4.

Pwihn en Kaun akan oh Kaunsel kan en Mwomwohdiso en Sises Krais

4.0

Kapehse

Ni ahmw wia kaun en Mwomwohdiso men, komw malipilipdahr sang ni pepehm mwahu en Sapwelimen Kauno sounpapah kan me ahneki mweimwei. komw ahniki ansou mwahu en sewese Sapwelimen Sahm Nanleng doadoahk en kapwurehdo mour kohkohlahte oh mour soutuk en aramas (Moses 1:39).

4.2

Padahk kan Duwen Kaun Emen nan Mwomwohdiso

Ni ansou me E wiewia Sapwelime kalohk pohn sampah, Sounkomouro kasalehda duwen mwomwen kaun emen nan Sapwelime Mwomwohdiso. Sapwellime kahrepe keieu kesemwpwal iei en wiewia kupwuren Sapwellime Sahm Nanleng oh sewese mehtei kan en wewehkihla oh momourki Sapwellime rongamwahu (kilang Sohn 5:30; Mosiah 15:7).

Rapahki Sapwellimen Kauno kaweid pwehn seweseiuk esehla oh kapwaiada ahmw pwukoah kan koaros komw alehda.

4.2.1

Kaunopada Ahmw Palingehn

Sises ketin kaunopada peihn Ih ong Sapwellime misin pohn sampah (kilang Luhk 4:1-2). Pil duwehte komwi, ni ahmw kin kaunopada palingenomwi en karanih Sahm Nanleng sang ni ahmw kin kapakap, onopki pwuhk sarawi, oh peihkiong Sapwellime kosonned akan.

Rapahki kaudiahl pwehn wewehki mwahu anahn en irail kan me komw kin kaweihd oh mwomwen ahmw pahn kapwaiada Sawpelimen Koht doadoahk me ketkihong komwi en wia.

Kauno pil ketin inoukihda me E pahn ketin ketkihong kisakis en ngehn ong irail kan me kin rapahki irail (kilang Doctrine and Covenants 46:8).

4.2.2

Papah Sapwellimen Koht Serih kan Koaros

Poakoahng aramas akan me komw kin papah duwehte me Sises wia. Kapakapki “wen kehlail unsek en mongiong” pwehn direkihla Sapwellime limpoak (Moroni 7:48).

Sewese emen emen irail kan en kak koaloalehla arail wewehki oh kakehlaka arail pwoson Sahm Nanleng oh Sises Krais. Sewese irail en kaunopada wiahda arail inou sarawi kan ni arail pahn alehda pil ehu arail tiahk sarawi. Koangoangehkin irail en kolokol inou sarawih kan me irail wiadahr oh alehda kapai kan en koluhla.

4.2.3

Padahngki Rongamwahu en Sises Krais

Kaun koaros wia sounpadahk kei. Nantihong en idawehn karasaras en Sounkomouro ni ah wia sounpadahk men (kilang iralaud 17; Padahk Duwehte Sounkomouro Ah kin Padahk). Sang ni ahmw koasoi oh wiewia, padahngki padahk en Sises Krais oh padahk sarawih kan en Sapwelime rongamwahu (kilang 3 Nihpai 11:32-33; Doctrine and Covenants 42:12–14).

Padahk sang nan pwuhk sarawi kan oh sang ni mahsen en soukohp en imwin rahn-akan (kilang Doctrine and Covenants 52:9).

Ma komw malipilipiong de kapwukoahki en katanga ehu mihting en Mwomwohdiso de kemwekid, tehk mwahu ma padahk pwung oh mih ni pwung en padahk sarawi (kilang Doctrine and Covenants 50:21–23).

4.2.4

Kaweid ni Pwung Mehlel

Emen emen ohpiser me kin katangahwei doadoahk kin papah pahn kaweid pen aramas emen me kin kolokol kih kan en prihsduhd (kilang 3.4.1). Wiepe wet kin kasalehda kairekdi en pwukoah oh kasalehda mwahu dahme emen anahne wia nan Sapwellimen Kauno doadoahk.

Emen ohpiser en soun kaweid pil kak kapwukoahki emen aramas ehu pwukoah doadoahk en lepin ansou en kaweid.

