3.

Padahk Sarawi kan en Prihsduhd

3.0

Kapehse

Prihsduhd iei mweimwei oh manaman en Koht. Sang ni prihsduhd, Sahm Nanleng ketin kaimwsakalahr Sapwellime doadoahk pwehn kapwaiada mour kohkohlahte oh mour soutuk en aramas (Moses 1:39). Koht ketin ketkihda mweimwei oh manaman ong Sapwellime pwutak kan oh serepein kan pohn sampah pwehn sawas pousehwei doadoahk wet (kilang iralaud 1).

3.2

Kapai kan en Prihsduhd

Sang ni inou sarawi kan oh tiahk sarawi kan en prihsduhd, Koht ketikihda kapai kaselel laud kei ong Sapwelime seri kan koaros. Kapai pwukat me iangahki:

• Pepdais oh wia towe en Mwomwohdiso en Sises Krais en Souleng en Imwin Rahn-akan.

• Kisakis en Ngehn Sarawi.

• Tungoale kamadipw sarawi.

• Ahneki mweimwei oh manaman en papah malipilip kan oh pwukoah teikan en Mwomwohdiso.

• Kak en ale kapai kan en peitriark oh ekei kapai kan en prihsduhd me iangahki kapai en kakehlail, koalelamwahu, oh kaweid.

• Kasarawihkihla manaman en Koht nan tehnpas sarawi.

• Katengtengiong emen tohn peneinei kohkohlahte.

• Inou en mour soutuk.

3.3

Melkisedek Prihsduhd oh Prihsduhd en Aron

Nan Mwomwohdiso, prihsduhd ahneki pali riau: Melkisedek Prihsduhd oh Prihsduhd en Aron (kilang Doctrine and Covenants 107:1).

3.3.1

Melkisedek Prihsduhd

Melkisedek prihsduhd iei Prihsduhd Sarawi, me sansal mwurin Poahngoak en Ieros en Koht (Doctrine and Covenants 107:3). Iei e wia manaman me Sapwelimen Koht pwutak kan oh serepein kan kak ahneki pwehn duwehla Ih (kilang Doctrine and Covenants 84: 19– 19; 132:19–20).

Sang ni mweimwei wet, kaun akan en Mwomwohdisoht kin doadoahngki pwehn kaweidwei oh patohwanda doadoahk sarawi kan en Mwomwohdiso (kilang Doctrine and Covenants 107:18).

Steik presiden me wia kaun lapalap en nan steiko (kilang Doctrine and Covenants 107:8, 10; pil kilang irelaud 6 nan pwuhk en kaweid wet). Pisop me wia kaun lapalap en nan wardo (kilang Doctrine and Covenants 107:17; pil kilang chapter 7 nan pwuhk en kaweid wet).

Ong ire kan me pid duwen ohpis kan oh pwukoah kan en Melkisedek prihsduhd, kilang 8.1.

3.3.2

Prihsduhd en Aron

Prihsduhd en Aron iei e wia kiseh de uhsangete Melkisedek Prihsduhd (Doctrine and Covenants 107:14). E iangahki kih kan en:

• Padahk en tohnleng kan.

• Rongamwahu en koluhla.

• Wiepen doadoahk en tiahk sarawih kan me iangahki pepdais ong kamwakeldahn dihp.

(Kilang Doctrine and Covenants 13:1; 84:26– 27; 107:20.)

Pisop me wia preseden en Prihsduhd en Aron nan wardo (kilang Doctrine and Covenants 107:15).

Ong ire kan me pid duwen ohpis kan oh pwukoah kan en Prihsduhd en Aron, kilang 10.1.3.

3.4

Manaman en Prihsduhd

Mweimwei en prihsduhd iei mweimwei me kohieng irail en kak welian Koht oh wia pwukoah kan ni Mware. Nan Mwomwohdiso, mweimwei kan koaros en prihsduhd kin wiawi pahn kaweidpen irail kan me kolokol kih kan en prihsduhd.

3.4.1

Kih kan en Prihsduhd

Kih kan en prihsduhd iei mweimwei me kohieng irail en kak kaweid wiepen doadoahngki prihsduhd ong Sapwellimen Koht serih kan.

3.4.1.1

Irail kan Me Kolokol Kih kan en Prihsduhd

Kauno ketin malipehiongehr emen emen Sapwellime Wahnpoaron kan kih koaros me pahn doadoahk nan Sapwellimen Koht wehi pohn sampah. Wahnpoaron me keieu wereilahr nan ah pwukoah, me wia Preseden en Mwomwohdiso, iei ihte pohn sampah me ahneki mweimwei en doadoahngki kih kan koaros en prihsduhd (kilang Doctrine and Covenants 81:1-2; 107:64-67, 91-92; 132:7).

