ʻIloʻi ʻoku lahi e ngaahi tafaʻaki ʻokú ne uesia e ngaahi faingataʻa moʻui lelei fakaeʻatamaí.

ʻI he Sione 9:2 naʻe ʻeke ange ʻe he kau ākonga ʻa e Fakamoʻuí kiate Ia fekauʻaki mo e tangata kuí: “Lāpai, ko hai naʻe faiangahalá, ʻa e tangatá ni, pe ko ʻene mātuʻá, naʻe fanauʻi kui ai iá?” Naʻe tali ʻe Sīsū ki Heʻene kau ākongá mo akoʻi kinautolu, “Naʻe ʻikai faiangahala ʻa e tangatá ni, pe ko ʻene mātuʻá: ka ko e meʻa ke fakahā ʻiate ia ʻa e ngaahi ngāue ʻa e ʻOtuá” (Sione 9:3). Te tau lava ʻo ako mei he fepōtalanoaʻaki nounou ko ʻení ko e ngaahi meʻa fakamamahí, kau ai e ngaahi faingataʻa ʻo e moʻui lelei fakaeʻatamaí, ʻoku ʻikai ko e ola ia ʻo e angahalá pea ʻe lava ke fakamoʻui kitautolu. ʻE lava ʻe he ngaahi meʻa lahi ʻo tānaki atu ki he ngaahi faingataʻa ʻo e moʻui lelei fakaeʻatamaí—tupuʻanga fakatuʻasinó (genetics), ʻātakaí, ngaahi fakatuʻutāmaki fakalavea lahí, ngaahi tūkunga ʻo e moʻuí, pea, ʻi he taimi e niʻihi, ko e ngaahi fili ʻokú te faí. ʻOku tatau ai pē pe ko e hā e ngaahi kupu fengāueʻakí, ka te tau lava ʻo maʻu ha mālohi mei he Fakamoʻuí ki he ʻamanaki leleí mo e faifakamoʻuí. ʻOku ʻikai totonu ke fakafokifā pē ʻetau aofangatuku ʻo pehē ko e faingataʻa ʻo e moʻui lelei fakaeʻatamaí ʻoku fakatupu fakahangatonu ia ʻe he faiangahalá pe ko ha vaivai fakaeʻulungaangá.