“10: ʻE anga fēfē haʻaku fefaʻuhi mo ʻeku ngaahi fakakaukau taonakitá?” Moʻui Lelei Fakaeʻatamaí: Tokoni Maʻakú (2019)
“Ko e Ngaahi Fakakaukau Taonakitá,” Moʻui Lelei Fakaeʻatamaí: Tokoni Maʻakú
ʻE anga fēfē haʻaku fefaʻuhi mo ʻeku ngaahi fakakaukau taonakitá?
ʻOku ʻikai ʻuhinga e ngaahi fakakaukau taonakitá ʻokú ke vaivai, pe mele, pe ko ha taha kovi; ʻoku ʻuhinga ia ʻokú ke fua ʻa e mamahi lahi fau pea mahalo ʻe fie maʻu ha tokoni lahi ange ke fakaleleiʻi hoʻo palopalemá. ʻI he taimi kuo kamata e moʻuí ke hangē ʻe ʻikai toe lava ke mapuleʻí pe ʻokú ke fekuki mo e ngaahi fakakaukau taonakitá, ʻahiʻahiʻi e ngaahi fokotuʻu ko ʻeni ʻi laló pe vakai ki he PreventingSuicide.ChurchofJesusChrist.org ki ha ngaahi fakakaukau lahi ange.
-
Tala ki ha taha. Kapau ʻokú ke ongoʻi ʻoku ʻikai ke ke malu, pe ko hoʻo moʻuí ʻoku ʻi he tuʻunga fakatuʻutāmaki, fetuʻutaki leva ki he ngaahi tafaʻaki tokoni fakavavevavé. Kapau ʻoku ʻikai ke ʻi he tuʻunga fakatuʻutāmakí ʻa hoʻo moʻuí, talanoa ki haʻo kaumeʻa, ha mēmipa ho fāmilí, pe ko ha taki he Siasí, pe telefoni ki ha telefoni laine tokoni ke taʻofi e taonakitá (vakai ki he ngaahi maʻuʻanga tokoni ʻi laló). ʻE lava hoʻo vahevahe hoʻo ngaahi fakakaukaú ʻo fakasiʻisiʻi e lahi ho mafasiá.
-
Falala ki he Fakamoʻuí. ʻOku tatau ai pē kapau ʻoku ʻikai ke ke ongoʻi ʻa e ʻofa pe takaua ʻa Sīsū Kalaisi ʻi hoʻo moʻuí he taimi ko ʻení, te ke lava pē ʻo ngāueʻi ha fakaʻamu ke ke ongoʻi ia. Te ke lava ʻo tūʻulutui hifo ʻi he taimi ʻokú ke lotu aí, lotu leʻo lahi, kole ha tāpuaki lakanga fakataulaʻeiki, pe talanoa ki hoʻo pīsopé.
-
Ngaohi ho ʻapí ke malu. Kapau ʻoku ʻi ai ha faʻahinga meʻa ʻokú ke fakakaukau ke ke ngāueʻaki ke fakalaveaʻi koe, fakamavahe kinautolu pe ʻai ha taha ke ne tokangaʻi kinautolu. Fakasiʻisiʻi e taimi ʻokú ke nofo toko taha aí peá ke fakatalanoa ki ha taha ʻokú ke nofo mo ia pe falala ki ai. Talanoa mo e tokotaha ko ʻení ʻo kau ki he ngaahi fakatokanga ʻa ia ʻoku ʻuhinga lelei taha kiate koe ʻi ho tūkungá.
-
Fokotuʻu ha ngaahi taumuʻa iiki. Hiki ʻi he ʻaho taki taha ha ngāue pē ʻe taha pe taumuʻa ki he ʻaho hono hokó. Tauhi ia ke faingofua pea malava foki. Ko hono fokotuʻu mo ngāueʻi e ngaahi taumuʻa īkí ʻe tokoni ia kiate koe ke ke maʻu ha ongo ʻo e mapuleʻí neongo e ngali taʻemalava ke tokangaʻí.