Kaun emen me kin kaunda pwihn en Mwomwohdiso ehu, mihting, de kemwekid teikan kin tehk mwahu pwe Sapwelimen Kauno kahrepen kemwekid kan en kin pweida. Sang ni wai met, kaun meno kin idawehn kaweihd sarawi kan en rongamwahuo, kosonned akan en Mwomwohdiso, oh kaweidpen Ngehn Sarawi.

Pwukoah malipilip de pwukoah teikan en kihda kaweihd sohte kin kieng aramaso me alehdahu ah pahn kesempwal sang de keieu keneinei sang mehtei kan (kilang Doctrine and Covenants 84:109-10).

E sohte mwahu en song en nantihong en kihda kaweihd pwehn alehkihdi peihn kalinganpe nan sohte lipilipil en pwihn akan nan Sapwelimen Kauno Mwomwohdiso (kilang Doctrine oh Covenants 121:34– 37).

4.2.5

Kihla Pwukoah Doadoahk oh Tehk Mwahu Wiepen Doadoahk kan

Sounkomouro ketkihong Sapwelime tohnpadahk kan pwukoahn doadoahk kan oh pwukoah kesempwal akan me inenen katapan (kilang Luhk 10:1). E pil ketkihong irail ahnsou mwahu en kak pil peihn pwukoahki doadoahk kan me irail alehda en wia (kilang Luhk 9:10).

Ni ahmw wia kaun emen, komw kak sewese mehtei kan kekeirda sang ni ahmw pahn kihong irail pwukoah kan en wia. Nantihong en kin mweidohng toweh kan koaros en kin iang wia Sapwelimen Koht doadoahk.

Kapwukoahki pahn pil sewese ahmw sawas en kak pweida mwahu. Rapahki kaweihd en Ngehno me pid duwen dahme komw anahne en kapwukoahkihong aramas pwe komwi en kak koadoahkehte dahme keieu kesempwal nan amw pwukoah kan.

4.2.6

Kaunopada Mehtei kan en kak Wiahla Kaun ekei oh Sounpadahk kei

Ni ansou me komw pahn pilada ihs me kak papah nan malipilip kan de pwukoah teikan en nan Mwomwohdiso, komw anahne kin kapakapki. Tamataman me Kauno pahn ketin kamanahla irail kan me E pahn ketin malipe. Dahme keieu kesempwal iei irail en ahniki ineng en papah, pahn kak ahniki aktikitik oh rapahki Sapwellimen Kauno sawas, oh kin nantihong en kin warohng ansou koaros.

4.2.7

Pilahnih Mihting kan, Lesen kan, oh Kemwekid teikan ki Kahrepeh kan me Sansalamwahu

Rapahki kaweihd en Ngehno ni ansou en pilahne mihting kan, lesen kan, oh kemwekid teikan me kahrepe sansal kan mie. Kahrepe pwukat pahn anahne en kakehlaka emen emen irail kan oh peneinei kan, wairaildo en karanih Krais, oh sewese irail en kapwaiada Sapwellimen Koht doadoahk en komour oh mour soutuk (kilang irelaud 1 oh 2).

4.2.8

Tehk Mwahu Pweidahn Ahmw Doadoahk kan

Ansou koaros kin pwurala oh kilang ahmw pwukoah doadoahk kan oh kekeirdahn palingenomwi ni ahmw wia kaun emen. Pil kin kilang kekeirdahn irail kan me komw kin kaweihd.

Ahmw pweidah kan ni ahmw wia kaun emen kin kohsang ni amw loaloapwoatihong en sewese Sapwellimen Koht serih kan en wia tohnpadahk mehlel en Sise Krais. Komw pahn kak ese me Kauno ketin pereniki ahmw doadoahk pweidah kan ni ahmw pahn kehn Ngehno ah wie doadoahk rehmw.

4.3

Kaunsel kan nan Mwomwohdiso

Kauno ketin kaweihdkiher kaun akan en Sapwellime Mwomwohdiso en kaweidpene nan Sapwellime doadoahk (kilang Doctrine and Covenants 41:2–3). Kaunsel kan kin kihda ahnsou mwahu kan ong toweh kan en kaunsel en ale kaudiahl ni arail kin rapahki en wewehkihla anahn akan en Sapwellimen Koht serih kan oh kin pilahni ia mwomwen arail pahn kak sewese irail en kak alehdi.

