Ngaahi Tefitoʻi Moʻoni mo e Ngaahi Fakahinohino ki hono Palani ʻo e Falelotú

“ʻOku fokotuʻu ʻe he Siasí ʻa e ngaahi falelotú koeʻuhí ke lava ʻe kinautolu kotoa ʻoku hū maí ʻo:

• Fakahoko mo fakafoʻou e ngaahi fuakavá ʻo fakafou ʻi he ngaahi ouau toputapú (vakai, Tokāteline mo e Ngaahi Fuakava 20:75; 59:9–12).

• Fakataha fakakātoa (vakai, 3 Nīfai 18:22–23).

• Lotu mo moihū fakataha (vakai, Mōsaia 18:25; Molonai 6:9).

• Feakoʻaki mo fetauhiʻaki (vakai, Molonai 6:4–5).

• Kau ʻi he ngaahi fakaʻaongaʻi kehe kuo fakangofuá ʻo hangē ko hono fakamatalaʻi ʻi he vahe 35 ʻo e Tohi Tuʻutuʻuni Fakakātoá.

ʻE lava ke kehekehe ʻa e ngaahi fotunga ʻo e falelotú ʻo makatuʻunga ʻi he ngaahi tūkunga mo e ngaahi fiemaʻu fakalotofonuá” (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 35.1).

“Ke lava ʻo fakamālohia ʻa e Siasí, ʻe teuteuʻi ʻe he ngaahi ʻēliá ha ngaahi palani pule taimi lōloa kimuʻa pea toki fai ha ngaahi tuʻutuʻuni ke fakalahi pe toe fokotuʻutuʻu ha feituʻu ki ha falelotu” (Ngaahi Tefitoʻi Moʻoni mo e Ngaahi Fakahinohino ki hono Fokotuʻu ʻo e Ngaahi Falelotú [2021], ChurchofJesusChrist.org). ʻE tokoni ʻa e ngaahi tefitoʻi moʻoni mo e ngaahi fakahinohino ko ʻení ki he kau ngāue fakaʻēliá ʻi heʻenau poupouʻi e kau taki lakanga fakataulaʻeiki fakaʻēliá mo fakasiteikí ʻi hono fakahoko ʻo e taumuʻa ko ʻení.

Ngaahi Tefitoʻi Moʻoní

Fakamālohia e Ngaahi ʻIunití

Ko e fatongia ʻo e kau taki lakanga fakataulaʻeikí ʻa hono fakamālohia ʻo e Siasí ʻo fakafou ʻi hono liliu ʻo e lahi ʻo e ʻiunití mo e ngataʻangá, ʻo fakatatau mo e fakahinohino ʻa e Kau Palesitenisī Fakaʻēliá. ʻE lava foki ke fakaleleiʻi hono fakaʻaongaʻi ʻo e ngaahi falelotú ʻi he liliu ʻo e ngaahi ngataʻanga ʻo e ʻiunití.

Ko Hono Fakaʻaongaʻí

“Kimuʻa pea fai ha fakalahi ki ha falelotu, ʻe fakapapauʻi ʻe he kau takí ʻoku fakaʻaongaʻi kakato ki he taupotu taha naʻe langa ki aí, ʻa e ngaahi falelotu ofi atu ki he fefonongaʻakí.” (Ngaahi Tefitoʻi Moʻoni mo e Ngaahi Fakahinohino ki hono Fokotuʻu ʻo e Ngaahi Falelotú). ʻOku kau ʻi he lahi ʻo e falelotú ʻa e tokolahi ʻo e kāingalotú (tokolahi ʻo e maʻulotú) pea mo e lahi ʻo e ngaahi ʻiuniti (ivi ʻo e ʻiunití) ʻe lava ke fakaʻaongaʻi ki ha falelotu. ʻI he ngaahi feituʻu ʻoku māfulifuli ai e mēmipasipí, ʻe lava ke fakakaukauʻi hano toe fakatapui (fakaʻaufuli pe liliu hono fakaʻaongaʻi) ʻo e ngaahi falelotu mo e ngaahi koloa ʻoku siʻisiʻi hono fakaʻaongaʻí.

Fakafuofua Tokamuʻa Leleí

ʻOku mahuʻinga hono tomuʻa fakafuofuaʻi e tupulaki ʻa e mēmipasipí mo e maʻu kalasí ki hono fokotuʻu ha palani pule lelei mo feʻunga ki he falelotú. ʻOku totonu ke fikaʻi e tokolahi ʻo e mēmipasipí mo e maʻu lotú ʻo fakatatau ki he founga kuo fakangofuá.

