Pedped ko an Jerbal in Karejar, O̧kwōj 2019

Imaron̄ Ke Jipan̄ Juon Armej Oktak?

Aaet. Bōtaab jerbal eo am̧ emaron̄ in oktak jān am̧ ļōmņak.

Liaona, O̧kwōj 2019

Jekar ejaak kōn maron̄ eo n̄an oktak. Eddōk m̧aanļo̧k n̄an kōjatdikdik ekwojarjar eo ad ej un eo an jeļā eo ad ilo mour in. Juon iaan kōttōpar ko ad reļļap tata ilo jerbal in karejar ej n̄an jipan̄ ro jet itok n̄an Kraist im kōm̧m̧ani oktak ko remenin aikuj n̄an jepļaak n̄an Im̧aan mejān. Ak kōnke kōn anemkwoj in kāālet eo aer, jerbal eo ad ilo jipan̄ er erom̧ āinwōt Kraist ej ewōr jon̄an,

Erkein rej jiljilimjuon katak ko rekajoor jān Rilo̧mo̧o̧r eo kōn ekōjkan ad maron̄ jipan̄ ro jet ilo kijejeto ko aer n̄an oktak im erom̧ āinwōt E.

Jab Mijak n̄an Karuwaineneiktok Oktak

Rilo̧mo̧o̧r eo eaar jab mijak n̄an kūr armej ro n̄an eļļo̧k jān wāween ko aer etto im kaorōk katak ko An. Eaar kūr Piter im Jemes n̄an joļo̧k jerbal ko aer im “ri eo̧n̄ad armej” (Mark 1:17). Eaar kūr kōrā eo eaar libobo kōn ļōn̄, “ilo̧k, im jab bar jero̧wiwi” (Jon 8:11). Eaar kūr likao eo em̧weie n̄an aji menin aorōk ko an men ko an laļ in im ļo̧o̧r E (lale Mark 10:17–22). Jemaron̄ barāinwōt jim̧or kajoor im iakwe ilo ad kūr ro jet n̄an kōm̧m̧ani oktak ko im ļoor Rilo̧mo̧o̧r eo.
Kemeemej Ej Aer Kāālet n̄an Oktak

Kain oktak eo Rilo̧mo̧o̧r eo ej kajjitōk kake ejjab maron̄ kipele. Rilo̧mo̧o̧r eaar katakin im kūr, bōtaap Eaar jab kipel. Likao eo em̧weiie eaar “ilo̧k ilo būrom̧ōj” (Matu19:22). Ilo Capernaum, elōn̄ iaan rikaļoor ro An raar kāālet n̄an “jepļaak,” im Eaar kajjitōk ippān Jon̄oulruo eo eļan̄n̄e raar kōņaan barāinwōt ilo̧k (lale Jon 6:66–67). Jet iaan rikaļoor ro an Jon Ripeptaij raar kāālet n̄an ļoor Rilo̧mo̧o̧r eo, ro jet raar jab (lale Jon 11:35–37; 10:40–42). Jemaron̄ kūr ro jet n̄an erom̧ āinwōt E, bōtaab jejjab maron̄ kōm̧m̧ani jokāālet eo n̄an oktak n̄an er. Im eļan̄n̄e rejjan̄in de kāālet n̄an oktak, jejjab aikuj ebbwer—ak aikuj en̄jake bwe jaar likjab.
Jar kōn Maron̄ eo an Ro Jet n̄an Oktak

Ilo Iien Jar eo An ilo Etad, Jisōs eaar kajjitōk ippān Anij bwe rikaļoor ro An ren kōjparok er jān nana, ren erom̧ ainwōt E im Jemen, im naaj kar obrak kōn iakwe eo an Anij (lale Jon 17:11, 21–23, 26). Im kōn an jeļā ke Pita enaaj aikuj kajoor ilo kijejeto ko an n̄an eddokļo̧k ilo jerbal eo an, Rilo̧mo̧o̧r eaar jar kōn e (lale Luke 22:32). Jar ko ad kōn ro jet remaron̄ kōm̧m̧ane juon oktak (lale Jemes 5:16).
Katakin Er n̄an Atartar ioon Kajoor eo An

Ej wōt kōn Rilo̧mo̧o̧r eo wōt jemaron̄ m̧ool in oktak im eddōk m̧aanļo̧k n̄an kōjatdikdik ekwojarjar eo ewōr ippād aolep. E ej “iaļ eo, m̧ool eo, im mour eo: ejjeļo̧k juon armej ej itok n̄an Jema, eļan̄n̄e ejjab kōn [E]” (Jon 14:6). Ej An kajoor me emaron̄ “kōm̧m̧an mennin m̧ōjņo̧ ko ren erom kajoor” (Ether 12:27). Ekar tōmak ilo kajoor in pinmuur eo An me eaar kōmaron̄ Alma eo Edik n̄an oktak (lale Alma 36:16–23). Jemaron̄ katakin ro jet n̄an atartar ioon Rilo̧mo̧o̧r eo bwe ren barāinwōt maron̄ bōk kajoor in karreo eo An ilo mour ko aer.
Kōm̧m̧an n̄an Er āinwōt Aer Maron̄ Erom

Iakwe im bōke remaron̄ in kareel ko me rej kōllowetak ko rekajoor an oktak. Kōrā eo ilo aibōj laļ eo eaar mour ippān juon emm̧aan eo ekar jab pāleen. Rikaļoor eo an Jisōs “raar būlōn̄ bwe eaar kōnono ippān kōrā eo” (Jon 4:27), ak Jisōs eļapļo̧k an kar kea kōn wōn eo liin enaaj kar erom. Eaar katakin liin im leļo̧k n̄an e iien eo em̧m̧an n̄an oktak, eo liin ekar. (Lale Jon 4:4–42.)

