Maʻu e kaungā-ongoʻi ʻofa fakalangi ʻa e Fakamoʻuí.

Ko e kaungā-ongoʻí ko e malava ia ʻo ongoʻi e ngaahi ongo ʻa e niʻihi kehé mo mahino e meʻa ʻoku nau fakakaukau ki aí pe ongoʻí. Ko e kaungā-ongoʻí ʻoku ʻikai ko e ongoʻi pē ki ha taha ka ko e ongoʻi mo kinautolu. Koeʻuhí naʻe hāʻele hifo ʻa Sīsū Kalaisi ʻo maʻulalo he meʻa kotoa pē, naʻá Ne maʻu ʻa e kaungā-ongoʻí mo ʻafioʻi e founga ke poupouʻi ʻaki kitautolu ʻi hotau ngaahi ʻahiʻahiʻí (vakai ki he ʻAlamā 7:11–12; Tokāteline mo e Ngaahi Fuakava 88:6).

ʻI he taimi ʻoku kamata ke taulōfuʻu ai e moʻuí, mahalo te tau pehē kuo liʻaki kitautolu ʻe he ʻOtuá. Te tau lava ʻo maʻu e nongá mo e fiemālié ʻi he foʻi moʻoni ko e ʻOtua ko e Tamaí mo hotau Fakamoʻui ko Sīsū Kalaisí, ʻokú Na ʻafioʻi kitautolu mo e founga ke tokoniʻi ai kitautolu ʻi hotau ngaahi faingataʻá. ʻOku ʻikai ʻuhinga foki ʻetau tui kia Sīsū Kalaisí ʻe ʻosi ai e ngaahi pole ʻo e moʻuí, ka ʻoku tau tui ʻe lava ʻe he ʻEikí ʻo foaki mai kiate kitautolu ʻa e mālohi ke tau lava ʻo fetaulaki mo hotau ngaahi faingataʻaʻiá.

Naʻe akoʻi ʻe ʻEletā Kuenitini L. Kuki: “ʻOku ʻikai faingofua maʻu pē e moʻuí ni, pea naʻe ʻikai ʻuhinga ia ke pehē; ko ha taimi ia ʻo e ʻahiʻahiʻi mo e siviʻi. … ʻI he taimi te tau ongoʻi ke tau pehē ai, ʻFakaʻamu pē ke ke ʻiloʻi, ʻoku ou faingataʻaʻiá,’ ʻe lava ke tau maʻu ha ʻilo fakapapau ʻoku [ʻi] ai [ʻa Sīsū Kalaisi], pea ʻoku tau malu ʻi Hono toʻukupu ʻofá” (“Fakaʻamu Pē Ke Ke ʻIloʻi, Naʻa Mau Faingataʻaʻia,” Ensign pe Liahona, Nōvema 2008, 103, 105).