Fakakaukauʻi Lelei hono Fokotuʻú

ʻOku totonu ke fokotuʻu ha faʻahinga feituʻu pē ʻoku fai ai e fakatahá ʻi he feituʻu totonu tahá ke nofo ai e tokolahi lelei ʻo e kāingalotú, ʻo ʻatā mei he ngaahi ngataʻanga ʻo e siteikí. ʻOku fie maʻu ke mahino ʻa e huʻunga ʻo e tupulakí, sīpinga ʻo e hikifonuá, mo e fefonongaʻaki ʻoku maʻú ki hono fakakaukauʻi lelei e feituʻu ki he ngaahi falelotú.

Malava ke Totongí

“ʻE fekumi e kau taki fakaʻēliá mo fakalotofonuá ki ha ngaahi founga fakaʻekonōmika lelei, taimi lōloa, mo tuʻu loa ki he ngaahi fiemaʻu ʻa ha falelotu” (Ngaahi Tefitoʻi Moʻoni mo e Ngaahi Fakahinohino ki hono Fokotuʻu ʻo ha Ngaahi Falelotu).

ʻOku totonu ke fakakaukauʻi ʻe he ngaahi ʻēliá ʻa e ngaahi meʻa kotoa pē ʻe ala faí, ʻo fakatatau ki he ngaahi tūkunga fakalotofonuá. ʻE lava ke kau ʻi he ngaahi meʻa ke fakakaukauʻí e ʻapi ʻo ha mēmipa, ʻapiako fakalotofonua pe senitā fakakolo, feituʻu naʻe lisi; ʻapi Siasi kuo langa, fakatau, pe konga ʻoku ʻatā; pe ha toe ngaahi fili kehe.

Ngaahi Fakahinohinó

ʻOku totonu ke fakakaukau e kau taki lakanga fakataulaʻeikí ki he ngaahi meʻá ni ʻi he taimi ʻoku nau fakapapauʻi ai pe ko e uooti ʻe fiha ʻoku ʻi ha falelotu:

• ‘Oku totonu ke kamata hono taimi-tēpileʻi ʻo e ngaahi fakataha he Sāpaté ʻi ha taimi fakapotopoto pea ʻosi hoʻatā kae lava kotoa e ngaahi fāmilí ʻo ako e ongoongoleleí ʻi ʻapi.

• ʻOku nofo e kāingalotú ‘i ha feituʻu ʻoku ʻikai ke fuʻu mamaʻo mei he falelotú.

• Kapau ʻe fie maʻu ha ngaahi liliu ki he falelotú, kuo pau ke siʻisiʻi pea ʻikai loko ʻi ai ha fakamole.

ʻOku fakaʻaongaʻi ʻe he ngaahi feituʻú ʻa e ngaahi tefitoʻi moʻoni ki hono palani ʻo e falelotú pea faʻufaʻu ha ngaahi palani pule fakataʻu nima kimuʻa pea toki fai ha tuʻutuʻuni ke fakalahi pe toe fokotuʻu ha feituʻu foʻou ki ha falelotu.

Palani Pule ʻo e Fakataha Alēlea Fakavahaʻa Siteikí pe Fakafekauʻakí

ʻE lava ke fokotuʻu ʻa e ngaahi palani pulé ʻi he lēvolo fakavahaʻa siteikí pe fakafekauʻaki ʻo e fakataha alēleá ʻi he taimi:

• ʻOku ʻi ai ha ngaahi faingamālie feʻinasiʻaki ʻi he vahaʻa ʻo e ngaahi feituʻu lolotongá pe ngaahi fale ʻoku fokotuʻu atu ki ha ngaahi siteiki kehekehe.

• ʻE lava ke uesia ha ngaahi siteiki lahi ʻi hono vahevahe foʻou ʻo e ngataʻangá.

• ʻOku fakamahino mei he tupulakí mo hono fakaʻaongaʻí ʻa e fiemaʻu ki ha toe fakalahi.

• ʻOku hanga ʻe he fetōʻaki ʻa e mēmipasipí ʻo fakaʻatā ha ʻēlia lahi ʻa ia ʻe lava ʻo fai ki ai ha fokotuʻutuʻu foʻou.