Pahn kaweidpen Preseden en Mwomwohdiso, kaun en prihsduhd kan kin alehda kih pwukat pwehn kak doadoahngki ong wasah kan me irail ahneki pwukoah loale. Kaun pwukat me iangahki:

• Steik oh distrik preseden kan.

• Pisop kan oh branch preseden kan.

• Preseden kan en kohrum en Melkisedek oh Prihsduhd en Aron.

• Preseden kan en tehnpas sarawi.

• Preseden kan en misin oh preseden kan en wasahn kaskuhl misineri kan.

Kaun pwukat kin alehdi kih kan en prihsduhd ni ansou me irail kin kasarawiahla ong arail pwukoah kan.

Kih kan en prihsduhd sohte kin kohieng mehtei kan, me iangahki kaunselor kan ong kaun akan en prihsduhd en wasahuo de preseden kan en pwihn en Mwomwohdiso. Preseden kan en pwihn en Mwomwohdiso me kin kaweihd sang ni pahn kaweihdpen irail kan me kolokol kih kan en prihsduhd (kilang 4.2.4).

3.4.1.2

Poahngoak ong Sapwelimen Kauno Doadoahk

Kih kan en prihsduhd pahn tehk mwahu pwe doadoahk en komour oh mour soutuk en pweida mwahu nin duwen wiepen koasondi kan me sansal (kilang Doctrine and Covenants 42:11; 132:8). Irail kan me kolokol kih kan en prihsduhd kin kaweihdwei Sapwellimen Kauno doadoahk ni wasah kan me arail pwukoah kan mih ie. Mweimwei en kaweihd wet pahn ohngete pwukoah kan me sansal ong malipilip me kohiong kaun meno. Ni ansou me pwukoah kan kopwurupwursang kaun akan en prihsduhd, irail solahr kolokol kih pwukat.

3.4.2

Kesepwildahn Prihsduhd oh Kasarawihpe

Pahn kaweihdpen irail kan me kolokol kih kan en prihsduhd, Prihsduhd en Aron oh Melkisedek Prihsduhd kin kohieng irail ohl en Mwomwohdiso me warohng (kilang Doctrine and Covenants 84:14-17). Mwurin kesepwildahn prihsduhdo ah wiawi, aramaso kin kasarawiala ong ohpis en prihsduhdo, me duwehte dihken de elder. Emen me kolokol prihsduhdo kin doadoahngki prihsduhdo ni wiepe me pwung oh pwukoah kan en ohpiso (kilang Doctrine and Covenants 107:99).

Ong me pid ireh kan me pid duwen kesepwildahn prihsduhd oh kasarawihpe, kilang 8.1. 1 oh 18.10.

3.4.3

Kasarawih en Mweimwei en Prihsduhd ong Papah nan Mwomwohdiso

3.4.3.1

Kasarawiahla ong Pwukoah

Ni ansou me ohl oh lih akan kin kasarawiahla ong pwukoah kan pahn kaweidpen irail kan me kolokol kih kan en prihsduhd, irail kin alehdi mweimwei sang Koht en wia pwukoah kan me irail malipilipiong. Ni ansou me irail kin komoaldihsang arail pwukoah kan, irail solahr ahneki mweimwei me irail alehdio.

Tohn Mwomwohdiso kan koaros me kin kasarwihong pwukoahn papah kin alehdi manaman laud oh pwukoah ehu en kak wia arail pwukoah kan me irail malipilipiong. Ni karasaras:

• Lih emen me alehdi ah pwukoah oh kasarawihong sang rehn pisop ong pwukoah en preseden en Relief Society kin alehdi mweimwei en kaweid doadoahk en Relief Society en wardo.

Koaros me kin alehda pwukoah oh kasarawihong kin papah pahn kaweidpen irail kan me kin kaweid irail (kilang 3.4.1.2).

3.4.3.2

Pwukoah Teikan

Kaun akan en Mwomwodiso kin kak kihda mweimwei ong pwukoah teikan. Ni ansou me ohl oh lih akan kin alehdi pwukoah pwukat, irail kin alehdi mweimwei sang Koht en wia pwukoah pwukat. Ni karasaras:

• Presidensi Keieu oh Pwihn en Wahnpoaron Ehk-Riemeno kin kiheng mweimwei ong Pwihn en Isiakan me kin alehdi pwukoah en apwalih ehriah kan oh kaweihd kapokon lap en steik kan.

• Mweimwei kin kohieng irail toweh kan en Mwomwohdiso me kin wia pwukoahn papah riatail ohl oh lih akan.

Mweimwei me kohda ong pwukoah teikan kin mie itaihtih ongete pwukoah kan me sansal oh wen ahsnou me pwukoahu anahne wiawihki.

