“5: Tokanga taha ke hoko ʻo hangē ko e Fakamoʻuí kae ʻikai ko hono lavaʻi pē ʻo ha ngaahi ngāue.” Moʻui Lelei Fakaeʻatamaí: Ngaahi Tefitoʻi Moʻoni Fakalūkufuá (2019)
“Hoko ʻo Hangē ko e Fakamoʻuí,” Moʻui Lelei Fakaeʻatamaí: Ngaahi Tefitoʻi Moʻoni Fakalūkufuá
Tokanga taha ke hoko ʻo hangē ko e Fakamoʻuí kae ʻikai ko hono lavaʻi pē ʻo ha ngaahi ngāue.
ʻI he ngaahi taimi ʻo e faingataʻá, ʻe lava ke ongo taulōfuʻu ʻa hono fakahoko ʻo e ngaahi ngāue īkí. ʻI he ngaahi momeniti ko ʻení, ʻe lava ke tau tokanga taha ki he tuʻunga ʻoku tau hoko ki aí, kae ʻikai ko e ngaahi ngāue pē ʻoku tau fakakakató. Naʻe akonaki ʻe Sīsū Kalaisi ʻo pehē: “Ko ia, ko e hā ʻa e anga ʻoku taau mo kimoutolú? Ko e moʻoni ʻoku ou pehē kiate kimoutolu, ke mou hangē pē ko aú” (3 Nīfai 27:27). ʻI he taimi ʻoku tau fefaʻuhi ai mo e ngaahi faingataʻa moʻui lelei fakaeʻatamaí, mahalo ʻe faingataʻa ke fai e meʻa kotoa pē ʻoku tau loto ke faí, ka ʻe lava ke tau manatuʻi ʻoku tau hoko ʻo hangē pē ko e Fakamoʻuí ʻi heʻetau feinga ke fakalakalaka he ʻaho takitaha. ʻOku mahuʻinga ke manatuʻi ko ʻetau fononga fakaeākongá ko ha ngāue hokohoko pea ko ʻetau tupulakí ʻoku hoko ia ʻi he kotoa ʻo e moʻuí.
ʻOku mahuʻinga foki ke manatuʻi ʻoku ʻikai ke ʻi ai ha ngaahi taimi tukupau ki he faifakamoʻuí mo hono aʻusia ʻo ha meʻa. Ko e faʻa kātakí mo e faivelengá ko ha ongo tafaʻaki mahuʻinga ia ʻo e ngāue hokohoko ko ʻení. Naʻe fakamatala ʻe Palesiteni Tāleni H. ʻOakesi ʻo pehē: “Ko e mahino kakato ko ia e tokāteline ʻa Sīsū Kalaisí, ko e palani ia ʻe lava ai ke tau hoko ko e fānau ʻa e ʻOtuá ʻi he tuʻunga ʻoku totonu ke tau ʻi aí. Ko e tuʻunga taʻe ha ʻila mo haohaoá ni ʻe maʻu ia ʻi he hokohoko hono tauhi e ngaahi fuakavá, ngaahi ouaú, mo e ngāué; ko hano fakatahaʻi e ngaahi fili naʻe totonú; pea hokohoko atu e fakatomalá” (“The Challenge to Become,” Ensign, Nov 2000, 33).