Ko e Fāmili Taʻengatá (Lēsoni Fakalotu 200)

Ngaahi Fehuʻí

1. Ko e hā ʻoku hoko ai e fāmilí ko e uho ʻo e palani ʻetau Tamai Hēvaní ki he fiefiá?

   ʻOku totonu ke kau ʻi hoʻo talí:

   • Ha fakamatala ʻo e ngaahi tefitoʻi taumuʻa ʻo e palani ʻo e fakamoʻuí.

   • Ha fakamatala ʻo e founga ʻoku tokoni ai e ngaahi fāmili angatonú ke fakakakato e ngaahi taumuʻa ko iá ʻo aʻu ki he taʻengatá.

   • Ha fakamatala ʻo e ʻuhinga ʻoku mahuʻinga ai e tokāteline ʻo e fāmilí kiate koe mo hoʻo fakalakalaka taʻengatá.

   • Ha fakamatala ʻo e founga kuo kaunga ai ʻa hoʻo mahino ki he tefitoʻi fatongia ʻo e fāmilí ʻi he palani ʻo e fakamoʻuí, ki he ngaahi fili ʻokú ke fai ʻi he moʻui ní.

2. Ko e hā e ngaahi tuʻunga moʻui ʻa e ʻEikí fekauʻaki mo e nofo-malí?

   ʻOku totonu ke kau ʻi hoʻo talí ha fakamatala ʻo e:

   • Ngaahi tufakanga mo e fatongia fakalangi ʻo e ngaahi hoa malí mo e mātuʻá.

   • Fatongia ʻo e Fakamoʻuí ʻi he nofo-malí mo e fāmilí.

   • Ngaahi fono ʻokú ne puleʻi e angamaʻá mo e anganofo ʻi he nofo-malí pea mo e natula taʻengata ʻo e ngaahi fono ko iá.

   • Ngaahi founga ʻe lava ke ke fakaʻaongaʻi ai e ngaahi tefitoʻi moʻoni ko ʻení ke ke teuteu atu pe fakalakalaka ai ʻi hoʻo nofo-malí mo e fāmilí.

3. Kuo tākiekina lelei fēfē ʻe he “Ko e Fāmilí Ko ha Fanongonongo ki Māmani” (Ensign pe Liahona, Nōvema 2010, 129) hoʻo moʻuí lolotonga e kalasi ko ʻení?

   ʻE lava ke ke hoko atu pe fakafehokotaki hoʻo ngaahi fakakaukau mei hoʻo ngaahi tali kimuʻá pe tohi fekauʻaki mo ha tefito foʻou. ʻOku totonu ke kau ʻi hoʻo talí:

   • Ha fakamatala ʻo ha tefitoʻi moʻoni pe tokāteline pau mei he fanongonongo ki he fāmilí, fakataha mo ha fakamatala ʻoku fakaʻaongaʻi ai e folofolá pe ngaahi lea ʻa e kau palōfita ʻi he ngaahi ʻaho kimui ní.

   • Ha sīpinga ʻo e founga kuo tokoni ai e muimui ki he faleʻi ʻa e kau palōfitá ke toe mahino lelei ange kiate koe ʻa e tefitoʻi moʻoni pe tokāteline naʻá ke filí.

   • Ha ngaahi sīpinga ʻo e ngaahi tāpuaki kuó ke maʻu pe ko e niʻihi kehé ʻi he muimui ki he faleʻi ʻi he fanongonongo ki he fāmilí.

   • Ha fakamatala ʻo e meʻa te ke fai ke moʻui kakato ange ʻaki e tefitoʻi moʻoni pe tokāteline naʻá ke filí.

Ngaahi Tefitoʻi Fakakaukau ʻo e Tokāteliné

Kuo fakatahatahaʻi e fakamatala ko ʻení ʻo fakaʻaongaʻi ki ai e ngaahi tefitoʻi fakakaukau ʻi he ngaahi lēsoni ki he kalasi ko ʻení. Ko e fika ko ia ʻi loto he haʻi ʻoku hoko atu he kupuʻi leá, ʻokú ne fakahaaʻi atu e fika ʻo e lēsoní ʻi he Tohi Lēsoni ʻa e Faiako ʻo e Fāmili Taʻengatá (2015) ʻa ia ʻe lava ke maʻu ai ʻa e fakamatalá. Fakafehoanaki hoʻo talí mo e fakamatala ʻi laló. Kapau ʻoku ʻi ai ha tefitoʻi fakakaukau ʻo e tokāteliné mei he toe vakaiʻi ko ʻení naʻe ʻikai ke ke fakakau ʻi hoʻo talí, fakakaukau leva ke toe fakaleleiʻi hoʻo talí kimuʻa peá ke toki fakahū iá. ʻOku ʻikai fie maʻu ia ke ke hiki tatau e fakamatala ko ʻení foʻi lea ki he foʻi lea ki hoʻo talí; fakapapauʻi pē ʻoku mahino kiate koe ʻa e ngaahi tokāteline ko ʻení peá ke fakamatalaʻi leva e mahino ko iá. Koeʻuhí ʻoku fie maʻu ha tali fakatāutaha ange ki he fehuʻi hono 3, ʻoku ʻikai ha tefitoʻi fakakaukau ia ki he fehuʻi ko iá.

