Mga Pangutana sa Cornerstone Course

mga estudyanting nagtuon

Mga Instruksyon sa Magtutudlo

Kini nga Pagpalambo sa Kasinatian sa Pagkat-on gihimo alang sa mga estudyante sa institute nga nagkuha og Cornerstone course. Kining kasinatian sa pagkat-on naglangkob og mga pangutana nga importante nga kauban sa gi-assign nga mga basahunon ug pag-apil sa klase. Ang mga tubag sa estudyante dili kinahanglan nga taas, apan kinahanglang nagrepresentar kini sa labing maayong paningkamot sa mga estudyante. Uban sa imong tabang, ang mga estudyante gidapit sa pagsulat, pagribyu, pag-usab, ug pagsumiter og mga tubag niini nga mga pangutana sa tibuok kurso. Bisan og ang mga estudyante giawhag sa pagsulat sa ilang mga tubag sa gawas sa klase, mahimong mogahin ka og oras sa klase niini nga paningkamot.

Samtang daghan sa mga detalye sa pagpangalagad ug pag-follow up ang kinahanglang ipahaum sa tinagsang mga programa, ang mosunod nga mga lakang makatabang nimo ug sa imong mga estudyante sa pag-angkon og malampusong kasinatian.

1. Mangandam: Sa dili pa magsugod ang kurso, pakigsabut og petsa sa pagribyu ug tagal sa mga estudyante sa pagsumiter sa ilang mga tubag sa matag pangutana. Ang ubang mga magtutudlo mahimong moribyu o mosumiter sa tanang mga tubag sa usa ra ka adlaw dapit sa katapusan sa semester; ang uban mahimong mohukom sa pagribyu ug pagsumiter sa mga tubag usa matag higayon sa kinatibuk-an sa kurso. Siguroa nga imong mahuman ang gikinahanglan nga materyal sa kurso sa dili pa nimo i-assign ang mga estudyante sa pagtubag sa mga pangutana kalabut niana nga materyal.

2. Magtakda og klarong mga ekpektasyon: Sa sinugdanan sa kurso, hatagi og kopya ang mga estudyante sa Pagpalambo sa Kasinatian sa Pagkat-on. Paggahin og pipila ka minuto nga ipasabut og klaro ang katuyoan ug mga ekspektasyon niini nga kasinatian, lakip ang mga petsa sa pagribyu sa materyal sa kurso ug isumiter ang mga tubag.

3. Mag-follow up: Sa kinatibuk-an sa kurso, awhaga kanunay ug tabangi ang tanang estudyante nga ilang kumpletuhon ang Pagpalambo sa Kasinatian sa Pagkat-on sa mga petsa nga gitagal.

4. Magribyu: Sa mga adlaw nga imong gi-iskedyul ang ribyu, dapita ug pahinumdumi ang mga estudyante sa pagdala sa ilang mga tubag diha sa klase. Ang katuyoan sa ribyu mao ang pagtabang sa mga estudyante sa pag-assess sa ilang mga tubag ug pagpakigbahin unsay ilang nakat-unan. Makabenepsiyo ang mga estudyante pinaagi sa pagribyu sa gitrabaho sa uban nga magtinagurha o sa ginagmayng grupo. Mas makahuluganon ang imong pagribyu kon imong dapiton ang mga estudyante sa pagpasabut, pagpakigbahin, ug pagpamatuod sa unsay ilang nakat-unan (tan-awa sa Gospel Teaching and Learning: A Handbook for Teachers and Leaders in Seminaries and Institutes of Religion [2012], 10). Kinahanglang mogahin ka og 10 ngadto sa 15 minutos sa kada pangutana atol sa pagribyu. Giawhag ang mga estudyante sa pag-usab sa ilang mga tubag kon gikinahanglan sa dili pa isumiter ang ilang katapusang mga tubag.

5. Magsumiter: Pagkahuman sa kurso isumiter sa mga estudyante ang tubag nganha nimo. Ang mga estudyante nakakompleto sa Pagpalambo sa Kasinatian sa Pagkat-on kon nakahimo sila og resonable nga paningkamot, sumala sa pag-evaluate sa magtutudlo, sa pagsulat, pag-usab, ug pagsumiter sa ilang mga tubag sa tanang mga pangutana alang sa kurso. I-rekord kadtong misumiter sa ilang mga tubag diha sa WISE Gradebook.

Pahibalo: Siguroha nga kadtong mga estudyante nga dunay espesyal nga mga panginahanglan, may mga kakulian sa panglawas, o mga problema sa kahimsug mahatagan sa akomodasyon nga ilang gikinahanglan sa pag-apil niini nga assessment nga parehas sa ilang kaubanan. Ang pipila ka mga akomodasyon maglakip sa paghatag og dagko nga letra o audio nga bersyon sa mga materyal, nga makapahimo sa mga estudyante nga makompleto ang mga tubag pinaagi sa tabang sa uban, magtugot nila sa pagsumiter og berbal nga tubag imbis sinulat nga mga tubag, o magtugot nila sa pagdiktar sa ilang mga tubag ngadto sa tigsulat o tigrekord. Adto sa lds.org/topics/disability sa pagpangita og impormasyon bahin sa pagtabang sa mga indibidwal nga dunay mga kakulian sa panglawas.

Mga Instruksyon alang sa Estudyante

Kining Paglambo sa Kasinatian sa Pagkat-on naglangkob og mga pangutana nga importante nga kauban sa pag-apil sa imong klase ug pagtuon sa gitudlo nga mga basahunon. Ang pagtubag niini nga mga pangutana sa kinatibuk-an sa kurso makapalawom sa imong pagsabut ug paggamit sa ebanghelyo samtang mamalandong ug mopakigbahin ka sa unsay imong nakat-unan. Kompletuha ang mosunod nga mga lakang alang sa matag pangutana:

1. Pagsulat og organisado nga tubag alang sa matag pangutana gamit ang imong kaugalingong mga pulong. Suportahi ang imong mga tubag sa mga kasulatan ug sa mga pulong sa mga propeta. Siguroha nga ang imong mga tubag angay nga ipakigbahin.

2. Ribyuha ang imong mga tubag pinaagi sa pagdala niini ngadto sa klase sa (mga) petsa nga gihatag sa imong magtutudlo.

3. Usba ang imong mga tubag base sa mga pagribyu, kon gikinahanglan.

4. Isumiter ang imong katapusang mga tubag alang sa tanang mga pangutana sumala sa (mga) petsa nga gihatag sa imong magtutudlo.

Ang imong mga tubag kinahanglang kumpletuhon sa gawas sa klase gawas kon dunay laing direksyon. Kon ikaw adunay pihong panginahanglan, kakulian sa panglawas, o problema sa kahimsug, pakigsultihi ang imong magtutudlo aron makahimo siya og mga akomodasyon sa pagtabang nimo nga makompleto kini nga kasinatian. Gusto ang imong magtutudlo nga molampus ka niini nga kasinatian ug andam sa pagtabang nimo nga magmalampuson.