ʻE lava fēfē ke u tala pe ʻoku ou faingataʻaʻia he taimí ni pe ʻoku ou fekuki mo ha faingataʻaʻia ʻo e moʻui lelei fakaeʻatamaí?

Ko ha konga mahuʻinga ʻo e lelei ʻi he moʻui lelei fakaeʻatamaí ko e malava ko ia ke vakai ʻaki e tuʻunga moʻoní ki he ngaahi palopalemá pe loto-moʻuá. Ko e tokotaha kotoa pē ʻoku ʻi ai e ngaahi ʻaho ʻoku nau ongoʻi loto-mamahi, loto-mafasia, loto-hohaʻa, pe lomekina ʻe he ngaahi faingataʻa ʻo e moʻuí. Kapau te ke kei fefaʻuhi mo e faingataʻaʻiá ʻo lau uike pe lōloa ange pe kamata ke hohaʻasi ʻe he ngaahi fakaʻilongá hoʻo moʻui fakaʻahó—ʻi ʻapi, ʻi he ngāueʻangá, akó, pe ʻi ho ngaahi vā fetuʻutakí—fekumi ki ha tokoni. Talanoa ki ha taha ʻokú ke falala ki aí, hangē ko ha mēmipa ʻo e fāmilí, kaungāmeʻá, palesiteni Fineʻofá, pīsopé, pe ko ha mataotao he moʻui lelei fakaeʻatamaí. ʻI hono tokangaʻi vave ange e ngaahi hohaʻa ʻo e moʻui lelei fakaeʻatamaí, ko e founga ʻaonga taha ia te ne lava ʻo tokoni ke taʻofi ha fakatuʻutāmaki he kahaʻú.

ʻOku ʻi ai ha ngaahi tafaʻaki kehekehe ʻoku nau uesia ʻa e ngaahi ongó, ngaahi fakakaukaú, tuʻunga fakaeongó, mo e ʻulungāngá. Ko hoʻo fefaʻuhi mo hoʻo moʻui lelei fakaeʻatamaí, ʻoku ʻikai ko ha fakaʻilonga ia ʻo ha vaivai ʻi ho ʻulungāngá pe laumālié. Naʻe fakamanatu mai kiate kitautolu ʻe ʻEletā Niila L. ʻEnitasoni “neongo ʻe ʻikai lelei ha tūkunga ʻo ha fānau ʻi he māmaní, ka ʻoku haohaoa ʻa [hono] DNA fakalaumālié he ko e foha pe ʻofefine moʻoni ia ʻo e ʻOtuá”(“Ko ia Ia ʻOkú Ne Maʻu ʻa Kinautolú, ʻOkú Ne Maʻu Au,” Ensign pe Liahona, Mē 2016, 50).

Neongo ʻoku totonu ke tau feinga kotoa pē ke tau poupouʻi e tuʻunga lelei ʻo e moʻui lelei fakaeʻatamaí, ʻoku ʻikai ko ha meʻa lelei ke te siviʻi pē ʻe kita hoto faingataʻaʻia fakaeʻatamaí. ʻE lava ke tokoniʻi koe ʻe ha mataotao ke tala e faikehekehe he fokoutua fakaeʻatamaí pea mo e ngaahi mafasia angamaheni fakaʻaho pē ʻo e moʻuí. ʻOku ʻikai totonu ke vakai ki he sivi fekauʻaki mo e moʻui lelei fakaeʻatamaí ʻo pehē ʻoku siʻisiʻi ange ʻene moʻoní ʻi ha toe sivi fakafaitoʻo ʻe taha.

Fakakaukau ki he ngaahi meʻá ni ʻi hoʻo fakakaukau ke talanoa mo ha mataotao ʻi he moʻui lelei fakaeʻatamaí:

• Ko e hā e fuoloa hoʻo fekuki mo e ngaahi faingataʻá ni?

• ʻOku lahi fēfē hono uesia fakaʻaho koe ʻe he ngaahi fakaʻilonga ko ʻení?

• ʻOkú ke fakatokangaʻi e niʻihi kehe ʻi ho fāmilí kuo nau aʻusia ha ngaahi faingataʻa tatau?

• ʻOku fakatupu nai ʻe he ngaahi faingataʻá ni ha ngaahi mamahi lahi ʻi hoʻo moʻuí?

• ʻOku ʻikai nai ke tokoni atu hoʻo ngaahi feinga ke ke ongoʻi lelei angé?

• Kuo ʻi ai nai ha taha ʻokú ke falala ki ai kuó ne fakalea atu fekauʻaki mo hoʻo tuʻunga fakaeongó pe ʻulungāngá?

Ngaahi Maʻuʻanga Tokoni ʻa e Siasí mo e Koló

(ʻOku ʻi ai ha niʻihi ʻo e ngaahi maʻuʻanga tokoni ʻi laló ʻoku ʻikai faʻu, tauhi, pe puleʻi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ka ʻoku ʻoatu ia ko ha tānaki pē ki he ngaahi maʻuʻanga tokoní.)

• “Loto-toʻa ʻi he Ngāue ʻa Kalaisí,” Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 349–57

• Neil L. Andersen,“Ko ia Ia ʻOkú Ne Maʻu ʻa Kinautolú, ‘Okú Ne Maʻu Au,” Ensign pe Liahona, Mē 2016, 49–52

• “Mental Health and Mental Disorders,” HealthyPeople.gov

• “What’s the Difference between Mental Health and Mental Illness?” HeretoHelp

• “Mental Illness,” Mayo Clinic