ʻOku faingataʻa ke vavaloʻi ʻeku ngaahi ongó, tuʻunga moʻuí, pea pehē mo e ngaahi ʻulungaangá pea naʻa mo hono mapuleʻi iá he taimi ʻe niʻihi, pea ʻoku lava ke hoko ʻeni ʻo faingataʻa ange ai ʻeku moihuú mo e ngāue tokoní. ʻOku ʻi ai ha feituʻu moʻoku?

ʻIo. ʻOku fakaafeʻi ʻe Sīsū Kalaisi ʻa e tokotaha kotoa ke haʻu kiate Ia. ʻOkú Ne fakaafeʻi e kakai kotoa pē ke nau maʻu e ongoongoleleí. ʻOku ʻikai ngata pē he ʻi ai ha feituʻu maʻanautolu ʻoku ʻi ai ʻenau faingataʻaʻia moʻui lelei fakaeʻatamaí, ka ʻoku toe ʻi ai mo ha fiemaʻu. ʻOku tau takitaha maʻu ʻa e ngaahi meʻafoaki fakalaumālie, ngaahi ʻulungaanga, mo e ngaahi talēniti ke tokoni ki hono langa e puleʻanga ʻo e ʻOtuá. ʻOku lahi ʻa e niʻihi fakafoʻituitui kuo nau ongoʻi e mamahi fakaeongo ke maʻu ha ngaahi tuʻunga māʻolunga ʻo e ʻofá mo e mahinó. ʻOku fie maʻu mo fakaʻamua koe ʻe he Siasí, pea ʻoku totonu ke ke ongoʻi ʻokú ke kau he laú.

ʻI heʻene kei hoko ko e mēmipa ʻo e Kau Palesitenisī ʻUluakí naʻe akonaki ʻa Palesiteni Tieta F. ʻUkitofa ʻo pehē:

“Mahalo ʻe pehē ʻe ha niʻihi, ʻʻOku ʻikai pē ke u ongoʻi kau atu mo kimoutolu ko e kakai ʻi he Siasí.’

“Kapau naʻe lava ke mou mamata ki homau lotó, mahalo te ke mei ʻiloʻi ʻokú ke feʻunga lelei ange koe ʻi he anga hoʻo fakakaukaú. Mahalo te ke ʻohovale ʻi hano ʻiloʻi ʻoku mau maʻu ha ngaahi fakaʻānaua, faingataʻaʻia mo ha ngaahi fakaʻamu tatau pē mo kimoutolú. Mahalo ʻe kehe ho tupuʻangá pe ko hoʻo tupu haké mei he meʻa ʻokú ke fakatokangaʻi ʻi ha Kāingalotu tokolahi ʻo e Ngaahi ʻAho Kimui Ní, ka ʻe ala hoko ia ko ha tāpuaki. Kāinga, ngaahi kaungāmeʻa ʻofeina, ʻoku mau fie maʻu homou ngaahi talēnití mo e ngaahi fakakaukau makehé. ʻOku hoko e kehekehe ʻo e kakai fakafoʻituituí mo e kakai he funga māmaní ko ha ivi ʻo e Siasí ni.” (“Haʻu ʻo Kau mo Kimautolu,” Ensign pe Liahona, Nōvema. 2013, 23).