Vahe 5

Ko e hā e faikehekehe ʻi he feinga ke haohaoá mo e fie maʻu ke moʻui tāú?

ʻOku faʻa haʻu e holi ke moʻui tāú mei heʻetau ʻofa ki he ʻOtuá mo hano ongoʻi ʻo ʻEne ʻofa kiate kitautolú. ʻOkú ne tataki kitautolu ʻi he hala ʻo e talangofuá, ngaahi fuakavá, pea mo e fakatomalá. Ko ha holi ke hoko ʻo haohaoa hangē ko ia naʻe fakaafeʻi ʻe he Fakamoʻuí ke tau faí (vakai ki he Mātiu 5:48). ʻOku ʻuhinga ia ki heʻetau feinga ke loto-fakatōkilalo pea “fakafisi [ʻa kitautolu] mei he anga taʻemāʻoniʻoni kotoa pē” koeʻuhí ke tau lava ʻo hoko ʻo haohaoa ʻia Sīsū Kalaisi ʻi Heʻene ʻaloʻofá (Molonai 10:32).

Ka ko e feinga ke haohaoá, ʻi he tafaʻaki e tahá, ʻoku faʻa tupu ia mei he manavaheé kae ʻikai ko e ʻofá—manavahē ko e maá, manavasiʻi he ʻikai ke ola leleí, manavahē ki he tauteá, manavahē ki he ʻikai ke talí pe loto-mamahí. Ko ha founga ʻe taha ʻoku fakahā ai ʻení ko ʻetau tokanga ki he ngaahi “meʻa naʻe ʻikai mahuʻingá” (Sēkope 4:14) ʻaki hano fokotuʻu haʻatau ngaahi taumuʻa ʻo fakalaka atu ia he meʻa kuo ʻosi fokotuʻu ʻe he ʻEikí mo fakamamahiʻi taʻeʻuhinga kitautolu ʻi he ʻikai ke tau aʻusia kinautolú. ʻE lava ke iku ia ki he loto-hohaʻá mo e taʻepau fakaelotó.

Naʻe fakamatalaʻi ʻe ʻEletā Sēsili O. Samuelasoni e faikehekehe he vahaʻa ʻo e moʻui tāú mo e haohaoá: “ʻOku ʻikai ke ʻuhinga tatau ʻa e moʻui tāú mo e haohaoá! … ʻE lava ke tau taau lolotonga ʻoku kei fie maʻu pē ke tau fakalakalaka. … Ko kinautolu ʻoku moʻua he feinga ke haohaoá … ʻoku nau faingataʻaʻia mei he fakalahiʻi loi ʻenau ngaahi fehālaaki īkí, ngaahi vaivaí pe tōnounoú ʻo aʻu pē ki ha taimi mahalo ʻe ʻikai ke nau lava ʻo ngāue lelei. … ʻOku fie maʻu ke tau ʻiloʻi [hotau ngaahi vaivaí], ka ʻoku ʻikai ke tau vīkiviki ʻiate kinautolu pe fakatupulaki kinautolu” (“What Does It Mean to Be Perfect?” New Era, Jan. 2006, 10, 12).