Mga Pagtulun-an ug Doktrina sa Basahon ni Mormon (Religion 275)

Ang Pagbisita ni Jesukristo sa Amerika

Mga Pangutana

1. Unsa ang tahas o papel sa Basahon ni Mormon sa imong kinabuhi?

   Ang imong mga tubag kinahanglang maglakip:

   • Sa mahinungdanong katuyoan sa Basahon ni Mormon ug sa tahas niini sa pag-establisar sa kamatuoran.

   • Sa gisaad nga mga panalangin alang niadtong nanagtuon sa Basahon ni Mormon.

   • Kon nganong importante nga makasabut sa balaan nga gigikanan sa Basahon ni Mormon.

   • Sa mga panalangin nga inyong nakita, nabati, o nasinati sa imong pagtuon sa Basahon ni Mormon niini nga kurso.

   • Kon sa unsang paagi ang imong pagtuon ug paggamit sa Basahon ni Mormon molambo, base sa imong kasinatian niini nga kurso.

2. Sumala sa Basahon ni Mormon, giunsa ni Kristo nga nahimong posible nga ikaw mahimaya?

   Ang imong mga tubag kinahanglang maglakip:

   • Sa usa ka pagpasabut ngano nga ang doktrina ni Kristo ug ang gisaad nga mga panalangin niadtong kinsa mosunod niini.

   • Kon giunsa ni kristo pagbuntog ang espiritwal ug pisikal nga mga babag alang sa matag usa nato.

   • Kon sa unsang paagi mitubo ang imong pagpasalamat ug pasalig kang Kristo atol niini nga kurso.

   • Kon unsay imong buhaton sa pagpakita nga ikaw midawat ni Jesukristo isip imong Ginoo ug Manluluwas.

3. Unsang mga kamatuoran gikan sa Basahon ni Mormon ang nakatabang kaninyo?

   Mahimo nimong pormahon o ikonektar ang mga ideya gikan sa imong mga tubag kaniadto o magsulat og bag-ong hilisgutan.

   • Paglista og tulo ngadto sa lima ka mga baruganan o mga doktrina gikan sa Basahon ni Mormon nga imong nakat-unan o nahimong mas makahuluganon kanimo tungod sa imong pag-apil niini nga kurso.

   • Gikan sa imong lista, pagpili og usa ka baruganan o doktrina ug ipasabut kini pag-ayo, gamit ang mga ehemplo gikan sa mga kasulatan ug mga pulong sa mga propeta.

   • Ipaambit nganong kini nga baruganan o doktrina importante nimo ug unsay buhaton nimo niini.

   • Isulat ang imong pagpamatuod kon unsay imong nakat-unan pinaagi sa imong pagtuon sa Basahon ni Mormon atol niini nga kurso.

Mahinungdanong mga Punto sa Doktrina

Ang mosunod nga impormasyon gitigum gamit ang mahinungdanong mga punto nga anaa sa mga leksyon niini nga kurso. Ang mga numero diha sa parenthesis nga nagsunod sa mga kinutlo nagpakita sa numero sa leksyon sa Teachings and Doctrine of the Book of Mormon Teacher Manual (2015) diin makita ang pamahayag. Itandi ang imong tubag sa impormasyon sa ubos. Kon dunay mahinungdanong punto sa doktrina gikan niini nga ribyu nga wala nimo maapil sa imong tubag, ikonsiderar ang pag-usab sa imong tubag sa dili pa kini isumiter. Dili kinahanglan nga imong kopyahon kini nga impormasyon nganha sa imong tubag; siguroha lang nga masabtan nimo kini nga mga doktrina ug masulti kana nga pagsabut. Tungod kay ang ika-3 nga pangutana nagkinahanglan og personal nga tubag, walay mahinungdanong mga punto kana nga pangutana.

1. Unsa ang role o papel sa Basahon ni Mormon sa imong kinabuhi?

   Ang mahinungdanong katuyoan sa Basahon ni Mormon ug sa tahas niini sa pag-establisar sa kamatuoran:

   • “Ang Dios mipagawas sa Basahon ni Mormon niining katapusang mga adlaw sa pagkumbinsir sa tanang mga tawo nga si Jesus mao ang Kristo” (1).

   • “Ang Basahon ni Mormon naglangkob sa kahingpitan sa ebanghelyo ni Jesukristo” (6).

   • Ang Biblia ug ang Basahon ni Mormon nagsaksi kang Jesukristo” (7).

   Mga panalangin nga gisaad alang niadtong nagtuon sa Basahon ni Mormon:

   • “Ang mga pagtulun-an sa Basahon ni Mormon bililhon kaayo nato karon tungod kay ang mga magsusulat nakahibalo sa mga problema nga atong atubangon” (6).

   • “Samtang magtuon kita sa Basahon ni Mormon ug mogamit sa mga pagtulun-an niini, malig-on kita batok sa yawa ug sa bakak nga mga pagtulun-an ug mga konsepto sa atong panahon” (11).

2. Sumala sa Basahon ni Mormon, giunsa ni Kristo nga nahimong posible nga ikaw mahimaya?

   Usa ka pagpasabut mahitungod sa doktrina ni Kristo ug ang gisaad nga mga panalangin niadtong mosunod niini:

   • “Kon kita moduol ngadto ni Kristo ug mosunod sa mga sugo, kita mahimong sama Kaniya ug sa atong Amahan sa Langit, ug kita maluwas” (3).

   • “Kon magpuyo kita sumala sa doktrina ni Kristo, ma-access nato ang mga panalangin sa Pag-ula ug makadawat og kinabuhing dayon” (8).

   • “Aron makadawat sa maloloy-ong mga panalangin sa pagpasaylo, kinahanglan kitang mopakita og pagtuo ni Jesukristo ngadto sa paghinulsol” (16).

   Giunsa ni Kristo sa pagbuntog ang mga espiritwal ug pisikal nga babag alang sa matag usa kanato:

   • “Pinaagi sa Iyang Pag-ula, si Jesukristo mibuntog sa mga epekto sa pisikal ug espiritwal nga kamatayon” (5).

   • “Ang Manluluwas midala diha sa Iyang kaugalingon sa atong mga kasakit, mga sakit, ug mga kahuyang aron Siya makatabang nato sa atong pag-atubang sa mga hagit sa pagkamortal” (5).

   • “Tungod kay gibugto ni Jesukristo ang mga higot sa kamatayon, kitang tanan mabanhaw ug makadawat og imortal nga lawas” (18).