1. Ko e hā ʻoku hoko ai e fāmilí ko e uho ʻo e palani ʻetau Tamai Hēvaní ki he fiefiá?

   Ko e ngaahi tefitoʻi taumuʻa ʻo e palani ʻo e fakamoʻuí:

   • “ʻOku ʻomi ʻe he palani ʻa e Tamai Hēvaní ha founga ke tau hangē ai ko ʻetau Mātuʻa Fakalangí” (3).

   • “Naʻe fakatupu e māmaní ke tokoni ke fakahoko e moʻui taʻe-faʻa-mate mo e moʻui taʻengata ʻa e tangatá” (4).

   Founga ʻoku tokoni ai e ngaahi fāmili angatonú ke fakakakato e ngaahi taumuʻa ko iá ʻo aʻu ki he taʻengatá:

   • “Ko e fāmilí ko e uho ia ʻo e palani ʻa e ʻOtuá ki he moʻui he maama fakalaumālié, fakamatelié, mo e moʻui taʻengatá” (6).

   • “Koeʻuhí ko e Hingá, ne lava ai ʻa ʻĀtama mo ʻIvi ʻo maʻu ha fānau pea lava ke fakalakalaka hona hakó ki he moʻui taʻengatá” (4).

   • “ʻOku tau aʻusia e ngaahi tuʻunga ʻo e moʻui ʻi he māmaní ʻaki ha sino fakamatelie ʻe lava ʻo tokoni ki hono teuteuʻi kitautolu ki he taʻengatá” (5).

   • “ʻI heʻetau hū ki he fuakava foʻou mo taʻengata ʻo e malí, ʻe lava ke hakeakiʻi kitautolu ʻi he tuʻunga māʻolunga taha ʻo e puleʻanga fakasilesitialé” (15).

2. Ko e hā e ngaahi tuʻunga moʻui ʻa e ʻEikí fekauʻaki mo e nofo-malí?

   Ngaahi tufakanga mo e fatongia fakalangi ʻo e ngaahi hoa malí mo e ngaahi mātuʻá:

   • “ʻOku ʻi ai ha fatongia toputapu ʻo e husepānití mo e uaifí ke na feʻofaʻaki mo fetauhiʻaki” (“Ko e Fāmilí: Ko ha Fanongonongo ki Māmani,”129).

   • “ʻI he taimi ʻoku ʻomi ai ʻe ha husepāniti mo ha uaifi ha fānau ki he māmaní, ʻokú na fakahoko ai ha konga ʻo e palani ʻo e fiefia ʻa e Tamai Hēvaní” (17).

   • “ʻOku fekauʻi ʻa e mātuʻá ke akoʻi ʻenau fānaú ke feʻofaʻaki mo fetauhiʻaki, tauhi e ngaahi fekau ʻa e ʻOtuá, pea ke hoko ko e kau tangataʻi fonua tauhi lao” (22).

   Fatongia ʻo e Fakamoʻuí ʻi he nofo-malí mo e fāmilí:

   • “ʻOku ʻai ʻe he Fakalelei ʻa Sīsū Kalaisí ke tau taki taha lava ʻo maʻu ʻa e ngaahi tāpuaki kotoa kuo talaʻofa mai ʻe heʻetau Tamai ʻi Hēvaní” (24).

   • “ʻI he langa ʻe he ngaahi fāmilí honau fakavaʻé ʻia Sīsū Kalaisí, ʻe ʻikai maʻu ʻe Sētane ha mālohi ke fakaʻauha kinautolu” (19).

   Ngaahi fono ʻokú ne puleʻi e angamaʻá mo e anganofo ʻi he nofo-malí pea mo e natula taʻengata ʻo e ngaahi fono ko iá:

   • “Ko e mali ʻi ha vā ʻo ha tangata mo ha fefine ʻoku tuʻutuʻuni ia ʻe he ʻOtuá” (“Ko e Fāmilí: Ko ha Fanongonongo ki Māmani,”129).

   • “Kuo ʻosi tuʻutuʻuni ʻe he ʻOtuá ke toki ngāue ʻaki pē ʻa e ngaahi mālohi toputapu ʻo e fakatupú ʻe ha tangata mo ha fefine kuó na ʻosi mali fakalao ko ha husepāniti mo ha uaifi” (“Ko e Fāmilí: Ko ha Fanongonongo ki Māmani,” 129) (16).

   • “He ʻikai hanga pea he ʻikai lava ʻe he ngaahi liliu ʻi he lao fakapuleʻangá ke ne liliu e fono kuo fokotuʻu ʻe he ʻOtuá ki he angamaʻá. ʻOku ʻamanaki mai e ʻOtuá ke tau poupouʻi mo tauhi ʻEne ngaahi fekaú, neongo e kehekehe ʻa e ngaahi fakakaukaú mo e fetōʻaki ʻa e sosaietí” (quoted in Gospel Topics, “Same-Sex Marriage,” lds.org/topics) (7).