“Hangē ha Ipu Kuo Maumaú”

ʻE uesia e toko taha mei he toko fā ʻi he māmaní ʻe he fokoutua fakaeʻatamaí ʻi ha taimi ʻi heʻenau moʻuí. Ne laka hake he kakai lalahi ʻAmelika ʻe 16 miliona ne nau foua tuʻo taha ha taimi loto-mafasia lahi he taʻu kuo ʻosí.

ʻOku ʻofa ʻa e Fakamoʻuí ki he fānau taki taha ʻa ʻEne Tamaí. ʻOkú Ne tokaimaʻananga e mamahi pea mo e fefaʻuhi ʻoku foua ʻe he tokolahi ʻi heʻenau moʻuí mo e ngaahi pole kehekehe lahi ʻo e moʻui lelei fakaeʻatamaí. Naʻá Ne foua e “ngaahi mamahí mo e ngaahi faingataʻá pea mo e ngaahi ʻahiʻahi kehekehe kotoa pē ; … [ʻo toʻo] kiate ia ʻa e ngaahi mamahi mo e ngaahi mahaki ʻoku moʻua ai hono kakaí” ( ʻAlamā 7:11; tānaki atu hono fakamamafaʻí; vakai foki ki he Hepelū 4:15–16; 2 Nīfai 9:21). Koeʻuhí ko ʻEne tokaimaʻananga e ngaahi faingataʻa kotoa pē, ʻokú Ne ʻafioʻi e founga “ke fakamoʻui ʻa e loto mafesí” (Luke 4:18; vakai foki, ʻĪsaia 49:13–16).

Ko hono moʻoní, ʻoku kehekehe pē ʻa e ngaahi faingataʻa moʻui lelei fakaeʻatamaí mei he tokotaha ki he tokotaha. ʻE lava ke ʻasi mai e ngaahi fakaʻilongá mo e ngaahi hohaʻá hangē ko e loto-mafasiá pe loto-hohaʻá ʻi ha ngaahi founga makehe, ʻo aʻu pē ki he niʻihi fakafoʻituitui ʻoku nau fokoutua tataú. ʻOku mau fakaafeʻi e kakaí ʻo tatau pē ʻi he Siasí mo e koló ke fakalahi ʻenau manavaʻofá mo e poupou kiate kinautolu ʻoku nau lolotonga faingataʻaʻiá pea faifatongia faivelenga ʻi hono tokangaʻi ʻenau tuʻunga moʻui lelei fakaeʻatamai ʻanautolú.

• Tokanga ki hoʻo ngaahi leá. ʻE lava ke liliu ʻe hoʻo leá e ngaahi fakakaukaú. Fakaʻehiʻehi mei he ngaahi konga lea ʻe ngalingali fakatuʻutāmaki pe tukuhifó, pea fakaʻaongaʻi e ngaahi lea ʻoku nau fakamatalaʻi kakato ange e meʻa ʻokú ke fakatokangaʻí. Vakai ki he Time to Change pe ko e American Psychiatric Association ke ako lahi ange.

• Hoko ko ha kaungāmeʻa. Fakafanongo ʻi he faʻa kātaki pea ʻikai fakamaau ʻi hono vahevahe ʻe he niʻihi kehé ʻenau ngaahi hohaʻá. Tokoniʻi kinautolu ke nau ʻiloʻi e ngaahi maʻuʻanga tokoni fakapālofesinalé kapau ʻoku nau fie maʻu ha poupou lahi ange. Vakai ki he HelpGuide.org pe Active Minds ke ako lahi ange.

• Akoako e tokangaʻi kitá. Mahalo ʻe fie maʻu ʻe he ngaahi fakangatangata ʻo ʻetau moʻui fakamatelié ke tau kiʻi māmālie hifo pea toe fakafoki mai hotau mālohí he ngaahi taimi ʻe niʻihi (vakai Mōsaia 4:27). ʻOku ʻikai siokita ke tuku ha taimi moʻou. Vakai ki he Mind.org pe sio ʻi ha lea TED ki he mahuʻinga ʻo hono tokangaʻi kitá ke ako lahi ange.