4.4

Wiepen Padahk en Doadoahk en Pwihn en Kaunsel kan

4.4.1

Kahrepeh kan en Kaunsel kan

Kaunsel kan kin kihwei kaweihd kesempwal me pid duwen sewese toweh kan en alehdi tiahk sarawih kan oh kolokol inou sarawi kan me patehng.

4.4.2

Kaunopada ong Mihting kan en Kaunsel

Preseden kan oh kaunsel kan kin anahne en kin tuhpene ansou kan koaros. Kaun pwukat kin rapahki Sapwellimen Kauno kaweihd ong ni pilahn en mihting kan en kaunsel. Irail pil kin alehda ireh kan sang rehn pwihn en kaunsel kan ong me pid dahme irail pil kak koasoikipene.

Kaun akan pil kin mweidong tohn kaunsel kan en ese dahme irail pahn koasoia mwohn mihting ah kin wiawi. Tohn kaunsel kan kin kaunopada dahme irail pahn koasoiahki me pid duwen ire pwukat.

4.4.3

Koasoakoasoipeneh kan oh Koasondih kan me Pweida

Nan ansou en mihting en kaunsel, kaun (de aramas me kaun meno kapwukoahki) pahn kawehwehda ire me irail pahn koasoikipenehu. Kaun meno ahpw pahn koangoangoah tohn kaunsel kan en koaskoasoikipene iren peidek kan oh ehukipene iren madamadau kan.

Toweh kan kin ehukipene ire me kak wiawi kan oh rongorongpene ni wahu. Ni arail kin raparapahki dahme kupwuren Kauno, ngehn en pepehm mwahu oh ehupene kin miehda.

Nan kaunsel ehu me ohl oh lih koaros kin iang pidada loale, kaun meno kin rapahki oh alehda arail wewehki kan oh madamadau kan sang ira koaros. Lih akan oh ohl akan kin ansou koaros ahniki madamadau wekpeseng kan me anahne en kin pahrekpene.

Kaun men me kin kaweihd koasoakoasoipenehn nan kaunselo. Ahpw, ohlo de liho pahn kin anahne en kin rongorong sang eh pahn kin wie lokolokaia.

Mwurin koasoakoasoipenehu, kaun meno pahn kak en pilada dahme pahn wiawi de kaiahla koasondio pwehn kak rapahki ekei ireh kan oh kaweid.

4.4.4

Ehupene

Toweh kan en kaunsel kin rapahki en wiahle ehu ni ineng mehlel oh kahrepe mwahu rehn Sahm Nanleng oh Sises Krais. Irail kin nantihong en ehupene nan arail koasoakoasoipeneh kan oh koasondih kan me kin pweida.

4.4.5

Dahme Pahn Wiawi oh Pwukoahki

Toweh kan en kaunsel kin wia palilaud en arail doadoahk mwohn oh mwurin mihting kan en kaunsel. Nan ansou en mihting kan, irail kin rapahki pepehm mwahu en kak wiahda pilahn kan me pahn sawas ong koasondih kan me pahn wiawi. Kaun en kaunselo pahn kin luke toweh kan en kapwaiada pwukoah kan me ong pilahn pwukat.

Toweh kan en kaunselo pahn kin repwohtkihla me pid duwen kapwukoah me kohieng irailo. Pweidahn doadoahk kin anahne en mie utuht oh petehkpen iren pwukoah doadoahko.

4.4.6

Nekinek ni Rir

Kaun akan kin kanaiheng ni ansou me irail kin ehukiwei audepen ireh kan en aramas emen rehn kaunsel kan. Irail kin ansou koaros ale mweimwei sang rehn toweh men pwehn kak doadoahngki songen ire pwukat.

Toweh kan en kaunsel sohte pahn ehukiheng ekei aramas ireh kan me pid aramaso likin pwihn en kaunsel ihte ma mie anahnepe ong kapwukoah me sang rehn kaun en kaunselo.

Ekei ire kesempwal akan pahn kin sohte kak en kasalehda mwohn pwihn en kaunselo pwon.