltiing, agpanunot a silalawag, ken agserbi iti Apo.
Ti panagbiag iti linteg ti kinadalus ti dayaw ket mangyeg iti pananganamong ti Dios ken bukod a naespirituan a bileg. No agkallaysakayo, mangisangbayto daytoy a linteg iti dakdakkel nga ayat, panagtalek, ken panagkaykaysa iti panagasawayo. Ti panagtungpal iti daytoy a linteg ti mangaramidto a posible ti agnanayon a panagdur-asyo ken agbalinkayo nga ad-adda a kas iti Nailangitan nga Amayo. Dumakkelto ti panagtalekyo iti bagiyo bayat ti panagbiagyo a kas maysa a disipulo ni Jesucristo.
Dagiti Saludsod ken sungbat
Ania ti pagrukodan ti Apo iti panagkawes, panangurnos iti bagi, panagpatato, ken panagpatebbeng iti bagi? Ti pagrukodan ti Apo ket ti panangdayawyo iti kinasagrado ti bagiyo, uray no kaipapanan dayta ti panagbalin a maiduma iti lubong. Bay-anyo a daytoy a kinapudno ken ti Espiritu ti agbalin a pangiwanwanyo iti panagaramidyo kadagiti pangngeddeng—nangnangruna kadagiti pangngeddeng nga addaan iti napaut nga epekto iti bagiyo. Agbalinkayo a masirib ken napudno, ken agpabalakad manipud kadagiti nagannak ken lideryo.
Kasano a maparmekko dagiti pannulisog ken dakes a bisio? Addaan iti bileg ti Nailangitan nga Ama ken ni Jesucristo a mangtulong kadakayo. Punnuenyo ti biagyo kadagiti banag a mangawis iti dayta a bileg iti biagyo, kas iti panagkararag, panagadal iti nasantuan a kasuratan, ken panagserbi iti dadduma. Umasidegkayo ken ni Jesucristo ken iti ebangheliona ket maammuanyonto a dagiti pagkapsutan agbalindanto a pagpigsaan. Agpatulongkayo kadagiti nagannak, lider, ken propesional a mamagbaga no kasapulan. Para kadagiti agsagsagaba iti pannakairuam wenno adiksion, idiaya ti Simbaan ti maysa a programa iti panangpaimbag iti adiksion [addiction recovery program]. Dagitoy ti bendision nga ipaay ti Simbaan ti Mangisalakan a mangtulong kadakayo a mangisubli iti panangkontrolyo iti biagyo. Agkasapulan daytoy iti panawen, isu nga aganuskayo, ken pulos a saankayo a sumuko.
Aggustoak kadagiti tao a kapadak iti sekso wenno padak a lalaki wenno padak a babai. Kasano a mayaplikar dagitoy a pagrukodan kaniak? Saan a basol ti pannakarikna iti panaggusto iti kapada iti sekso wenno pada a lalaki wenno pada a babai. No addaankayo kadagitoy a rikna ket saanyo a pagtarigagayan wenno pagtignayan a maitunos kadagitoy, tungtungpalenyo ti sagrado a linteg ti Nailangitan nga Ama iti kinadalus ti dayaw. Maysakayo a maipatpateg nga anak ti Dios ken maysa a disipulo ni Jesucristo. Laglagipenyo a maawatan ti Mangisalakan ti amin a banag a mapadpadasanyo. Babaen iti katulaganyo a naikamang Kenkuana, masarakanyonto ti pigsa a mangtungpal kadagiti bilin ti Dios ken mangawat kadagiti bendision nga ikarina. Agtalekkayo Kenkuana ken iti ebangheliona.
Naabusoak, ket mariknak ti bainko. Adda kadi basolko? Ti panagbalin a maysa a biktima ti ania man a kita ti panagabuso wenno pannakadangran ket saan a mangaramid kadakayo a nagbasolkayo. Saankayo koma a makonsensia wenno mabain. Ay-ayatennakayo ti Mangisalakan. Kayatna a tulongannakayo, paimbagennakayo, ken ikkannakayo iti talna. Makatulong pay dagiti propesional a mamagbaga, dagiti miembro ti pamiliayo, ken dagiti lideryo.
Kitaen iti Genesis 1:27 (naparsuatayo iti ladawan ti Dios); Juan 14:18 (ikari ti Mangisalakan a liwliwaennatayo); TagaFilipos 4:7 (ti talna ti Dios, daeganna ti amin a pannakaawat); Doktrina ken Katulagan 88:15 (ti espiritu ken ti bagi isuda ti kararua); 89 (ti Nainsiriban a Balikas); 121:45 (ti nadalus a panagpampanunot mangiturong iti napigsa a panagtalek iti bagi).
Dagiti saludsod iti rekomenda iti templo
Kinuna ti Apo nga amin a banag ket “aramiden a nadalus” iti imatangna (Doktrina ken Katulagan 42:41). Ikarkarigatam kadi nga aramiden a nadalus ti panunot ken galadmo? Tungtungpalem kadi ti linteg ti kinadalus ti dayaw?
Maawatam ken tungtungpalem kadi ti Nainsiriban a Balikas (Word of Wisdom)?