ʻE ngāue ʻa e kau pule palani fakaʻēliá mo e Kau Fitungofulu Fakaʻēliá pea mo e kau palesiteni fakasiteiki ʻoku kaunga tonu ki aí ʻo teuteuʻi ha ngaahi fokotuʻu ke fakangofua ʻe he Kau Palesitenisī Fakaʻēliá.

Palani ʻi he Lēvolo Fakasiteikí

ʻI hono fakakaukauʻi ko ia ha fiemaʻu ke fakalahi pe toe fokotuʻu ha feituʻu ki ha falelotu ne ʻikai kau ʻi ha palani pule fakavahaʻa siteiki pe fakafekauʻaki, ʻe ngāue ʻa e pule palani fakaʻēliá mo e palesiteni fakasiteiki ʻoku felāveʻi mo iá ke teuteu ha ngaahi fokotuʻu ʻe fakangofua ʻe he Kau Palesitenisī Fakaʻēliá.

Fakangofua ʻo e Ngāué mo Hono Fakapaʻangá

ʻE lava ke fakahū atu ha feituʻu foʻou pe ngāue ki hano toe fakaleleiʻi ʻoku ʻasi ʻi he palaní ke hoko ko e konga ʻo e palani fakataʻú pe ʻi ha founga fakangofua makehe.

Ngaahi Ngafá mo e Fatongiá

Kau Palesitenisī Fakaʻēliá

ʻOku ʻomi ʻe he Kau Palesitenisī Fakaʻēliá ha fakahinohino ki he ngaahi founga, tuʻutuʻuni, mo e ngaahi ola ʻoku fie maʻu ki hono palani ʻo e falelotú. ʻOku fakamahino mai ʻe he Kau Palesitenisī Fakaʻēliá ha ngaahi meʻa pau ʻoku fai ki ai ha hohaʻa, fakahinohinoʻi e Kau Fitungofulu Fakaʻēliá ʻi he tokāteliné mo e ngaahi tefitoʻi moʻoní, pea fakangofua ʻa e ngaahi meʻa ke fakamuʻomuʻa ʻi he palani pulé mo e ngaahi aofangatukú.

Fitungofulu Fakaʻēliá mo e Kau Taki Lakanga Fakataulaʻeiki Fakalotofonuá

ʻOku akoʻi ʻe he Fitungofulu Fakaʻēliá ʻa e tokāteliné mo e ngaahi tefitoʻi moʻoní ki he kau palesiteni fakasiteikí mo e fakamisioná pea fealēleaʻaki foki mo e kau ngāue fakaʻēliá. ʻE toe vakaiʻi mo ʻomi ʻe he Fitungofulu Fakaʻēliá, kau palesiteni fakasiteikí, mo e kau palesiteni fakamisioná ha fakamatala fekauʻaki mo e ngaahi palani pule ʻo e falelotú. Te nau fakahū mai ha ngaahi liliu ki ha ngataʻanga ʻo ha faʻahinga ʻiuniti ki he Kau Palesitenisī Fakaʻēliá ke fai hano toe vakaiʻi.

Talēkita ki he Ngaahi Meʻa Fakatuʻasinó (DTA) mo e Kau Ngāue Fakaʻēliá

ʻOku ʻoange ʻe he Talēkita ki he Ngaahi Meʻa Fakatuʻasinó (DTA) mo e kau ngāue fakaʻēliá ki he kau taki faka-Siasí ha fakamatala totonu, lipooti, ʻanalaiso, mo ha ngaahi fokotuʻu. ʻI hono fakafenāpasi mo e fakahinohino ʻa e Kau Palesitenisī Fakaʻēliá mo e Polokalama ʻo e Falelotu Fakaʻēliá, ʻe teuteu ʻe he pule palani fakaʻēliá ha ngaahi palani pule taʻu ʻe nima, ʻa ia ʻoku kau ai ʻa e ngaahi meʻa mei he fakataha alēlea fakafekauʻakí, ngaahi meʻa fakavahaʻa siteikí, mo e palani he lēvolo ʻo e siteikí. ʻOku fengāueʻaki ʻa e pule palaní mo e kau taki lakanga fakataulaʻeikí ke fai ha ngaahi tuʻutuʻuni lelei mo aofangatuku e ngaahi fokotuʻú.

Fakatokangaʻi ange: ʻOku toe ʻuhinga foki e foʻi lea ko e kau palesitenisī fakasiteikí ki he kau palesitenisī fakavahefonuá.