N̄e jej kōm̧m̧an an ro jet āinwōt aer kar ijello̧kin āinwōt aer maron̄ erom, jemaron̄ dāpij er. Ijello̧kin, jemaron̄ jeorļo̧k aer bōd im meļo̧kļo̧k bōd ko etto. Jemaron̄ tōmak bwe ro jet remaron̄ oktak. Jemaron̄ jab kalimjōk m̧ōjņo̧ ko im kwaļo̧k piktok ko rem̧m̧an me remaron̄ in jab maron̄ in loi kōn er make. “Ewōr ippād eddo in n̄an kalimjōk kajjojo āinwōt aer jab ak ilo aer maron̄ erom.”¹
Kōtļo̧k Aer Ilo̧k ilo Iiūm̧ eo Aer Make

Oktak ebōk iien. Aoleped aikuj “wōnm̧aanļo̧k ilo kijenmej m̧ae iien [ad] weppān (Katak im Bujen Ko 67:13). Jisōs eaar kijenmij ippān ro jet im wōnm̧aanļo̧k wōt n̄an katakin em̧ool ro raar jum̧ae E, kam̧ool kōn jerbal eo An kar leļo̧k n̄an E jān Jemen im uwaaki kajjitōk ko aer (lale Matu 12:1–13; Jon 7:28–29). Jemaron̄ kijenmej ippān ro jet im kōketak er bwe ren kijenmej ippāer make.
Jab Ebbweer Eļan̄n̄e Rej Jepļaak n̄an Jekjek ko Aer Etto

Ālkin an Kraist kar mej, jekdo̧o̧n Pita im jet iaan Rijilōk ro raar bar jepļaak n̄an ta eo raar iminene kake (lale Jon 21:3). Kraist eaar kakeememej Pita bwe ej aikuj in “naajdik [An] sip” (lale Jon 21:15–17), im Pita eaar jepļaak n̄an jerbal in karejar eo. Emaron̄ in lukkuun pidodo n̄an jepļaak n̄an wāween ko etto. Jemaron̄ wōnm̧aanļo̧k wōt n̄an rejtake kōn kōketak em̧m̧an im kūr ko reim̧we n̄an wōnm̧aanļo̧k wōt n̄an ļoor Rilo̧mo̧o̧r eo im kajjieon̄ n̄an erom̧ āinwōt E.

Kōtļo̧k an Ro Jet Eddōkļo̧k

Elder Jeffrey R. Holland jān Doulul eo an Jon̄oulruo Rijilōk ro ej kwaļo̧k bwebwenato in kōn kōtļo̧k an ro jet eddōk: “Kar jiron̄ eō juon iien kōn juon likao eo me ium̧win elōn̄ iiō ko eaar enan̄in aolep iien kar unin kōnono eo an aolep kōjak ilo jikuuļ eo an. Eaar wōr jet men ko elikjab ie, im eaar pidodo n̄an an ro m̧ōttan kajierer kake e. Tokālik ilo mour eo an eaar em̧m̧akūt ettoļo̧k. Āliktata eaar kobaļo̧k ilo army im eaar wōr jet an en̄jake ko rejeraam̧m̧an ijo ilo bōk jeļāļo̧kjeņ im em̧m̧akūtļo̧k jān mour eo an m̧okta. Ilōn̄ in aolep, āinwōt an lōn̄ ilo jarin tariņae kōm̧m̧ane, eaar lo aiboojoj im kabwilōn̄lōn̄ eo an Kabun̄ in im kar erom niknik im m̧ōņōnō ilowaan.

“Innām, ālkin jet iiō ko tokālkin, eaar jepļaakļo̧k n̄an bukwōn eo eaar rūttoļo̧k ie āinwōt juon jodikdik. Elōn̄ iaan epepen eo an raar em̧m̧akūtļo̧k ak ejjab aolep. Eo aorōktata, ke eaar jepļaakļo̧k ebwe an kar jeraam̧m̧an im oktak, ejja jekjek in kōļmenļo̧kjeņ eo wōt etto me eaar waļo̧k m̧okta eaar pād wōt ijo, kōttan an jepļaakļo̧k. N̄an armej ro ilo bukōn eo an, e elakkar ejja wōt ‘āt eo wōt-ilo-jikin eo wōt.’ …

“Āliktata kijejeto eo an em̧m̧aan in āinwōt eo an Paul n̄an likūt men eo epād ilik im jibadōk jinikjej eo me Anij eaar likūt im̧aan eaar jidik kōn jidik mājkunļo̧k m̧ae iien eo eaar mej kōn wāween eo eaar mour ke eaar jodikdik . … Ekanooj nana, ekanooj kabūrom̧ōjm̧ōj bwe eaar bar juon alen jepooļ jān … ro me raar ļōmņak mour eo an m̧okta eļapļo̧k an kaitoktok limo jān ilju im jekļaj eo an. Raar maron̄ in bōk jān jibadōk eo an me Kraist eaar jibwe n̄an e. Im eaar mej ilo an būruom̧ōj, kōnke kōn jidik an bōk make. …

“Kōtļo̧k bwe armej en ukweļo̧k Kōtļo̧k bwe armej en eddōkļo̧k. Tōmak bwe armej remaron̄ oktak im em̧m̧anļo̧k.”²

© 2019 jān Intellectual Reserve, Inc. Aolep jim̧we ko rej pād ippān. Kar jeje ilo USA. Kōmālim ilo kajin English: 6/18. Kōmālim an ukook: 6/18. Ukook eo an Ministering Principles, August 2019. Marshallese. 15769 874