3.4.4

Doadoahngki Mweimwei en Prihsduhd ni Pwung

Mweimwei wet kak doadoahkte on ni me pwung (kilang Doctrine and Covenants 121:36). E kin doadoahkte sang ni ngoangki, ohpampap, meleilei, aktikitik, limpoak, oh kadek (kilang Doctrine oh Covenants 121: 41– 42).

Irail kan me kin doadoahngki mweimwei en prihsduhd sohte kin iding arail me doadoahk ong mehtei kan. Irail sohte kin doadoahngki ong peihn arail kahepeh kan.

3.5

Manaman en Prihsduhd

Manaman en prihsduhd iei manaman my Koht ketin kapaiahki Sapwellime serih kan. Sapwellimen Koht manaman en prihsduhd kohieng irail toweh kan koaros en Mwomwohdiso—lih oh ohl—ni arail kin kolokol inou sarawih kan me irail wiadahr ong Ih. Toweh kan kin wiahda inou sarawi pwukat ni ansou me irail kin alehdi tiahk sarawih kan en prihsduhd. (Kilang Doctrine and Covenants 84:19-20.)

Kapai kan en manaman en prihsduhd me toweh kan kak alehdi iei me iangahki:

• Mehn kaweihd ong arail mour.

• Ineng en men ese ia mwomwen arail pahn sewese papah tohn peneinei kan oh mehtei kan.

• Kehlail en dadaurete oh powehdi kahpwal akan.

• Kisakis kan en Ngehno pwehn kak kalaudehla arail koahiek kan.

• Kaudiahl en kak ese ia mwomwen ah pahn kak kapwaiada ni unsek doadoahk me irail malipilipiong, kasarawihong, de pwukoah teikan me kohieng irail en wia.

• Sewese oh kakehlaka pwehn kak nantihong duwehla Sises Krais oh Sahm Nanleng.

3.5.1

Inou Sarawi kan

Inou sarawi iei inou kesempwal ehu nan pwungen Sahm Nanleng oh Sapwelime seri kan. Koht ketkihda koasondih kan ong inou sarawio, oh Sapwelime seri kan pwungki en peikiong koasondi pwukau. Koht ketin inoukihda me E pahn ketin kapaiada Sapwelime seri kan ni ansou me irail pahn kapwaiada inou sarawio ni unsek.

Koaros me dadaurete lel imwi wie kolokol arail inou sarawi kan pahn ale mour soutuk (kilang 2 Nephi 31:17–20; Doctrine and Covenants 14:7).

Pahpa oh nohno kan, kaun en Mwomwohdiso kan, oh mehtei kan kumwail sewese emen emen irail kan en kaunopada en wiahda inou sarawi kan ni ansou me irail alehda tiahk sarawi kan en rongamwahuo. Irail en tehk mwahu pwe aramaso en kak wewehki mwahu inou sarawi kan me ohlo de liho wiahda. Ni ansou me aramaso wiahdahr ah inou sarawi, irail en sewese ohlo de liho en kolokol teng. (Tehk Mosiah 18:8–11, 23–26.)

3.5.2

Tiahk Sarawi kan

Tiahk sarawi iei kemwekid sarawi kesempwal ehu me kin wiawi sang rehn prihsduhd men me ahneki mweimwei.

Nan pali tohtohn tiahk sarawi kan, emen emen aramas kin wiahda ah inou sarawih kan rehn Koht. Karasepeh kan iei pepdais, kamadipw sarawi, endaumen, oh tiahk sarawi en katengtengpenehn kapwopwoud.

Tiahk sarawi kan en komour oh mour soutuk inenen kesempwal ong mour kohkohlahte. Ong ekei ireh kan, kilang 18.1.

3.6

Prihsduhd oh Wasahn Kouson

Koaros toweh kan en Mwomwohdiso me kin kolokol arail inou sarawi kan—lih akan, ohl akan, oh serih kan—kapaikidahr manaman en prihsduhd en Koht nan imwarail kan ni ah kin kakehlaka peihn irail oh arail peneinei kan (kilang 3.5). Manaman wet pahn sewese toweh kan wia Sapwelimen Koht doadoahk en komour oh mour soutuk nan peihn arail mour oh peneinei kan (kilang 2.2).

Ohl akan me kolokol Melkisedek prihsduhd kak kieng kapai kan en prihsduhd ong tohn peneinei pwehn kak sewese kaweihd, kamwahuiala, oh koaloalamwahuih. Ni ansou me anahnepe, toweh kan en Mwomwohdiso kak rapahki sawas en kapai kan sang irail tohn peneinei teikan, ohl sounpapah kan, de kaun akan en Mwomwohdisohn wasahu.